নোর্থ ইস্ত ইনস্তিত্যুৎ ওফ সাইন্স এন্দ তেক্নোলোজী (এন.ই.আই.এস.তি.)গী জোর্হাৎ কেম্পসতা কোবিদ-১৯ তেস্তিং লেবোরেতরী অমা লিংখৎখ্রে‍। অসাম লৈঙাক্কী হকশেল অমসুং য়াইফ য়ুম্বাল, শেনথুম, মহৈ মশিং (হাইয়র, সেকেন্দরী অমসুং ইলিমেন্তরী), ত্রান্সফোর্মেসন এন্দ দেভেলপমেন্ত, পি.দব্লিউ.দি. মন্ত্রী দা: হিমন্ত বিস্বা সর্মনা লেবোরোতরী অদু শঙ্গাখি‍। সি.এস.আই.আর.তি.-এন.ই.আই.এস.তি. দিরেক্তর দা: জি. নরহরি সাস্ত্রীনা নিংশিংনিংঙাই ওইরবা থৌরম অদুবু সি.এস.আই.আর.তি.-এন.ই.আই.এস.তি.কী পুৱারীদা মরুওইবা তাঙ্কক অমনি হায়না ফোঙদোকখি‍।

এন.ই.আই.এস.তি.না অসামগী ওইনা তেস্তিং ফেসিলিতি হাংদোকপা অহানবা রিছর্চ এন্দ দেভেলপমেন্ত ইনস্তিত্যুৎ ওইখিববু থাগৎলদুনা দা: হিমন্ত বিস্বা সর্মনা ইনস্তিত্যুৎ অসিগী সাইন্তিস্তশিং অমসুং স্তাফশিংবু থৌরাং অসি পায়খৎপগীদমক হরাও তয়াম্বা ফোঙদোকখি‍।

দা: সাস্ত্রীনা হায়খিবদা ইনস্তিত্যুৎ অসিগী সাইন্তিস্ত ১০গী কাংবু অমনা ভাইরস অসিদগী আর.এন.এ. খায়দোকপদা মায়পুননা চঙশিল্লি অমদি অতোপ্পা স্তাফ মেম্বর ৪০না সপ্পোর্ত সিস্তেম ওইনা থবক তৌরি‍। ইনস্তিত্যুৎ অসিগী বাইওতেক্নোলোজী দিভিজননা আর.তি.-পি.সি.আর.-বেজ কোবিদ-১৯ চাংয়েং তৌবগী থবক্তা মরুওইবা থৌদাং য়ারি‍। মসিগী মথক্তা অসাম লৈঙাক অমদি জোর্হাৎকী দিস্ত্রিক এদমিনিস্ত্রেসননা ইনস্তিত্যুৎ অসিনা পায়খৎলিবা থৌরাংশিং অসিদা শরুক য়াশিন্দুনা মতেং পাংশিল্লি‍।

দা: হিমন্ত বিস্বা সর্মনা সি.এস.আই.আর. এন.ই.এস.তি.দা লৈবা কোবিদ-১৯ তেস্তিং লেবরেতরী ইনস্তিত্যুৎ অসিগী দিরেক্তর দা: জি. নরহরি সাস্ত্রীনা শরুক য়াদুনা শঙ্গারি‍

অসাম লৈঙাক্কী হকশেল অমদি য়াইফ-য়ুম্বাল লোয়শঙদগী মাইক্রোবাইওলোজিস্ত অমনা চাংয়েং তৌরিবশিং অসি সর্তিফাই তৌনবগীদমক ইনস্তিত্যুৎ অসিগী কোবিদ-১৯ তেস্তিং লেবোরেতরী অসিগা পুন্না চৎমিন্নরি‍। চাংয়েং তৌনবগীদমক সেম্পলশিং স্তেৎ লৈঙাক অমসুং জোর্হাৎকী দিস্ত্রিক এদমিনিস্ত্রেসনগা খুৎশম্নরগা লৌগদবনি‍। চাংয়েং তৌনবগীদমক ইনস্তিত্যুৎ অসিনা প্রোজেক্ত সাইন্তিস্ত অম অমসুং রিছর্চ স্কোলার অমা কন্ত্রেক্তা শীজিন্নরি‍।

দা: সর্মনা ইনস্তিত্যুৎ অসিগী সাইন্তিফিক প্রোগ্রামশিং, রিছর্চ, তোক্নোলোজী অমসুং পোত্থোকশিংসু য়েংখি‍। এন.ই.আই.এস.তি.না পেতেন্ত লৌরবা অমদি কম্মর্সিএলাইজ তৌরবা তেক্নোলোজীশিংগী মতাংদা খঙবদা মহাক্না নুংঙাইবা ফোঙদোকখি‍। কম্মর্সিএল ওইনা ওন্থোক্লবা পনবা য়াবা এচিভমেন্ত খরদি হর্বেল এন্তি-অর্থ্রাইতিস ওইন্তমেন্ত, এন্তি-ফঞ্জেল ওইন্তমেন্ত, এরোমেতিক পাম্বীশিংগী অনৌবা মখলশিংনি‍।

“মফমসিদা কোবিদ-১৯ তেস্তিং লেবোরেতরী লিংখৎপা হায়বসি মসিনা ভাইরস অসিনা চাইথোকখিদুনা কম্ম্যুনিতী ত্রান্সমিসনগী ফীভম লৌদ্রিঙৈদা চাংয়েং তৌবা, থিদোকপা অমদি খাইদোকপা হায়বসিনা মালেমগী ওইনা খ্বাইদগী কান্নবা অমদি মায় পাকপা লম্বী অমা ওইরিবনিনা ফীভমসিদা তঙাইফদবা অমা ওইরি‍। অসাম হৌজিক কম্ম্যুনিতী লেভেল ত্রান্সমিসনগী তাঙ্কক ওইরিবা স্তেজ ৩গী পল লানগদবগী ফীভমদা থরাক থরাক য়ান্দুনা লৈরি‍,” হায়না দা: সাস্ত্রীনা হায়খি‍।

ফীভম অসি ফগৎহন্নবা অমদি লাকশিন্নবগীদমক অমত্তা ঙাইরবা লম্বীদি মশীং য়াম্না চাংয়েং তৌবা অসিনি অমদি লাইচৎ অসি থেংননবগীদমক মীয়ামদা লৈরিবা ৱাখলগী থৌনা অসিনা অশাগী মঙাল ওইরি হায়না মহাক্না মখা তাখি‍। অদুগা নাকল অমরোমদনা ফীভম অসি ফংবা ঙম্বা হায়বসি মীওই খরখক্কী খুত্তা লৈরিবা অসিসু শিংনবা অমনি‍। মরম অসিনা সাইন্তিফিক কম্ম্যুনিতীগী খ্বাইদগী মরুওইবা থৌদাংদি ভাইরস অসি তান্নবা ফংননবা হেক ঙম্লিমখৈ চাংয়েং মশীং য়াম্না তৌবা অমদি লায়েংবা ঙমবা কান্নবা দ্রগ নৎত্রগা ভেক্সিন পুথোকপা হায়বসিনা ওইরি‍।

*****