শেল-থুম মন্ত্রালয়
শেল-থুম মন্ত্রীনা আধারদা য়ুম্ফম ওইবা ই.-কে.ৱাই.সি.গী থোংদা খুদক্তা পি.এ.এন. ফংহন্নবগী খুদোংচাবা হৌদোকখ্রে
Posted On:
28 MAY 2020 4:42PM by PIB Imphal
কেন্দ্রগী বজেত্তা লাওথোকখিবগী মওং অমা ওইনা ফাইনান্স অমসুং কোর্পোরেৎ এফেয়র্সকী কেন্দ্র মন্ত্রী শ্রীমতী নির্মলা সিতারমন্না ঙসি ন্যু দিল্লীদা খুদক্তা পি.এ.এন. (চাওরাক্না অশেংবা মতমগা মান্ননা) ফংহন্নবগী য়ানবগী খুদোংচাবা হৌদোকখ্রে। মসিগী খুদোংচাবা অসিদা আধারগী চৎনবা য়াবা নম্বর লৈরিবা অমসুং আধারগা লিঙ্ক তৌরবা মোবাইল নম্বর অমা লৈবা এপ্লিকান্তশিংগীদমক্তা হৌজিক ফংলে। ফংহন্নবগী থবক-থৌওং অসি চে চংদে অমসুং মমল তিংদনা ইলেক্ত্রোনিক্কী পি.এ.এন. অমা ফংহল্লি। মতম ইকুই-কুইদনা শেল-থুমগী মন্ত্রী শ্রীমতী নির্মলা সিতারমন্না খুদক্তা পি.এ.এন. ফংহন্নবগী খুদোংচাবা অসি কেন্দ্রগী বজেৎ, ২০২০দা লাওথোকখি হায়বা নিংশিংহনখি। বজেৎকী ৱাফমগী পেরা ১২৯দা, শেল-থুমগী মন্ত্রীনা ফোংদোকখি, “মমাংগী বজেত্তা, ঐহাক্না পি.এ.এন. অমসুং আধার ওন্থোক-ওনশিন তৌবা হৌদোকখি, মদুগীদমক্তা মথৌ তাবা চৎন-কাংলোনশিং অদু হান্ননা খংহনখ্রে। পি.এ.এন. ফংহনবা অদুগী থবক-থৌওং অদু লায়নবা য়াম্না থুনা ঐখোয়না এপ্লিকেসন্দা দিতেলশিং ফোর্ম মেনবগী মথৌ তাহন্দনা আধারদা লিঙ্ক তৌরগা পি.এ.এন. অদু খুদক্তা ফংহন্নবা সিস্তেম অমা হৌদোক্লগনি।”
আধারদা য়ুম্ফম ওইবা ই-কে.ৱাই.সি.দগী খুদক্তা পি.এ.এন. লৌথোকপগী খুদোংচাবা অসি নিংথিজবা মওংদা ঙসি হৌদোকখি, অদুম ওইনমক, চাংয়েং পাংথোকপা ওইনা মাগী ‘বিতা ভর্জন’ অদুদি ফেব ১২, ২০২০দা ইনকম তেক্স বিভাগকী ই-ফাইলিংগী ৱেবসাইত্তা হৌদোকখি। মদুগী মতমদুদগী মে ২৫, ২০২০ ফাওবা মথং-মথং মিনিত ১০মুক চং-চংনা খুদক্তা পি.এ.এন. ৬,৭৭,৬৮০ ফংহনখ্রে।
25.05.2020 ফাওবদা তেক্স পেয়রশিংদা পুন্না পি.এ.এন. ক্রোর ৫০.৫২ ফংহনখ্রে, মদুগী মনুংদগী ক্রোর ৪৯.৩৯ দি মী অমমমগী ওইনা ফংহনখি অমসুং হৌজিক ফাওবদা ক্রোর ৩২.১৭দগী হেনবনা আধারগা শম্নহনখি।
খুদক্তা পি.এ.এন. ফংহনবগী থৌওং অসি য়াম্না চম্মী। খুদক্তা পি.এ.এন. লৌথোক্কদবা এপ্লিকান্ত অদুনা মহাক্কী চৎনবা য়ারিবা আধার নম্বর ফংনবা ইনকম তেক্স বিভাগকী ই-ফাইলিং ৱেবসাইতকী মথৌ তাই অমসুং মাগী আধার রেজিস্তর তৌখিবা মোবাইল নম্বরদা ফংবা ও.তি.পি. অদু হাপচিনগদবনি। মায় পাক্না থৌওং অদু মপুং ফানা তৌরবা মতুংদা দিজিৎ-১৫ গী খংহন্নবগী নম্বর অমা থোরকই। মথৌ তারবদি, এপ্লিকান্ত অদুনা মাগী আধার নম্বর অদু হাপ্পগা মতম অমদা হেক্তা স্তেতস অদু য়েংবা য়াই অদুগা ফংনবগী থবক অদু মায় পাক্লবা মতমদা ই-পি.এ.এন. অদু দাউনলোদ তৌবা য়াই। করিগুম্বা আধারগা লিঙ্ক তৌনরবদি ই-পি.এ.এন. অদু মাগী ই-মেল আই.দি.দসু থারক্কনি।
খুদক্তা ই-পি.এ.এন. ফংহনবগী খুদোংচাবা অসি হৌজিকফাওবদা ইনকম তেক্স বিভাগনা দিজিতেল ইন্দিয়াগী ওইবা পাংথোকখিবা থবক্কী অতোপ্পা খোংথাং অমনি, তেক্সপেয়রশিংদা মখা তানা মপুং ফানবা থবক পাংথোকপদা লায়থোকহল্লি।
*****
(Release ID: 1627599)
Visitor Counter : 321