ভারতকী উপ রাস্ত্রপতি শ্রী এম ভেঙ্কয়া নাইদুনা ঙসি নীতি অয়োগ সি.ই.ও. শ্রী অমিতাব কান্ত, দ্রিঙ্কিং ৱাতর এন্দ সেনিতেসন সেক্রেতরী শ্রী পর্মেস্বরন ঐয়র, অমসুং ৱাতর রিসোর্সেস, রিভর দেবেলপমেন্ত এন্দ গঙ্গা রিজুবিনেসন সেক্রেতরী শ্রী য়ু.পি. সিংহগা মীফম পাঙথোক্তুনা আন্ধ্র প্রদেশকী নেল্লোর দিস্ত্রিক্কী ইকং থোক্কনবা উদয়গীরিগী থক্নবা অমদি ঈথৈ লৌখোংগী ঈশিং ফংহন্নবা লৌখৎপা য়াবা থৌরাংশিংগী মতাংদা খন্নখি‍। মফমদুগী মীয়াম্না থেংনরিবা খুদোংচাদবশিং উপ রাস্ত্রপতিনা মখোয়দা পাউদমখি‍।

ইকুই কুইদ্রিঙৈদা উপ রাস্ত্রপতি শ্রী ভেঙ্কয়া নাইদুনা ইং ১৯৭৮দা মহাক্কী অহানবা ওইনা এম.এল.এ. অমা ওইনা ভোত কারকখিবা মফম উদয়গীরি কনস্তিতুএন্সীগী মীয়ামদা ৱারা শানখি‍। মখোয়গী ফীভম হংবা মতমদা মখোয়না মফমদুগী লৈমায়গী ঈশিংগী চেং শাথিনা হন্থখিদুনা পুখ্রি, গুহাশিং কংনরে অমদি ৱাতর সপ্লাই স্কিমশিং মথৌ মপুং ফানা তৌবা ঙম্নদ্রে হায়না উপ রাস্ত্রপতিতা পাউদমখি‍। নোং মরাং কায়না চুদবা হন্দক্কা থারগা থংন-থংননা চহী ৭ শুরে হায়না মখোয়না উপ রাস্ত্রপতিতা পাউদমখি‍। মখোয় অয়াম্বনা শ্রী নাইদুদা কৃষ্ণ বেসিন নৎত্রগা সোমাসিলা প্রোজেক্ততগী ঈশিং পুরক্নবগী লম্বী থিবিয়ু হায়না হায়জখি‍।

ঙসিগী উপ রাস্ত্রপতিকা পুন্না খন্ন-নৈনবা অদুদা ওফিসিএলশিংদুনা অন্ধ্র প্রদেশ লৈঙাক্কী তানদুনা তোঙান তোঙানবা লম্বীশিং থিজিনগে অমদি খ্বাইদগী ফগদবা পাম্বৈ অমা পুথোক্নবা ৱাফম থমখি‍।

উপ রাস্ত্রপতিনা ৱাতর রিসোর্সেসকী সেক্রেতরীদা সেন্ত্রেল ৱাতর কম্মিসনগা খন্নদুনা তেক্নিকেলগী ওইবা ওইথোকপা য়াবশিং পুথোক্নবা পাউতাক পীখি‍। ৱাতর গ্রিদ প্রোজেক্তকী খুত্থাঙদা অমদি ঈশিংগী খুদোংচাদবা কোকহন্নবা দিতেল প্রোজেক্ত রিপোর্ত (দি.পি.আর.) অমদি স্তেৎ লৈঙাক্না লৌখৎলিবা তোঙান তোঙানবা থৌরাংশিংসু নৈননবা ফৈ হায়না মহাক্না মখা তাখি‍।

অহানবগী ওইনা য়েংশিল্লবা মতুংদা জল সক্তি মন্ত্রালয়, নীতি আয়োগ অমসুং সেন্ত্রেল ৱাতর কম্মিসনগী মকোক থোংবা ওফিসিএলগী কাংবু অমনা মফমদুদা চত্তুনা মফমদুদা থেংনরিবা ফীভমশিং খঙদোক্নবা অমদি পায়খৎবা য়াবা পাম্বৈ থৌরাংশিং পুথোক্নবা স্তেকহোল্দরশিংগা ৱারী ৱাতাই শাননবা ৱাফমসু উপ রাস্ত্রপতিনা থমখি‍।

****