কোরোনা লাইচৎনা মরম ওইদুনা থা ৫ লেপ্লুরবা মতুংদা লৈবাক শিনবা থুংবদগী খুৎহৈবশিংগী “এম্পাৱরমেন্ত এক্সচেঞ্জ” ওইরবা “হুনর হাত” সেপ্তেম্বর ২০২০দগী “লোকেলদগী গ্লোবেল” হায়বা ৱাখল্লোনদা অমদি খুৎহৈবা মশিং হেন্না শরুক য়াদুনা অমুক হৌরগনি‍।

মাইনোরিতী এফিয়র্সকী কেন্দ্র মন্ত্রী শ্রী মুখতার অব্বাস নকবীনা ঙসি মফমসিদা ফোঙদোকখিবদা, হৌখিবা চহী ৫সিদা         ইন্দিয়াগী খুৎহৈবশিং, থোং থাকপগী লমদা খঙহৈরবশিং অমসুং মখোয়গা লোয়নবা মীওই লাখ ৫রোমদা থবক পীরিবা অমদি থবক পীবগী খুদোংচাবা পীরিবা “হুনর হাত” ঙসিদি মীয়ামনা পাম্নবা হেনগৎলক্লি‍। লৈবাকসিগী মনুং হঞ্জিনবা মফমশিংদা লৈরিবা খুৎহৈবশিংদা কৈথেল অমদি খুদোংচাবশিং পীরিবা “হুনর হাত” লমদমসিগী খুৎনা শাবা পোত্থোকশিংগী অতাঙবা মমল লৈরবা ব্রান্দ অমা ওইবা ঙম্লে‍।

নীংশিংবা য়াবদি প্রধান মন্ত্রী শ্রী নরেন্দ্র মোদিনা ফেব্রুৱারী ২০২০দা নই দিল্লীগী ইন্দিয়া গেততা পাঙথোকখিবা “হুনর হাত”তা খঙহৌদনা লাক্তুনা খুৎহৈবশিংনা শাবা লমদমসিগী পোত্থোকশিংবু থাগৎলদুনা পুক্নীং থৌগৎলম্মী‍। খুৎহৈবশিং অমদি মখোয়গী পোত্থোকশিংবু “মন কি বাত” থৌরমদা থাগৎলদুনা প্রধান মন্ত্রী শ্রী মোদিনা ফোঙদোকখিবদা, “নুমিৎ খরনিগী মমাঙদা দিল্লীদা পাঙথোকপা হুনর হাতকী অপীকপা মফম অমদা ঐনা ঐখোয়গী লৈবাক অসিগী খেন্ননা শন্দোক্লিবা মফমশিং, নাৎ, চৎনবী, চান-থক্নবা পোৎলমশিং অমসুং পুক্নীং লুম্লবা ৱাখল্লোনশিংগী মচু মমেনশিং উবা ফংখি‍।  তশেংনা হায়রবদা নাৎকী ফিজোলশিং, খুৎনা শাবা পোৎলমশি, কার্পেৎ, কোল-লীকশিং, ৱাগী অমদি শেনজ্রেংগী পোত্থোকশিং, প্ঞ্জাবকী ফুলকারি, অন্ধ্র প্রদেশকী পুক্নীং হুরবা শউনগী পোত্থোকশিং, তামিল নাদুগী ফজরবা অয়েকপা লাইশিং, উত্তর প্রদেশকী শেনজ্রেংকী পোত্থোকশিং, কত্চকী পিথ্রাইগী পো্থোকশিং অমদি ভাদোহি কার্পেৎ, ঈশৈগী খুৎলায় কয়াগা লোয়ননা মশিং য়াম্লবা ৱারীশিংতনা লৈতেংলিবা পোত্থোকশিং; ইন্দিয়া পুম্বগী ওইবা কলা অমসুং নাৎকী ময়েক শেংলবা মচলশিং তশেংনমক তোপ তোপ্পী‍। খুৎহৈবশিংগী পুক্নীং অনি লোঙদনা হোৎনবা কনবা, মখোয়গী হৈজরিবা মহৈদা লৈরিবা নুংশিবা অমদি পুক্নীং লুপ্পগী ৱারীশিংসু চপ মান্ননা পুক্নীং থৌগিৎনীংঙাই ওই‍।

প্রধান মন্ত্রী শ্রী মোদিনা ফোঙদোকখি, “হুনর হাত অসি  তশেংনমক কলা অমদি খুৎশা হৈবগী উত্থোকফম ফম্পাক অমনি; মসিনা মীয়ামকী মঙলান কয়াবু পাইনবগী মশা পানবিরি‍। মসি লৈবাকসিগী খেন্নবা শক্তমবু নাথৈদুনা থমবা য়ারোইদবা মফম অমনি‍। খুৎশা হৈবগী মথক্তা মসিনা ইন্দিয়াগী খেন্নবা মখল কয়াগী চান-থক্নবগী পোৎলমশিংবুসু উৎলি‍। পরেং অমখক্তদা মীশক অমনা ইদ্লি-দোসা, ছোলে-ভাতুরে, দাল-বাতি, খমন-খান্দ্বিদা নত্তনা অতোপ্পা কয়া উবা ফংদবা লৈতে‍। ঐনা বিহারকী মহাও লৈরবা লিত্তি-চোখা পাম্না চাখি‍। ইন্দিয়া শিনবা থুংনা মসিগুম্লবা মেলা অমদি একজিবিসনশিং মতম মতমগী মতুংইন্না পাঙথোক্লি‍। মতম হেক ফংবা মতমদা কনাগুম্বাশিংনা মসিগুম্বা থৌরমশিং অসি ইন্দিয়াবু খঙননবা অমদি হকথেংননা থেংননবা য়াওগদবনি‍। অসুম্না তৌবনা নহাক্না লৈবাকসিগী কলা অমদি নাতকী ঈপাকসিগী শরুক অমা ওইবা ঙমহনবতা নত্তনা নহাক্না মথৌ কনবা খুৎহৈবশিং, মরুওইনা নুপীশিংগী চাউখৎলোন অমদি নুংঙাই য়াইফবগী লম্বী পুরকপদা শরুক য়াবা ঙমহনগনি‍।

লৈবাক শিনবা থুংনা থম্লিবা অথিংবা মতমসিবু শীজিন্নরদুনা খুৎহৈবশিংনা মখোয়গী তাঙলবা পোত্থোকশিং মশিং য়াম্না শেম শাদুনা লৈখি অমদি মথঙগী ‘হুনর হাত’তা য়োন্ননবা পুথোরক্কদৌরি হায়না শ্রী নকবীনা পাউদমখি‍।

“হুনর হাত” অসিদা সোসিএল দিস্তেন্সিং, সেনিইতাইজেসন অমসুং মায়খুম শোয়দনা শীজিন্নহন্নবা থৌরাং লৌখৎকনি হায়না শ্রী নকবীনা হায়খি‍। “সে নো তু পেনিক, য়েস তু প্রিকোসন্স” হায়বা ৱাখল্লোনদা য়ুম্ফম ওইদুনা মীয়ামদা হকশেলগী মরমদা ৱাখল তাহন্নবা “জান ভী, জহান ভী” কৌবা অখন্নবা পেভিলিয়ন অমসু য়াওগদৌরি‍।

মাইনোরিতী এফিয়র্স মন্ত্রালয়না লৈবাক শীনবা থুংনা মফম কয়াদা “হুনর হাত” দজন ২গী মথক্তা শীনখ্রে অমদি “হুনর হাত”শিংসিগী খুত্থাঙদা খুৎহৈবা লাখ কয়াদা থবক পীবগী অমদি থবক পীনবগী খুদোংচাবা কয়া পীবা ঙমখ্রে‍।

লাক্কদৌরিবা নুমিৎশিংদা চান্দিগর, দিল্লী, প্রয়াগরাজ, ভোপাল, জয়পুর, হায়দরবাদ, মুম্বাই, গুরুগ্রাম, বেঙ্গলুরু, চেন্নাই, কোলকতা, দেহরাদুন, পত্না, নাগপুর, রাইপুর, পুদুচেরী, অম্রিতসর, জম্মু, সিমলা, গোৱা, কোচি, গুৱাহাতি, ভুবনেস্বর, অজমের, অহমদবাদ, ইন্দোর, রাঞ্চি, লখনৌ অমদি অতৈ মফমশিংদা “হুনর হাত” পাঙথোক্কদৌরি‍।

হন্দক্তি মীয়াম্না “হুনর হাত”তগী পোত্থোকশিং দিজিতেল অমদি ওনলাইনগী খুত্থাঙদসু লৈবা য়ারগনি হায়না শ্রী নকবীনা ফোঙদোকখি‍। মাইনোরিতী এফিয়র্স মন্ত্রালয়না খুৎহৈবশিং অমদি মখোয়গী মশাগী ওইবা পোত্থোকশিং জি.ই.এম. (গভর্নমেন্ত ই মার্কেতপ্লেস)তা রেজিস্তর তৌবা হৌরে‍। এক্সপোর্ত প্রমোসন কাউন্সিল কয়ানা খুৎহৈবশিংসিগী খুৎনা শাবা লমদমসিগী পোত্থোকশিং মশিং য়াম্না মালেমগী কৈথেলদা য়ৌহন্নবা হৈনীংবা উৎলক্লে‍।

“হুনর হাত” অমুক হন্না পাঙথোক্লগনি হায়বসিদা লৈবাক শিনবা থুংবদগী খুৎহৈবা লাখ কয়ানা হরাউ তয়াম্বা ফোঙদোরক্লি‍ হায়না শ্রী নকবীনা হায়খি‍।

***