ইন্দিয়ন ইন্সতিত্যুত ওফ তেক্নোলোজী (আই.আই.তি.) গুৱাহতীগী থিজিনবগী থবক তৌরিবশিংনা অলঝৈমর লায়নানা মরম ওইদুনা মরক-মরক্তা ৱাখল মাংবা হন্থহন্নবদা মতেং পাংবা ঙম্বা ৱাখলদগী পুথোক্নদুনা শেম্বা ৱাখল্লোন অমা পুথোকখ্রে।

থিজিল্লিবা কাংবু অসি বাইওসাইন্সেস অমসুং বাইওইঞ্জিনীয়রিং বিভাগ, আই.আই.তি. গুৱাহতীগী প্রোফেসর প্রো. রামাকৃষ্ণনন অমদি ইলেক্ত্রিকেল অমসুং ইলেক্ত্রিকেল ইঞ্জিনীয়রিং বিভাগ, আই.আই.তি. গুৱাহতীগী প্রোফেসর প্রো. হর্শালনেমাদানা লুচিংখি। মখোয়না অলঝৈমরগী র্যুরোকেমিকেল প্রিন্সিপল নৈনখি অমসুং ঙৈহাক-ঙৈহাক ৱাখল মাংহনবগী লোয়নরিবা ব্রেন্দা ন্যুরোতোক্সিক ওইবা মোলিক্যুলশিং পৈশিল্লকপদগী ঙাকথোক্নবা অনৌবা লম্বী পুথোকখ্রে।  

আই.আই.তি.গুৱাহতীগী তীমনা লো ভোলতেজ ইলেক্ত্রিক ফীল্দ শিজিন্নবগুম্বা অমসুং ‘ত্রোজান পেপ্তাইদশিং’ শিজিন্নদুনা ব্রেন্দা ন্যুরোতোক্সিক মোলিক্যুলশিং পুনশিন্নরকপশিং ফাজিনবা য়াম্না খংনিংঙাই ওইহল্লিবা মেথদশিং রিপোর্ত তৌরক্লি। সাইন্তিস্তশিং অসি রিসর্চ স্কোলর দা. গৌরব পান্দে অমসুং শ্রী জাহনুসাইকিয়ানা মখোয়গী থবক্তা মতেং পাংই। মখোয়গী নৈনবশিং অদুগী ফল অদু এ.সি.এস. কেমিকেল ন্যুরোসাইন্স, আর.এস.সি. এদভান্স ওফ রোয়েল সোসাইতী ওফ কেমিস্ত্রী, বি.বি.এ. অমসুং ন্যুরোপোপ্তাইদসকুম্বা মমিং চৎলবা জর্নেলশিংদা ফোংলকখি।

অলঝৈমরগী লায়না অসি ফহন্নবা ভারত্তা শেমগৎখিবা অসিগী মরু ওই মরমদি চীনা অমসুং অমেরিকাগী মতুংদা মালেম অসিদা অলঝৈমর লায়না নাবা অসি অহুমশুবা খ্বাইদগী য়াম্বা মী মশিং অদু ভারত্তা লৈ, ভারত্তা মীওই মিলিয়ন ৪দগী হেন্না অলঝৈমরগা মরি লৈননা ৱাখল মাংবগী শারাক ওই। হৌজিক্কী লায়েংশিং অসিদা মাগী সিম্পতোম খরখক্তমক কোকহনবা হম্মি অদুবু নারক্লিবা অদুগী মনুংদা লৈরিবা মরমশিং অদুবুদি হৌজিকফাওবা লায়েংবা ঙমদ্রি। 

“১৯৯৮ অমসুং ২০১১গী মরক্তা ৱাফম অসি হকচিন্না লুবা অদু উৎপা অলঝৈমর লায়না ফগৎনবগী হীদাক ১০০রোম মায় পাকখিদ্রে” হায়না লায়না অসিবু ফহন্নবা মালেম শিন-থুংনা হোৎনবদা শরুক য়ারিবা দা. রামাকৃষ্ণন্না হায়খি।  

অলঝৈমরগী অরেপ্পা মওংদা ওইহল্লিবা হোলমার্ক অসি ব্রেন্দা এমাইলোদ বেতা পেপ্তাইদশিং তুংশিল্লকপদগীনি। দা. রামাকৃষ্ণ অমসুং দা. নেমাদেনা অলঝৈমরদা তুংশিনবশিং অসি ফাজিন্নবা পেপ্তাইদশিং অদু পৈশিল্লকপা হন্থহন্নবা মেথদশিং থীরি।  

২০১৯দা আি.আই.তি. গুৱাহতীগী সাইন্তিস্তশিংনা অলঝৈমরগী লায়না নাহন্দুনা ৱাখল মতেক-মতেক মাংহনবা হুগী ময়ায় চেল্লবা ন্যুরোদিজিনেরেতিব মোলিক্যুলশিং তুংশিনবা অদু লো-ভোলতেজ, শোক্নীংঙাই ওইদ্রবা ইলেক্ত্রিকেল ফীল্দ শিজিন্নদুনা হন্থহনবা য়াই হায়বসি থেংনখি। মপানথংবা ইলেক্রিক/মেগ্নেতিক ফীল্দনা পৈশিল্লকপা অসি ঙাকথোক্তুনা মসিগী পেপ্তাইদ মোলিক্যুলশিংগী স্ত্রকচর অসিবু নিংথিজবা মওংদা

“ইলেক্ত্রিক ফীল্দগা থেংনহনবদগী, ঐখোয়না শিংলি নাওরিগী সেলশিং অসি পুনশিন্নরক্কদবদগী ১৭-৩৫% ফাওবা হন্থহনবা ঙম্মি, মসিনা লায়না অসি নারকপদা চহী ১০ রোম থেংথহনগনি”, হায়না দা. রামাকৃষ্ণননা হায়খি।

হীরম অসিদা মখা তানা থবক তৌরদুনা সাইন্তিস্তশিংনা ‘ত্রোজান পেপ্তাইদ’শিং শিজিন্নদুনা ন্যুরোতোক্সিক মোলিক্যুলশিং পুনশিন্নরকপা ফাজিন্নবগী ওইথোকপা য়াবা অদু খংবা ঙমখি। ‘ত্রোজান পেপ্তাইদ’ শিজিন্নবগী ৱাখল্লোন অসি ‘ত্রোজান হোর্স’পু গ্রীকশিংনা ত্রোয়গী লানফমদা লৈথোক-লৈশিন তৌনবা পোৎশক অমা ওইনা শিজিন্নখিবদগী লাকপনি। থিজিল্লিবশিংনা এমাইলোইদ পেপ্তাইদশিং তুংশিল্লকপা, তোক্সিক ফাইব্রিলর চবুনশিং শেম্মকপদা ফাজিনবা অমসুং ৱাখল মাংহল্লক্লিবা শীংলি-নাওরিশিংদা হু চেনবা হন্থহন্নবা ‘লৌনম তৌবা’গা মান্নবা থৌওং পায়খত্তুনা ত্রোজান পেপ্তাইদকী দিজাইন তৌখি।  

“ঐখোয়গী থিজিন খোৎচিনবা অসিনা অলঝৈমরগী লায়না হৌরকপগী মতম থেংথহন্নবগী তোঙানবা লম্বী অমা পুথোরক্লে। অদুম ওইনমক, মসিদা অমসুং মীওইবদা লায়েংনবা পুথোরক্তিঙৈগী মমাংদা এনিমেলগী মোদেলদা অমসুং ক্লিনিকেলগী ওইবদা তেস্তিং তৌগনি” হায়না প্রোজেক কোওর্দিনেতর দা. রামাকৃষ্ণননা হায়খি।

****