প্রেতোলিয়ম অমদি নেচরেল গ্যাসকী অমসুং স্তীলগী কেন্দ্র মন্ত্রী শ্রী ধর্মেন্দ্র প্রধান্না ঙসি ৱেবিনারগী থোংদগী লৈবাক অসিগী পি.এম.ইয়ু.ৱাই.গী বেনিফিসিয়রী, গ্যাস য়েন্থোকপা মী অমসুং ও.এম.সি. ওফিসর ১৫০০গা ৱারী শান্নখ্রে।

প্রধান মন্ত্রী উজ্জ্বালা য়োজনা ( পি.এম.ইয়ু.ৱাই. ) অসিনা লায়রবা অমদি থওইবিদ্রবা ইমুং করোর ৮ হেনবগী মথক্তা মীওই কয়াগী পুন্সিবু মরুওইবা মওংদা লমজিংবীদুনা  মায় পাকপগী খোচৎ অসি  চপ-চানা চহি মরি মপুং ফারে হায়না শ্রী প্রধান্না হায়খি। মালেম অসিগী জাতি খুদিংমক  কোবিদ-১৯না চৈথেং ফংহল্লে অমসুং ইনাক খুল্লে হায়বা মী অমফাওবা লেম্না থারমদ্রে হায়না মন্ত্রীনা হায়খি। ইন্দিয়ানা পাম্বৈ কয়াদগী তমথিরবা লায়না অসি লান্থেংনরি। মতম অসিমক্তদা  লায়রবা অমসুং হন্থবা মীওই কাংলুপশিংগীদমক্তা চেকশিন-থৌরাংশিং লৌখৎখ্রে অমসুং অৱা-অনা কোকহন্নবা অমসুং  তেংবাং কয়া অমা লাওথোকখ্রে। থৌদোক অসি থোকপা হৌরকপা নুমীৎশিংদা মোদী সরকারনা প্রধান মন্ত্রী গরীব কলয়ান য়োজনা লাওথোকখ্রে অমসুং মরুওইবা মচাক অমা ওইনা পি.এম.ইয়ু.ৱাই.গী বেনিফিসিয়রীশিংদা থা ৩গী লেম্না গ্যাস ফংহনখ্রে হায়না মন্ত্রীনা হায়খি। মখোয়গী খুদোংচাবশিং ফংবদা ৱাদনবা দাইরেক বেনিফিৎ ত্রান্সফর(দি.বি.তি.)দগী মখোয়-মখোয়গী একাউন্ততা এদভান্স ওইনা লুপা করোর ৮৪৩২ হাপখ্রে। হৌজিক ফাওবদা পি.এম.ইয়ু.ৱাই.গী বেনিফিসিয়রী করোর ৬.২৮তা লেম্না গ্যাস সিলিন্দরশিং ফংহনখ্রে।

থৌদোক অসি থোক্লিঙৈগী অমসুং পীননবা তানশিল্লকপনা হেনজিল্লকপা মতমদা  পোত্থোক পুথোকপদা, এল.পি.জি. সিলিন্দরশিং পুশিল্লকপা অমসুং য়েন্থোকপদা য়েংশিন্দুনা থবক তৌহল্লিবশিং অসিগীদমক ও.এম.সি.ওফিসিএলশিংবু মন্ত্রীনা থাগৎখি।

অতোপ্পা লৈবাকশিংগা য়েংনবদা কোবিদ-১৯ থেংনবদা ইন্দিয়াগী থাক অসি খরা ফরি হায়না মহাক্না ফোংদোকখি।   মসিগীদমক্তা ঐখোয়না প্রধান মন্ত্রী অমসুং মহাক্কী থৌনা অমসুং অচুম্বা ৱারেপ অমসুং লৈবাক অসিগী মীশিংনা মহাকপু লুচিংবা অমা ওইনা খনবীদুনা থাজবা থমদুনা সোসিএল দিস্তেন্সিং, খুৎ হামদোকপা, মাস্ক শিজিন্নবা অমদি মথং-মথং কয়া অমা ইন্দুনা সরকারনা থোকপা ইন্সত্রকসনশিং অদুবু ইকাই খুম্নফম থোকই হায়না মহাক্না হায়খি।  লৈবাক অসিগী শেন্মীৎলোন অমসুং থবক-ইনখাংশিং অমুক হঞ্জিল্লক্নবা তৌবগী মতম ওইরে হায়না মহাক্না হায়খি। কোবিদ-১৯ লান্থেংনবদা ইন্দিয়াগী শেন্মীৎলোনবু শৌগৎনবা লুপা করোর লাক্ষ ২০গী পেকেজ পুরকপগীদমক মহাক্না প্রধান মন্ত্রী অমসুং শেল-থুগী মন্ত্রীবু  থাগৎখি।  শেন্মীৎলোনগী সেক্তর অমসুং খুন্নাই অসিগী সেগমেন্ত পুম্নমকপু পেকেজ অসিদগী তেংবাং ফংহল্লগনি। লৈবাক অসিদা ইরমদমগী ওইবা পোৎলমশিং শাদুনা ইশানা ইরোমদোম লেপচবা ঙম্ননবা লৈবাক অসিদা আত্মানির্ভরতা অভিয়ান হৌদোকপগীদমক্তা প্রধান মন্ত্রীবু মহাক্না তরাম্না ওকখি।

মসিগী মথংদা, পি.এম.ইয়ু.ৱাই.গী বেনিফিসিয়রীশিংনা মখোয়না খংউ-উরুবশিং অদু হায়খি। মমাংদা অমুক্তা থোকখিদ্রিবা থৌদোক অসিগী মতমদা মখোয়বু চেকশিন্না য়েংশিনবিবগীদমক মখোয়না সরকারবু থাগৎপা ফোংদোকখি।  মখোয় ময়ামগী মরক্তগী কয়া অমনা মখোয়না অহানবা মতমদা গ্যাস কন্নেক্সন তৌবদা মখোয় অসি কয়াম্মুক য়াম্না লায়ররম্বগে অমসুং গ্যাস সিলিন্দর অমা থৌরাং তৌবীদুনা মখোয়গী পুন্সি হোংহনখিবগে হায়বদু নিংশিংখি। মখোয়শিং অদুদগী কয়া অমনা মখোয়গী ময়ুমদা এল.পি.জি.সিলিন্দর ফংহনবীদুনা মখোয়গী পুন্সিনা অরাইবা মওংদা, হকচাং ফনা, অতেক-অকায় অমসুং অকি-অখং লৈহন্দবা খক্তা নত্তনা থাউ লৌবা চৎকনি হায়বগী হৈনিংদবা-তৌনিংদবা অদু কোকহন্দুনা অমসুং অহাংবা মতম ফজনা ফংহল্লে হায়না ফোংদেকখি। হৌজিকসু অতেনবা মতমদা অথনবা সিলিন্দরশিং ফংলি, লেপ্তনা সিলিন্দরশিং ফংহনবদা থবক তৌরিবা কোরোনাবু লান্থেংনরিবশিং মীওইশিংবু থাগৎপা ফোংদোকখি।

****