ପର୍ଯ୍ୟଟନ ମନ୍ତ୍ରଣାଳୟ ପକ୍ଷରୁ ‘ଦେଖୋ ଅପନା ଦେଶ’ ଶୃଙ୍ଖଳାର 18ତମ ୱେବିନାରରେ ଗତ 12 ତାରିଖରେ ଓଡ଼ିଶା ସମ୍ପର୍କରେ ଏକ କାର୍ଯ୍ୟକ୍ରମ ସ୍ଥାନ ପାଇଥିଲା । ଏହାର ନାମ ରଖାଯାଇଛି “ଓଡ଼ିଶା-ଇଣ୍ଡିଆସ ବେଷ୍ଟ କେପ୍ଟ ସିକ୍ରେଟ” ।

ଓଡ଼ିଶା ସରକାରଙ୍କ ପର୍ଯ୍ୟଟନ ସଚିବ ବିଶାଳ ଦେବ ଏଥିରେ ନିଜର ପ୍ରାରମ୍ଭିକ ସୂଚନା ପ୍ରଦାନ ପୂର୍ବକ ଓଡ଼ିଶାର ବିପୁଳ ପର୍ଯ୍ୟଟନ ସମ୍ଭାର ଓ ସାଂସ୍କୃତିକ ବୈଶିଷ୍ଟ୍ୟ ସମ୍ପର୍କରେ ସୂଚନା ଦେଇଥିଲେ । ଓଡ଼ିଶାର ପ୍ରାଚୀନ ସଭ୍ୟତା, କଳିଙ୍ଗ ସ୍ଥାପତ୍ୟ ଶୈଳୀ ପ୍ରସିଦ୍ଧ ମନ୍ଦିର, କମନୀୟ ବେଳାଭୂମିମାନ ଥିବା ରାଜ୍ୟର ସୁଦୀର୍ଘ ତଟରେଖା, କଳା, ହସ୍ତଶିଳ୍ପ, ସଂସ୍କୃତି, ଲୋକପ୍ରିୟ ନୃତ୍ୟକଳା ଯଥା ଓଡ଼ିଶୀ, ଗୋଟିପୁଅ, ରାଜ୍ୟର ଅରଣ୍ୟ ସମ୍ପଦ ଓ ଅନ୍ୟାନ୍ୟ ପ୍ରାକୃତିକ ବିଭବ ଆଦି ସମ୍ପର୍କରେ ସେ ଆଲୋକପାତ କରିଥିଲେ । ରାଜ୍ୟରେ ପରିବେଶ ପର୍ଯ୍ୟଟନକୁ ଅଧିକ ଲୋକପ୍ରିୟ କରିବା ପାଇଁ ବିଭିନ୍ନ ପ୍ରାକୃତିକ ପର୍ଯ୍ୟଟନସ୍ଥଳୀର ବିକାଶ ପାଇଁ ଗ୍ରହଣ କରାଯାଇଥିବା କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ ।

ଟ୍ରାଭେଲ ଲିଙ୍କ ପ୍ରାଇଭେଟ ଲିମିଟେଡର ପରିଚାଳନା ନିର୍ଦ୍ଦେଶକ ବେଞ୍ଜାମିନ ସାଇରନ, ବିରାସତ ଇ ହିନ୍ଦର ସହ ପ୍ରତିଷ୍ଠାତା ଜିତୁ ମିଶ୍ର କାର୍ଯ୍ୟକ୍ରମର ଉପସ୍ଥାପନା କରିଥିଲେ । ଓଡ଼ିଶା ପର୍ଯ୍ୟଟକମାନଙ୍କ ପାଇଁ ପ୍ରାଚୀନ କୀର୍ତ୍ତିରାଜି ଭଗ୍ନାବଶେଷ, ପ୍ରବାଦୀୟ ପୀଠ, ପ୍ରାଚୀନ ଜନଜାତି ଓ ସେମାନଙ୍କ ସଂସ୍କୃତି, ବୌଦ୍ଧ-ଐତିହ୍ୟ, କମନୀୟ ବେଳାଭୂମି ଓ ମୁହାଣ, ଆକର୍ଷଣୀୟ କ୍ୟାମ୍ପ ସାଇଟ, ଅପୂର୍ବ ସଂସ୍କୃତି, ହସ୍ତକଳା, ପର୍ବପର୍ବାଣୀ, ମେଳା, ଓ ଯାତ୍ରା ଆଦିର କିପରି ଏକ ଅମୂଲ୍ୟ ଗନ୍ତାଘର ତାହା ଉପସ୍ଥାପକ ବର୍ଣ୍ଣନା କରିଥିଲେ ।

ଏହି ୱେବିନାରରେ ଭର୍ଚ୍ଚୁଆଲ ଜିର୍ଣ୍ଣିଂ ବା ଆଭାସି ଯାତ୍ରା ମାଧ୍ୟମରେ ଅଂଶ ଗ୍ରହଣକାରୀମାନେ ଭିତରକନିକା ବନ୍ୟପ୍ରାଣୀ ଅଭୟାରଣ୍ୟ, ପକ୍ଷୀ ସମାଗମ ପାଇଁ ପ୍ରସିଦ୍ଧ ମଙ୍ଗଳାଯୋଡି, ଇରାୱଡି ଡଲଫିନ ପାଇଁ ପ୍ରସିଦ୍ଧ ଚିଲିକା ହ୍ରଦ ଓ ସାତପଡା, ଶିମିଳିପାଳ ଜାତୀୟ ଉଦ୍ୟାନ, ହୀରାକୁଦ ଜଳଭଣ୍ଡାରର ପରିବେଶ ପର୍ଯ୍ୟଟନ ସ୍ଥଳ, ଜଳପ୍ରପାତ, ନିସ୍ତବ୍ଧ ଉପତ୍ୟକାର ଗଣ୍ଡ, ଦାରିଙ୍ଗବାଡି ନେଚର କ୍ୟାମ୍ପ, ସାତକୋଶିଆ ଗଣ୍ଡ, ଭେଟନଇ, ସି-ବିଚ, ଓଡ଼ିଆ ଖାଦ୍ୟ, କଳାକୃତି, ବୟନ ଓ ବାନ୍ଧ କଳା, ନୃତ୍ୟ, ଉତ୍ସବ, ଯାତ୍ରା, ଉତ୍ସବ ଓ ଆଦିବାସୀ ସଂସ୍କୃତି ଏବଂ ଐତିହ୍ୟ ସମ୍ପର୍କରେ ବିଭିନ୍ନ କଥା ଜାଣିବାକୁ ପାଇଥିଲେ ।

ଏହି ୱେବିନାର ମାଧ୍ୟମରେ ଭାରତର ବିଭିନ୍ନ ରାଜ୍ୟର ପର୍ଯ୍ୟଟନ ସ୍ଥଳୀ, ଐତିହ୍ୟ, ସଂସ୍କୃତି, ଖାଦ୍ୟପେୟ, ଚଳଣି ଓ ସମୃଦ୍ଧ ଐତିହାସିକ, ସାଂସ୍କୃତିକ ପରମ୍ପରା ସମ୍ପର୍କରେ ପର୍ଯ୍ୟଟକମାନଙ୍କୁ ଅବଗତ କରାଇବା ପର୍ଯ୍ୟଟନ ମନ୍ତ୍ରଣାଳୟର ଉଦ୍ଦେଶ୍ୟ । ଏଥିରେ ଉଭୟ ଅଜ୍ଞାତ, ସ୍ୱଳ୍ପ ଅଜ୍ଞାତ ପର୍ଯ୍ୟଟନ ସ୍ଥଳଗୁଡିକ ଉପରେ ମଧ୍ୟ ଗୁରୁତ୍ୱ ଦିଆଯାଉଛି । ଯେଉଁମାନେ ଏହି ୱେବିନାର ଦେଖିବାର ସୁଯୋଗ ପାଇନାହାନ୍ତି ସେମାନେ https://www.youtube.com/channel ରୁ ଏହା ଦେଖିପାରିବେ ।

ୱେବିନାରର ପରବର୍ତ୍ତୀ ଅଧ୍ୟାୟ ଆସନ୍ତା ଗୁରୁବାର (ମେ 14) ଦିନ 11 ଘଣ୍ଟା ସମୟରେ ଆୟୋଜିତ ହେବ । ଏହାର ବିଷୟବସ୍ତୁ ହେଲା ‘Mysuru : Craft Caravan of Karnataka’ । ଅଂଶଗ୍ରହଣକାରୀମାନେ ଏଥିପାଇଁ https://bit.ly/MysuruDAD ରେ ପଞ୍ଜୀକରଣ କରିପାରିବେ ।

**************