বিশাখাপতনমদা গ্যাস য়ুরকপগী থৌদোক মতুংদা পায়খৎলিবা থবকশিংগী ফিবম য়েংশিন্নবা ঙসি অয়ুক প্রধান মন্ত্রী নরেন্দ্র মোদীনা লুচিংদুনা অৱাংবা থাক্কী মীফম অমা পাংথোকখ্রে। অশোক-অপন নংলবা মীওইশিং কন্নবা পায়খৎলিবা থবকশিং অমসুং থৌদোক অদুনা শোকহল্লবা মফম অদু চেকশিন্না শেন্ননবা পায়খৎলিবা থবকশিংগী মতাংদা মহাক্না খন্নখি। মীফম অদুদা ঙাকশেল মন্ত্রী রাজনাথ সিংহ, য়ুমলৈ-কৈরৈ মন্ত্রী অমিৎ সাহ, য়ুমলৈ-কৈরৈগী রাজ্য মন্ত্রী নিত্যানন্দ রাই অমসুং জি. কিসান রেদী অমসুং অতোপ্পা সেনিয়র ওফিসরশিং শরুক য়াখি।

থৌদোক অদুগী মতাংদা ঙসি অয়ুক অহানবা পাউ হেক ফংবগা, প্রধান মন্ত্রী অমসুং য়ুমলৈ-কৈরৈ মন্ত্রীনা আন্ধ্র প্রদেশকী সি.এম.গা ৱারী শানখি অমসুং ফিবম অদু লাকশিন্নবা কেন্দ্রদগী পীবা য়াবা দরকার ওইবা মতেং পীগনি হায়না থাজবা পীখি। ফিবম অদু মখোয়না মখা তানা অমসুং কুপ্না য়েংশিল্লি।

মীফম অসি হেক লোইবগা য়ুমলৈ-কৈরৈ, ইনভাইরনমেন্ত, ফোরেস্ত অমসুং ক্লাইমেৎ চেঞ্জ, কেমিকেল্স অমসুং পেত্রোকেমিকেল্স, ফর্মাস্যুতিকল্স, ইনফোরমেসন অমসুং ব্রোদকাস্তিং মন্ত্রালয়শিংগী সেক্রেতরীশিং; নেস্নেল দিজাস্তর মেনেজমেন্ত ওথোরিতী (এন.দি.এম.এ.)গী মেম্বরশিং অমসুং নেস্নেল দিজাস্তর রেসপোন্স ফোর্সকী দাইরেক্তর জেনেরেল; হেল্থ সর্বিসেসকী দাইরেক্তর জেনেরেল অমসুং এ.আই.আই.এম.এস.কী দিরেক্তর অমসুং অতোপ্পা মেদিকেলগী অখঙ-অহৈশিং শরুক য়াদুনা কেবিনেৎ সেক্রেতরীনা থৌদোক অদু অমুক হন্না য়েংশিনবগী মীফম অমা পাংথোকখি; ফিবম অসি লাকশিন্নবা পায়খৎকদবা অকক্নবা থবকশিং লেপথোকখি। মীফম অদুদা প্রধান মন্ত্রীগী প্রিন্সিপল সেক্রেতরীসু শরুক য়াখি।

হৌজিক ওইরিবা ফিবম অসিদা রাজ্য সরকারদা মতেং পাংনবা অমসুং গ্যাস য়ুরকপদগী ওইহল্লকপা অতেনবা অমসুং অশাংবা মতমগী মেদিকেলগী চৈথেং কোকহন্নবা পাম্বৈশিং লৌখৎনবা নেস্নেল ইনভাইরনমেন্তেল ইঞ্জিনীয়রিং রিসর্চ ইন্সতিত্যুৎ, নাগপুরগী অখঙ-অহৈ কাংবু অমগা লোয়ননা এন.দি.আর.এফ. পুনেগী সি.বি.আর.এন. (কেমিকেল, বাইওলোজিকেল, রেদিওলোজিকেল অমসুং ন্যুক্লিয়র) য়ুনিৎকী কাংবু অমা খুদক্তা বিশাখাপতনমদা চংশিনবা হায়না মীফম অদুদা ৱারেপ লৌখি।

বিশাখাপতনম জিলাগী গোপালপতনম মন্দলগী আর.আর. ভেনকতপুরম খুঙ্গংদা ঙসি অয়ুক অঙনবা পুং ৩দা কেমিকেল প্লান্ত অমদা স্তেরিন গ্যাস য়ুবগী থৌদোক থোকখিবনি। থৌদোক অদুদা অকোয়বদা লৈবা খুঙ্গংশিং হায়বদি নরভা, বি.সি. কোলোনী, বাপুজী নগর, কম্পালপলেম অমসুং কৃষ্ণ নাগর শোকহনখি। হু চেনবা স্তেরিন গ্যাসনা উন্সা, মিৎ নুংঙাইতবা থোকহনবা য়াই অমসুং নিংশা হোনবা নুংঙাইহন্দে অমসুং অতোপ্পা মেদিকেলগী খুদোংচাদবা কয়া থোকহল্লি।

রাজ্য সরকারদা মতেং পাংনবা খুদক্তা নেস্নেল দিজাস্তর রেসপোন্স ফোর্সকী কাংবু সি.বি.আর.এন.গী মীওইশিংগা লোয়ননা বিশাখাপতনমদা থমখ্রে। থৌদোক থোকফমগী অনকপদা লৈবা মীওইশিং খুদক্তা কনবগী থবকশিং এন.দি.আর.এফ.কী কাংবুনা পাংথোকখি। পুনেদগী এন.দি.আর.এফ.কী অখন্নবা সি.বি.আর.এন. য়ুনিৎ অমসুং নাগপুরদগী এন.ই.ই.আর.ই.গী অখঙ-অহৈশিং বিশাখাপতনমগীদমক থাদোকখ্রে। মসিগী মথক্ত, মফম অদুদা লৈরিবা মেদিকেলগী মীওইশিংদা হেল্থ সর্বিসেসকী দাইরেক্তর জেনেরেলনা অখন্নবা মেদিকেলগী পাউতাকশিং পীগনি।

গ্যাস য়ুখিবা মফম অদুদা লৈরিবা লন-থুমশিং, মসিগী চৈথেং, অশোকপশিংগী মরক্তা থেংনরিবা লাইওংশিং, ফার্স্ত-এদকী থবকশিং, চেকশিন-থৌরাংশিং, তৌগদবা অমসুং তৌরোইদবশিং মফম অসিগী খঙবা য়াগনি।

****