కొవిడ్‌-19పై పరిశోధనలు చేపట్టడానికి హైదరాబాద్‌లోని సెంటర్ ఫర్ సెల్యులర్ అండ్ మాలిక్యులర్ బయాలజీ (సీసీఎంబీ), బెంగళూరుకు చెందిన ఐస్టెమ్‌ రీసెర్చ్‌ ప్రైవేట్‌ లిమిటెడ్‌ సంస్థతో ఒప్పందం కుదుర్చుకుంది. మానవ కణజాలంలో కరోనా వైరస్‌ పెరిగేలా ఈ పరిశోధన సంస్థలు ప్రయత్నిస్తాయి. ప్రయోగశాలలో వైరస్‌ విరుగుడు ఔషధాలు, వాక్సిన్ల పరీక్షలకు ఇది ఉపయోగకరంగా మారుతుంది.

    యాంటీ కొవిడ్‌ స్క్రీనింగ్‌ (ఏసీఎస్‌) ఫ్లాట్‌ఫామ్‌లో భాగంగా, ఐస్టెమ్‌ సంస్థకు చెందిన మానవ ఊపిరితిత్తుల పైపొర కణజాల వృద్ధి వ్యవస్థను శాస్త్రవేత్తల బృందం ఉపయోగించుకుంటుంది. ప్రయోగశాలలో ఔషధాలను పరీక్షించడానికి సహేతుక ఆధారాన్ని ఏర్పాటు చేయాలనే ఉద్దేశంతో, వైరస్‌ పరమాణు నిర్మాణం, వ్యాధి లక్షణాలను ఆ బృందం అంచనా వేస్తుందని సీసీఎంబీ శాస్త్రవేత్తలు వెల్లడించారు.

    "మానవ శరీరం వెలుపల వైరస్‌ను పెంపొందించడం సాంకేతికపరమైన సవాలు. దానిని అధిగమించాలి. వైరస్‌ సోకి, వృద్ధి చెందడంలో ACE2 రెసిప్టర్‌, ఇతర జన్యువులు ముఖ్య నిర్ణాయకాలని ఐస్టెమ్‌ కణజాల వృద్ధి వ్యవస్థ వెల్లడించింది. ఊహించిన విధంగా వైరస్‌ వృద్ధి చెంది; ఔషధ పరీక్షలు, వ్యాక్సిన్ల అభివృద్ధి వ్యూహాలను రూపొందిచడానికి డా.కృష్ణన్‌ హసన్‌ నేతృత్వంలోని సీసీఎంబీ బృందానికి ఈ వ్యవస్థ సహకరిస్తుందని ఆశాభావంతో 
ఉన్నా"మని సీసీఎంబీ డైరెక్టర్‌ రాకేశ్‌ మిత్ర వెల్లడించారు.

    సెల్యులర్ మరియు మాలిక్యులర్ బయాలజీలో అత్యాధునిక పరిశోధనలు చేసే సీసీఎంబీ, కౌన్సిల్‌ ఆఫ్‌ సైంటిఫిక్‌ అండ్‌ ఇండస్ట్రియల్‌ రీసెర్చ్‌ (సీఎస్‌ఐఆర్‌)కు చెందిన ముఖ్య ప్రయోగశాల. ఐస్టెమ్‌ రీసెర్ట్‌ ప్రైవేట్‌ లిమిటెడ్‌, బెంగళూరుకు చెందిన సెంటర్‌ ఫర్‌ సెల్యూలర్‌ మరియు మాలెక్యులర్‌ ప్లాట్‌ఫామ్స్‌ (సీ-సీఏఎంపీ)కు చెందిన అంకుర సంస్థ. ఇది కణజాల వృద్ధికి సంబంధించిన పరిశోధనలు చేస్తుంది.

    కొవిడ్‌-19 ప్రయోగాలను సీసీఎంబీ విజయవంతంగా ముందుకు తీసుకెళుతుందని ఐస్టెమ్‌ సంస్థ సీఈవో డా.జోగిన్‌ దేశాయ్‌ ఆశాభావం వ్యక్తం చేశారు. ఏసీఎస్‌ ఫ్లాట్‌ఫామ్‌ను డా.రాజశ్రీ పాల్‌ అభివృద్ధి చేశారని, కణజాల వృద్ధి, వ్యాధి పరీక్షల్లో తమ సామర్థ్యానికి అది నిదర్శనమని అన్నారు. ఈ ప్రయోగాల ప్రయోజనాలను ప్రజలకు అందించేందుకు ఐస్టెమ్‌ పనిచేస్తున్నట్లు తెలిపారు.

(కీ వర్డ్స్‌
: కొవిడ్‌-19, సీఎస్‌ఐఆర్‌-సీసీఎంబీ, ఊపిరితిత్తుల పైపొర కణజాలం, కరోనా వైరస్‌ వృద్ధి, ఐస్టెమ్‌, డీబీటీ)