భారత రైల్వేలకు వెన్నెముక వంటి సిబ్బంది యోధులు ప్రపంచ మహమ్మారి వ్యాప్తి ఫలితంగా విధించిన జాతీయ దిగ్బంధం సమయాన్ని సద్వినియోగం చేసుకున్నారు. ఈ మేరకు రైల్వేశాఖ పరిధిలోని వివిధ జోన్లలో దీర్ఘకాలం నుంచీ పెండింగ్‌లో పడిన అనేక పనులను సకాలంలో పూర్తిచేశారు. ఇందులో భాగంగా అనేక సంవత్సరాలుగా పెండింగ్‌లో పడి, చిక్కులకు దారితీస్తున్న యార్డుల ఆధునికీకరణ, సిజర్స్‌ క్రాస్‌ఓవర్ల నవీకరణ, వంతెనల మరమ్మతులు వంటి నిర్వహణ కార్యకలాపాలను రైల్వే సిబ్బంది దిగ్విజయంగా పూర్తిచేశారు. ఒకవైపు దేశవ్యాప్తంగా ప్రజలకు నిత్యావసరాలు, వైద్య సామగ్రి కొరతలేకుండా సరఫరా శృంఖలానికి రైల్వేశాఖ పూర్తిస్థాయిలో చేయూత అందించింది. అదే సమయంలో రైళ్ల నిలిపివేత ఫలితంగా లభించిన సమయం, సౌలభ్యాలను ‘జీవితంలో ఓ సారి లభించిన సదవకాశం’గా పరిగణించి కాలాన్ని సద్వినియోగం చేసుకుంటూ చిక్కులకు దారితీస్తున్న లోటుపాట్లన్నిటినీ సరిదిద్దుకుంటూ వచ్చింది. ఇందులో భాగంగా అనేక వంతెనలు, క్రాస్‌-ఓవర్‌ మార్గాలు, గర్డర్ల మార్పు, కాంక్రీట్‌ నిర్మాణాల మరమ్మతులు, కొత్త ఏర్పాట్లు, యార్డుల ఆధునికీకరణ వగైరా పనులన్నిటినీ పూర్తిచేసింది. పనికిరాని రోడ్ ఓవర్‌ బ్రిడ్జిలను తొలగించి రహదారులను విశాలం చేసింది. సాధారణ రోజుల్లో ఈ పనులన్నీ చేయాల్సి వస్తే, రైలు-రహదారి మార్గాలన్నిటా రాకపోకలను నిత్యం కొన్ని గంటలవంతున కొన్ని రోజులపాటు పనులు చేయాల్సి వచ్చేది. ఇప్పుడు కరోనా వైరస్‌ మహమ్మారి కారణంగా వెసులుబాటు లభించడంతో అన్ని పనులూ సజావుగా పూర్తయ్యాయి.

*****