মমিং লৈরবা আর্কিওলোজিস্ত প্রোঃ বি.বি. লালগী চহী চাম শুরকপা কুমওন থৌরমদা ঙসি নই দিল্লীদা কেন্দ্রগী কলচর মন্ত্রী শ্রী প্রহ্লাদ সিংহ পতেলনা “প্রোঃ বি.বি. লাল – ইন্দিয়া রিদিস্কভর্দ” কৌবা ই-বুক অমা ফোঙখ্রে‍। কলচর মন্ত্রালয়গী সেক্রতরী শ্রী অনন্দ কুমারসু থৌরমদুদা শরুক য়াখি‍। প্রোঃ লাল উত্তর প্রদেশকী ঝান্সী দিস্ত্রিক্তকী মনুং চন্না লৈবা বাইদোরা খুলদা ইং ১৯২১গী মে ২দা পোকখি‍। লাইরিক অদু কলচর মন্ত্রালয়না প্রোঃ বি.বি. লাল সেন্তিনরী সেলেব্রেসন কম্মিতীগা খুৎশম্নদুনা শেম শাবা অখন্নবা খুৎনম্নি‍। লাইরিক অদু আরকইওলোজীগী লমদা মহাক্কী মমল য়াম্লবা থৌদাংগীদমক্তা কলচর মন্ত্রালয়না কৎপনি‍। অয়ুক্কী মতমদা কলচর মন্ত্রী শ্রী প্রহ্লাদ সিংহ পতেলনা প্রোঃ বি.বি. লালগী মনাক্তা চত্তুনা মহাক্কী মপোক নুমিৎকী য়াইফা ৱারোল পীখি অমদি ইকাই খুম্নবা উৎখি‍।

থৌরমদুদা ৱা ঙাঙলদুনা শ্রী পতেলনা হায়খি মদুদি প্রোঃ বি.বি. লাল অহিংবা লিজেন্দ অমনি অমদি মহাক্কুম্বা মীওই অমা লৈবা হায়বসি ভারতকী লাইবক ফবনি‍। প্রোঃ লাল মীখা পোল্লিঙৈ মতমদা ফুমদুনা লৈরুরবা ইন্দিয়গী সিবিলাইজেসন নৌনা পুথোরকখিবা ইন্দিয়ন আর্কিওলোজীগী মমল য়াম্লবা মনি অমনি হায়না মহাক্না হায়খি‍। মমা লৈবাক্কীদমক মপুন্সি চুপ্পা কত্থোক্তুনা লাক্লবা মমিং লৈরবা আর্কিওলোজিস্ত অসিগী চহী চাম শুবগী কুমওন থৌরম কলচর মন্ত্রালয়না পাঙথোকপা হায়বসি তশেংনা নুংঙাইবা ৱাফম অমনি হায়না মহাক্না মখা তাখি‍। প্রোঃ লাল অসি আর্কিওলোজিস্তশিংখক্তগী নত্তনা ইন্দিয়াগী মীপুম খুদিংমক্কী ওইনা পুক্নিং থৌগৎনীংঙাই ওইবা মীশক অমনি হায়না শ্রী পতেলনা হায়খি‍।

প্রোঃ বি.বি. লাল ইং ২০০০দা পদ্ম ভু্শন পীদুনা ইকাই খুম্নখি‍। মহাক আর্কিওলোজিকেল সর্ভে ওফ ইন্দিয়া (এ.এস.আই.)গী দিরেক্তর জেনেরেল ওইনা ইং ১৯৬৮তগী ১৯৭২ ফাওবা লৈরমই অমসুং ইন্দিয়ন ইনস্তিত্যুৎ ওফ এদভান্স স্তদিজ, সিম্লাগী দিরেক্তর ওইনসু লৈরমই‍। প্রোঃ লাল তোঙান তোঙানবা য়ুনেস্কো কম্মিতীশিংদসু  য়াওরমই‍। দিকেদ মঙাগী কেরিয়রদা প্রোঃ লালনা আর্কিওলোজীগী লমদা য়াম্না চাউনা থৌদাং য়ারমই‍। প্রোঃ লাল ইং ১৯৪৪দা তক্সিলাদা সার মোরতিমর হ্বীলরনা তাকপী তম্বীরকখিবনি অদুগা তুংদা আর্কিওলোজিকেল সর্ভে ওফ ইন্দিয়াদা য়াওরকখি‍। হস্তিনাপুর (য়ু.পি.), সিসুপালগর (ওরিশা), পুরানা কিলা (দিল্লী), কালিবঙ্গন (রাজস্থান) য়াওনা মরুওইবা লেন্দমার্ক মফম কয়া এক্সকাভেৎ তৌরম্মি‍। ইং ১৯৭৫-৭৬তগী হৌরগা প্রোঃ লালনা আর্কিওলোজী ওফ রমায়ন সাইৎশিংগী মখাদা অয়োধ্যা, ভারদ্বাজ আশ্রম, শ্রিঙ্গাভেরাপুরা, নন্দিগ্রাম অমসুং চিত্রকুৎনচিংবা মফমশিং থিজিল্লমই‍। প্রোঃ লালনা লাইরিক ২০ অমদি তোঙান তোঙানবা লৈবাকসিগী অমদি মালেমগী জর্নেলশিংদা থিজিন ৱারেং ১৫০ হেনবা ইখ্রে‍।

*****