প্রধান মন্ত্রী শ্রী নরেন্দ্র মোদীনা ঙসি ভিদিও মেসেজ অমদা, প্রভু বাস্বেশ্বরগী মপোক কুমোন, বাস্ব জয়েন্তীগী নুমিৎনা লাকপদা, প্রভু বাস্বেশ্বরগী মফমদা ইকাই খুম্নবা উৎখিবগা লোইননা লৈবাক মীয়ামদা য়াইফ-পাউজেল পীখ্রে।

বাস্ব জয়েন্তী অসি ১২শুবা চহী চাদা ফিলোসোফর অমসুং সোসিএল রিফোর্মর ওইরম্বা বিস্বগুরু বাস্বেশরবু ইকাই খুম্নবা উৎপা ওইনা চহী খুদিংগী পাঙথোকপা থৌরম অমনি।

গ্লোবেল বাস্ব জয়েন্তী- ২০২০ অসি ঙসি ভারত অমসুং মপান্দা লৈবা তুংইনবশিংগী মরক্তা দিজিতেলগী খুৎ-থাংদা পাঙথোক্লি।

প্রধান মন্ত্রীনা মহাক্কী পাউজেলদা, লৈবাক অসিনা কোরোনাভাইরস লাইচৎ অসিবু মাইথিবা পীনবগীমক প্রভু বাস্বেশ্বরগী মফমদা পাঙ্গল থৌনিজখি।

প্রধান মন্ত্রীনা, অশেংবা ভাচনাশিংবু লোল ২৩দা হন্দোকপবু ওইরো নত্ত্রগা লন্দন্দা বাস্বেশরগী মীতম হাংদোকখিববু ওইরো,  মমাংগী থৌদোক কয়াদা প্রভু বাস্বেশ্বরগী লমজিং লমতাক কয়াদগী তমজহৌনবগী খুদোংচাবা কয়াবু নৌহৌননা নীংশিংখি।

প্রভু বাস্বেশ্বরবু অফাওবা রিফোর্মর অমসুং মতিক লৈবা এদমিনিস্ত্রেতর অমা ওইনা শৈথারদুনা, প্রধান মন্ত্রীনা হায়খি, প্রভু বাস্বেশ্বরনা মীপুম খুদিংমকপু নত্ত্রগা সমাজ অসিবু মহাক্না পাম্বা মওংদা শেমদোক্নবা তাকপীখিবতা নত্তনা মহাক মশাগী পুন্সিদসু মহাক্না পামজবা লম্বী অদুমক চৎখি।

প্রভু বাস্বেশ্বরনা তাকপীরিবশিং অসি স্পিরিচুৱেল নোলেজগী হৌরকফম ওইবতা নত্তনা ঐখোয়গী পুন্সিদা চৎকদবা লম্বীশিংগী মৈরানি হায়না প্রধান মন্ত্রীনা ফোংদোকখি। মহাক্না তাকপীখিবশিংনা ঐখোয়বু হেন্না ফবা মীওইবা অমা ওইনবা, অমসুং ঐখোয়গী সমাজ অসি ৱাখল শানবা, মিনুংশিনা য়োম্বা অমসুং মীওইবা জাতিগী খনবা সমাজ অমা ওইনবা তাকপীরি। মহাক্না চহী চা কয়াগী মমাংদগী ঐখোয়গী সমাজ অসিবু সমস্যা কয়াদা অমসুং মান্নবা থাক পুরক্নবা লমজিংবীরক্লি।

প্রভু বাস্বেশ্বরনা সমাজ অসিগী অরোইবা শমজিন্নফম ওইনা লেপ্পীদুনা য়াম্না মরু ওইরিবা গনতন্ত্রগী মরু হুনবীরমই, অমসুং মীওইবগী হকশিংবু ৱাংনা থাংগৎপীরমই হায়না প্রধান মন্ত্রীনা ফোংদোকখি। বাস্ববনা মীওইবগী পুন্সিদা চংবা হীরম খুদিংমক থেংলমই, অমসুং মসিবু হেন্না ফগৎহন্নবা উপাইশিং পুথোকপীরমই হায়না মহাক্না মখা তাখি।

প্রধান মন্ত্রীনা ২০১৭তা ফোংদোকখিবা, বাস্ববনগী ভাচনাশিংবু দিজিতাইজ তৌনবগী থবকশিং খুমাং চাউশিন্না তৌরিবশিংবু পল্লদুনা প্রধান মন্ত্রীনা অপেনবা ফোংদোকখি।

বাস্ব সমিতীনা ঙসিগী থৌরম অসিবু মালেম শীনবা থুংনা দিজিতেলগী খুথাংদা পাংথোকপীবগীদমক থাগৎপা ফোংদোক্লদুনা, লোকদাউনগী চৎন-কাংলোনশিংবু ইন্না-ইন্না থৌরম পাংথোকপগী খ্বাইদগী মপুং ফারবা খুদম্নি হায়না প্রধান মন্ত্রীনা ফোংদোকখি।

প্রধান মন্ত্রীনা হায়খি, “ঙসিদি, ভারতকী মীয়াম পুম্নমক্না অহোংবা হায়বসি মখোয় মশাদগী হৌই হায়বসি খঙজরে। মসিগী থাজবসিনা লৈবাক অসিনা খুদোংথিবা কয়া মাইথিবা পীবদা মতেং পাংলে।” মহাক্না মসিগী আশা অমসুং থাজবগী  পাউজেল অসিবু মমাং থানা পুনবা অমসুং মপাঙ্গল কলহন্নবা ময়ামদা থম্লক্লি। মসিনা ঐখোয়বু হেন্না কন্না হোৎননীংবগী ইথিল পীবীরনি অমসুং ঐখোয়গী লৈবাক অসিবু অনৌবা অৱাংবা মফম অমদা থাংগৎপা ঙমহল্লনি হায়না মহাক্না মখা তাখি। মহাক্না প্রভু বাস্ববনগী থবকশিং অমসুং মহাক্কী ৱাখল্লোনশিংবু মালেম শীনবা থুংনা শন্দোক্তুনা হেন্না ফবা মালেম অমা ওইনবা তকশিনখি।

বাস্ব জয়েন্তীদা মীয়ামদা য়াইফ-পাউজেল পীরদুনা, সোসিএল দিস্তেন্স ঙাক্না চৎনবা “দো গজ দুরী”গী কাঙলোনবু ঙাক্না চৎনবা পুক্নিং চিংশিনখি।