ঐহাক্কী নুংশিজরবা ইরৈবাকচাশিং, খুরুমজরি। ময়াম পুম্নমক্না লোকদাউন মতমসিদা মন কী বাত তাবীরি। হন্দক্কী মন কী বাত অসিদদি হান্নদগী হেন্না সজেসন, ফোন কোলনচিংবা মশিং য়াম্না হেঙ্গৎলক্লি। হিরম কয়াগা লোয়ননা ময়ামগী থমোয়গী ৱাফম কয়া ঐগী ইনাক তম্না য়ৌরক্লি। ঐহাক্নাসু য়াম্না পানবা অমদি তানবসু হোৎনজৈ। অদোমগী ৱাফমশিংদগী মরী লৈনবা ৱাফম কয়াসু খঙবা ঙমজরি। মসি চরাংনবা মরকসিদা নীংশিংজরি। লানলক্তা পীজরিবা মন কী বাত অসিদা নুংগী ওইবা ৱাফম খরা লৈবাক মীয়ামদা শিন্নজগে।

মরূপশিং, তশেংনমক ভারত্তা কোরোনাগী মায়োক্তা থেংনরিবা লান অসি মীয়ামগনি। কোরোনাগী মায়োক্তা মীয়ামনা লান্থেংনরি, অদোমসু থেংনরি। মীয়ামগা লোয়ননা লৈঙাক্নসু লান্থেংনরি। ভারতগুম্বা চাউরবা লৈবাক, চাউখৎনবা হোৎনরিবা লৈবাক অসিনা লাইরবশিংগীসু য়াম্না চেকশিন্না লান্থেংনরি। মসিনা কোরোনাগা লান্থেংনবা অমদি মসিবু মায়থিবা পীবগী লালোং অমনি। ঙসি লৈবাক পুম্বনা লৈবাকসিগী নাগরিক পুম্বা, মীয়াম পুম্বা লৈবাক অসিগী লান্মী ঙাক্তনি, লান অসিবু লুচিংলিবা ঙাক্তনি। মসিগীদমক ঐখোয় লাইবক ফবা হায়বদু ওইরি। মায়কৈ অমদা হেক্তা য়েংবীয়ু, অদোম্না অদুম খঙবা ঙমগনি মদুদি ভারতকী লাঞ্জং অসি মীয়ামগীনি। মালেম পুম্বা লাইচৎ অসিগী অৱাবা মায়োক্নরি, তুংগী মীরোলনা মসিগী মরমদা নৈনরকপদা ভারতকী মীয়ামগী খোঙজং অসিগী মতাংদা শোইদনা নৈনরক্কনি হায়বা অসি ঐহাক্কী থাজবনি। লৈবাক পুম্বদা লৈরক কোনসাং শিনবা থুংনা, মফম মফম খুদিংদা মী অমনা অমগী মতেং পাংনবগীদমক চোংথোক্নরক্লি। লাইরবশিংগী চানবদগী হৌরগা চিঞ্জাক্কী শিল লাংবা, লোকদাউন ঙাকপা, হোস্পিতালশিংগী এরেঞ্জমেন্ত, মেদিকেল ইক্বুইপমেন্তনচিংবা লৈবাকসিদা শেম শাবনচিংবদা লৈবাক পুম্বা মায়কৈ অমত্তদা পান্দম অমতংদা পুন্না চৎমিন্নরি। খুবাক খুবা, পুখম থিনবা, কেগাম থাউমৈ, মোম্বতীনচিংবনা পোকহনখিবা ৱাখলোন্দুনা ইরৈবাকচাশিংনা করিগুম্বা অমা নত্ত্রগা অমা পাংথোক্নিংবগী ৱাল্লোন পোকখি। শহরবু ওইরে, খুঙ্গংবু ওইরে মফম খুদিংদা লৈবাক পুম্বদা অচৌবা জগ্য অমা পাংথোকপগুম তৌরি। মসিদা মীপুম খুদিংনা মশা-মশাগী ওইবা থৌদাং পাংথোক্নবা হোৎনরি। ঐখোয়গী লৌমী ইচিল-ইনাও অমদি ইচল-ইচেশিংদা য়েংলসি, অসিগুম্লবা অকিবা ফংলবা লাইচৎ অসিদা কনা অমত্তা চরা হেন্দনবা হোৎনরি। মীপুম খুদিং মাগী মাগী তোবা ঙম্বা থাক্তা লান অসি মায়োক্নরি। কনাগুম্বনা কাগী ভরা কোকপীরি, কনাগুম্বনা মাগী পেন্সন নত্ত্রগা মানা ফংলকপা শেনফমদু পি.এম. কেয়র্স ফন্দদা দান তৌরক্লি। কনানা ইঙ্খোলগী এনসাং নাপী পুম্বা দান তৌরি অদুগা কনানা নুমিৎ  খুদিংগী লাইরবা চা কয়াবু লেম্না চাক পীজরি। কনানা মাস্ক তুরী অদুগা অদুগা কনানা ক্বরেন্তাইন তৌবগী মখোয়না লৈরিবা স্কুলগী ফকলাংদু পেন্তিং তৌদুনা শেমজিল্লি।

 মরূপশিং, অতোপ্পগী মতেং পাংনবগীমক অদোমগী থমোয়দা ৱাখল পোক্লিদনা, মদুনি ভারতনা কোরোনাগী মায়োক্তা লান্থেংনবগী খ্বাইদগী চাউবা পাঙ্গল ওইরিবসি। মসিমক্না লাঞ্জং অসি মীয়ামগী লাঞ্জং ওইহনলিবনি। হৌখিবা চহি খরদগী ঐখোয়গী লৈবাক্তা মসি চৎনবী মা ওইনা লাক্লি লোয়ননা মরা চৎলক্লি। মীওই কোতি কয়ানা গ্যাস সবসিদী থাদোকপা, সেনিয়র সিতিজন লাখ কয়ানা রেলৱে সবসিদী থাদোকপা, স্বচ্ছ ভারত খোংজংগী লুচিংবা ওইবা, তোইলেৎ শাবা অসিনচিংবা মশিং থিঙমদ্রবা ৱাফম কয়া, ৱাফমশিং অসিনা ঐখোয় পুম্মকপু অমত্তা ওইনা অতিংবা লংলা অমনা লেংলি। অমত্তা ওইনা পুন্দুনা লৈবাক্কীদমক করিগুম্বা খরা তৌনীংবগী ৱখল্লোনগা লোয়ননা।

ঐগা নুংশিজরবা ইরৈবাকচাশিং, ঐহাক্না য়াম্না নোলুক্না ইকায় খুম্নজবগা লোয়ননা ইরৈবাকচা কোতি ১৩০গী ৱাখল্লোন অসিবু কোক নোন্না খুরুমজরি। অদোম-অদোমগী ৱাখল্লোনগী মতুং ইন্না লৈবাক্কীদমক মশাগী অপা্বগী মতুং ইন্না, ইশাগী মতমগী মতুং ইন্না করিগুম্বা খরা তৌনবগীদমক্তা সরকারনা দিজিতেল প্লেৎফোর্ম অমা শেম্লে মদুদি covidwarriors.gov.in  অমুক্কা হন্না হায়জগে covidwarriors.gov.in অসিনি। প্লেৎফোর্ম অসিগী মতেংনা সরকারনা সিভিল সোসাইতী ওর্গনাইজেসনশিংগী ভোলুন্তীয়র, সিভিল সোসাইতীগী মীহুৎশিং অমসুং লোকেল এদনৃমিনিস্ত্রেসনবু অমগা অমগা পাউ ফাউনহল্লি। তেনখ্রবা মতমগী মনুংদা পোর্তেল অসিনা মীওই কোতি অমগা লাখ কুনমঙা পুন্সিলহল্লে। মসিদা দোক্তর, নর্সতগী হৌরগা আশা. এ.এন.এম. ৱার্করশিং, এন.সি.সি. অমদি এন.এস.এস.কী মরূপশিং, তোঙান-তোঙানবা লমদা লৈবা প্রেফেস্নেলশিংনা প্লেৎফোর্ম অসিবু মখোয়গী প্লেৎফোর্ম ওইনা শিজিন্নররে। মখোয়না গ্রাউন্দ লেবেলদা ক্রাইসিস মেনেজমেন্ত প্লান শেম্বদা অমসুং মসিবু মপুং ফাহনবদা মতেং য়াম্না পাংলি। অদোমসু covidwarriors.gov.inদা খুৎশম্নরগা লৈবাক্কী সেবা তৌবা য়াই, কোবিদ ৱারিয়র ওইবা য়াই।

মরূপশিং, খুদোংথিবা থৌদোক, লান খুদিংমক্না করিগুম্বা পরা অমদি অদুম তম্বী। ওইথোকপা য়াবা লম্বেল শেম্মি, অনৌবা পন্থুং কয়াগী মায়কৈসু তাকই। অসিগুম্বা ফিভম অসিদা লৈবাক মীয়াম পুম্বনা অরেপ্পা শক্তি উৎপীরি। মসিনা ভারত্তা অচৌবা অহোংবা অমা লাক্লিবনি। ঐোয়গী বিজিনেস, ওফিস, মহৈতমফমশংশিং, মেদিকেল সেক্তর পুম্বা অনৌবা অহোংবা অমদা য়াম্না য়াংনা চেন্সিল্লি। তেক্নোলোজীগী মায়কৈদা য়েংলুরবসু লৈবাকসিগী অনৌবা পুথোকপা কয়া ফিভমগী মতুং ইন্না অনৌ-অনৌবা পোৎ কয়া পুথোরকই।

মরূপশিং, লৈবাক অসিনা তিম অমা ওইনা থবক তৌবগী নুংঙাইবসু থবক্তু পাংথোক্লবতদা খঙবা ঙমই। ঙসি কেন্দ্র সরকার, রাজ্য সরকার, খোয়গী দিপার্তমেন্ত খুদিং, ওর্গনাইজেসন খুদিং রিলিফকীদমক্তা অমত্তা ওইনা খোংজেল য়াংনা থবক তৌমিন্নরি। ঐখোয়গী এভিয়েসন সেক্তরদা থবক তৌরিবা মীওইশিং, রেলৱেগী থবক তৌরিবা মীওইশিংসু লৈবাক মীয়ামগী খুদোং চাদবা থোক্তনবগীদমক অহিং-নুংথিল নায়দনা কন্না হোৎনরি। অদোমসু খঙবীরম্লগনি, লৈবাক্কী মফম খুদিংদা হিদাক লাংথক ফংহন্নবগীদমক লাইফলাইন উরান হায়বা থোইদোকপা খোংজং অমসু চত্থরি। মরূপশিং মসিনা তেনখ্রবা মতমসিদা লৈবাক শিনবা থুংনা কিলোমীতর লাখ ৩ অতিয়াদা পাইরি লোয়ননা তন চামঙাদগী হেনবা হিদাক লাংথক কয়া লৈবাক্কী মফম শিনবা থুংনা য়ৌহল্লি। মতৌ অসুম্না রেলৱেগী মরূশিংনা লোকদাউনগী মতমসিদসু লৈবাক মীয়ামদা পোৎ ফংহন্নবগীদমক্তা, পোৎ-চৈ ৱাৎহন্দনবগীদমক্তা কন্না হোৎনরি।

মসিগীদমক্তা ইন্দিয়ান রেলৱেনা চাউরবা রেল লম্বী ৬০দা পার্সেল ত্রেন ১০০ হেন্না চেলহল্লি। মতৌ অসুম্না হিদাক লাংথক্কী মতাংদসু ঐখোয়গী পো্স্তেল দিপার্তমেন্তনা অচৌবা থৌদাং লৌরি। তশেংনমক মখোয়শিং অসি, ঐখোয়গী মরূশিং অসি অশেংবা কোরোনা ৱারিয়র ঙাক্তনি।

মরূপশিং, প্রধান মন্ত্রী গরীব কল্যান পেকেজকী খুত্থাংদা লাইরবশিংগী একাউন্তদা পৈশা দাইরেক্ত ত্রান্সফর তৌরি। ওল্দ এজ পেন্সনসু পীখ্রে। লাইরবশিংদা থা অহুমগী ওইনা গ্যাস সীলিন্দর, চিঞ্জাকনচিংবা লেম্না ফংহনবগী খুদোংচাবসু পীরি। থবকশিং অসিদা সরকারগী তোঙান-তোঙানবা বিভাগকী মীওইশিং, বেঙ্কিং সেক্তরগী মীওইশিং পুন্না তিম অমত্তা ওইনা অহিং নুংথিল খায়দনা থবক তৌরি, লোয়ননা ঐহাক্না লৈবাক অসিগী রাজ্য সরকারশিংনা লাইচৎ অসিবু থেংননবগীদমক্তা অকনবা থৌদাং য়াবগীদমক থাগৎপা ফোংদোকচরি।

ঐহাক্কী নুংশিজরবা ইরৈবাকচাশিং, লৈবাক অসিগী হকশেল সেবাদা শরুক য়ারিবা মীওইশিংনা হন্দক্তা লাউথোকখিবা ওর্দিনান্স অদুদা নুংঙাইবা ফোংদোকখি। ওর্দিনান্স অসিদা কোরোনা ৱারিয়রশিংদা ক্রাইম তৌবা, ওৎপা, শোকহনবা তৌরবদি অকনবা দন্দি পীগনি হায়খ্রে। কোরোনা ফ্রী ওইনবগীদমক অহিং নুংথিল খায়দনা থবক তৌরিবা ঐখোয়গী দোক্তর, নর্স, পেরামেদিকেল স্তাফ, কম্ম্যুনিতী হেল্থ ৱার্করশিংবু ঙাক শেন্নবগীমক্তা খোংথাং অসি তঙায় ফদনা লৌখৎপনি।

ঐহাক্কী নুংশিজরবা ইরৈবাকচাশিং, লাইচৎ অসিগী মায়োক্তা লান্থেংনরিঙৈ মরক অসিদা ঐখোয়না ঐখোয়গী পুন্সিবু, সমাজপু অমদি ঐখোয়গী অকোয়বদা থোক্লিবা থৌদোক ৱাথোক কয়াবু অনৌবা মীৎয়েংদা য়েংবগী খুদোংচাবসু ফংলি। সমাজকী মীৎয়েংদসু অচৌবা অহোংবা অমা লাক্লি। ঙসিদি ঐখোয়গী পুন্সিদা পুন্সিগা মরী লৈনরিবা মীওইশিংগী ফংফম অমদি তঙায়ফদবদু খঙবা ঙম্লে। ঐখোয়গী য়ুমশিংদা থবক শুরিবা মীওইশিং ঐখোয়গী তঙায় ফদ্রবশিংবু ফংহনবদা মতেং পাংলিবা অচম্বা মীওইশিং, লৈকায়গী দুকান্দা থবক তৌরিবা মীওইশিং পুম্নমক্কী থৌদাংসি কয়াদা চাউখ্রবনো হায়বদু খঙবা ঙম্লে। মতৌ অসুম্না তঙায় ফদবা থবকশিংদা দেলিবরী তৌরিবা মীওইশিং, কৈথেলদা থবক শুরিবা শিন্মী ইচিল-ইনাও ইচল-ইচেশিং, অনকপদা লৈবা ওতো থৌবশিং, রিক্সা থৌবশিং মখোয় য়াওদনদি ঐখোয়গী পুন্সিসে কয়াদা ৱাখ্রবনো হায়বা ঐখোয় খঙবা ঙম্লে।

মরূশিং, ঐখোয়না তোয়না তাবা ৱাহৈ অহুম লৈ- নেচর, পরবর্সিয়ন অমসুং কলচর। ৱাহৈশিং অসিবু পুন্না অমুক্তং য়েংলগা মসিগী নুংগী ৱাখল্লোনদু য়েংলবদি অদোম্না পুন্সিবু মশক খঙনবগী থোংজাও হাংবদু উগনি। ঐখোয়না মীওইবগী নেচরগী মরমদা নৈনবদা মসি ঐগীনি, ঐনা মসি শিজিন্নবনি, মসিদা ৱাখল্লোন অসি য়াম্না সাধারন ওই, মসিদা কনা অমত্তনা শাউনদে, মসিবু ঐখোয়না নেচর হায়না কৌই।

অদুবু ঐগী নত্তবা, মসিদা ঐগা হক লৈতবা অদুবু ঐনা মীঙোন্দগী মুন্দুনা লৌবা অদুগী লুন্দুনা লৌরগা শিজিন্নবা মসিবু ঐখোয়না দিফোর্মেসন হায়না খঙনৈ। অনিমকসি নত্তবা মসিগী মথক্তা য়াম্না চাউখৎপা ৱাখল্লোন লৈবা অমদি নোলুকপা ওইবা অদুদা কলচর উবা ফংই। কনাগুম্বা অমনা মহাক্কী ফংফম থোকপা পোৎ, মানা শুজ নোমজদুনা ফংলকপা পোৎ, মাগীদমক্তা দরকার ওইবা পোৎ, য়াম্বু য়াম্লবসু য়া্বু য়ামদ্রবসু, অতোপ্পগী তঙায় ফদবদু উদুনা মশাগী খন্না মীঙোন্দা য়েন্থোকপা পীথোকপা অদুবু কলচর কৌই।

মরূপশিং অৱাবা মতম্না লাক্লবদি অসিগুম্বা গুনশিং অসিগী চাংয়েং তৌরকই। হৌখিবা নুমিৎ  খরনি অসিদা ভারতনা মশাগা চৎন লোনচৎ অমদি ৱাখল্লোন অমসুং সংস্কৃতিগী মতুং ইন্না ৱারেপ খরা লৌখ্রে। খুদোং থিরবা তাঙ্কক অসিদা মালেম অসিগী ওইনা চাউখৎলবা লৈবাকশিংসু য়াওনা হিদাক্কীদমক য়াম্না ৱানৈ। তাঞ্জা অসিদা ভারতনা ময়ামদা হিদাক পীদ্রবসু কনামত্তনা ভারতপু ৱারৌবা ঙম্লোই। লৈবাক পুম্নমক্না খঙই ভারতকী ওইনসু মাগী প্রজাগী পুন্সি কনবনা অহানবা থৌদাংনি। অদুম ওইনমক ভারতনা মাগী চৎন লোনচৎ তুংইন্না ৱারেপ লৌরি। ঐখোয়না ভারতকী দরকার লৈবশিংগীদমক হোৎনবা য়াবা হোৎনবগা লোয়ননা মালেম পুম্বদগী মীওইবগী থৱায় কন্ননবগীদমক হায়জরকপশিংগীসু খনখি। ঐখোয়না মালেম অসিগী দরকার লৈবা খুদিংমক্তা হিদাক য়ৌহন্নবা হোৎনদুনা মীওইবা খুনাইগীদমক থবক অসি পাংথোকখি। অতোপ্পা লৈবাক্কী লুচিংবশিংগা ফোন্দা ৱারী শানবা মতমদা মখোয়না ভারতকী প্রজাশিংদা ইকায় খুম্নবা ফোংদোরকই।

মরূপশিং, কোবিদ-১৯না মরম ওইরগা ঐখোয়গী থবক তৌবগী মওং, ঐখোয়গী পুন্সি মহিং অমসুং ঐখোয়গী হৈনবিদা অহোংবা কয়া লৈরে। ময়াম্নসু থোইদোক্না থেংনবীরিবা খঙবীরবনি। খুদোংথিবা অসিদগী ঐখোয়না তোঙান-তোঙানবা হিরম কয়া খঙবা হেঙ্গৎলে। ঐখোয়না অকোয়বদা লৈরিবা হৌজিক উবা ফংবা অহোংবা অসি মাস্ক উপ্পা অমসুং মায় খুমজিনবা অসিনি। কোরোনানা মরম ওইরগা লাকপা অহোংবদা মাস্ক অসি ঐখোয়গী পুন্সিগী শরুক অমা ওইরে। ঐখোয়গী অকোয়বদা মী ময়াম অমা মাস্ক উপ্পা উবা অসি ঐখোয়গী হৈনবী ওইরমদে অদুবু হৌজিক্তি ওইরে। হোয় মাস্ক অপলিবা মীওই খুদিংমক অসি নারে হায়বদি নত্তে। অদুগা ঐহাক্না মাস্ককী ৱাফম অসি প্লকপদা থায়নগী ৱা অমা নীংশিংলকই। মতম অমদা ঐখোয়গী লৈবাক অসিগী মফম কয়া অমদা মীওই অমনা উহৈ লৈবা উবদা পুক্নিংদা অনাবা য়াওব্রা হায়না হংনরম্মি। হায়বদি হৈ অসি অনাবতনা চাগদবনি হায়না চৎনরম্মি। হৌজিক্তি মতম হোংলকপগী মতুং ইন্না চৎনবী অদুসু হোংলক্লে। মসিগা চপ মান্ননা মাস্ক উপ্পগী চৎনবী অমসুং মসিগা লোয়নরিবা ৱাল্লোন অসি হোংলক্লগনি।

ঐহাক্কী নুংশিজরবা ইরৈবাকচাশিং, ঙসি ময়ামদা মন কী বাত ফোংদোকপা নুমিৎ  অসিদা অকশ্যা-ত্রিতিয়াগী শেংলবা নুমিৎ তাবা অসি ঐহাক থোইদোক্না নুংঙাইবা ফাওজৈ। মরূপশিং শ্যে হায়বগী ৱাহন্থোক্তি অমংবা অদু মতম লৈবা খিবিক্তা মুৎপা লৈতবা, লোয়বা নায়দবা হায়বনা অকশ্যৈ হায়বনি। ঐখোয়গী য়ুম-য়ুমদা নুমিৎ  অসি চহি খুদিংগী পাংথোকই। অদুম ওইনমক হন্দক্কী চহী অসিদদি মসিগী থোইদোকপা মরুওইবা অমা অমুক হেন্না লৈরে। ঙসিগী লুরবা তাঙ্কক অসিদা নুমিৎ  অসিনা ঐখোয়দা নীংশিংহল্লিবদি ঐখোয়গী আত্মা ঐখোয়গী ৱাখল্লোন অসি অকশৈ হায়বদি লোইবা মুৎপা নায়বা নত্তে। নুমিৎ  অসিনা ঐখোয়দা নীংশিংহল্লিবদি ঐখোয়না খদোংথিবা খুদোংচাদবা কয়া মায়োক্নরবসু, লাইনা কয়া অমা মায়োক্নবা তারবসু মদুবু থেংন্ননবা অমদি মায়োক্ননবা মীওইবগী ৱাখল্লোন থৌনা লোইবা লৈতে। নুমিৎ  অসিদা ভগবান শ্রী কৃষ্ণ অমসুং সুর্য়দেব অনিগী থৌজালদগী পান্দবশিংনা অকশয়-পাত্র ফংখি হায়না থাজনৈ।    

মরূপশিং, রামজানগী শেংলবা থাসু হৌখ্রে। মমাংগী রামজান পাংথোকপা মতমদা কুমশিগী রামজান অসিদা অসুক খুদোংথিবা অসি থেংনগনি হায়বা কনানসু খঙখিদে। অদুবু হৌজিক মালেম পুম্বদা খুদোংথিবা অসি মায়োক্নরি। করিগুম্বা তাঙ্কক অসিদা ঐখোয়না থমোয়বু খুদুম চনবা ঙম্বা থমোয় চেৎপা মীনুংশি লৈবা অমসুং মীয়ামগী মতেং পাংবগী ৱাখল্লোন লৈবগী খুদম অমা ওইরসি। হন্দক্তি ঐখোয় হান্নদগী হেন্না চেৎলসি। ইদ য়ৌদ্রিঙৈদা মালেম অসিদগী কোরোনা চৎখিদুনা হান্নগুম হরাও তয়াম্না ইদ পাংথোকপা ঙমহনবিয়ু হায়না থৌনিজরসি। ঐহাক্না থাজৈ, রামজানগী মতম অসিদা দিস্ত্রিক এদমিনিস্ত্রেসনশিংনা পীবা লৈঙাক্লোনশিং ইন্দুনা ময়াম্না কোরোনাগী মায়োক্তা চংশিল্লিবা লাঞ্জং অসিবু হেন্না কনশিনহনগনি। হৌজিক লম্বী কৈথেল অমসুং লৈকাইদা ফিজিকেল দিস্তেন্সিংগী কাংলোন ঙাকপা য়াম্না মরু ওই। ময়ামদা গজ অনি লাপ্না লৈনবা অমসুং য়ুমদগী মপান থোক্তনবা পাউতাক পীবিরিবা কম্ম্যুনিতী লীদরশিংদসু ঐহাক্না তৌবিমল খঙবা উৎচরি।

তশেংবমক্নি কোরোনা অসিনা হন্দক্তি ভারত অমসুং মালেমগী লৈবাক খুদিংমক্তা কুমহৈ পাংথোকপগী মওং মতৌ অসি পুমহোং হোংদোক্লে। হৌখিবা নুমিৎ  খরনি অসিদা ঐখোয়গীসিদা বিহু, বৈসাখি, পুথান্দু, বিশু, অমসুং ওরিয়া ন্যু ইয়ারনচিংবা কুমহৈ কয়া লাকখ্রে। ময়াম্না কুমহৈশিং অসি য়াম্না চম্না য়ুমদা লৈরগা পাংথোকখ্রে। হান্নদি কুমহৈশিং অসি মরূপ-মপাং অমসুং মরী-মতাশিংগা লোয়ননা য়াম্না হরাও তয়াম্না অমসুং নুংঙাইনা পাংথোক্লম্বনি। য়ুমদগী মপান থোক্লগা নুংঙাইবা ফোংদোক্লম্বনি। অদুবু কুমসিদি পুম্নমক্না থমোয়দা খুদুম চল্লে, লোকদাউনগী চৎন কাংলোন ঙাক্লে। খৃস্তান ইচিল-ইনাওশিংনসু ইস্তর সন্দে য়ুমদা পাংথোক্লে। ইশাগী সমাজ অমসুং লৈবাক্কী থৌদাং অসি পাংথোকপসি সিগী তাঞ্জা অসিদা য়াম্নমক মরু ওইখ্রে। মদুতদা ঐখোয়না কোরোনা শন্দোকপা থিংবা ঙমগনি। কোরোনাগুম্বা মালেম শিনবা থুংনা শন্দোরক্লিবা লাইচৎ অসিবু মায়থিবা পীবা ঙমগনি।   

ঐহাক্কী নুংশিজরবা ইরৈবাকচাশিং, মালেম পুম্বদা শন্দোরক্লিবা লাইচৎ অসিগী মরক অসিদা অদোমগী ইমুংগী মীহুৎ অমা ওইনা ময়ামদা হায়জনীংবা ৱাফম অমা লৈরে। ময়াম পুম্নমক ঐহাক্কী ইমুং মনুংনি অদুনা ৱাফম সি ময়ামদা হায়বা অসি ঐহাক্কী ইথৌনি হায়না খঞ্জৈ। ৱাফমদি অসিনি, ঐখোয়গী শহরদা, ঐখোয়গী খুঙ্গংদা, ঐখোয়গী লৈরক্তা নত্ত্রগা ঐখোয়গী ওফিসতা কোরোনা য়ৌরক্ত্রি অদুনা হৌজিক ঐখোয়দা য়ৌরক্লোয় হায়না থৌশাদনা লৈথোকপীগনু। মালেম অসিদা থোক্লিবা ময়াম অসিনা ঐখোয়দা ৱাফম কয়া তাক্লি। অদুনা ঐখোয়গীসিদা হন্না-হন্না হায়রিবদি হেক চেকশিনহৌদবদা খুদোং থিবা নংলে। নীংশিংবীয়ু ঐখোয়গী ইপা-ইপুশিংনা হিরমশিং অসিগী মতাংদা য়াম্না ফজনা লমজিং লমতাকপীরম্মি। মখোয়না হায়বীরম্মি-  

অগ্নি: শেশম রিনা: শেশম,

ব্যাধি: শেশম তাথাবাচা।

পুনহ: পুনহ: প্রাভারধেতা,

তসমাৎ শেশম না কারয়েৎ॥

হায়বদি, লায়না লৌদুনা হৌদোক্লম্বা মৈ, শেন্দোন অমসুং লাইনা, তাঞ্জা হেক ফংবগা অমুক হল্লক্লগা হেন্না খুদোং থিহল্লি, অদুনা মসি মপুং ফানা লাইয়েংবা য়াম্না মরু ওই। মরম অদুনা মফম খুদিংমক্তা চেকশিন্দবা শুকয়া য়াদে। ঐহাক্না অমুক্কা হন্না হায়জরি, মীয়ামদগী ইশাবু গজ অনি লাপ্না থম্বীয়ু অমদি হচাং ফনা লৈবিয়ু। গজ অনিগী অরাপ্পা য়াম্নমক মরু ওই। ময়াম পুম্বগী হকচাং নাদ য়েক্তনবগীদমক থৌনিজবগা লোয়ননা ঐহাক্কী ৱাফম অসি লোইশিনজরি। মথংগী মন কী বাত্তা উনবা মতমদা মালেমগী ইবা লাইচৎ অসিদগী খরা ফরকপগী পাউ লাক্তুনা মীওইবা কাংলুপ অসিগী অৱাবা কোকপা মতম অমা ওইহন্নবগীদমক তাইবং মপুদা নীজবগা লোয়ননা ময়াম্বু হন্না-হন্না থাগৎচরি।