ইলেক্ত্রোনিক্স অমসুং আই.তি. মন্ত্রালয়

শ্রী সঞ্জয় ধোত্রেনা লৈবাক অসিগী আই.তি. সার্বিসশিংগী ফীবম য়েংশিনখ্রে
মীওই মিলিয়ন ৭৫না আরোগ্য সেতু এপ দাউনলোদ তৌনখ্রে

Posted On: 24 APR 2020 6:16PM by PIB Imphal

ইলেক্ত্রোনিক্স অমসুং আই.তি, কম্যুনিকেসন, অমসুং ঐচ.আর.দি.গী রাজ্য মন্ত্রী শ্রী সঞ্জয় ধোত্রেনা ইলেক্ত্রোনিক্স অমসুং ইনফোর্মেসন তেক্নোলোজী (মৈতী)গী মখাদা লৈবা তোঙান-তোঙানবা দিপার্তমেন্তশিং অমসুং অন্দর্তেকিংশিংনা কোবিদ-১৯ লোকদাউন মনুংদা লৌখৎলিবা থবক থৌরমশিং ভিদিও কনফরেন্সিংগী খুত্থাংদা য়েংশিনখ্রে। হৌজিকফাওবদা লৌখৎলিবা থবক থৌরমশিংদা মন্ত্রীনা অপেনবা ফোংদোকখি অমসুং দিপার্তমেন্তশিংনা লৈবাক্কী সেবা তৌবদা সোসিএল দিস্তেন্সিংগী কাংলোনশিং মপুং ফানা ঙাক্তুনা ঙমজবা থাক্তা পাংথোক্নবা তকশিনখি।

মীওই মিলিয়ন ৭৫ হেনবনা মখোয়গী মোবাইল ফোন্দা আরোগ্য সেতু এপ দাউনলোদ তৌখ্রে হায়না পাউদমখি। মসিগী এপ অসি কোবিদ-১৯ থেংনবদা খ্বাইদগী মরুওইবা খুৎলাই অমনি হায়না মহাক্না ফোংদোকখি অমসুং মালেম শীনবা থুংনা শন্দোক্লিবা লাইচৎ অসিদা অচম্বা প্রজা মীয়ামগীদি লাইফলাইন ওইরগনি হায়না মন্ত্রীনা ফোংদোকখি। এপ অসিবু মীয়াম পুম্বনা খঙননবা অঙম্বা থাক্তা ওফিসিএলশিংনা হোৎননবা খঙহনখি।

মন্ত্রীনা ইনফোর্মেসন তেক্নোলোজী (আই.তি.) অমসুং আই.তি. এনেবল সার্বিস (আই.তি.ই.এস.)শিংদা মিৎয়েং থম্লি অমসুং মহাক্না মরুওইবা ওফিসিএলশিংগা লোকদাউন মতুংদা মসিগী সেক্তর অসি তপ্না- তপ্না হাংদোক্নবা খন্নখি। মহাক্না ওফিসিএল অমসুং স্তেকহোলদরশিংদা অসিগুম্বা খুদোংচাদবা মতম অসিদা অচম্বা প্রজা মীয়ামদা কান্নবা পীগদবা আই.তি. সোলুসনশিং অমসুং সর্বিসশিংদা মিৎয়েং থম্নবা তকশিনখি। লৈবাক অসিদা লৈরিবা সেক্তর খুদিংমক্তা আই.তি. সেক্তর অসিনা য়াংলেন শরু ওইদুনা লৌরিবা মরুওইবা থৌদাং অসিগী মতাংদসু ফোংদোকখি। অসিগুম্বা ক্রাইসিসকী মতম অসিদা ভারত সরকারনা প্রধান মন্ত্রী শ্রী নরেন্দ্র মোদীগী মতীক লৈরবা লীচিং মখাদা লেপ্পা লৈতনা থবক কয়া পায়খৎলি হায়না মহাক্না ফোংদোকখি। হৌজিক ঐখোয়না ফংলিবা পুৱারী ওইহৌরগদবা মীয়ামগী সেবা তৌনবগী খুদোংচাবশিং অসি লৌদুনা অচম্বা প্রজা মীয়ামগী অৱাবা কোক্নবগীদমক ঙমজবা থাক্তা হোৎনগদবনি হায়না মহাক্না মখা তাখি।

লৈবাক শীনবা থুংনা সি.এস.সি.না লৌরিবা চাউরবা নেৎৱর্ককী থৌদাং অসিবু পল্লদুনা, ক্রাইসিসকী মিৎকুপ অসিদা মখোয়গী সর্বিসশিং অসিসু, মরুওইনা কা হেন্না মনুং হঞ্জিনবা মফমশিংদা তেলিমেদিসিনগী সর্বিসশিং পীবদা শিজিন্নবা য়াই হায়না ফোংদোকখি। মসিনা লোকদাউনগী মনুংদা মেদিকেল সর্বিস ফংনবা হোৎনবদা অৱাবা ওইরবা মীওইশিংদা খরতা ওইরবসু অৱাবা কোক্কনি।



(Release ID: 1618416) Visitor Counter : 22