কোবিদ-১৯গী লোকদাউন লৈরিঙৈ মনুং অসিদা চয়োল ৩ ঙনখৎনা উনশিং শেংদোক্লবা মতুংদা, বোর্দর রোদস ওর্গনাইজেশন (বি.আর.ও.)না রোহতাং পাস (সমুদ্রগী লৈমাইগী মথক্তা ফীত ১৩,৫০০গী) অসি ঙসি হাংদোকখ্রে।মসি লৈবাক অসিগী অতৈ মফমশিংগা হিমাচল প্রদেশকী লাহোল অমসুং স্পিতি জিলাগা শম্নহল্লিবা শিংলি নাওরি ওইরিবা লম্বিনি। পাস অসি মমাং চহিগী মে ১৮দা হাংদোকখিবনি।

হিমাচল প্রদেশকী সরকারনা লৌউশিংউবা হৌনবগীদমক্তা লৌমীশিং হল্লকপদা খুদোংচানবা অমসুং মরু ওইবা তঙাইফদনা চংবা পোৎলমশিং পুশিনবা য়ানবা অমসুং কোবিদ-১৯না মরম ওইরগা থোকহল্লিবা অসিগীডমক্তা লাহোল তম্পাক্তা রিলীফ মেতরিবেলশিং পুশিন্নবা উন শেংদোকপগী থবক অসি খুমাং চাওশিলহন্নবা বি.আর.ও.দা হায়জখি।

বি.আর.ও.না মনালি অমসুং খোকসারদগী হাই-তেক মেছিনরীশিং শিজিন্নখি। উনগী নোংলৈ নুংশিৎ, য়াম্না ইংবা অইং-অশাগী ফিভম অমসুং রাহালা ফোল, বীস নাল্লাহ অমসুং রানি নাল্লাহদা তোইনা উন নীংখায়বা থোকপনা মরম ওইরগা থবক অসি থেংথহনখি অদুবু উন শেংদোক্লিবা তীমশিংনা লাহোল তম্পাক্তা লৈরিবা মীয়ামশিংদা রিলীফ ফংহন্নবা কোবিদ-১৯গী চেকশিন থৌরাং পুম্নমক লৌখত্তুনা নুংথিল নুমিদাং খায়দনা লেপ্তনা থবক তৌখি।

বি.আর.ও.না লমজিংদুনাতঙাইফদনা চংবা মরু ওইবা পোৎলমশিং অমসুং চাওরাক্না লৌমী ১৫০রোম পুবা গারিগী অহানবা কনভোই ঙসি লাহোল তম্পাক্তা চৎখ্রে, অসুম্না হন্দক চহিগী ওইনা রোহতাং পাস অসি ওফিসিয়েল ওইনা হাংদোকখ্রে। রোহতাং পাস অসি মমাং চহিগা য়েংনরুবদা চয়োল অহুম ঙনখৎনা ত্রাফিক হাংদোকখ্রে হাববগী পাউ তাবদা মফম অদুদা লৈরিবা মীয়ামগী মরক্তা অৱাবা কোকহনখ্রে। মসিনা মফম অদুদা লৈরিবা মীয়ামগীদমক্তা য়াম্না মথৌতারবা রিলীফ মেতরিয়েলশিং অমসুং মেদিকেল সপ্লাইশিং পুরক্নবা হোৎনবদা কেন্দ্র অমসুং রাজ্য সরকারদা খুদোংচাবা ওইহনগনি। মসিগা লোইননা জিলা অসিগী য়াংলেন শরু ওইরিবা লৌউশিংউবগী থৌওংশিংশু পাংথোকপা হৌবা য়ারগনি।

পাস আসি হাংদোক্নবা উন শেংদোকপগী থবক অসি চহি খুদিংগী পাংথোকই মরমদি পাস অসি থা তরুক ময়া নক্না উন্না কুপ্তুনা লৈ হায়বদি নভেম্বরগী ময়াই চনবদগী মেগী ময়াই ফাওবা। মসি দিসেম্বর ১২, ২০১৯ ফাওবা হাংদুনা থমখি। তমপাক অসিগী অপুনবা ওইনা নিংথমগী মতমদা মপানদগী লোজিস্তিক/ সপ্লাইশিং পুশিল্লক্নবগীদমক্তা নোংথক্তা পুশিল্লকপগী মপান তাংই।

অসিদা নত্তনা, কোবিদ-১৯গী মায়োক্তা সরকারনা হোৎনরিবশিং অসিদা হেন্না পাঙ্গল হাপকৎনবা বোর্দর রোদস ওর্গনাইজেশনগী পর্সোনেল পুম্নমক্না পুন্না নোংমগী তলপ অমসুং মসিদগী হেন্না খোমগত্তুনা পি.এম. কেয়রস ফন্দদা লুপা কোতি ১ অমা তেংবাং ওইনা খাইগৎখি।