লকডাউনৰ সময়ছোৱাত আন্দামান নিকোবৰ দ্বীপপুঞ্জ আৰু লক্ষদ্বীপলৈ খাদ্য সামগ্ৰীৰ অবিৰত যোগান অব্যাহত ৰাখিছে ভাৰতীয় খাদ্য নিগমে(এফচিআই)৷ জটিল ভৌগোলিক অৱস্থিতি আৰু সীমিত যোগাযোগ সুবিধাৰ বাবে এই অঞ্চলসমূহলৈ খাদ্য সামগ্ৰীৰ নিয়মীয়া যোগান অব্যাহত ৰখাটো যথেষ্ট প্ৰত্যাহ্বানজনক হৈ পৰে৷ তথাপি, ভাৰতীয় খাদ্য নিগমে দ্বীপপুঞ্জ দুটাত সময়মতে খাদ্য সামগ্ৰী যোগান ধৰাত সৰ্বাধিক গুৰুত্ব আৰোপ কৰিছে৷ ইয়াৰ অংশস্বৰূপে এফচিআইয়ে ৰাষ্ট্ৰজোৰা লকডাউনৰ যোৱা ২৭দিনত আন্দামান নিকোবৰলৈ ২খন জাহাজ আৰু লক্ষদ্বীপলৈ ৭খন সৰু জাহাজ সঞ্চালিত কৰিছে৷ এয়া হ’ল দ্বীপপুঞ্জ দুটালৈ জাহাজ চলাচলৰ মাহিলী গড় পৰিমাণৰ দুগুণতকৈও অধিক৷

আন্দামান নিকোবৰ দ্বীপপুঞ্জ আৰু লক্ষদ্বীপলৈ যাবলৈ স্থলপথ অথবা ৰেল পথৰ সুবিধা নথকাত খাদ্য সামগ্ৰী যোগান ধৰাৰ ক্ষেত্ৰত যথেষ্ট প্ৰত্যাহ্বানৰ সন্মুখীন হ’বলগীয়া হয়৷ সাগৰীয় পথেই ইয়াৰ  যোগাযোগৰ একমাত্ৰ উপায়৷ আন্দামান নিকোবৰ দ্বীপপুঞ্জ আৰু লক্ষদ্বীপত ভাৰতীয় খাদ্য নিগমৰ একোটাকৈ ভাণ্ডাৰ আছে৷ প’ৰ্ট ব্লেয়াৰ আৰু আন্দ্ৰ’থত থকা এই গুদামৰ সক্ষমতা হ’ল ক্ৰমে ৭০৮০ মেট্ৰিক টন আৰু ২৫০০ মেট্ৰিক টন৷

লকডাউনৰ ২৭ দিনৰ সমছোৱাত প্ৰায় ১৭৫০ মেট্ৰিক টন খাদ্য সামগ্ৰী মাংগালোৰ বন্দৰৰ পৰা লক্ষদ্বীপলৈ সঞ্চালিত কৰা হৈছে৷ এয়া হ’ল স্বাভাৱিক মাহিলী গড় পৰিমাণ ৬০০ মেট্ৰিক টনতকৈ প্ৰায় তিনিগুণ অধিক৷ একেদৰে, প্ৰায় ৬৫০০ মেট্ৰিক টন খাদ্য সামগ্ৰী কাকিনাড়া বন্দৰৰ পৰা প’ৰ্ট ব্লেয়াৰ আৰু আন্দামান নিকোবৰ দ্বীপপুঞ্জত অৱস্থিত বিভিন্ন বন্দৰলৈ সঞ্চালিত কৰা হৈছে৷ এয়া হ’ল স্বাভাৱিক মাহিলী গড় পৰিমাণ ৩০০০ মেট্ৰিক টনতকৈ দুগুণৰো অধিক৷

লকডাউনৰ ফলত সৃষ্টি হোৱা বিভিন্ন বাধা-নিষেধ নেওচি এই দ্বীপপুঞ্জসমূহত খাদ্যৰ যোগান অব্যাহত ৰখা হৈছে৷  যোৱা ২৭ দিনত লক্ষদ্বীপত প্ৰায় ১১০০ মেট্ৰিক টন খাদ্য সামগ্ৰী আৰু প্ৰায় ৫৫০০ মেট্ৰিক টন খাদ্য সামগ্ৰী আন্দামান নিকোবৰ দ্বীপপুঞ্জত যোগান ধৰা হৈছে৷ ইয়াৰ ভিতৰত অন্তৰ্ভুক্ত হৈ আছে প্ৰধানমন্ত্ৰী গৰীব কল্যাণ অন্ন যোজনাৰ অধীনত লাভ কৰা অতিৰিক্ত আবণ্টন৷

****

APS/PK/MS/MS