প্রধান মন্ত্রী নরেন্দ্র মোদীনা লৈবাক অসিদা ইং ২০২০ গী এপ্রিলগী তাং ১৪দা পীখিবা মহাক্কী ৱারোলদা ভারতকী লোকদাউন অসি লৈবাক অসিদা কোভিদ-১৯ শন্দোকপা লাকশিন্নবগীদমক ইং ২০২০গী মেগী তাং ৩ ফাওবা শাংদোক্লে হায়না লাউথোকখ্রে। প্রধান মন্ত্রীনা মখা তানা হায়রি মদুদি ইং ২০২০গী এপ্রিলগী তাং ২০দগী লৈবাক অসিগী তোঙান্না খন্দোক্লবা মফমশিংদা অখন্নবা তৌদবা য়াদ্রবা থবক খরদি হাংদোক্কনি হায়বসিনি।

প্রধান মন্ত্রীনা লাউথোকখিবদুগী মখা তারকপদা, য়ুম্লৈ-কৈরৈ মন্ত্রালয় (এম.ঐচ.এ)না ইং ২০২০গী এপ্রিলগী তাং ১৪দা থোকপা চেরোল অমদা ভারত্তা লোকদাউন অসি ইং ২০২০ গী মে তাং ৩ ফাওবা শাংদোক্লে হায়না লাউথোকখিবনি। মখা তানা, এম.ঐচ.এনা ইং ২০২০গী এপ্রিলগী তাং ১৫দা অতোপ্পা চেরোল অমগা থোক্তুনা রাজ্যশিংনা/য়ু.তিশিং/দিস্ত্রিক এদমিনিস্ত্রেসনশিংনা কন্তেনমেন্ত জোন্নি হায়না লাউথোক্তবা মফমশিংদা অহেনবা থবক পাঙথোকপা য়াহন্ননবগী অয়াবা পীখি। 

ইং ২০২০গী এপ্রিলগী তাং ১৫দা থোকপা চেরোল অসিগা লোয়ননা, লৈবাক পুম্বদা অথিংবা লৈবা থবকশিং, কন্তেনমেন্ত জোনশিংদা তৌবা য়াবা থবকশিং, অমসুং ইং ২০২০গী এপ্রিলগী তাং ২০দগী লৈবাক পুম্বদা চৎনবদা অয়াবা পীবা থবকশিং য়াওবা শেমদোক্লবা হেন্না মপুং ফারবা চৎন-কাঙলোন খরসু পীখি।

হায়রিবা শেমদোক্লবা চৎন-কাঙলোনশিং অসিগী পান্দমদি লোকদাউনগী ১বা তাংকক্তা ফংখিবা কান্নবদু মপুং ফাহনবা অমসুং মখা তানা কোভিদ ১৯ শন্দোকপদগী তপথহনবগা লোয়ননা লৌমীশিং, শিনমীশিং, অমসুং নোংমগী খুৎশুমল তান্দুনা চারিবা মীওইশিংগী অৱাবা কোকহনবনি।

লৈবাক শীনবা থুংনা অথিং থম্লিবা থবকশিংদি, নোংথক্কী লম্বী, রেল অমসুং কংফাল লম্বীদা চৎপা; ইন্দস্ত্রি অমসুং ললোন-ইতিক্কী থবকশিং; হোস্পিতালিতি সার্ভিসশিং; সিনেমা হোলশিং, সোপিং কমপ্লেক্সশিং, থিএতরশিং, অসিনচিংবা, সোসিয়েল, পোলিতিকেল অমসুং অতোপ্পা  থৌরমশিং, অমসুং ধর্মগা মরী লৈনবা মফমশিং/ ধর্মগী ওইবা পুনবা য়াওনা ময়ামগী লাই খুরম্ফমশিং হাংবনি।

জাতিগী থাক্তা চৎনগদবা চৎন-কাঙলোনশিংগী মনুংদা থবক শুফম নত্রগা ময়াম তিনবা মফমদা য়ুমদা শেমজবা মাইখুম-ফি (ফেস মাস্ক) শীজিন্নবা, সেনিতাইজর শীজিন্নবগুম্বা হকশেল ফহনবা অমসুং হকশেলগা মরী লৈনবা চেকশিন-থৌরাংশিং, স্তেগর্দ সিফ, এক্সেস কন্ত্রোল, থর্মেল স্ক্রিনিং অমসুং লোক-তিন শীৎপদা ফাইন থীহনবা অসিনচিংবা। হায়রিবশিং অসি থুগাইদুনা চৎপশিংগী মথক্তা পেনালতি পীগনি।

শেমদোক্লবা চৎন-পথাপশিং অসিগী মখাদা ইং ২০২০গী এপ্রিলগী তাং ২০দগী  পাঙথোকপা য়াবা থবকশিং অসি রাজ্যশিং/ য়ু.তিশিং/ দিস্ত্রিক এদমিনিস্ত্রেসনশিংনা হকশেল অমসুং য়াইফ-য়ুম্বাল মন্ত্রালয়গী চৎন-কাঙলোনশিংগী মখাদা কন্তেনমেন্ত জোন্নি হায়না লাউথোকখ্রবশিংগী মনুংদদি চৎনরোই। হায়রিবা মফমশিং অসিদা, তৌদবা য়াদ্রবা থবকশিং হায়বদি হিদাক লাংথক্কী অথু-অকাই অমসুং লো অমসুং ওর্দরগা মরী লৈনবা থবকশিং অমসুং সরকারগী থবকশিং নত্তনা চেক তৌদনা মী চঙলকপা/থোকপগী অয়াবা লৈতে।

কোভিদ ১৯গী কেস য়াম্না চাওনা লৈবা অমসুং কা হেন্না থুনা য়াঙনা শন্দোকপা, ফিভম শোক্লবা দিস্ত্রিকশিংদা অকনবা লাকশিন্নবা থৌরাংশিং লৌখৎকনি। কন্তেনমেন্ত জোনশিং তংদাংনা খঙদোক্নবা পথাপশিং অমসুং লাকশিন্নবগী থৌরাংগী অকুপ্পা ৱারোলসু থোকখ্রে। হায়রিবা মফমশিং অসিদা অখন্নবা থবক-থৌরম খরখক্তমক্কী অয়াবা পীগনি অমসুং হকচিনবা চত্থোক-চৎশিন্দা অথিংবসু থমখ্রে।  

ইং ২০২০গী এপ্রিলগী তাং ২০ দগী চৎনবা য়াবা থবকশিং অসি লৌউ-শিংউ অমসুং মসিগা মরী লৈনবা থবকশিং মপুং ফানা চত্থবা য়ানবা পান্দম থমগনি, মতীক চানা ঙাক-শেন্দুনা অমসুং অকক্নবা তৌদবা য়াদ্রবা চৎন-কাঙলোন অমগী মখাদা খুঙ্গংগী শেনমিৎলোন্দা খ্বাইদগী ফবা মওংদা ফগৎহনবা, নোংমগী খুৎশুমল তাল্লিবা মীওইশিং অমসুং অতোপ্পা শিনমীশিংদা থবক্কী খুদোংচাবা পীবা, অখন্নবা ইন্দস্ত্রিগা মরী লৈনবা থবকশিং মখা তান্না শুবা য়াহনবা অমসুং দিজিতেল ইকোনোমিনি।

পোচৈ হোন্দোক-হোঞ্জিন তৌবদা মথৌ তাবা অমসুং তাদবা থিদনা অথিংবা লৈতনা মথৌ তৌহনবা। লৌউ-শিংউগী পোত্থোকশিং লৌথোক-লৌশিনগা মরী লৈনবা থবকশিং, মাঙজৌননা পীরবা মেন্দিশিংদা মহৈ-মরোং য়োনবা অমসুং দাইরেক অমসুং দিসেন্ত্রেলাইস মার্কেতিং তৌবা, পোত্থোক পুথোকপা, অমসুং হার, মহৈ-মরোংগী হিদাক অমসুং মরু-মরাং য়োন্থোক-য়োনশিন তৌবা; শমুদ্র অমসুং কংফাল থংবা শরুক্তা ঙা য়োকপা; শঙ্গোম, শঙ্গোমগী পোত্থোক থাদোক-থাজিন তৌবা, য়েন লোইবা য়াওনা শা-শন লোইবগী থবক, অমসুং চা, কোফি অমসুং রব্বর পাম্বী থাবগী থবকশিং পাঙথোকপা য়াগনি।

খুঙ্গংগী শেনমিৎলোন য়াঙনা চাউখৎনবা, চীঞ্জাক শেম-শাবগী ইন্দস্ত্রিশিং য়াওনা খুঙ্গংদা চলাইরিবা ইন্দস্ত্রিশিং; লম্বী-থোং শাবা, ঈথৈ লৌখোংগী প্রোজেকশিং, খুঙ্গংগী মফমশিংদা শেমগৎ শাগৎপা অমসুং ইন্দস্ত্রিএল প্রোজেকশিং; ঈথৈ-লৌখোং অমসুং ঈশিং য়োকখৎপগা মরী লৈনবা এম.এন.আর.ই.জি.এগী মখাদা থবক শুবা; অমসুং কমন সার্ভিস সেন্তরশিং (সি.এস.সি)গী থবক পুম্বা পাঙথোকপা য়ারগনি। হায়রিবা থবকশিং অসিনা অতোপ্পা লমগী শিনমীশিং য়াওনা খুঙ্গংগী শিনমীশিংদা থবক্কী খুদোংচাবা পীগনি।

এস.ই.জেদশিং, ই.ও.য়ুশিং, ইন্দস্ত্রিএল ইস্তেতশিং অমসুং ইন্দস্ত্রিএল তাউনশিপশিংদা সোসিএল দিস্তেনসিংগী এস.ও.পি চৎনরবা মতুংদা এক্সেস কন্ত্রোল লৈবা মেন্যুফেকচরিং অমসুং ইন্দস্ত্রিএল ইস্তাব্লিসমেন্তশিং মথৌ তৌবগী অয়াবা পীরি। আই.তি হার্দৱেয়র অমসুং চঙদবা য়াদ্রবা পোৎচৈশিং অমসুং পেকেজিং পুথোকপসু অয়াবা পীরি। কোয়লা, মিনরেল অমসুং থাউ শুংবসু অয়াবা পীরবা থবকশিংনি। মসিগী থৌরাংশিং অসিনা ইন্দস্ত্রিএল অমসুং মেন্যুফেকচরিং সেক্তরশিংদা অনৌবা ময়োল অমা চোংহল্লগনি অমসুং মসিনা চেকশিল থৌরাংশিং অমসুং সোসিয়েল দিস্তেনসিংবুসু ঙাক্না চত্তুনা থবক্কী খুদোংচাবা পীগনি হায়না থাজৈ। মসিগা লোয়ননা, শেনমিৎলোনগী মরুওইবা মচাক অমা ওইরিবা, খুদম ওইনা হায়রবদা আর.বি.আই, বেঙ্কশিং, এ.তি.এম, এস.ই.বি.আইনা নোতিফাই তৌরবা কেপিতেল অমসুং দেতকী কৈথেলশিংবু অমসুং ইন্স্যুরেন্স কম্পনিশিংসু ইন্দস্ত্রিএল সেক্তরদা লিক্বিদিতি অমসুং ক্রেদিতকী ঙাক্লৌ পীনবগী মীৎয়েংদা মথৌ তৌবা য়াহল্লি।

দিজিতেল ইকোনোমি অসি সার্ভিস সেক্তরদা য়াম্না মথৌ তাবা পোৎশক অমনি অমসুং মসি লৈবাক অসি চাউখৎপদা য়াম্নমক মরু ওই। মসিগী মরম্না, ই-কমর্সকী থবকশিং, আই.তিগী মথৌশিং, অমসুং আই.তি ইনেবল সার্ভিসশিং, সরকারগী থবকশিংগী দেতা অমসুং কোল সেন্তরশিং অমসুং ওনলাইন্দা তাকপী তম্বিবগী থবকশিং অমসুং দিস্তেন্স লর্নিংগী থবক পুম্নমক হাংদোক্লে।

শেমদোক্লবা চৎন-কাঙলোনশিং অসিনা হকশেলগী থবকশিং অমসুং সোসেয়েল সেক্তরবুসু হাংদোকপগী অয়াবা পীরে; পব্লিক য়ুতিলিশিংসু অয়েৎপা অমতা য়াওদনা মথৌ তৌহনগনি; চঙদবা য়াদ্রবা পোৎলমশিং পুথোক-পুশিন তৌবদসু অয়েৎপা অমত্তা লৈতনা চত্থহনগনি; অমসুং, কেন্দ্র অমসুং রাজ্য সরকারশিং অমসুং লোকেল বোদিশিংগী মরুওইবা ওফিসশিং মথৌ তাবা মীশিংদুমক্কা লোয়ননা হাংগদবনি।

পুল্লপ শুপচিল্লগা, হায়রিবা শেমদোক্লবা চৎন-কাঙলোনশিং অসি লৈবাক অসিদা কোভিদ ১৯ লাকশিনবদা চংবা পুম্নমক তুং ইন্দুনা খুঙ্গং অমসুং লৌউ-শিংউগী থবক অমসুং থবক পীবগী মীৎয়েংদগী শেনমিৎলোন্দা য়াম্না মরুওইবা পান্দম থমদুনা মথৌ তৌহন্নবা হোৎনবনি।

অঙনবা অয়ুক্তা অইবা চেরোল ওইনা থোকখিবা শেমদোক্লবা চৎন-কাঙলোনশিং অসি মমুৎ তানা অমসুং কান্নবা ফংনা চৎননবা কেবিনেত সেক্রেতরীগা লোয়ননা রাজ্যশিংগী চীফ সেক্রেতরী অমসুং দি.জি.পিশিংগা মীফম পাঙথোক্লি। প্রধান মন্ত্রীগী প্রিন্সিপাল সেক্রেতরী, য়ুনিয়ন হোম সেক্রেতরী অমসুং য়ুনিয়ন হেলথ সেক্রেতরীসু শরুক য়াখি।

কল্লেক্তরশিং, এস.পিশিং, ম্যুনিসিপাল কমিস্নরশিং অমসুং সিভিল সর্জন খুদিংমকসু মীফম অদুদা শরুক য়াখি।