ఈస్టర్ సందర్భాన్ని పురస్కరించుకుని భారత ఉపరాష్ట్రపతి శ్రీ ముప్పవరపు వెంకయ్య నాయుడు దేశ ప్రజలకు శుభాకాంక్షలు తెలియజేశారు. చీకటి పై వెలుగు ఎప్పుడూ విజయం సాధిస్తూనే ఉంటుందని గుర్తు చేసిన ఉపరాష్ట్రపతి, కోవిడ్ -19 కి వ్యతిరేకంగా సాగే పోరాటంలో భారతదేశం మరియు ప్రపంచం విజయం సాధిస్తాయని ఆకాంక్షించారు.

ఉపరాష్ట్రపతి సందేశం పూర్తి పాఠం.

ఈస్టర్ సందర్భంగా దేశ ప్రజలకు నా హృదయపూర్వక శుభాకాంక్షలు. శాంతిని ప్రవచించిన యేసు క్రీస్తు శిలువ వేయబడిన తర్వాత మూడో రోజు పునరుత్థానమే ఈస్టర్ పర్వదినం. ఇది ఆశ మరియు విశ్వాసం యొక్క పునరుత్థానం కథ. కాంతి ఎల్లప్పుడూ చీకటి పై విజయం సాధిస్తుందని, ధర్మం ఎల్లప్పుడూ అధర్మం మీద విజయం సాధిస్తుందని గుర్తు చేసే కథ.

కరోనా వైరస్ వ్యాప్తి సవాలు విసురుతున్న ప్రస్తుత తరుణంలో, దీన్ని అధిగమించేందుకు ప్రపంచం ప్రయత్నిస్తోంది. ఈ నేపథ్యంలో ఈస్టర్ మనందరి జీవితాల్లో ధైర్యం మరియు ఆశావాదాన్ని నింపుతుందని భావిస్తున్నాను. మన ప్రియమైన వారితో ఈస్టర్ జరుపుకునే సమయంలో కోవిడ్ -19కి వ్యతిరేకంగా జరిగే ఈ పోరాటంలో భారతదేశం మరియు ప్రపంచం విజయం సాధించాలని ప్రార్థిద్దాం.

ఈ సంక్షోభం నుంచి మనల్ని బయట పడేసేందుకు అవిశ్రాంతంగా శ్రమిస్తున్న ప్రజలందరికీ ముఖ్యంగా ఆరోగ్య కార్యకర్తలకు మన కృతజ్ఞతలు తెలియజేద్దాం.

ఈ పండుగ మన మనసుల్ని దయతో, సానుభూతితో నింపి మన హృదయాల్ని మరింత దృఢంగా తయారు చేసి, మన జీవితాల్లో శాంతి, సామరస్య భావనలను విరబూసేలా చేస్తుందని ఆకాంక్షిస్తున్నాను.