ভাৰতৰ উপ-ৰাষ্ট্ৰপতি শ্রী এম ভেংকায়া নাইডু আৰু তেওঁৰ পত্নী শ্রীমতী উছম্মাই ক’ভিড-১৯ সংক্ৰমণ মোকাবিলা কৰাৰ প্ৰতি সংহতি প্ৰদৰ্শনেৰে আজি নতুন দিল্লীৰ উপ-ৰাষ্ট্ৰপতি ভৱনত নিশা ৯ বজাত বন্তি প্ৰজ্জ্বলন কৰে৷

প্ৰধানমন্ত্রী নৰেন্দ্ৰ মোদীয়ে দেশজুৰি ন’ভেল ক’ৰোনা ভাইৰাছৰ বাবে নামি অহা অন্ধকাৰ পৰিস্থিতিৰ পৰা মুক্তি পাবলৈ, দেশবাসীৰ প্ৰতি ঐক্যবদ্ধ যুঁজৰ প্ৰতীক হিচাপে বন্তি প্ৰজ্বলনৰ আহ্বান জনাইছিল৷ সেই আহ্বানৰ প্ৰতি সঁহাৰি জনাই উপ-ৰাষ্ট্ৰপতিয়ে দেশবাসীক ঐক্যবদ্ধ যুঁজৰ আহ্বান জনায়৷

প্ৰধানমন্ত্রীৰ আহ্বানলৈ বিপুল সঁহাৰিয়ে ভাৰতবাসীয়ে পুনৰ বুজাই দিয়ে যে এই সংকট কালত দেশবাসীয়ে দৃঢ় মানসিকতাৰে এই যুঁজ চলাই যাবলৈ প্ৰস্তুত৷

লকডাউন সময়ছোৱাত দেশবাসীক ঘৰতে থকাৰ আবেদন জনাই উপ-ৰাষ্ট্ৰপতিয়ে সমাজৰ প্ৰতিগৰাকী ব্যক্তিয়ে এই সংক্ৰমণ যাতে আৰু অধিক নহয়, তাৰ প্ৰতি লক্ষ্য ৰখা উচিত বুলি কয়৷

স্বাস্থ্যকর্মী, আৰক্ষী, পৌৰ নিকায়, চাফাইকর্মী তথা সমাজকর্মীসকলে এই মহামাৰীৰ বিৰোধী যুঁজত সন্মুখৰ পৰা যুঁজিছে বুলি প্ৰশংসা কৰি তেওঁ কয় যে সামাজিক দূৰত্ব বজাই ৰাখি ব্যক্তিগত সুৰক্ষা নিশ্চিত কৰিব লাগিব৷ ক’ভিড-১৯ৰ সংক্ৰমণ ৰোধত চৰকাৰ আৰু স্বাস্থ্য বিশেষজ্ঞসকলে যি নির্দেশনা জাৰি কৰিছে সেয়া সকলোৱেই মানি চলিব লাগিব৷

সাধাৰণ জনতাৰ চাহিদা পুৰণত কেন্দ্ৰ আৰু ৰাজ্য চৰকাৰসমূহে গ্ৰহণ কৰা প্ৰচেষ্টাৰ আদৰণি জনাই উপ-ৰাষ্ট্ৰপতিগৰাকীয়ে কয় যে দেশৰ এই সংকটকালত দুখীয়া তথা প্ৰব্ৰজিত শ্ৰমিকসকলৰ কাষত থিয় দিয়াটো সমাজৰ প্ৰতিটো স্তৰৰ লোকৰে দায়িত্ব আছে৷

এই মহামাৰীৰ সঠিক তথ্য প্ৰচাৰৰ বাবে বৈদ্যুতিন তথা ছপা মাধ্যমৰ প্ৰতিনিধিসকলক প্ৰশংসা কৰি তেওঁ কয় যে কেৱল ছ’চিয়েল মিডিয়াত যি জনৰৱ, মিথ্যাচাৰ, ভুল তথ্য প্ৰচাৰিত হৈছে সেয়া এৰাই চলিব লাগিব৷

এক ফেচবুক পোষ্টত উপ-ৰাষ্ট্ৰপতিয়ে কয় যে ছ’চিয়েল মিডিয়াত যি ভুল তথ্য প্ৰচাৰিত হৈছে, সেয়াও প্ৰকৃতাৰ্থত এক সংক্ৰমণ। ইয়াক অনতিপলমে প্ৰতিহত কৰিব লাগিব৷

তেওঁ কয় যে কোনো সম্প্ৰদায়ৰ নীতি-নিয়মক লৈ যদি অপব্যাখ্যা থাকে, সেয়াও শীঘ্ৰে প্ৰতিহত কৰিব লাগিব৷ কাকো আমি আমাৰ গোঁড়ামিৰ দৃষ্টিৰে চাব নালাগিব৷ তেওঁ লগতে কয় যে নির্দেশনা ভংগ কৰাৰ দৰে কাম আমি যাতে নকৰো, সেয়া নিশ্চিত কৰিব লাগিব৷

উপ-ৰাষ্ট্ৰপতিয়ে এই ক্ষেত্ৰত ব্যক্তিগত আৰু সামাজিক পৰ্যায়ত ক্ৰমান্বয়ে মুকলি আলোচনাৰ ওপৰত বিশেষ গুৰুত্ব আৰোপ কৰে৷ উপ-ৰাষ্ট্ৰপতিয়ে জনৰৱ আৰু ভুল তথ্যৰ বিপৰীতে সঠিক তথ্য বাৰে বাৰে প্ৰচাৰৰ পোষকতা কৰে৷

এই প্ৰতিকূল পৰিস্থিতিত সকলো বাধা অতিক্ৰম কৰি সংক্ৰমণ প্ৰতিৰোধ কৰিবলৈ যি সকল চিকিৎসক আৰু স্বাস্থ্যকর্মীয়ে সন্মুখৰ পৰা সাহসেৰে যুঁজ দি আহিছে, তেওঁলোকৰ ওপৰত কৰা শাৰীৰিক আক্ৰমণক লৈ ক্ষোভ প্ৰকাশ কৰি উপ-ৰাষ্ট্ৰপতি নাইডুয়ে কয় যে এই অগ্ৰণী যোদ্ধাসকলৰ প্ৰতি সন্মান প্ৰদৰ্শন কৰাটো আমাৰ কর্তব্য। উপ-ৰাষ্ট্ৰপতিয়ে এই যোদ্ধাসকলৰ জীৱনৰ নিৰাপত্তাৰ বিষয়টো নিশ্চিত কৰাৰ আহ্বান জনায়৷

ইফালে, উপ-ৰাষ্ট্ৰপতি তথা ৰাজ্যসভাৰ সভাপতি ভেংকায়া নাইডুয়ে ক’ভিড-১৯ সংক্ৰমণ কালত তথা এই পৰিস্থিতি স্বাভাবিক নোহোৱালৈকে তেওঁৰ প্ৰতি মাহৰ দৰমহাৰ ৩০% দান কৰিব বুলি সদৰি কৰে৷

****

VRRK/MS/MSY/RK/DB