প্ৰধানমন্ত্ৰী শ্ৰী নৰেন্দ্ৰ মোদীয়ে ব্ৰাছিলিয়াত ১৩ নৱেম্বৰত ১১সংখ্যক ব্ৰিকছ সন্মিলনৰ আজৰি সময়ত ৰাছিয়াৰ ৰাষ্ট্ৰপতি মাননীয় ভ্লাডিমিৰ পুটিনক সাক্ষাৎ কৰে৷ চলিত বৰ্ষত নেতা দুগৰাকীৰ এয়া চতুৰ্থটো সাক্ষাৎ৷

বৈঠকত নেতা দুগৰাকীয়ে দ্বিপাক্ষিক সম্পৰ্কৰ অগ্ৰগতি পৰ্যালোচনা কৰে৷ আমাৰ প্ৰতিৰক্ষা মন্ত্ৰী, পেট্ৰ’লিয়াম মন্ত্ৰী আৰু প্ৰাকৃতিক গেছ মন্ত্ৰীৰ সফল ৰাছিয়া ভ্ৰমণৰ কথা প্ৰধানমন্ত্ৰীয়ে বিশেষভাৱে উল্লেখ কৰে৷

দুয়োগৰাকী নেতাই সন্তুষ্টিৰে প্ৰকাশ কৰে যে ২০২৫ৰ ভিতৰত ২৫ বিলিয়ন মাৰ্কিন ডলাৰৰ দ্বিপাক্ষিক বাণিজ্যৰ লক্ষ্যত ইতিমধ্যে উপনীত হোৱা গৈছে৷ তেওঁলোকে সিদ্ধান্ত লয় যে আঞ্চলিক পৰ্যায়ত বাণিজ্যৰ জটিলতা দূৰ কৰিবলৈ ৰাছিয়া আৰু ভাৰতৰ মাজত প্ৰথমখন দ্বিপাক্ষিক আঞ্চলিক সন্মিলন অহা বৰ্ষত অনুষ্ঠিত হ’ব৷

তেওঁলোকে তেল আৰু প্ৰাকৃতিক গেছৰ আমদানিত দেখিবলৈ পোৱা সুস্থিৰতা আৰু অগ্ৰগতিৰ বিষয়েও উল্লেখ কৰে৷ ৰাষ্ট্ৰপতি পুটিনে ৰাছিয়াৰ সুমেৰু অঞ্চলত প্ৰাকৃতিক গেছৰ সম্ভাৱনীয়তাৰ প্ৰসংগ উত্থাপন কৰি ভাৰতক এই অঞ্চলত বিনিয়োগ কৰিবলৈ আমন্ত্ৰণ জনায়৷

দুয়োগৰাকী নেতাই ৰেলৱে আদিৰ দৰে আন্তঃগাথনিমূলক ক্ষেত্ৰত দেশ দুখনৰ অগ্ৰগতিৰো বুজ লয়৷ তেওঁলোকে প্ৰতিৰক্ষা খণ্ড আৰু অসামৰিক পাৰমাণৱিক শক্তি খণ্ডৰ সহযোগিতাক লৈ সন্তুষ্টি প্ৰকাশ কৰে৷ তৃতীয় বিশ্বৰ দেশত অসামৰিক পাৰমাণৱিক শক্তি খণ্ডত সহযোগিতাৰ সম্ভাৱনীয়তাক তেওঁলোকে আদৰণি জনায়৷

ভাৰত আৰু ৰাছিয়াৰ মূৰব্বী দুগৰাকীয়ে লগতে উল্লেখ কৰে যে তেওঁলোকে আন্তঃৰাষ্ট্ৰীয় বিষয়ত উমৈহতীয়া পক্ষ গ্ৰহণ কৰিব আৰু ভৱিষ্যতলৈ ঘনিষ্ঠ আলোচনা অব্যাহত ৰাখিব৷

ৰাষ্ট্ৰপতি পুটিনে প্ৰধানমন্ত্ৰী মোদীক অহা বছৰ ৰাছিয়াৰ বিজয় দিৱসত উপস্থিত থাকিবলৈ আমন্ত্ৰণ জনায়৷ প্ৰধানমন্ত্ৰীয়ে তেওঁৰ আমন্ত্ৰণ আনন্দৰে গ্ৰহণ কৰে৷

*******

VRRK/AK/MS