نئی دہلی،05  مارچ2019؍وزیر اعظم جناب نریندر مودی نے آج گجرات کے وسترال میں پردھان منتری شرم یوگی مان-دھن (پی ایم –ایس وائی ایم) یوجنا کا آغاز کیا۔ انہوں نے منتخب استفادہ کنندگان کے درمیان پی ایم –ایس وائی ایم پنشن کارڈ تقسیم کئے۔ملک بھر کے 3لاکھ کامن سروس سینٹرز پر 2 کروڑ سے زیادہ ورکروں نے ویڈیو کانفرنس کے ذریعے اس افتتاحی پروگرام کو دیکھا۔

آج کے دن کو تاریخی دن قرار دیتے ہوئے وزیر اعظم نے پی ایم –ایس وائی ایم یوجنا کو ملک کے 42کروڑ غیر منظم شعبے سے وابستہ ورکروں کے نام وقف کیا۔انہوں نے کہا کہ یہ اسکیم  غیر منظم شعبوں کے اندراج شدہ ورکروں کے لئے ان کے بڑھاپے میں کم از کم تین ہزار روپے ماہانہ پنشن یقینی بنائے گی۔وزیر اعظم نے مزید کہا کہ آزادی کے بعد یہ پہلی مرتبہ ہے جب کسی اسکیم میں غیر منظم شعبے کے کروڑوں ورکروں کا احاطہ کیاگیا ہے۔

وزیر اعظم نے تفصیل کے ساتھ پی ایم-ایس وائی ایم کے فوائدپر روشنی ڈالی۔وزیر اعظم نے کہا کہ استفادہ کنندگان جتنی رقم جمع کریں گے، اتنی ہی رقم مرکزی حکومت بھی دے گی۔انہوں نے ہر ماہ پندرہ ہزار روپے سے کم کمانے والے غیر منظم شعبے کے ورکروں سے اپیل کی کہ وہ اپنے قریبی کامن سروس سینٹر میں استفادہ کنندہ کی حیثیت سے اپنا اندراج کرائیں۔

وزیر اعظم نے یہ یقین دلاتے ہوئے کہ اندراج کے عمل میں کوئی پریشانی نہیں ہوگی، حاضرین کو بتایا کہ صرف ایک فارم بھرنے کی ضرورت ہوگی، جس پہ آدھار نمبر اور بینک کھاتے کی تفصیلات دینی ہوں گی۔کامن سروس سینٹر کے ذریعے کسی استفادہ کنندہ کا اندراج کرنے پر جو خرچ آئے گا اسے مرکزی حکومت برداشت کرے گی۔ وزیر اعظم نے  کہا کہ یہ ڈیجیٹل انڈیا کا معجزہ ہے۔

وزیر اعظم نے شہریوں سے اپیل کی کہ وہ غیر منظم    شعبے میں کام کرنے والے ورکروں کو پی ایم –ایس وائی ایم اسکیم میں اپنا اندراج کرانے کے کام میں ان کی مدد کریں۔ انہوں نے کہا کہ خوشحال طبقے کے ذریعے اس طرح کے اقدامات سے غریبوں کے زبردست فائدہ ہوگا۔انہوں نے کہا کہ محنت کے وقار کی قدر کرنے سے ملک آگے بڑھے گا۔

وزیر اعطم نے کہا کہ مرکزی حکومت کی متعدد اسکیموں کا مقصد خاص طورپر غیر منظم شعبوں میں کام کرنے والوں کو فائدہ پہنچانا ہے۔ ایسی اسکیموں میں آیوشمان بھارت، پردھان منتری جیون جیوتی بیمہ یوجنا، پردھان منتری سرکشا بیمہ یوجنا، پردھان منتری آواس یوجنا، اجولا یوجنا، سوبھاگیہ یوجنا اور سووچھ بھارت  مہم شامل ہیں۔انہوں نے ملک میں خواتین اور لڑکیوں کے امپاورمنٹ کے لئے کئے گئے اقدامات کے بارے میں بھی بتایا۔

وزیر اعظم نے کہا کہ پی ایم-ایس وائی ایم یوجنا، آیوشمان بھارت کے تحت دستیاب کرائے گئے ہیلتھ کوریج اور پردھان منتری جیون جیوتی بیمہ یوجنا کے تحت لائف اینڈ ڈس ایبلٹی کوریج اور پردھان منتری سرکشا بیمہ یوجنا کے ساتھ مل کر غیر منظم شعبے کے ورکروں کو ان کے بڑھاپے میں جامع سوشل سیکورٹی کوریج کو یقینی بنائے گی۔

بدعنوانی کے خلاف اپنے عزم کا اعادہ کرتے ہوئے وزیر اعظم نے کہا کہ ان کی حکومت بچولیوں اور بدعنوانی کو ختم کرنے کے تئیں پابند عہد ہے۔ انہوں نے مزید کہا کہ وزیر اعظم ہمیشہ مستعد رہتے ہیں۔

م ن۔م م۔ن ع

U: 1388