पत्र सूचना कार्यालय

সহকাৰ সে সমৃদ্ধি (Sahkar Se Samriddhi)

ভাৰতৰ সমবায় আন্দোলনক শক্তিশালীকৰণৰ পাঁচ বছৰ

ভাৰতৰ সমবায় যাত্ৰা: সামূহিক সমৃদ্ধিৰ ভিত্তিত আগবঢ়া এক যাত্ৰা

ভাৰতৰ সমবায় আন্দোলন "বসুধৈৱ কুটুম্বকম্" (Vasudhaiva Kutumbakam)-ৰ দৰ্শনত গভীৰভাৱে শিপাই আছে, যাৰ বিশ্বাস হৈছে যে সমগ্ৰ পৃথিৱী এখনেই পৰিয়াল। সমবায়সমূহে দীৰ্ঘদিন ধৰি যৌথ মালিকীস্বত্ব, পাৰস্পৰিক সহযোগিতা আৰু অন্তৰ্ভুক্তিমূলক উন্নয়নৰ প্ৰতিষ্ঠান হিচাপে কাম কৰি আহিছে। গ্ৰাম্য ঋণ, দুগ্ধ, মীনপালন, গৃহ নিৰ্মাণ আৰু বিপণনৰ পৰা আৰম্ভ কৰি, সমবায়সমূহে লাখ লাখ লোকক বজাৰ, বিত্তীয় সেৱা আৰু জীৱিকাৰ সুযোগ লাভ কৰাত সক্ষম কৰি তুলিছে। ৬ জুলাই, ২০২১ তাৰিখে প্ৰতিষ্ঠা কৰা সমবায় মন্ত্ৰালয়ে সমবায় খণ্ডৰ ৰূপান্তৰকাৰী সম্ভাৱনাক উন্মোচন কৰাৰ ক্ষেত্ৰত চৰকাৰৰ অংগীকাৰক প্ৰতিফলিত কৰে, যাৰ লক্ষ্য হৈছে প্ৰতিষ্ঠানসমূহক শক্তিশালী কৰি ভৱিষ্যতৰ বাবে অধিক সক্ষম কৰি তোলা।

ডিজিটেল আৰু প্ৰতিষ্ঠানগত সংস্কাৰৰ অগ্ৰগতি

সমবায় মন্ত্ৰালয়ৰ ৫ম প্ৰতিষ্ঠা দিৱস ৬ জুলাই, ২০২৬ তাৰিখে ভাৰত মণ্ডপম, নতুন দিল্লীত উদযাপন কৰা হয়। এই উপলক্ষে ভাৰতৰ সমবায় পৰিৱেশতন্ত্ৰক অধিক শক্তিশালী কৰাৰ উদ্দেশ্যে একাধিক গুৰুত্বপূৰ্ণ ডিজিটেল আৰু আন্তঃগাঁথনি (Infrastructure) সম্পৰ্কীয় পদক্ষেপ গ্ৰহণ কৰা হয়। ইয়াৰ অন্যতম মুখ্য আকৰ্ষণ আছিল ৫০,০০০খন প্ৰাথমিক কৃষি ঋণ সমবায় সমিতি (Primary Agricultural Credit Societies) চমুকৈ PACS ক e-PACSলৈ ৰূপান্তৰ কৰা।

এই কাৰ্যসূচীত সমবায় সংৰক্ষণ আন্তঃগাঁথনি শক্তিশালী কৰাৰ উদ্দেশ্যে ৪৭টা শস্য সংৰক্ষণ গুদামঘৰৰ আধাৰশিলা স্থাপনো কৰা হয়। ৰাষ্ট্ৰীয় দুগ্ধ উন্নয়ন ব'ৰ্ড (National Dairy Development Board) চমুকৈ NDDBৰ বাবে দুগ্ধ যোগান পৰ্যালোচনা ডেশ্বব'ৰ্ড পৰ্টেল (Milk Supply Review Dashboard Portal) মুকলি কৰা হয়, যাতে দুগ্ধ সংগ্ৰহ আৰু বিতৰণ অধিক ফলপ্ৰসূভাৱে পৰিচালনা কৰিব পৰা যায়। ইয়াৰ উপৰিও ৰাষ্ট্ৰীয় নগৰ সমবায় বিত্ত আৰু উন্নয়ন নিগম (National Urban Cooperative Finance and Development Corporation) চমুকৈ NUCFDC-ৰ দুটা মুখ্য পদক্ষেপ — সহকাৰ চি.বি.এছ. (Sahakar CBS) আৰু সহকাৰ সহযোগী (Sahakar Sahyogi) — উন্মোচন কৰা হয়। সহকাৰ চি.বি.এছ. (Sahakar CBS) হৈছে নগৰ সমবায় বেংকসমূহৰ বাবে এক কেন্দ্ৰীভূত মূল বেংকিং সমাধান (Core Banking Solution)। সহকাৰ সহযোগী (Sahakar Sahyogi) হৈছে এক সংলাপভিত্তিক কৃত্ৰিম বুদ্ধিমত্তা (Conversational AI)-চালিত মঞ্চ, যি গ্ৰাহক সেৱা আৰু বেংকিং কাৰ্যকলাপ অধিক উন্নত কৰাৰ উদ্দেশ্যে প্ৰস্তুত কৰা হৈছে।

ভাৰতৰ সমবায়সমূহ: এক দৃষ্টিত পৰিসৰ

বৰ্তমান ভাৰতত বিশ্বৰ অন্যতম বৃহৎ সমবায় পৰিৱেশতন্ত্ৰ গঢ়ি উঠিছে, যিয়ে অৰ্থনীতিৰ প্ৰায় প্ৰতিটো খণ্ডকে সামৰি লৈছে। এই প্ৰতিষ্ঠানসমূহে তৃণমূল পৰ্যায়ৰ অৰ্থনৈতিক অংশগ্ৰহণৰ ভেটি হিচাপে কাম কৰি আছে আৰু কৃষক, দুগ্ধ উৎপাদক, মৎস্যজীৱী, শিল্পী-কাৰিকৰ আৰু শ্ৰমিকসকলক আয়ৰ সুযোগৰ সৈতে সংযোগ স্থাপন কৰিছে।

সমবায়সমূহক গাঁথনিগত সংস্কাৰৰ জৰিয়তে শক্তিশালীকৰণ

যোৱা ৫ বছৰত চৰকাৰে ভাৰতৰ সমবায় পৰিৱেশতন্ত্ৰক অধিক শক্তিশালী কৰাৰ উদ্দেশ্যে ৰূপান্তৰমূলক সংস্কাৰ কাৰ্যকৰী কৰিছে। এই সংস্কাৰসমূহে সমবায়সমূহক অধিক অন্তৰ্ভুক্তিমূলক, স্বচ্ছ, ডিজিটেলভাৱে সক্ষম আৰু অৰ্থনৈতিকভাৱে অধিক শক্তিশালী কৰি তোলাত গুৰুত্ব আৰোপ কৰিছে। এই পদক্ষেপসমূহে সমবায়সমূহক তৃণমূল পৰ্যায়ৰ সমৃদ্ধি আৰু অন্তৰ্ভুক্তিমূলক সামাজিক-অৰ্থনৈতিক বিকাশৰ অধিক শক্তিশালী চালিকাশক্তি হিচাপে গঢ়ি তুলিছে। সমবায় মন্ত্ৰালয় প্ৰতিষ্ঠাৰ পিছৰে পৰা ১৫২টাতকৈ অধিক মুখ্য পদক্ষেপ গ্ৰহণ কৰা হৈছে। এই পদক্ষেপসমূহে পৰম্পৰাগত সমবায় প্ৰতিষ্ঠানসমূহক আধুনিকীকৰণ কৰাৰ লগতে বিকাশ আৰু বহুমুখীকৰণৰ নতুন সুযোগ সৃষ্টি কৰিছে।

১. PACSৰ পুনৰুজ্জীৱন: ঋণ প্ৰতিষ্ঠানৰ পৰা গ্ৰাম্য বিকাশ কেন্দ্ৰলৈ

প্ৰাথমিক কৃষি ঋণ সমবায় সমিতি (Primary Agricultural Credit Societies) চমুকৈ PACS হৈছে স্বল্পম্যাদী সমবায় ঋণ গাঁথনিৰ তৃণমূল ভেটি। এইসমূহে বৰ্তমান বহুসেৱামূলক প্ৰতিষ্ঠান হিচাপে সক্ৰিয়ভাৱে কাম কৰি আছে আৰু গ্ৰাম্য অৰ্থনৈতিক সেৱাসমূহৰ প্ৰথম সংযোগস্থল হিচাপে পৰিগণিত হৈছে।

জুন ২০২৬ পৰ্যন্ত PACS-ৰ বাবে হোৱা মুখ্য অগ্ৰগতি হৈছে—

• ৩২খন ৰাজ্য/কেন্দ্ৰীয় শাসিত অঞ্চলত আদৰ্শ উপ-আইন (Model Bye-laws)ৰ জৰিয়তে PACS-সমূহক ২৫টাতকৈ অধিক ব্যৱসায়িক কাৰ্যকলাপ চলোৱাৰ অনুমতি দিয়া হৈছে।
• PACS-এ এতিয়া কেৱল ঋণ সেৱাতে সীমাবদ্ধ নাথাকি খুচুৰা ব্যৱসায়, সংৰক্ষণ, স্বাস্থ্যসেৱা, ইন্ধন আৰু ডিজিটেল সেৱা আদি ক্ষেত্ৰতো কাম কৰি আছে।
• ৩৯৪টা PACS-এ খুচুৰা ইন্ধন বিক্ৰী কেন্দ্ৰ (Retail Fuel Outlet)-ৰ বাবে আবেদন কৰিছে আৰু ৩টা আউটলেট ইতিমধ্যে আৰম্ভ কৰা হৈছে।
• ৩৯,১৭৭টা PACS প্ৰধানমন্ত্ৰী কিষাণ সমৃদ্ধি কেন্দ্ৰ (PM Kisan Samriddhi Kendra) হিচাপে কাৰ্যকৰী হৈ আছে।
• ৫৪,১১৭টা PACS সাধাৰণ সেৱা কেন্দ্ৰ (Common Service Centre) চমুকৈ CSC হিচাপে কাৰ্যকৰী হৈ আছে।
• ৪,২৪৮টা PACS-ক জনৌষধি কেন্দ্ৰ স্থাপনৰ অনুমোদন দিয়া হৈছে; ইয়াৰে ৮৪৩টা কাৰ্যকৰী হ'বলৈ সাজু।

এই বহুমুখীকৰণে গাঁও পৰ্যায়ত অত্যাৱশ্যকীয় সেৱাসমূহৰ প্ৰৱেশাধিকাৰ উল্লেখযোগ্যভাৱে উন্নত কৰিছে।

২. PACS-ৰ ডিজিটেল ৰূপান্তৰ

সমবায় শাসন ব্যৱস্থা আৰু কাৰ্যদক্ষতা শক্তিশালী কৰাৰ ক্ষেত্ৰত প্ৰযুক্তি কেন্দ্ৰীয় ভূমিকা পালন কৰিছে। জুন ২০২৬ পৰ্যন্ত PACS-ৰ ডিজিটেলীকৰণৰ ক্ষেত্ৰত হোৱা অগ্ৰগতি হৈছে—

• ২০২২ চনত প্ৰাৰম্ভিক ২,৫১৬ কোটি টকাৰ আবণ্টনৰ তুলনাত ২০২৫ চনত মুঠ আৰ্থিক ব্যয় ২,৯২৫.৩৯ কোটি টকালৈ বৃদ্ধি কৰা হৈছে।
• ৬৩,০০০টা PACS-ৰ কম্পিউটাৰাইজেশ্যনৰ সময়সীমা ৩১ মাৰ্চ, ২০২৭ পৰ্যন্ত নিৰ্ধাৰণ কৰা হৈছে।
• ৭৯,৬৩০টা PACS-ক অনুমোদন জনোৱা হৈছে; ইয়াৰে ৬৩,৪২৮টা PACS-এ বৰ্তমান ERP (Enterprise Resource Planning) ছফ্টৱেৰ ব্যৱহাৰ কৰি আছে।
• ৬৫ হাজাৰতকৈ অধিক PACS-লৈ হাৰ্ডৱেৰ যোগান ধৰা হৈছে।
• ৪২,৭০০টাতকৈ অধিক PACS-ত অনলাইন অডিট সম্পন্ন কৰা হৈছে।
• ERP ছফ্টৱেৰ ১৪টা ভাষাত উপলব্ধ কৰা হৈছে।

PACS-ৰ ডিজিটেলকৰণে স্বচ্ছতা, হিচাপ-নিকাচ আৰু সেৱা প্ৰদান ব্যৱস্থা উল্লেখযোগ্যভাৱে উন্নত কৰিছে।

৩. তৃণমূল পৰ্যায়ত সমবায়ৰ বিস্তাৰ

চৰকাৰে প্ৰতিখন গ্ৰাম পঞ্চায়তক সমবায় প্ৰতিষ্ঠানসমূহৰ সৈতে সংযুক্ত কৰাটো নিশ্চিত কৰাৰ ওপৰত গুৰুত্ব আৰোপ কৰিছে—

• এতিয়ালৈকে ৩৭,৪৫৪টা নতুন বহুমুখী PACS, দুগ্ধ সমবায় সমিতি আৰু মীন সমবায় সমিতি পঞ্জীয়ন কৰা হৈছে।
• ২.৫৫ লাখতকৈ অধিক গ্ৰাম পঞ্চায়তত PACS-ৰ উপস্থিতি আছে।
• ৮৭,১৫৯টাতকৈ অধিক গ্ৰাম পঞ্চায়ত দুগ্ধ সমবায়ৰ আওতাত আছে।
• ২৯,৯৬৪টাতকৈ অধিক গ্ৰাম পঞ্চায়ত মীন সমবায়ৰ আওতাত আছে।

এই সম্প্ৰসাৰণে সেৱাৰ পৰা বঞ্চিত অঞ্চলসমূহত সমবায়ৰ প্ৰৱেশাধিকাৰ অধিক শক্তিশালী কৰি তুলিছে।

৪. সমবায়ৰ জৰিয়তে গ্ৰাম্য আন্তঃগাঁথনি নিৰ্মাণ

চৰকাৰে সমবায়সমূহৰ জৰিয়তে বিশ্বৰ সৰ্ববৃহৎ বিকেন্দ্ৰীকৃত শস্য সংৰক্ষণ আঁচনি (Decentralized Grain Storage Plan) ৰূপায়ণ কৰি আছে—

• ১৪৫টা PACS-ত গুদামঘৰ সম্পূৰ্ণ কৰা হৈছে।
• ৬৮,৭০২ মেট্ৰিক টনতকৈ অধিক সংৰক্ষণ ক্ষমতা সৃষ্টি কৰা হৈছে।

এই পদক্ষেপে চপোৱাৰ পিছৰ ক্ষতি হ্ৰাস কৰাত আৰু স্থানীয় সংৰক্ষণ সুবিধা আৰু উন্নত বজাৰ সময় নিৰ্বাচনৰ জৰিয়তে কৃষকৰ আয় বৃদ্ধি কৰাত সহায় কৰে।

৫. কৃষক উৎপাদক প্ৰতিষ্ঠান (FPO)-সমূহক শক্তিশালীকৰণ

উত্তম সামূহিক সংগ্ৰহ (Aggregation) আৰু বজাৰ প্ৰৱেশাধিকাৰৰ বাবে সমবায়সমূহক আধুনিক কৃষক উৎপাদক প্ৰতিষ্ঠানসমূহ (Farmer Producer Organizations) চমুকৈ FPOs-ৰ সৈতে সংযুক্ত কৰা হৈছে—

• সমবায় খণ্ডত ১,৮৬৩টা FPO গঠন কৰা হৈছে।
• PACS-ৰ জৰিয়তে ১,১১৭টা FPO গঠন কৰা হৈছে।
• ১,০৭০টা মীন FPO গঠন কৰা হৈছে আৰু ইয়াৰ সুবিধাৰ বাবে ৯৮ কোটি বিতৰণ কৰা হৈছে।

ইয়াৰ ফলত বজাৰৰ সৈতে সংযোগ, প্ৰক্ৰিয়াকৰণ আৰু কৃষকৰ আয় আহৰণৰ ক্ষমতা উন্নত হৈছে।

৬. কৰ ৰেহাই আৰু ব্যৱসায় কৰাৰ সহজতা

নীতি-সংস্কাৰৰ ফলত সমবায়সমূহৰ আৰ্থিক স্বাস্থ্যও উন্নত হৈছে। সমবায়সমূহৰ বাবে প্ৰৱৰ্তন কৰা মুখ্য কৰ ৰেহাইসমূহ হৈছে—

• ১ কোটি টকাৰ পৰা ১০ কোটি টকা আয় থকা সমবায়সমূহৰ বাবে উপ-কৰ ১২%ৰ পৰা ৭%লৈ হ্ৰাস কৰা হৈছে।
• ন্যূনতম বিকল্প কৰ (Minimum Alternative Tax) চমুকৈ MAT ১৮.৫%ৰ পৰা ১৫%লৈ হ্ৰাস কৰা হৈছে।
• উৎসত কৰ কৰ্তন (TDS)ৰ নগদ ধন উত্তোলনৰ সীমা ১ কোটি টকাৰ পৰা ৩ কোটি টকালৈ বৃদ্ধি কৰা হৈছে।
• PACS আৰু প্ৰাথমিক সমবায় কৃষি আৰু গ্ৰাম্য উন্নয়ন বেংক (Primary Cooperative Agriculture and Rural Development Banks)-ৰ বাবে অধিক নগদ লেনদেনৰ সীমা নিৰ্ধাৰণ কৰা হৈছে।

এই পদক্ষেপসমূহে তাৰল্য বৃদ্ধি কৰাৰ লগতে নিয়ম পালনজনিত বোজা হ্ৰাস কৰিছে।

৭. শ্বেত বিপ্লৱ ২.০

শ্বেত বিপ্লৱ ২.০-ৰ অধীনত সমবায় দুগ্ধ খণ্ডক অধিক শক্তিশালী কৰা হৈছে। ইয়াৰ মূল লক্ষ্য হৈছে ২০২৮-২৯ চনৰ ভিতৰত দুগ্ধ সংগ্ৰহ ৫০% বৃদ্ধি কৰা।

• এতিয়ালৈকে ২৫,২৮২টা দুগ্ধ সমবায় সমিতি পঞ্জীয়ন কৰা হৈছে।
• মহিলা-নেতৃত্বাধীন দুগ্ধ সমবায়সমূহ আৰু সমবায়ৰ অধিক বিস্তৃত কভাৰেজৰ ওপৰত বিশেষ গুৰুত্ব আৰোপ কৰা হৈছে।

৮. নতুন ৰাষ্ট্ৰীয় সমবায় প্ৰতিষ্ঠানসমূহ

খণ্ডভিত্তিক বিকাশক অধিক শক্তিশালী কৰাৰ উদ্দেশ্যে তিনিটা নতুন ৰাষ্ট্ৰীয় বহুৰাজ্যিক সমবায় প্ৰতিষ্ঠান স্থাপন কৰা হৈছে। জুন ২০২৬ পৰ্যন্ত ইয়াৰ অগ্ৰগতি হৈছে—

• ৰাষ্ট্ৰীয় সমবায় ৰপ্তানি লিমিটেড (National Cooperative Exports Limited) চমুকৈ NCEL

NCEL হৈছে সমগ্ৰ দেশৰ বিভিন্ন সমবায় সমিতিৰ দ্বাৰা উৎপাদিত উদ্বৃত্ত সামগ্ৰী আৰু সেৱাৰ ৰপ্তানিৰ বাবে এক ছাতি-সংগঠন (Umbrella Organization)। জুন ২০২৬ পৰ্যন্ত NCEL-এ ৩৮খন দেশলৈ ১৫.৪ লাখ মেট্ৰিক টন সামগ্ৰী ৰপ্তানি কৰি ৬,২৯৫ কোটি টকাৰ ৰপ্তানি সম্পন্ন কৰিছে।

• ৰাষ্ট্ৰীয় সমবায় জৈৱিক লিমিটেড (National Cooperative Organics Limited) চমুকৈ NCOL

NCOL হৈছে জৈৱিক সামগ্ৰীৰ সংগ্ৰহ, ক্ৰয়, প্ৰমাণীকৰণ, পৰীক্ষণ, ব্ৰেণ্ডিং আৰু বিপণনৰ বাবে এক ছাতি-সংগঠন। জুন ২০২৬ পৰ্যন্ত ইয়াৰ ১৪,২৮৬টা সদস্য সমবায় আছে।

• ভাৰতীয় বীজ সহকাৰী সমিতি লিমিটেড (Bharatiya Beej Sahakari Samiti Limited) চমুকৈ BBSSL

BBSSL-এ সমবায় নেটৱৰ্কৰ জৰিয়তে “ভাৰত বীজ” ব্ৰেণ্ডৰ অধীনত উৎকৃষ্ট মানদণ্ডৰ বীজ উৎপাদন, ক্ৰয় আৰু বিতৰণৰ কাম কৰে। জুন ২০২৬ পৰ্যন্ত ইয়াৰ ৩৮,৬৬৫টা সদস্য সমবায় আছে।

৯. সক্ষমতা বিকাশ আৰু সমবায় শিক্ষা

চৰকাৰে শিক্ষা আৰু প্ৰতিষ্ঠানগত বিকাশৰ জৰিয়তে সমবায়সমূহক অধিক শক্তিশালী কৰি তুলিছে।

ত্ৰিভুৱন সহকাৰী বিশ্ববিদ্যালয় (Tribhuvan Sahkari University) ভাৰতৰ প্ৰথম সমবায় বিশ্ববিদ্যালয় হিচাপে স্থাপন কৰা হৈছে।

এই বিশ্ববিদ্যালয়ে সমবায় খণ্ডত শিক্ষা, গৱেষণা আৰু দক্ষতা বিকাশক সমৰ্থন আগবঢ়ায়।

ৰাষ্ট্ৰীয় সমবায় প্ৰশিক্ষণ পৰিষদ (National Council for Cooperative Trainin) আৰু NABARD-ৰ জৰিয়তে প্ৰশিক্ষণ কাৰ্যসূচী পৰিচালনা কৰা হয়।

এই পদক্ষেপসমূহে সমবায়সমূহৰ শাসন ব্যৱস্থা, নেতৃত্ব আৰু পৰিচালনাগত কাৰ্যদক্ষতা অধিক শক্তিশালী কৰিছে।

ৰাষ্ট্ৰীয় সমবায় উন্নয়ন নিগম (National Cooperative Development Corporation): বিনিয়োগৰ চালিকা শক্তি

ৰাষ্ট্ৰীয় সমবায় উন্নয়ন নিগম (National Cooperative Development Corporation) চমুকৈ NCDC-এ সমবায়সমূহৰ বিকাশত বিত্তীয় সহায় আগবঢ়োৱাৰ ক্ষেত্ৰত এক গুৰুত্বপূৰ্ণ ভূমিকা পালন কৰিছে। ২০২৫-২৬ বিত্তীয় বৰ্ষত (FY 2025-26) NCDC-এ ১.৫৫ লাখ কোটি টকাৰ অনুমোদন জনাইছে আৰু ১.২৭ লাখ কোটি টকা বিতৰণ কৰিছে। মে' ২০২৬ পৰ্যন্ত ১০,০০০টা কৃষক উৎপাদক প্ৰতিষ্ঠান (FPOs) গঠন আৰু প্ৰচাৰৰ আঁচনিৰ অধীনত কৃষক উৎপাদক প্ৰতিষ্ঠান (FPOs) আৰু ক্লাষ্টাৰ-ভিত্তিক ব্যৱসায়িক সংগঠন (Cluster-Based Business Organizations) চমুকৈ CBBOসমূহলৈ ২,৩২০ কোটি টকা বিতৰণ কৰিছে। এই ধাৰাবাহিক বিত্তীয় সহায়ে বিভিন্ন খণ্ডত সমবায়সমূহৰ সম্প্ৰসাৰণ ত্বৰান্বিত কৰিছে।

ভাৰত টেক্সি: ভাৰতৰ প্ৰথম সমবায়ভিত্তিক গতিশীলতা মঞ্চ

ভাৰত টেক্সি হৈছে সহকাৰ টেক্সি সমবায় লিমিটেডৰ এক পদক্ষেপ। সহকাৰ টেক্সি সমবায় লিমিটেড হৈছে সমবায় আৰ্হিৰ ওপৰত ভিত্তি কৰি গঢ়ি তোলা চালক-কেন্দ্ৰিক গতিশীলতা মঞ্চ। ইয়াৰ লক্ষ্য হৈছে চালকসকলক আৰ্থিকভাৱে সবল কৰা আৰু জনসাধাৰণক সুলভ, নিৰাপদ আৰু নিৰ্ভৰযোগ্য পৰিবহণ সেৱা আগবঢ়োৱা।

বৰ্তমান ভাৰত টেক্সি-ত ৬.৩৭ লাখ পঞ্জীয়নভুক্ত চালক আৰু ৩৫.৭৭ লাখ পঞ্জীয়নভুক্ত গ্ৰাহক আছে। এই সেৱা দিল্লী-এন.চি.আৰ., গুজৰাট, লক্ষ্ণৌ, চণ্ডীগড়, মুম্বাই, জয়পুৰ আৰু কানপুৰত কাৰ্যকৰী হৈ আছে। অহা কেইমাহমানৰ ভিতৰত ৰাঁচী, পাটনা, গুৱাহাটী, ভূপাল, কলকাতা, ইন্দোৰ আৰু নাগপুৰত এই সেৱা আৰম্ভ কৰাৰ পৰিকল্পনা কৰা হৈছে।

বিকশিত ভাৰত গঢ়াত সমবায়ৰ ভূমিকা

পাঁচ বছৰত সমবায় মন্ত্ৰালয়-এ সমবায়সমূহক অন্তৰ্ভুক্তিমূলক বিকাশৰ চালিকাশক্তিলৈ ৰূপান্তৰিত কৰিছে। অধিক শক্তিশালী প্ৰতিষ্ঠান, উন্নত সেৱা প্ৰদান ব্যৱস্থা আৰু ডিজিটেল প্ৰযুক্তিৰ বিস্তৃত গ্ৰহণে তৃণমূল পৰ্যায়ত ইয়াৰ প্ৰভাৱ অধিক শক্তিশালী কৰিছে। সম্প্ৰসাৰিত আন্তঃগাঁথনি আৰু উন্নত বজাৰ প্ৰৱেশাধিকাৰে গ্ৰাম্য অৰ্থনীতিক অধিক শক্তিশালী কৰিছে। সমবায়-নেতৃত্বাধীন বিকাশৰ জৰিয়তে মহিলা আৰু কৃষকসকলে এতিয়া অধিক সুযোগ লাভ কৰিছে।

ভাৰত যিদৰে অন্তৰ্ভুক্তিমূলক আৰু বহনক্ষম উন্নয়নৰ পথত আগবাঢ়িছে, সমবায়সমূহেও সমতাভিত্তিক বিকাশ আৰু স্থিতিস্থাপকতা বৃদ্ধিত অবিৰতভাৱে ভূমিকা পালন কৰি যাব। “সহকাৰ সে সমৃদ্ধি (Sahkar Se Samriddhi)”-ৰ দৃষ্টিভংগীৰে অনুপ্ৰাণিত হৈ সমবায় আন্দোলনে এক স্থিতিস্থাপক, আত্মনিৰ্ভৰশীল আৰু সমৃদ্ধ ভাৰত গঢ়ি তোলাৰ যাত্ৰা অব্যাহত ৰাখিছে।

তথ্যসূত্ৰসমূহ

সমবায় মন্ত্ৰালয়

https://cooperation.gov.in/en/about-primary-agriculture-cooperative-credit-societies-pacs

https://www.pib.gov.in/PressReleasePage.aspx?PRID=2146717&reg=48&lang=2

https://www.pib.gov.in/PressReleasePage.aspx?PRID=2241955&reg=3&lang=1

https://www.pib.gov.in/PressReleasePage.aspx?PRID=2214633&reg=3&lang=2

https://www.pib.gov.in/PressReleasePage.aspx?PRID=2201729&reg=3&lang=1

https://www.pib.gov.in/PressReleasePage.aspx?PRID=2281327&reg=48&lang=1

https://sansad.in/getFile/annex/270/AU4161_Yqq3fo.pdf?source=pqars

পি.আই.বি. বেকগ্ৰাউণ্ডাৰ

https://www.pib.gov.in/PressNoteDetails.aspx?NoteId=156980&ModuleId=3&reg=22&lang=13

pdf চাবলৈ ইয়াত ক্লিক কৰক

***

পিআইবি গৱেষণ

(तथ्य सामग्री आईडी: 150727) आगंतुक पटल : 18