57th International Film Festival of India 2026
20 – 28 Nov 2026

'बंदखणीतल्यान सुटपी लोकांक आपली जीण परत उबारपाक दुसरी संदी मेळपाक जाय': 57व्या इफ्फींत ‘न्यू होम’ विशीं दिग्दर्शक निकिता ग्रुशीन


सांस्कृतीक समज आनी सहकार्या वरवीं सिनेमा भारत-रशियाचे संबंद घटमूट करूंक शकता: दिग्दर्शक निकिता ग्रुशीन

पोस्ट केल्लें: 22 NOV 2026 2:14PMby PIB Mumbaiउजवाडणी आयडी: 2339954Views: 5

गोंय, 22 नोव्हेंबर 2026

 

बऱ्याच वर्सांच्या बंदखणी उपरांत समाजांत परत येवपी लोकांक आपली जिण परतून उबरपा खातीर आनी आपल्या भूतकाळातल्यान भायर सरपा खातीर खूब वेळा दुर्लक्षित अशा संघर्शाक तोंड दिवचें पडटा, अशें रशियन चित्रपट निर्माते आनी ‘न्यू होम’चे दिग्दर्शक श्री. निकिता ग्रुशिन हांणी सांगले. ते गोंयांत 57व्या भारतीय आंतरराष्ट्रीय चित्रपट महोत्सवा (IFFI) वेळार आयोजीत पत्रकार परिशदेंत उलयताले. 101 मिनटांच्या रशियन भाशेंतल्या ह्या चित्रपटाचो IFFI 2026 त जागतिक प्रीमियर जाता. महोत्सवांत भागीदार देश म्हणून भोवमानीत केल्ल्या रशियाच्या खासा चित्रपट प्रदर्शनाचो हो चित्रपट एक भाग आसा.

आपल्या चित्रपटा फाटल्या प्रेरणेविशीं उलयतना, श्री. ग्रुशिन हांणी म्हळें, दीर्घ काळ बंदखणीची शिक्षा भोगिल्ल्या आनी पुनर्वसन प्रक्रियेंतल्यान वचपी कांय लोकांकडेन जाल्ल्या संवादांतल्यान अश्या लोकांक समाजांत परतून मिसळपाक कितें त्रास जातात, हाची तांका जाणीव जाली. अश्या अणभवांक पुरेसें लक्ष मेळना, अशें तांकां दिसून आयलें आनी आंतरराष्ट्रीय पांवड्यार सादर जावपी आपल्या पयल्या चित्रपटाच्या माध्यमांतल्यान तांच्यो काणयो चड व्यापक प्रेक्षकां मेरेन पावोवपाची तांका इत्सा आशिल्ली. बंदखणींतल्यान सुटल्या उपरांत आपलें जिवीत परतून उबारपाचो आनी अर्थ सोदपाचो यत्न करपी दादले आनी बायल मनश्यांच्या, संघर्षाचें चित्रण ह्या चित्रपटांत केलां.

ग्रुशिन हांणी बरयल्लो आनी दिग्दर्शीत केल्लो ‘न्यू होम’ (Novyy Dom) हो चित्रपट अॅना ह्या बायल मनशेची कथा सांगता. सात वर्सांचो तुरुंगवास भोगून भायर आयिल्ल्या अॅना कडेन पयशे ना, कुटुंब ना आनी जिणेंत फुडें कितें करचें हाची स्पश्ट दिशाय ना. समाज सेवेच्या आदारान तिका नोकरी, रावपाची वेवस्था आनी एक आदार गट मेळटा, जंय तिची रोमन कडेन भेट जाता. ताच्या मदतीन ती हळूहळू आपलें जीवित परत उबारपाचो यत्न करता. पूण आपल्या फुडल्या भवितव्याचो निर्णय घेवंक शकपी एक कठीण निर्णय घेवचे पयलीं अॅनाक आपल्या भूतकाळाक आनी मनांतल्या संघर्शाक तोंड दिवचे पडटा. अपराधीपणाची भावना, माफी, पुनर्वसन आनी जिणेंत दुसरी संदी मेळपाची शक्यता अशा विशयांचो वेध हो चित्रपट घेता.

मुखेल पात्राच्या निर्मितीविशीं उलयतना श्री. ग्रुशिन हांणी स्पश्ट केलें की, अॅना हें पात्र खंयच्याय एका विशिश्ट व्यक्तीचेर आदारिल्लें ना. ताचे बदला, अश्याच परिस्थितींतल्यान गेल्ल्या आनी आपलें जिवीत परतून उबारपाचो यत्न करपी जायत्या लोकांकडेन जाल्ल्या संवादांतल्यान तांका प्रेरणा मेळ्ळी. प्रत्यक्ष जिणेंतल्या ह्या निरीक्षणांतल्यान चित्रपटाच्या कथानकाचो पायो तयार जालो. आपल्या स्वताच्या लेखनशैलीच्या आनी सर्जनशील कल्पनाशक्तीच्या माध्यमांतल्यान तांणी ह्या कथेक आकार दिलो.

बंदखणींतल्यान सुटपी लोकांक भेडसावपी समस्या खंयच्याय एका देशा मेरेन वा समाजा मेरेन मर्यादीत नात, अशें चित्रपटाच्या मुखेल संदेशाविशीं उलयतना दिग्दर्शकान नदरेक हाडलें. आपली शिक्षा पुराय केल्या उपरांत लेगीत, जायत्यांच्या मनांत अपराधीपणाची खोल भावना उरता. ही भावना तांच्या निर्णयांचेर परिणाम करता आनी तांकां जिणेंत फुडें वचपापासून आडायता. अॅनाच्या प्रवासाच्या माध्यमांतल्यान व्यक्तीक ह्या भावनिक वज्याक कशें तोंड दिवचे पडता आनी परत नव्यान जिण सुरू करपाचें धैर्य कशें मेळयतात, हाचो वेध घेवपाचो आपणे यत्न केलो, अशें तांणी सांगलें.

पत्रकार परिशदेंत दिग्दर्शकां बरोबर  हाजीर आशिल्ल्यो छायाचित्रकार एकातेरिना स्मोलिना हांणी तांच्या सर्जनशील भागीदारीविशीं म्हायती दिली. फिल्म स्कूलाच्या दिसांपासून आशिल्ल्या आपल्या वळखीची याद काडून तांणी सांगलें, हाचे पयलीं तांणी तीन लघुपटांनी (शॉर्ट फिल्म्स) एकठांय काम केल्लें. जायत्यां वर्सांची मैत्री आनी एकामेकांच्या काम करपाच्या पद्दतींची आशिल्ली वळख हाका लागून चित्रपटाच्या चित्रीकरणाच्या वेळार तांच्या मदीं सहज समन्वय निर्माण जालो. देखून सर्जनशील प्रक्रिया आनंददायी आनी समाधानकारक जाली.

सिनेमॅटोग्राफी मळार येवपी बायलांक खंयच्या आव्हानांक तोंड दिवचें पडटा, ह्या प्रश्नाचेर उलयतना स्मोलिना हांणी तांकाय सुरवातीक भंय आनी अनिश्चिततेचो अणभव आयिल्लो, अशें सांगलें. पूण ल्हवू ल्हवू तांणी ह्या भंयाचेर मात केली. सुरवातीच्या भंयाक लागून स्वताक फाटीं दवरचे न्हय, तर ह्या क्षेत्रांत करिअर करपाक इत्सुक आशिल्ल्या बायलांनी आत्मविश्वास आनी दृढनिश्चयान ह्या वेवसायाक सामोरे वचचें, अशें आवाहन तांणी केलें.

भारतीय आनी रशियन सिनेमा मदि चड बऱ्या सहकार्याच्या संदींविशीं उलयतना श्री. ग्रुशिन हांणी दोनूय देशांमदले दीर्घ काळापासून आशिल्ल्या चित्रपटसंबंधांची याद करून दिली. तांणी सांगलें, सोव्हिएत संघांत भारतीय चित्रपट खूब लोकप्रिय आशिल्ले आनी आयज लेगीत रशियन प्रेक्षकांच्या काळजांत तांची एक खाशेली सुवात आसा.

फुडारांत भारत-रशिया हांच्या मदल्या चित्रपटविशीच्या भागीदारीच्या शक्यतांविशीं श्री. ग्रुशिन हांणी सकारात्मकता उक्तायली. हें सहकार्य फकत आर्थिक गुंतवणूक आनी तांत्रिक देवाणघेवाण मेरेन मर्यादीत उरूंक फावना, हाचेर तांणी भर दिलो. दोनूय देशांमदले सांस्कृतिक नातें आनी लोकांमदले संबंध उजवाडाक हाडपी कथा, एक घटमुट सर्जनशील भागीदारी खातीर अर्थपूर्ण पायो जावंक शकतात, अशें तांणी नमूद केलें.

‘न्यू होम’ हो चित्रपट अॅनाच्या प्रवासा वरवीं एक असो मानवी अणभव मुखार हाडटा जो राष्ट्रीय आनी सांस्कृतिक शिमो हुपून वता: हो सन्मान, स्वीकारार्हता आनी जिवीत परतून सुरू करपाचे एके संदीचो सोद आसा. IFFI 2026 च्या ‘शीमे पलीकडल्यो काणयो' ह्या संकल्पनेकडेन सुसंगत आशिल्लो हो चित्रपट, वेगवेगळ्या वास्तवांक लागीं हाडपाची, सहानुभूती वाडोवपाची आनी समान मानवी अणभवांच्या माध्यमांतल्यान प्रेक्षकांक एकठांय जोडपाची सिनेमाची क्षमता अधोरेखित करता. रशियाच्या भागीदार देश शोकेसाचो एक भाग म्हूण ह्या फिल्माचें प्रदर्शन, भारत आनी जगांतल्या हेर देशांमदली सांस्कृतिक समज वाडोवपाक आनी सर्जनशील देवाणघेवाणीक प्रोत्साहन दिवपाक ह्या महोत्सवाची भूमिका लेगीत दाखोवन दिता.

ह्या पत्रकार परिशदेचें संचालन श्री. किरण मुरली हांणी केलें.

Read IFFILOID here: https://www.pib.gov.in/iffi/57/iffiLoid.aspx?yr=2026&lang=1&reg=48

 

* * *

पीआयबी मुंबई | मनाली प्रभूगांवकर/मोनाली प्रभू/दर्शना राणे


Great films resonate through passionate voices. Share your love for cinema with #IFFI2026 and #StoriesWithoutBorders. Tag us @pibindia on Instagram and @PIB_India on X, and we will help amplify your festival moments!

For accredited journalists, critics, bloggers, and vloggers seeking 1-on-1 interviews with filmmakers and festival juries, write to us at:
iffi.mediadesk@pib.gov.in with the subject line: Take One with PIB.


Official Release ID: 2339954
•
Media Centre: Goa
•
Festival Dates: Nov 20 – 28, 2026