પોસ્ટેડ ઓન:
21 NOV 2026 10:58PM by PIB Ahmedabad
કેન્દ્રીય ગૃહમંત્રી અને સહકારિતા મંત્રી શ્રી અમિત શાહે અરુણાચલ પ્રદેશમાં કાયદો અને વ્યવસ્થા, આંતરિક સુરક્ષા, સરહદ વ્યવસ્થાપન અને વિકાસ સંબંધિત મુખ્ય મુદ્દાઓ પર ચર્ચા કરવા માટે આજે ઇટાનગરમાં એક ઉચ્ચ-સ્તરીય સમીક્ષા બેઠકની અધ્યક્ષતા કરી હતી. આ બેઠકમાં અરુણાચલ પ્રદેશના મુખ્યમંત્રી શ્રી પેમા ખાંડુ; કેન્દ્રીય સંસદીય બાબતો અને લઘુમતી બાબતોના મંત્રી શ્રી કિરેન રિજિજુ; રાજ્યના નાયબ મુખ્યમંત્રી; વરિષ્ઠ મંત્રીઓ; અને કેન્દ્ર તથા રાજ્ય સરકારના ઉચ્ચ અધિકારીઓ ઉપસ્થિત રહ્યા હતા.
આ બેઠકમાં રાજ્યના કાયદો અને વ્યવસ્થા, ફોજદારી ન્યાય પ્રણાલી, માદક દ્રવ્યોની તસ્કરી, સાયબર ક્રાઇમ, આતંકવાદ અને ઉગ્રવાદ, વિદેશી નાગરિકો, પોલીસ આધુનિકીકરણ અને આપત્તિ વ્યવસ્થાપન સંબંધિત મુદ્દાઓની વ્યાપક સમીક્ષા કરવામાં આવી હતી.
કેન્દ્રીય ગૃહમંત્રી શ્રી અમિત શાહે રાજ્યમાં શાંતિ અને સુરક્ષા સુનિશ્ચિત કરવા માટે કેન્દ્રીય અને રાજ્યની સુરક્ષા એજન્સીઓ વચ્ચે બહેતર સંકલન, સ્થાનિક ગુપ્તચર નેટવર્કને મજબૂત કરવા અને સંવેદનશીલ વિસ્તારોમાં સતત દેખરેખ જાળવી રાખવા પર ભાર મૂક્યો હતો.
અરુણાચલ પ્રદેશ ચીન સાથે જે આશરે 1,126-કિલોમીટર લાંબી આંતરરાષ્ટ્રીય સરહદ ધરાવે છે તેની સંવેદનશીલતાને ધ્યાનમાં રાખીને, ગૃહમંત્રીએ સરહદ સુરક્ષા અને વ્યૂહાત્મક માળખાગત સુવિધાઓની સમીક્ષા કરી હતી. તેમણે સરહદી વિસ્તારોમાં માર્ગ જોડાણ, બોર્ડર આઉટપોસ્ટ્સ, હેલિપેડ અને ટેલિકોમ્યુનિકેશન સુવિધાઓના વિસ્તરણ પર, તેમજ સ્થાનિક વસ્તી માટે આજીવિકાની તકો વધારવા માટે 'વાઇબ્રન્ટ વિલેજીસ પ્રોગ્રામ'ના અસરકારક અમલીકરણ પર પણ વિશેષ ભાર મૂક્યો હતો.
શ્રી અમિત શાહે નવા ફોજદારી કાયદાઓના અસરકારક અમલીકરણ, સમયસર તપાસ, વૈજ્ઞાનિક પુરાવા એકત્ર કરવા, ઈ-સાક્ષ્ય અને ઈ-સમન્સ પ્રણાલીઓના ઉપયોગ અને પોલીસ તથા ફરિયાદ પક્ષ વચ્ચે બહેતર સંકલન સુનિશ્ચિત કરવા પર ભાર મૂક્યો હતો. તેમણે પડતર કેસોના ઝડપી નિકાલ અને તપાસની ગુણવત્તામાં સુધારો કરવાને પ્રાથમિકતા આપવાની જરૂરિયાત પર પણ પ્રકાશ પાડ્યો હતો.
માદક દ્રવ્યોની તસ્કરી અને ગેરકાયદેસર ખેતી સામેના અભિયાનોની સમીક્ષા કરતી વખતે, કેન્દ્રીય ગૃહમંત્રીએ 'ઓપરેશન ડોન' અને 'મિશન સુરક્ષા' હેઠળ હાથ ધરવામાં આવી રહેલી કાર્યવાહીનો તાગ મેળવ્યો હતો. પ્રધાનમંત્રી શ્રી નરેન્દ્ર મોદી દ્વારા હિમાયત કરાયેલા વિઝન, 2029 સુધીમાં 'નશામુક્ત ભારત'ની પ્રતિબદ્ધતાની પુનઃપુષ્ટિ કરતાં, શ્રી શાહે ગેરકાયદેસર પાકનો નાશ કરવા, તસ્કરી નેટવર્ક સામે કડક કાર્યવાહી કરવા, જનજાગૃતિ લાવવા અને વ્યસનમુક્તિ તથા પુનર્વસન સુવિધાઓને મજબૂત કરવા પર ભાર મૂક્યો હતો.
બેઠકમાં સાયબર ક્રાઇમની રોક માટે 1930 હેલ્પલાઇનના અસરકારક સંચાલન, સાયબર-ફોરેન્સિક ક્ષમતાઓના વિસ્તરણ અને પ્રશિક્ષિત નિષ્ણાતોની ઉપલબ્ધતા વધારવા અંગે ચર્ચા કરવામાં આવી હતી. આધુનિક સાધનોની જોગવાઈ, ઉન્નત તાલીમ સુવિધાઓ અને આવશ્યક સંસાધનોને મજબૂત કરવા સહિત પોલીસ આધુનિકીકરણ પર પણ ભાર મૂકવામાં આવ્યો હતો. વધુમાં, રાજ્યની ભૌગોલિક પરિસ્થિતિઓને ધ્યાનમાં રાખીને, આપત્તિ વ્યવસ્થાપન તંત્ર - જેમાં સ્ટેટ ડિઝાસ્ટર રિસ્પોન્સ ફોર્સ (SDRF), ફાયર સર્વિસીસ અને કટોકટી પ્રતિભાવ પ્રણાલીઓનો સમાવેશ થાય છે - તેની ક્ષમતા વધારવાની જરૂરિયાત પર પણ ચર્ચા કરવામાં આવી હતી.
બેઠક દરમિયાન, કેન્દ્ર અને રાજ્ય સરકારો વચ્ચે બહેતર સંકલન દ્વારા આંતરિક સુરક્ષાને મજબૂત કરવા, સરહદી વિસ્તારોમાં માળખાગત સુવિધાઓનો વિસ્તાર કરવા, સુરક્ષા એજન્સીઓની ક્ષમતાઓ વધારવા અને વિવિધ યોજનાઓના સમયબદ્ધ અમલીકરણને સુનિશ્ચિત કરવા પર ભાર મૂકવામાં આવ્યો હતો. બેઠકનો મુખ્ય ઉદ્દેશ્ય અરુણાચલ પ્રદેશમાં મજબૂત આંતરિક સુરક્ષા, સુરક્ષિત સરહદી વિસ્તારો અને સર્વાંગી વિકાસ સુનિશ્ચિત કરવાનો હતો.
કેન્દ્રીય ગૃહમંત્રી અને સહકારિતા મંત્રી શ્રી અમિત શાહે અરુણાચલ પ્રદેશના વિકાસ કાર્યોની સમીક્ષા કરવા માટે ઇટાનગરના લોકભવન ખાતે એક બેઠકની અધ્યક્ષતા પણ કરી હતી. આ બેઠકમાં અરુણાચલ પ્રદેશના મુખ્યમંત્રી શ્રી પેમા ખાંડુ, કેન્દ્રીય સંસદીય બાબતોના મંત્રી શ્રી કિરેન રિજિજુ, રાજ્યના નાયબ મુખ્યમંત્રી શ્રી ચોવના મેઈન, ગૃહમંત્રી શ્રી મામા નાતુંગ, લોકસભા સાંસદ શ્રી તાપીર ગાઓ અને રાજ્યસભા સાંસદ શ્રી તાઈ તાગક, કેન્દ્રીય ગૃહ સચિવ શ્રી ગોવિંદ મોહન, અને ગૃહ મંત્રાલય, સેન્ટ્રલ આર્મ્ડ પોલીસ ફોર્સિસ, આર્મી અને રાજ્ય સરકારના વરિષ્ઠ અધિકારીઓ ઉપસ્થિત રહ્યા હતા.
બેઠકમાં રાજ્યના મુખ્ય સચિવ શ્રી મનીષ કુમાર ગુપ્તાએ રાજ્યના વિકાસ અને મુખ્ય યોજનાઓની પ્રગતિ અંગે પ્રેઝન્ટેશન આપ્યું હતું. એવી માહિતી આપવામાં આવી હતી કે અરુણાચલ પ્રદેશની ગ્રોસ સ્ટેટ ડોમેસ્ટિક પ્રોડક્ટ (GSDP) 2015-16માં ₹20,373 કરોડથી વધીને 2026-27માં ₹50,651 કરોડ (અંદાજિત) થઈ ગઈ છે. માર્ગ નિર્માણની ગતિ છ ગણી વધી છે, જે દર વર્ષે 300 કિમીથી વધીને દર વર્ષે 1,800 કિમી થઈ છે. રાજ્યએ PMAY (ગ્રામીણ) અને જલ જીવન મિશન હેઠળ સંપૂર્ણ સંતૃપ્તિ હાંસલ કરી છે. એવી પણ માહિતી આપવામાં આવી હતી કે અરુણાચલ પ્રદેશ દેશમાં કિવીનો સૌથી મોટો ઉત્પાદક છે અને DPIITના ‘સ્ટેટ્સ સ્ટાર્ટઅપ ઇકોસિસ્ટમ રેન્કિંગ’માં ‘બેસ્ટ પરફોર્મર’ તરીકે પસંદગી પામ્યું છે. ‘વાઇબ્રન્ટ વિલેજીસ પ્રોગ્રામ’ હેઠળ, 455 સરહદી ગામડાઓમાં ₹2,875.17 કરોડના 2,414 પ્રોજેક્ટ્સમાંથી 1,099 પ્રોજેક્ટ્સ પૂર્ણ થઈ ગયા છે.
પ્રગતિની સમીક્ષા કરતી વખતે, કેન્દ્રીય ગૃહમંત્રીએ નિર્દેશ આપ્યો હતો કે રાજ્યના બજેટનો મોટો હિસ્સો રસ્તાઓ અને પુલો પાછળ ખર્ચવામાં આવી રહ્યો હોવા છતાં, એવા વિસ્તારોને પ્રાથમિકતા આપવી જોઈએ જ્યાં માર્ગ ઘનતા હજી પણ ઓછી છે. તેમણે જણાવ્યું હતું કે પ્રવાસન ક્ષેત્રમાં સારી ગુણવત્તાવાળા ‘હોમસ્ટે’ પર ધ્યાન આપવું જોઈએ, અને પ્રવાસીઓની સંખ્યા વર્તમાન 9.18 લાખથી વધારીને 15 લાખ કરવી જોઈએ. તેમણે કહ્યું હતું કે અરુણાચલ પ્રદેશ ઈંડા, માંસ, માછલી અને ડેરી ઉત્પાદનોમાં આત્મનિર્ભર બનવું જોઈએ.
કેન્દ્રીય ગૃહમંત્રી શ્રી અમિત શાહે જણાવ્યું હતું કે સમગ્ર રાજ્યમાં બાળકોનું 100% રસીકરણ અને સંસ્થાકીય પ્રસૂતિ સુનિશ્ચિત કરવી જોઈએ. તેમણે કહ્યું હતું કે ગામડાઓમાં 100% ડિજિટાઇઝેશન માટે એક યોજના તૈયાર કરવી જોઈએ. ‘જ્ઞાન ભારતમ મિશન’ હેઠળ, જ્ઞાન પ્રણાલીના નિષ્ણાતોને સામેલ કરવા જોઈએ, અને મહત્ત્વપૂર્ણ હસ્તપ્રતો અને દસ્તાવેજો માટે સઘન શોધખોળ હાથ ધરવી જોઈએ.
શ્રી અમિત શાહે જણાવ્યું હતું કે ‘મિશન કૃષિ વીર’ અને ‘મિશન અરુણ હિમવીર’ હેઠળ, એક અલગ અભિગમ અપનાવવો જોઈએ, જેમાં પ્રથમ સુરક્ષા દળોની જરૂરિયાતોનું મૂલ્યાંકન કરવું જોઈએ અને ત્યારબાદ ગામડાઓને તે જરૂરિયાતો પૂરી કરવા માટે સક્ષમ બનાવવા જોઈએ. તેમણે કહ્યું હતું કે કિવી, નારંગી અને મોટી એલચી પરના વર્તમાન ધ્યાન ઉપરાંત, વિશેષ વિકાસ માટે વધુ બે બાગાયતી પાકોની પસંદગી કરવી જોઈએ. રાજ્ય સરકારે ભારત સરકાર પાસેથી અનેક વિષયો પર સહકારની માંગ કરી છે, જેમાં વધારાના હેલિકોપ્ટર; દિલ્હીથી અરુણાચલ પ્રદેશની કોમર્શિયલ ફ્લાઇટ્સમાં વધારો; પાસીઘાટથી પરશુરામ કુંડ સુધીની રેલવે લાઇનની વહેલી મંજૂરી; સુબાનસિરી જળાશયમાં વિશિષ્ટ પ્રવાસન (નિશ ટુરિઝમ); અને મેચુકામાં દ્વિ-ઉપયોગી ‘એડવાન્સ્ડ લેન્ડિંગ ગ્રાઉન્ડ’ના વિસ્તરણનો સમાવેશ થાય છે.
કેન્દ્રીય ગૃહમંત્રીએ અરુણાચલ પ્રદેશના સર્વાંગી વિકાસ પ્રત્યે ભારત સરકારની પ્રતિબદ્ધતાનો પુનરોચ્ચાર કર્યો હતો અને રાજ્યને સતત સમર્થનની ખાતરી આપી હતી. મુખ્યમંત્રી શ્રી પેમા ખાંડુએ માર્ગદર્શન બદલ કેન્દ્રીય ગૃહમંત્રીનો આભાર માન્યો હતો અને તેમને ખાતરી આપી હતી કે રાજ્ય સરકાર આ નિર્દેશોનો અમલ કરવા અને રાજ્યના વિકાસને આગળ વધારવા માટે દરેક પ્રયાસ કરશે.
SM/NK/GP/JT
સોશિયલ મીડિયા પર અમને ફોલો કરો :
@PIBAhmedabad
/pibahmedabad1964
/pibahmedabad
pibahmedabad1964[at]gmail[dot]com