Ka tnat ki kad lieng, ki kam lieng bad ki lynti lyngba ki jaka shong um
azadi ka amrit mahotsav

U Sarbananda Sonowal u pynpaw ïa ka lad ban bei tyngka kaba $10 billion ha ka kam shna jhad ha India ha khmat ki nongïalam jong ka kam jhad na kylleng ka pyrthei.

Ka jingdawa ban shna jhad ha India ka la kot sha ka dor kaba palat $1.7 billion, kaba kynthup ïa palat 150 tylli ki jhad, ha kaba palat 80 na ka shispah na ka jingdawa ka wan na shabar ri, ong U Sarbananda Sonowal.

U Myntri u la plie ïa ka portal “Naukosh” bad buh thong ban pynlong ïa India kawei na ki 10 tylli ki ri kiba hakhmat ha ka kam shna jhad ha u snem 2030.
Ka Cochin Shipyard bad ka Damen ki la soi ïa ka soskular jingïatreilang (MoU) ban ïatreilang ha ka jingshna ïa ki jhad thymmai.

30 tylli ki jaka shna jhad na shabar ri, kynthup ïa lai tylli kiba heh tam ha South Korea, ki la ïashim bynta ha ki jingïakren halor ka jingtei ïa san tylli ki jaka shna jhad; 10 tylli ki kynhun nongmihkhmat na shabar ri kin leit jngoh ïa kine ki jaka.

Shna ha India, na ka bynta ka India bad na ka bynta ka pyrthei baroh kawei: Ong U Sarbananda Sonowal.

Yn sa tei san tylli ki jaka shna jhad thymmai, ha Dugarajapatnam ha Andhra Pradesh, ha Kuchhadi, Gujarat, ha Dighi, Maharashtra, ha Kendrapada, Odisha bad ha Thoothukudi, Tamil Nadu.

Ha ka: 16 NOV 2026 6:54PM by PIB Shillong

New Delhi, 16 Naiwieng 2026: U Myntri Sorkar Pdeng ba dei khmih ïa ka tnat Ports, Shipping and Waterways (MoPSW), u Sarbananda Sonowal, u la khot ïa ki kompani shna jhad, ki kompani pynïaid jhad bad ki kynhun ai jingïarap pisa na kylleng ka pyrthei ban wan bei tyngka ha India. La khmih lynti ba kine ki san tylli ki jaka shna jhad thymmai kin khring ïa ka jingbei tyngka kaba jan 10 billion dollar. U la ong ruh ba ka thong jong India ka long ban rung hapdeng ki 10 tylli ki ri kiba hakhmat ha ka kam shna jhad ha ka pyrthei ha u snem 2030 bad hapdeng ki san tylli ki ri kiba hakhmat ha u snem 2047.

U Sonowal u la pynpaw ïa kane ka lad bei tyngka ha ka India Shipbuilding Investment Conclave 2026, kaba la pynlong da ka MoPSW ha New Delhi mynta ka sngi. U la plie ruh ïa ka portal Naukosh, ka digital na ka bynta ka kam shna bad pynbha ïa ki jhad. Ha kane ka jingïalang, ka Damen Shipyards bad ka Cochin Shipyard ki la soi ïa ka soskular jingïasngewthuh jingmut (MoU) ban ïatreilang ha ki projek shna jhad ha ki por ban wan.

“Ka India ka la long kaba la pynkhreh ban shna ïa ki jhad na ka bynta ka pyrthei baroh kawei,” u Sarbananda Sonowal u la ong. “Shna ha India, na ka bynta ka India bad na ka bynta ka pyrthei baroh kawei.” Kane ka jingïalang ka long shi bynta ban bteng ïa ki sienjam kiba la shim hadien ba ka Sorkar, hapoh ka jingïalam jong u Myntri Rangbahduh ka ri, u Narendra Modi, ka la mynjur ïa ka jingpynbiang pisa kaba kot haduh $8 billion na ka bynta ban kyntiew ïa ka kam shna lieng ha u snem ba la dep.

U Myntri Sorkar Pdeng, u Sarbananda Sonowal, u la kdew ïa ka jingdawa ïa ki jhad hapoh ka ri bad na shabar ri, kum ki lad ban khring ïa ki nongbei tyngka. U la ong ba ka jingdawa ïa ki jhad hapoh ka ri ka kynthup ïa palat 400 tylli ki jhad, kaba plie lad ïa ka jingbei tyngka kaba jan 24 billion dollar Ki jingdawa ban shna jhad kiba dang don mynta ki kynthup ïa palat 150 tylli ki jhad, kiba shongdor palat 1.7 billion dollar, bad palat 80 na ka shispah jong kane ka dor ka dei na ki jingdawa na shabar ri.

ka jingbei tyngka ka pynleit jingmut ha kine ki san tylli ki jaka shna jhad thymmai, kiba ki heh sorkar ki la pynshisha ba ki la pynkhreh ban tei. Kine ki jaka ki long ha Dugarajapatnam ha Andhra Pradesh, Kuchhadi ha Gujarat, Dighi ha Maharashtra, Kendrapada ha Odisha bad Thoothukudi ha Tamil Nadu. Ki kynhun jong ka Sorkar Pdeng bad ki Sorkar Jylla ki la pyni ïa ki nongbei tyngka ïa ki jaka kiba don, ki polisi kiba kyrshan bad ka jingïatreilang jong ka Sorkar Pdeng bad ki Sorkar Jylla na ka bynta ki jaka shna jhad, ki karkhana shna ïa ki bynta jong ki jhad bad kiwei pat ki kam kiba ïadei bad ka duriaw.

U Sonowal u la ong ba kine ki jaka shna jhad kin plie lad ïa ka jingpynmih mar, ki kor ki bor teknoloji, ka kamai kajih bad ka jingshalan mar sha shabar ri. “Hapoh ka jingïalam kaba radbah jong u Myntri Rangbahduh ka ri, U Narendra Modi, ka jingïatreilang hapdeng ka Sorkar Pdeng bad ki Sorkar Jylla ka pynkhlaiñ ïa ka bynta kaba thymmai jong ka Make in India. Ki jylla kiba don harud duriaw, kata ka Andhra Pradesh, Gujarat, Maharashtra, Odisha bad Tamil Nadu, ki la pyni ba ki long ki nongïatreilang ha kane ka thong jong ka ri, ym tang ki jylla kiba ai jaka. Ngi trei lang kum kawei ka India, khnang ba ki nongbei tyngka kin ïoh ïa ki jaka, ki jingmynjur bad ka jingkyrshan ha ka rukom treikam khlem kano kano ka jingpynslem,” la ong u Sonowal.

Ki heh jong 30 tylli ki jaka shna jhad na kylleng ka pyrthei ki la wan shim bynta lang bad ki kompani pynïaid jhad, ki kompani shna tiar, ki bank, ki nongbei tyngka bad ki kynhun mihkhmat jong ki ri bapher bapher, ryngkat bad ki nongïalam jong ki karkhana bapher bapher na India. Napdeng kiba la wan shim bynta ki long ka HD KSOE, Samsung Heavy Industries, Hanwha Ocean, Fincantieri, Meyer Werft, Damen, Royal IHC, Everllence, Mitsui Engines, Wartsila, Kongsberg, Drydocks World Dubai, Maersk, MSC, CMA CGM, MOL bad DP World.

U Ambassador jong ka South Korea sha India ruh u la lamkhmat ïa ka kynhun nongmihkhmat hadien ka jingleit jngoh dang shen jong u Myntri Sorkar Pdeng, u Sarbananda Sonowal, sha South Korea. Ka HD KSOE, Samsung Heavy Industries bad Hanwha Ocean ki long ki lai tylli ki kompani shna jhad kiba heh tam ha South Korea. Ka kompani pynïaid jhad HMM ruh ka la wan shim bynta ha kane ka jingïalang. Ka jingwan shim bynta jong ki ka ïadei bad ka jingïatreilang kaba la tip kum ka VOYAGES (Vision for Operation of Yard Assisted Growth with Efficiency and Scale), kaba u Myntri Rangbahduh jong ka India, u Narendra Modi, bad u President jong ka South Korea, u Lee Jae Myung, ki la soi ha u bnai Ïaiong 2026. Kane ka jingïatreilang ka thmu ban pynïasoh ïa ka jingstad bad ka sap jong ka South Korea ha ka kam shna jhad bad ka thong Maritime Amrit Kaal Vision 2047 jong ka India.

Ka Naukosh, kaba la pynmih da ka tnad Directorate General of Maritime Administration (DGMA) ka wanrah lang ïa ki polisi, ki jingmynjur bad ki lad ban bei tyngka ha kawei ka rynsan digital. U Sarbananda Sonowal u la ong ba kane kan pynlong ïa ka rukom treikam kaba kham shai bad pynsuk ïa ka kam khaii pateng. Kane ka portal ka long na ka bynta ki jaka shna jhad, ki jaka pynbha jhad, ki kompani shna tiar jhad, ki kynhun shna dur jhad, ki kynhun peit bad pynshisha ïa ki kyrdan bad ka jingshngaiñ jong ki jhad, ki jaka wad bniah bad ai jinghikai, ki kynhun bei tyngka, ki kompani ai insurance bad ki bor pynïaid bad khmih ïa ki kyndon treikam.

Ki module jong ka system kin kynthup ïa ka kot jingtip jong ki karkhana shna lieng, ki jingtip shaphang ka jinglah bad ka bor treikam jong ki jaka shna lieng, ka rynsan jingïatreilang, ki jingtip shaphang ka pisa tyngka bad ki lad pynbiang pisa, ka jaka buh jingtip, ka jaka kyntiew ïa ka jingpynmih ïa ki jingmut thymmai, ki prokram jinghikai bad ka jingpynshisha lyngba ki syrnot, bad ka jingpynïaid kam katkum ki aiñ bad ki kyndon. Ka Dashboard paidbah kan pyni ïa ki dak jingkheiñ kiba kongsan shaphang ki jaka shna lieng bad ka jinglah treikam jong ki, ka jingkheiñ jong ki lieng kiba la dep pynpoi bad kiba dang don ha ka thup ban shna, ryngkat bad ki jingtip ba thymmai shaphang ka jinglong jingman bad ki jingroi jong ka kam shna lieng.

Ha ka jingïalang Open House jong ki Nongïalam ba hakhmat eh ha ka kam Maritime ha ka pyrthei (Global Maritime Leaders' Open House), ki heh jong ki karkhana bad ki kynhun bapher bapher ki la ai ïa ki jingai jingmut bad pynsngew sha ki ophisar sorkar, halor ki polisi bad ki jingthmu ban pyntyllun ïa ka kam ha ki por ban wan. Hadien kata, ki kynhun nongmihkhmat ki la pynlong ïa ki jingïalang ki kynhun treikam jong ki jylla kiba don ha ki cluster, ki tnat sorkar pdeng bad ki kynhun treikam ha ka liang ka pisa tyngka, khnang ban ïatreilang ban pynurlong ïa ki jingïateh kular kiba shai bad kiba thikna. Ki Sorkar Jylla ki la pynbeit ruh ïa ki jingleit jngoh ïa ki jaka lashai ka sngi, kata ha ka Sngi Ba-ar, 17 tarik u Naiwieng, na ka bynta 10 tylli ki kynhun nongmihkhmat na ki ri bapher bapher, khnang ba kin lah ban leit jurip ïa ki jaka kiba don ha ki cluster.

U Sonowal u la ong, “Ka jingwan jong ki nongïalam na kylleng ka pyrthei ban shim bynta ha kane ka sngi ka pyni ïa ka jingshaniah kaba nang khlaiñ jong ki ha ka India kum kawei na ki jaka kiba don ïa ka lad ban kyntiew ïa ka kam shna lieng. “Da ka jingdon jong ka jingdawa kaba thikna ïa ki lieng, ka jingkyrshan kaba khlaiñ lyngba ki polisi sorkar, ka jingpynbiang pisa kyrpang bad san tylli ki cluster ha ki jaka rud duriaw kiba la pynkhreh pura, ka India ka don ïa ki lad bad ki jingkyrshan kiba biang ban khring ïa ki nongbei tyngka bad ban pynroi ïa kane ka kam ha ki snem ban wan. Ka jingthmu kaba kongsan jong ngi mynta ka long ban pynkylla ïa ki jingïakren kiba mynta ka sngi sha ki projek kiba lah ban pyntreikam ha ki jaka ba la thmu.”

U Sonowal u la pynïasoh ïa kane ka jingpyrshang bad ka jingïalam jong u Myntri Rangbahduh ka ri, u Narendra Modi, da kaba ong ba ka kam shna lieng ka la kylla long kawei na ki nongrim ba kongsan jong ka jingiaid lynti jong ka ri sha ka jinglong kaba lah ban shaniah ha lade (Aatmanirbhar Bharat) bad ka jingtei ïa ka ri kaba la kiew shaphrang (Viksit Bharat). U la ong ruh ba ka jingroi jong kane ka bynta kan plie lad ïa ki karkhana, ki kam khaiï bad ki samla jong ka India ban ïoh ïa ki lad bad ki kabu bapher bapher.

U Vijay Kumar, Secretary jong ka Tnat Ports, Shipping and Waterways (MoPSW), u la ong ba ki jingïakren ki long kiba bniah bad kiba ïadei bad ki kam kiba donkam ban pyntreikam. U la bynrap shuh shuh da kaba ong “Man la u nongbei tyngka mynta u la tip shai ïa ki briew ne ki ophis kiba u lah ban ïakynduh na ka bynta kino kino ki jingdonkam jong u, ha ki kynhun treikam jong ki cluster, ki Sorkar Jylla bad ka tnat sorkar ba dei peit. Ngin sa buddien ïa man la ka jingïakren bad jingïalang ba la pynlong, ha kine ki taïew ban wan.”

Ha kane ka jingïalang, la don bynta lang ruh u Myntri Sorkar Pdeng, u Sarbananda Sonowal, ryngkat bad u Secretary, ki heh ophisar na ki tnat sorkar pdeng, ki Sorkar Jylla bad ki heh jong ki kad lieng kiba khraw.

**************

 


(Release ID: 2337252) visitor counter : 16
Pule ia kane ka kyrwoh khubor ha ka: Assamese , English , Urdu , हिन्दी , Tamil , Telugu