Ki riewieit phlim kiba wan ban sakhi ïa ka International Film Festival of India (IFFI) kaba 57 kin ïoh ïa ka jingsngewtynnad kaba kyrpang, katba kane ka tamasa kan rakhe ïa ka jingriewspah bad ka jingphylla jong ki kam shna phlim hapoh Ri Spain. Katba la jied ïa ka Spain kum ka Ri ba la pynkup burom kyrpang (Country of Honour), ka IFFI kan pyni ïa ka jingjied ba kyrpang kaba kynthup ïa saw tylli ki phlim Spain kiba la shna ha kane ka juk mynta, kiba kynthup ïa ki phlim kiba la pyni nyngkong eh ha ka pyrthei, ha dewbah Asia bad ha India. Kane ka jingpyni phlim ba kyrpang, ka khmih lynti ban ai ïa ki nongpeit phlim ïa ka lad ban ïohi bad sngewthuh kham bha ïa ka jingim, ka sap thaw jingmut bad ka rukom ïathuh khana kaba dang ïaid shaphrang bad kylla dur jong ka kam shna phlim ha Spain ha kane ka juk mynta.
Ki saw tylli ki phlim Spain baitynnat ha kane ka Tamasa IFFI jong mynta u snem ki kynthup:
Ka Krismas Bakthang (Amarga Navidad)
Ka phlim ba dang mih shen ha une u snem jong u nongshna phlim bapaw uba la jop arsien ïa ka Khusnam Oscar, u Pedro Almodóvar ka peit bniah ïa ki jingma kiba mih na ka jingpyndonkam ïa ki jingshem jong lade bad ki jingjia kiba la jia shisha ha ka jingpynmih phlim, da kaba kylli ba haduh katno ba u nongshna phlim u lah ban pynpaw ïa ka bynta jong ka jingim jong uwei u briew, ha ka jingwad ïa ka khana kaba don ïa ka jingshisha. Ka khana ka ïadei bad u Raul, uwei u nongshna phlim uba la paw namar kawei ka phlim ba pawnam jong u, hynrei uba mad ïa ka jingeh ban shem ïa ki jingmut thymmai na ka bynta ka phlim kaba bud. Katba ka khana ka nang ïaid shakhmat, u pyndonkam ïa ka jingshem ba sngewsih ba la wan jia ha ka jingim jong u kum ka nongrim bakongsan bad ka jingpynshlur ban thoh ïa ka script ba thymmai na ka bynta ka phlim jong u.
Ïa kane ka phlim la pyni rynsan ha ki Tamasa pyni phlim kiba paw jong mynta u snem kum ha Cannes, ha Toronto bad ha San Sebastian, bad kan sa ïoh ruh ban paw rynsan nyngkong pat ha Ri India ha ka tamasa IFFI.
Ka Jingwad ïa u Michael (Persiguiendo a Michael)
Kane ka phlim ba la mih ha u snem 2026 ba la shna da u Juana Macias, ka ïathuh ïa ka khana shaphang kawei ka theilud kaba la ïoh ïa ka jingpang Parkinson’s Disease. La ong ba kane ka kynthei da ka jingshlur ka jied ym ban shong sah ha kata ka jingsngewsih ba ka mad ha ka jingim jong ka, hynrei ban im ïa ka jingim ha ka rukom kaba phylla. Da ka jingkyrshan jong ka kynhun music therapy jong ka, kiba ki dkhot jong ka ruh ki don ïa kajuh hi ka jingpang, ka la leit ban ïakynduh ïa u tyngshop bapawnam u Michael J. Fox, uba la ju bna ba u im ryngkat bad kane ka jingpang Parkinson hi. Kane ka jait phlim ba hap ha ka thup sawangka biria la pynkhreh ban sa pyni pyrthei nyngkong eh ha ka tamasa IFFI 2026.
U Khun Ba Dakaid (El Mal Hijo)
Ka phlim El Mal Hijo jong u tyngshop uba dei ruh u nongpynmih phlim jong ka Ri Spain u Jaime Lorente kan sa ïoh ban paw rynsan nyngkong duh ha ka dewbah Asia ha ka tamasa pyni phlim jong ka IFFI jong une u snem 2026. Kane ka phlim ka bishar bniah ïa ka jingshempap kaba ktah ïa ka jingim jong ki briew na kawei ka pateng sha kawei pat, kumjuh ruh ïa ka jingïadei hapdeng ki dkhot bapher bapher ha ka longïing. Ha shwa kane, la pyni ïa kane ka phlim ha ka Tamasa San Sebastian International Film Festival. Ka khana ka ïathuh ïa ka jingim jong uwei u briew uba la shah iehnoh ha u kpa jong u ha ka rta kaba dang 11 snem, bad uba la leit ban sah bad ka meiieit jong u kaba um da ithuh than haduh katta katta. Katba u ïakhun pyrshah ïa ki jingkynmaw kiba pynmong ïa ka dohnud jong u bad ban sngewthuh ïa ka mynnor kaba dap da ki jingeh ha ka longïing jong u, u pyrshang ban pyndkut ïa ka jingïaibteng jong ka jingmad ïa kine ki jingsngewsih ba shempap kiba la ïaid pateng la pateng ha ka longïing jong u.
Trinidad
Kane ka phlim Trinidad ba la pyllait ha u snem 2025, kaba la pynmih da ka Laura Alvea bad u José Ortuño, ka pyni ïa ki jingjia bad ki jingïaid lynti jong kawei ka samla kynthei na Spain ha kaba kut jong ka spah snem kaba 19, kaba la phet sha ka Wild West (ka thaiñ ba shathie-sepngi jong ka Ri America). Hadien ba ka la shah pharep ba ka la leh ïa kawei ka kam runar, ka la pynïasnoh ïalade bad ka kynhun kieng atiar jong ki kynthei runar, bad sdang ïa ka jingïaid lynti kaba dap da ki jingïaleh, ki jingma bad ki kam jingpynhiar kput. La pynkhreh ban pyni nyngkong eh ïa kane ka phlim ha ka pyrthei (World Premiere) ha kane ka tamasa IFFI 2026.
***