ট্ৰায়-এ “দ্য ৰেজিষ্টাৰ অৱ ইণ্টাৰকানেক্ট এগ্ৰিমেণ্টছ (চতুৰ্থ সংশোধন) ৰেগুলেচনছ, ২০২৬” মুকলি কৰে

ভাৰতীয় দূৰসংযোগ নিয়ন্ত্ৰণ প্ৰাধিকৰণে (TRAI) আজি “দ্য ৰেজিষ্টাৰ অৱ ইণ্টাৰকানেক্ট এগ্ৰিমেণ্টছ (চতুৰ্থ সংশোধন) ৰেগুলেচনছ, ২০২৬” মুকলি কৰিছে। এই নিয়মাৱলী ২০২৭ চনৰ ১ জানুৱাৰীৰ পৰা কাৰ্যকৰী হ'ব।

দূৰসংযোগত আন্তঃসংযোগক সেই বাণিজ্যিক আৰু কাৰিকৰী ব্যৱস্থাক বুজায়, যিয়ে দুটা বা ততোধিক দূৰসংযোগ নেটৱৰ্কক সংযোগ কৰে, সেইবোৰৰ মাজত দূৰসংযোগ ট্ৰেফিক প্ৰবাহৰ সুযোগ দিয়ে আৰু বিভিন্ন সেৱা প্ৰদানকাৰীৰ ব্যৱহাৰকাৰীসকলক নিৰৱচ্ছিন্নভাৱে যোগাযোগ কৰিবলৈ সক্ষম কৰে। দ্য ৰেজিষ্টাৰ অৱ ইণ্টাৰকানেক্ট এগ্ৰিমেণ্টছ ৰেগুলেচনছ, ১৯৯৯ এ সেৱা প্ৰদানকাৰীসকলৰ মাজত কৰা ইণ্টাৰকানেক্ট চুক্তিসমূহৰ পঞ্জীয়ন আৰু ৰক্ষণাবেক্ষণৰ বাবে নিয়ন্ত্ৰণমূলক কাঠামো প্ৰদান কৰে।

ভাৰতীয় দূৰসংযোগ নিয়ন্ত্ৰণ প্ৰাধিকৰণ আইন, ১৯৯৭ ৰ ধাৰা ১১(১)(খ) ৰ উপ-ধাৰা (vii) আৰু (viii) এ TRAI ক, অন্যান্য বিষয়ৰ লগতে, ইণ্টাৰকানেক্ট চুক্তিসমূহৰ এখন পঞ্জী ৰক্ষণাবেক্ষণ কৰিবলৈ আৰু নিৰ্ধাৰিত মাচুল পৰিশোধ আৰু অন্যান্য নিৰ্দিষ্ট প্ৰয়োজনীয়তা পূৰণসাপেক্ষে জনসাধাৰণৰ পৰিদৰ্শনৰ বাবে উপলব্ধ কৰিবলৈ ক্ষমতা প্ৰদান কৰে।

আন্তঃসংযোগ বিষয়সমূহ পৰিচালনা কৰা বৰ্তমানৰ নিয়ন্ত্ৰণমূলক কাঠামো প্ৰাসংগিক, স্বচ্ছ আৰু সেৱা প্ৰদানকাৰীসকলৰ মাজত দক্ষ আন্তঃসংযোগৰ বাবে অনুকূল হৈ থকাটো নিশ্চিত কৰিবলৈ, ট্ৰায়-এ ০৩.০৪.২০২৫ তাৰিখৰ “আন্তঃসংযোগ বিষয়ত বৰ্তমানৰ ট্ৰায়-এ ৰেগুলেচনসমূহৰ পৰ্যালোচনা” সম্পৰ্কীয় প্ৰাক-পৰামৰ্শ পত্ৰৰ জৰিয়তে নিয়ন্ত্ৰণমূলক কাঠামোৰ পৰ্যালোচনা আৰম্ভ কৰে। এই প্ৰাক-পৰামৰ্শ পত্ৰৰ জৰিয়তে, অন্যান্য বিষয়ৰ লগতে, দ্য ৰেজিষ্টাৰ অৱ ইণ্টাৰকানেক্ট এগ্ৰিমেণ্টছ ৰেগুলেচনছ, ১৯৯৯ পৰ্যালোচনা কৰিবলৈ অংশীদাৰসকলৰ মতামত বিচৰা হৈছিল।

তাৰ পিছত, প্ৰাক-পৰামৰ্শ প্ৰক্ৰিয়াৰ সময়ত লাভ কৰা অংশীদাৰসকলৰ মন্তব্য বিবেচনা কৰি, ১০.১১.২০২৫ তাৰিখে “আন্তঃসংযোগ বিষয়ত বৰ্তমানৰ ট্ৰায়-এ  ৰেগুলেচনসমূহৰ পৰ্যালোচনা” সম্পৰ্কীয় পৰামৰ্শ পত্ৰ জাৰি কৰা হয়। পৰামৰ্শ পত্ৰৰ জৰিয়তে, অন্যান্য বিষয়ৰ লগতে, দ্য ৰেজিষ্টাৰ অৱ ইণ্টাৰকানেক্ট এগ্ৰিমেণ্টছ ৰেগুলেচনছ, ১৯৯৯ পৰ্যালোচনা কৰিবলৈ অংশীদাৰসকলৰ মন্তব্য বিচৰা হৈছিল। সম্প্ৰসাৰণৰ পিছত, লিখিত মন্তব্য আৰু প্ৰতি-মন্তব্য দাখিলৰ অন্তিম তাৰিখ ক্ৰমে ১৫.১২.২০২৫ আৰু ২৯.১২.২০২৫ আছিল।

পৰামৰ্শ পত্ৰত উত্থাপিত বিষয়সমূহৰ প্ৰতি সঁহাৰি জনাই সোতৰগৰাকী অংশীদাৰে তেওঁলোকৰ মন্তব্য দাখিল কৰে, আনহাতে নগৰাকী অংশীদাৰে প্ৰতি-মন্তব্য দাখিল কৰে। পৰামৰ্শ প্ৰক্ৰিয়াৰ অংশ হিচাপে, ২৮.০১.২০২৬ তাৰিখে পৰামৰ্শ পত্ৰৰ ওপৰত এখন মুকলি আলোচনা (OHD) অনুষ্ঠিত হয়। পৰামৰ্শ প্ৰক্ৰিয়াৰ সময়ত অংশীদাৰসকলৰ পৰা লাভ কৰা মন্তব্য আৰু সেইবোৰৰ বিশ্লেষণ বিবেচনা কৰি, ট্ৰায়-এ দ্য ৰেজিষ্টাৰ অৱ ইণ্টাৰকানেক্ট এগ্ৰিমেণ্টছ (চতুৰ্থ সংশোধন) ৰেগুলেচনছ, ২০২৬ চূড়ান্ত কৰিছে।

সংশোধনী নিয়মাৱলীৰ মূল কথাসমূহ তলত দিয়া হৈছে:

ইণ্টাৰকানেক্ট চুক্তিৰ অনলাইন পঞ্জীয়ন: সংশোধনী নিয়মাৱলীত সকলো সেৱা প্ৰদানকাৰীয়ে তেওঁলোকৰ ইণ্টাৰকানেক্ট চুক্তিসমূহ, লগতে সেইবোৰৰ যিকোনো সালসলনি, TRAI য়ে এই উদ্দেশ্যে স্থাপন কৰা পৰ্টেলৰ জৰিয়তে পঞ্জীয়ন কৰাৰ ব্যৱস্থা কৰা হৈছে। ফ্লপি/ডিস্কেটত ছফ্ট কপিৰ সৈতে ছপা প্ৰতিলিপি দাখিল কৰাৰ আগৰ প্ৰয়োজনীয়তা বাতিল কৰা হৈছে। ২০২৭ চনৰ ১ জানুৱাৰীত বলবৎ থকা চুক্তিসমূহ সেই তাৰিখৰ পৰা পোন্ধৰ দিনৰ ভিতৰত দাখিল কৰিব লাগিব, আৰু নতুন চুক্তি আৰু সালসলনি সেইবোৰৰ সম্পাদন বা সালসলনিৰ পোন্ধৰ দিনৰ ভিতৰত দাখিল কৰিব লাগিব।

টেক্সট-ছাৰ্চেবল ইলেক্ট্ৰনিক নথি দাখিল: সেৱা প্ৰদানকাৰীসকলে পঞ্জীয়নৰ বাবে নিৰ্দিষ্ট সময়সীমাৰ ভিতৰত টেক্সট-ছাৰ্চেবল পিডিএফ ফৰ্মেটত ইণ্টাৰকানেক্ট চুক্তি আৰু সেইবোৰৰ সালসলনিৰ ইলেক্ট্ৰনিক প্ৰতিলিপি দাখিল কৰিব লাগিব। ইয়াৰ ফলত নথিসমূহৰ কুশল প্ৰক্ৰিয়াকৰণ, পৰীক্ষা, ৰক্ষণাবেক্ষণ আৰু পুনৰুদ্ধাৰ সহজ হ'ব।

ইণ্টাৰকানেক্ট চুক্তিৰ পঞ্জীলৈ অনলাইন প্ৰৱেশ: সংশোধিত কাঠামোৱে ইণ্টাৰকানেক্ট চুক্তিৰ পঞ্জী পৰিদৰ্শনৰ বাবে আবেদন দাখিল, পঞ্জীৰ নিৰ্ধাৰিত অংশলৈ প্ৰৱেশ আৰু তাৰ প্ৰতিলিপি বা উদ্ধৃতি লাভ কৰাটো পৰ্টেলৰ জৰিয়তে সক্ষম কৰে। ইয়াৰ ফলত বৰ্তমানৰ ভৌতিক পদ্ধতিৰ উপৰিও পঞ্জীৰ সংশ্লিষ্ট অংশসমূহলৈ ইলেক্ট্ৰনিক প্ৰৱেশ সহজ হ'ব, যাৰ ফলত প্ৰযোজ্য নিয়ন্ত্ৰণমূলক বিধান সাপেক্ষে ৰাইজৰ বাবে সহজলভ্যতা আৰু সুবিধা উন্নত হ'ব।

সুনিৰ্দিষ্ট সময়ৰ ভিতৰত বিশদ তথ্য প্ৰদান : ট্ৰায়-এ বিশদ তথ্য সংগ্ৰহৰ বাবে নিৰ্দিষ্ট ফৰমেট নিৰ্ধাৰণ কৰি দিব পাৰে, যি ট্ৰায়-ৰ নিৰ্দেশিত সময়ৰ ভিতৰত  ইণ্টাৰকানেক্ট চুক্তিৰ পঞ্জীত অন্তৰ্ভুক্ত কৰিব লাগিব। ইয়াৰ ফলত সুসংগঠিত আৰু মানসন্মত তথ্যৰ সময়মতে উপলব্ধতা নিশ্চিত হ'ব, ফলপ্ৰসূ নিয়ন্ত্ৰণমূলক তদাৰকী আৰু ইণ্টাৰকানেকশ্বন ব্যৱস্থাত অধিক স্বচ্ছতা সহজ হ'ব।

পৰিদৰ্শন আৰু প্ৰতিলিপিৰ বাবে মাচুলৰ সংশোধন: পঞ্জী পৰিদৰ্শনৰ বাবে মাচুল প্ৰতি ঘণ্টা বা তাৰ অংশৰ বাবে ১,৫০০ টকালৈ সংশোধন কৰা হৈছে, আৰু প্ৰতিলিপি বা উদ্ধৃতিৰ বাবে মাচুল প্ৰতি পৃষ্ঠাত ৫০০ টকালৈ সংশোধন কৰা হৈছে। সংশোধিত মাচুল গাঁথনি মোটামুটিভাৱে ভাৰতীয় দূৰসংযোগ নিয়ন্ত্ৰণ প্ৰাধিকৰণ (তথ্যৰ প্ৰৱেশ) ৰেগুলেচন, ২০০৫ ৰ অধীনত নিৰ্ধাৰিত কাঠামোৰ সৈতে সংগতি ৰাখি কৰা হৈছে।

আৰ্থিক দণ্ডৰ বাবে শ্ৰেণীবদ্ধ কাঠামো: নিয়মাৱলীৰ ফলপ্ৰসূ ৰূপায়ণৰ বাবে, এই নিয়মাৱলীৰ বিধানসমূহ উলংঘা কৰাৰ বাবে শ্ৰেণীবদ্ধ আৰ্থিক দণ্ডৰ কাঠামো নিৰ্ধাৰণ কৰা হৈছে। ইয়াৰ ফলত নিয়ন্ত্ৰণমূলক কাঠামোৰ বলবৎকৰণ অধিক ফলপ্ৰসূ, আনুপাতিক  আৰু এই নিয়মাৱলীৰ বিধানসমূহ উলংঘাৰ প্ৰকৃতি আৰু গুৰুত্বৰ সৈতে সামঞ্জস্যপূৰ্ণ হ'ব।

সংশোধনী নিয়মাৱলীয়ে পঞ্জীয়ন, দাখিল আৰু প্ৰৱেশ প্ৰক্ৰিয়াসমূহৰ ডিজিটেলাইজেশ্বনৰ জৰিয়তে ইণ্টাৰকানেক্ট চুক্তিৰ পঞ্জীয়ন আৰু ৰক্ষণাবেক্ষণ পৰিচালনা কৰা কাঠামোটোক আধুনিকীকৰণ কৰে। সময়বদ্ধভাৱে তথ্য দাখিল আৰু শ্ৰেণীবদ্ধ আৰ্থিক দণ্ড সম্পৰ্কীয় বিধানসমূহে ফলপ্ৰসূ নিয়ন্ত্ৰণমূলক তদাৰকী আৰু অনুপালন সহজ কৰিব। সামগ্ৰিকভাৱে, সংশোধিত কাঠামোৱে ইণ্টাৰকানেক্ট চুক্তি সম্পৰ্কীয় বিষয়সমূহত প্ৰশাসনিক দক্ষতা, স্বচ্ছতা, সহজলভ্যতা আৰু নিয়ন্ত্ৰণমূলক নিশ্চয়তা বৃদ্ধি কৰিব বুলি আশা কৰা হৈছে।

“দ্য ৰেজিষ্টাৰ অৱ ইণ্টাৰকানেক্ট এগ্ৰিমেণ্টছ (চতুৰ্থ সংশোধন) ৰেগুলেচনছ, ২০২৬” ৰ সম্পূৰ্ণ পাঠ, ব্যাখ্যামূলক স্মাৰকপত্ৰৰ সৈতে, TRAI ৰ ৱেবছাইট http://www.trai.gov.in ত উপলব্ধ।

যিকোনো স্পষ্টীকৰণ/তথ্যৰ বাবে, TRAI ৰ উপদেষ্টা (নেটৱৰ্ক, স্পেকট্ৰাম আৰু অনুজ্ঞাপত্ৰ-I) শ্ৰী সমীৰ গুপ্তাৰ সৈতে ইমেইল আইডি: adv-nsl1@trai.gov.in বা টেলিফোন নম্বৰ +91-11-20907752 ত যোগাযোগ কৰিব পাৰি।

PSF/ ARJ