దేశ క్రీడా రంగంపై అవగాహన పెంపొందించేందుకు మై భారత్‌ వేదికలో ‘ఖేలో భారత్‌: తయారీ నుంచి పతకాల సాధన వరకు’ క్విజ్‌ను ప్రారంభించిన క్రీడల శాఖ

కేంద్ర యువజన వ్యవహారాలు, క్రీడల మంత్రిత్వ శాఖ పరిధిలోని క్రీడల విభాగం 2026 నవంబర్‌ 4న మై భారత్ వేదికలో ‘ఖేలో భారత్‌: తయారీ నుంచి పతకాల సాధన వరకు’ క్విజ్‌ను ప్రారంభించింది. దేశ క్రీడా వ్యవస్థను బలోపేతం చేయడం, దేశీయ క్రీడా వస్తువుల తయారీని ప్రోత్సహించడం, 2026 ఆసియా క్రీడలు, ఆసియా పారా క్రీడల్లో భారత్‌ పాల్గొనడం, సాధించిన విజయాలపై ప్రజల్లో అవగాహన పెంపొందించడం ఈ క్విజ్‌ లక్ష్యం. ఈ క్విజ్‌ 2026 నవంబర్‌ 20 వరకు అందుబాటులో ఉంటుంది. తయారీ, ఆవిష్కరణల నుంచి అంతర్జాతీయ క్రీడా రంగంలో అత్యుత్తమ ప్రదర్శన వరకు విస్తరిస్తున్న భారత క్రీడా వ్యవస్థ గురించి పౌరులు, విద్యార్థులు, యువత, వృత్తి నిపుణులు, క్రీడాభిమానులకు అవగాహన కల్పించేలా దీనిని రూపొందించారు.

రూ.1,856.67 కోట్ల కేటాయింపుతో రూపొందించిన ‘ఖేలో ఇండియా క్రీడా వస్తువుల తయారీ పథకం’పై కూడా ఈ క్విజ్‌లో ప్రశ్నలు ఉంటాయి. దేశీయ క్రీడా వస్తువుల తయారీ వ్యవస్థను బలోపేతం చేయడం ఈ పథకం లక్ష్యం. ఇందులో ప్రోత్సాహకాలు, జోక్యాలు అనే రెండు విభాగాలు ఉన్నాయి. పెట్టుబడులకు మద్దతు, తయారీ జోన్లు, ఇప్పటికే ఉన్న తయారీ క్లస్టర్లు, ఉత్పత్తి ప్రోత్సాహకాలు, ధ్రువీకరణ, పరీక్షలు, పరిశోధన, నైపుణ్యాభివృద్ధి, అంకుర సంస్థలు, బ్రాండింగ్‌, ప్రచారం వంటి అంశాలు వీటి పరిధిలోకి వస్తాయి. దేశీయ తయారీని ప్రోత్సహించడం, ఉపాధి అవకాశాలను కల్పించడం, ఎగుమతులను పెంచడం, భారత క్రీడా వస్తువుల తయారీదారుల అంతర్జాతీయ పోటీతత్వాన్ని బలోపేతం చేయడం ఈ చర్యల ప్రధాన ఉద్దేశం.

జపాన్‌లోని ఐచి-నగోయాలో జరిగిన 20వ ఆసియా క్రీడలు–2026, 5వ ఆసియా పారా క్రీడలు–2026లో భారత్‌ పాల్గొన్న తీరును కూడా ఈ క్విజ్‌ వివరిస్తుంది. ఆసియా క్రీడల్లో భారత్‌ 36 క్రీడాంశాలు, 255 ఈవెంట్లలో 501 మంది అథ్లెట్లతో బరిలోకి దిగింది. వీరిలో 65 మంది ఖేలో ఇండియా అథ్లెట్లు, 203 మంది టాప్స్‌ (టార్గెట్‌ ఒలింపిక్‌ పోడియం స్కీమ్‌) మద్దతు పొందిన అథ్లెట్లు, 310 మంది తొలిసారిగా పాల్గొన్నవారు ఉన్నారు.  ఆసియా పారా క్రీడల్లో భారత్‌ 11 క్రీడాంశాలు, 177 ఈవెంట్లలో 168 మంది అథ్లెట్లతో పాల్గొంది. వీరిలో 33 మంది ఖేలో ఇండియా అథ్లెట్లు, 47 మంది టాప్స్‌ అథ్లెట్లు, జాతీయ అత్యుత్తమ శిక్షణ కేంద్రాలకు చెందిన ఆరుగురు అథ్లెట్లు, 61 మంది తొలిసారిగా పాల్గొన్నవారు ఉన్నారు. ఆసియా క్రీడల్లో 31 రాష్ట్రాలు, కేంద్రపాలిత ప్రాంతాలకు చెందినవారు, ఆసియా పారా క్రీడల్లో 25 రాష్ట్రాలు, కేంద్రపాలిత ప్రాంతాలకు చెందినవారు భారత బృందాలకు ప్రాతినిధ్యం వహించారు.

ఈ అంశాల ద్వారా పటిష్ఠమైన దేశీయ క్రీడా వస్తువుల తయారీ వ్యవస్థ అభివృద్ధిని, అంతర్జాతీయ క్రీడా పోటీల్లో భారత్‌ పెరుగుతున్న ప్రాతినిధ్యంతో అనుసంధానించడమే ఈ క్విజ్‌ లక్ష్యం. క్రీడల్లో క్షేత్రస్థాయి భాగస్వామ్యాన్ని ప్రోత్సహించడం, ప్రతిభావంతులైన క్రీడాకారులను గుర్తించి వారిని తీర్చిదిద్దడం, క్రీడా మౌలిక సదుపాయాలను బలోపేతం చేయడం, క్రీడాకారులు ఉన్నత స్థాయి విజయాలు సాధించే దిశగా ముందుకు సాగేందుకు మార్గాలను కల్పించడంలో ఖేలో ఇండియా పోషిస్తున్న పాత్రను కూడా ఈ క్విజ్‌ తెలియజేస్తుంది.

వయసుతో సంబంధం లేకుండా భారత పౌరులందరూ ఈ క్విజ్‌లో పాల్గొనవచ్చు. లింగం, విద్యార్హత లేదా రాష్ట్రం ఆధారంగా ఎలాంటి ప్రత్యేక అర్హత పరిమితులు లేవు. 20 ప్రశ్నలకు సమాధానాలు ఇచ్చేందుకు పాల్గొనేవారికి 15 నిమిషాల సమయం ఉంటుంది. క్విజ్‌లో పాల్గొనే ముందు మై భారత్ వేదికలో అందుబాటులో ఉన్న సూచన సమాచారాన్ని పరిశీలించాలని నిర్వాహకులు సూచిస్తున్నారు.

క్విజ్‌ ఫలితాల ఆధారంగా తొలి 100 మంది పాల్గొనేవారికి ఫిట్‌ ఇండియా మెర్చండైజ్‌ అందజేస్తారు. సమాన మార్కులు వచ్చిన సందర్భంలో కంప్యూటర్‌ ఆధారిత లాటరీ విధానం ద్వారా విజేతలను ఎంపిక చేస్తారు. క్విజ్‌ పూర్తయిన తర్వాత పాల్గొనేవారు సరైన సమాధానాలను చూడవచ్చు.

ఈ క్విజ్‌ మై భారత్ వేదికలో అందుబాటులో ఉంది. లింక్‌: https://mybharat.gov.in/quizzes/yuva/detail/F4bPGADIB1E_OFqlCIFJWA/ 

క్రీడా వస్తువుల తయారీని బలోపేతం చేయడం, క్రీడా ప్రతిభను పెంపొందించడం, దేశ క్రీడా లక్ష్యాలను ముందుకు తీసుకెళ్లేందుకు భారత్‌ చేపడుతున్న కార్యక్రమాలపై అవగాహన పెంపొందించుకోవడానికి ఈ క్విజ్‌లో పాల్గొనాలని దేశవ్యాప్తంగా ఉన్న పౌరులు, విద్యార్థులు, యువత, క్రీడాభిమానులకు కేంద్ర యువజన వ్యవహారాలు, క్రీడల మంత్రిత్వ శాఖ ఆహ్వానిస్తోంది.

క్విజ్‌ వివరాలు

క్విజ్‌ శీర్షిక: ఖేలో భారత్‌: తయారీ నుంచి పతకాల సాధన వరకు

క్విజ్‌ నిర్వహణ కాలం: 2026 నవంబర్‌ 4 నుంచి 20 వరకు

సమయం: 15 నిమిషాలు

ప్రశ్నల సంఖ్య: 20

అర్హత: వయస్సుతో సంబంధం లేకుండా భారత పౌరులందరూ

బహుమతులు: తొలి 100 మంది పాల్గొనేవారికి ఫిట్‌ ఇండియా మెర్చండైజ్‌

***