నాడు పోస్టు చేయడమైనది:
03 NOV 2026 4:39PM by PIB Hyderabad
వాణిజ్య, పరిశ్రమల మంత్రిత్వ శాఖ పరిధిలోని భారత ప్రభుత్వ వ్యవసాయ, శుద్ధి చేసిన ఆహార ఉత్పత్తుల ఎగుమతి అభివృద్ధి సంస్థ (ఏపీఈడీఏ), అరుణాచల్ ప్రదేశ్‌లోని జీరో ప్రాంతం నుంచి 1.5 మెట్రిక్ టన్నుల కివీ పండ్లను యునైటెడ్‌ అరబ్‌ ఎమిరేట్స్‌ (యూఏఈ)లోని దుబాయ్‌కు ఎగుమతి చేసేందుకు సహకరించింది. ఈ సరుకు విజయవంతంగా దుబాయ్‌కు చేరుకుంది. అక్కడి అల్‌ ఖుసైస్‌లోని లూలూ హైపర్‌మార్కెట్‌లో ప్రదర్శనకు ఉంచారు. అంతర్జాతీయ మార్కెట్లలో ఈ పండ్లకు ఉన్న అవకాశాలను అంచనా వేసే దిశగా ఈ కార్యక్రమం ఒక ముందడుగుగా నిలిచింది.
ఈశాన్య ప్రాంత అభివృద్ధి మంత్రిత్వ శాఖ (ఎండీఓఎన్‌ఈఆర్‌) ఆధ్వర్యంలో చేపట్టిన ఈ కార్యక్రమం ద్వారా ‘కివీ: అరుణాచల్ ప్రదేశ్ ప్రత్యేకత’ అనే బ్రాండింగ్‌ కార్యక్రమం కింద రాష్ట్ర కివీ రంగాన్ని ప్రోత్సహించి, బలోపేతం చేయాలని లక్ష్యంగా పెట్టుకున్నారు. అరుణాచల్ ప్రదేశ్ ప్రభుత్వ వాణిజ్య, వాణిజ్య కార్యకలాపాల శాఖ, ఉద్యానవన శాఖల సహకారంతో ఈ కార్యక్రమాన్ని అమలు చేస్తున్నారు. రాష్ట్రంలో పండే కివీ పండ్లను అంతర్జాతీయ మార్కెట్లకు పరిచయం చేయడం, వినియోగదారుల స్పందనను అంచనా వేయడం, స్థానిక రైతులకు ఎగుమతి అవకాశాలను విస్తరించేందుకు మెరుగైన మార్కెట్‌ అనుసంధానాలను అభివృద్ధి చేయడం దీని ప్రధాన ఉద్దేశం.
అరుణాచల్ ప్రదేశ్‌లోని ఎత్తైన ప్రాంతాల్లో నెలకొన్న వాతావరణ పరిస్థితులు, సహజ పర్యావరణం ప్రత్యేకమైన నాణ్యత, రుచితో కూడిన కివీ పండ్ల సాగుకు అనుకూలంగా ఉన్నాయి. రాష్ట్రంలో పండే కివీకి ప్రీమియం దేశీయ మార్కెట్లు, ఎగుమతుల ప్రోత్సాహం, విలువ ఆధారిత ఉత్పత్తుల తయారీలో మంచి అవకాశాలు ఉన్నాయి. ఈ ప్రాంతంలో ప్రధానంగా హేవార్డ్‌, మాంటీ, అలిసన్‌, బ్రూనో రకాల కివీని సాగు చేస్తున్నారు. వీటిలో హేవార్డ్‌ రకానికి అంతర్జాతీయ మార్కెట్లలో మంచి డిమాండ్‌ ఉంది.
అల్‌ ఖుసైస్‌లోని లూలూ హైపర్‌మార్కెట్‌ విక్రయ విభాగానికి ఈ సరుకు చేరడంతో, ఈ కార్యక్రమం ప్రారంభోత్సవ దశను దాటి నేరుగా రిటైల్‌ స్థాయిలో మార్కెట్‌ అంచనా వేసే దశకు చేరుకుంది. వినియోగదారులకు పండ్లను రుచి చూపించి, వారి అభిప్రాయాలు సేకరించడం ద్వారా కివీ పండ్ల ఆమోదయోగ్యత, వాటికి ఉండే డిమాండ్‌ అవకాశాలను అంచనా వేయనున్నారు. వినియోగదారుల అభిరుచులు, నాణ్యతపై అంచనాలు, ప్యాకేజింగ్‌, ప్రదర్శనకు సంబంధించిన అవసరాలపై కూడా ఈ అంచనా ద్వారా అవగాహన లభించనుంది. ఈ వివరాలు భవిష్యత్తులో వాణిజ్య స్థాయిలో ఎగుమతులు చేపట్టేందుకు రైతులు, సహకార సంఘాలు, ఎగుమతిదారులకు ఉపయోగపడతాయి. అలాగే అనువైన మార్కెట్‌ అవకాశాలను గుర్తించేందుకు దోహదం చేస్తాయి.
ఈ కార్యక్రమం ద్వారా స్థానిక కివీ రైతులను విదేశీ మార్కెట్లతో అనుసంధానించడం, అదనపు విక్రయ మార్గాలను కల్పించడం లక్ష్యంగా పెట్టుకున్నారు. భవిష్యత్తులో చేపట్టే ఎగుమతుల ద్వారా రైతులకు మరింత మెరుగైన ఆదాయం పొందే అవకాశాలు కల్పించనున్నారు. ఈ నమూనా ఎగుమతి ద్వారా మార్కెట్‌ స్పందనను అంచనా వేయడంతో పాటు, అంతర్జాతీయ మార్కెట్లలో అరుణాచల్ ప్రదేశ్ కివీ పండ్లకు మరింత గుర్తింపు, ఆదరణ కల్పించేందుకు అవసరమైన అంశాలను గుర్తించవచ్చని భావిస్తున్నారు.
ఈ సరుకు ఎగుమతిని ప్రారంభించే కార్యక్రమానికి అరుణాచల్ ప్రదేశ్ ప్రభుత్వ వ్యవసాయ, అనుబంధ శాఖల మంత్రి గాబ్రియేల్‌ డీ వాంగ్సు, వాణిజ్య శాఖ మంత్రి సలహాదారు, ఎమ్మెల్యే డాక్టర్‌ మోహేష్‌ చాయ్‌ హాజరయ్యారు. ఇతర ప్రముఖుల్లో జీరో ఎమ్మెల్యే శ్రీ హాగే అప్పా, వ్యవసాయ, ఉద్యానవన శాఖల ప్రత్యేక కార్యదర్శి రిషితా గుప్తా, వాణిజ్య శాఖ కార్యదర్శి బుల్లో మాము (ఐఆర్‌ఎస్‌), అరుణాచల్ ప్రదేశ్ ప్రభుత్వ ఉద్యానవన శాఖ కార్యదర్శి కోజ్‌ రిన్యా, షిల్లాంగ్‌లోని ఐసీఈఆర్‌ డైరెక్టర్‌ కర్దిర్వెల్‌ గోవిందసామి పాల్గొన్నారు.
కివీ రైతుల సహకార సంఘం, ఫెయిర్‌ ఎక్స్‌పోర్ట్స్‌ ఇండియా ప్రైవేటు లిమిటెడ్‌ ప్రతినిధులు కూడా ఈ కార్యక్రమంలో పాల్గొన్నారు. ఏపీఈడీఏ అధికారులు, వాణిజ్య, ఉద్యానవన, వ్యవసాయ శాఖల అధికారులు, సరుకుతో పాటు వచ్చిన కివీ రైతులు, కార్యక్రమానికి సంబంధించిన ఇతర ప్రతినిధులు హాజరయ్యారు.
ఈ కార్యక్రమం ద్వారా ఈశాన్య ప్రాంతంలోని వ్యవసాయ, ఉద్యానవన ఉత్పత్తుల ప్రోత్సాహానికి, వాటిని అంతర్జాతీయ మార్కెట్లకు చేరువ చేసేందుకు ఏపీఈడీఏ తన సహకారాన్ని కొనసాగిస్తోంది. అరుణాచల్ ప్రదేశ్ కివీ పండ్లు విజయవంతంగా దుబాయ్‌కు చేరుకుని, అక్కడి రిటైల్‌ విక్రయ కేంద్రాల్లో ప్రదర్శనకు రావడం ద్వారా విదేశీ మార్కెట్లలో వాటి అవకాశాలను అంచనా వేసేందుకు వీలుకలిగింది. అంతర్జాతీయ వాణిజ్యంలో పాల్గొనేందుకు స్థానిక రైతులను సిద్ధం చేయడానికీ ఇది దోహదపడుతుంది.
***