શૈક્ષણિક વર્ષ 2026-27 માટે નેશનલ મીન્સ-કમ-મેરિટ સ્કોલરશીપ સ્કીમ હેઠળ અરજીઓ સબમિટ કરવાની છેલ્લી તારીખ 15 નવેમ્બર, 2026 સુધી લંબાવવામાં આવી

કેન્દ્રીય શિક્ષણ મંત્રાલયે શૈક્ષણિક વર્ષ 2026-27 માટે નેશનલ મીન્સ-કમ-મેરિટ સ્કોલરશીપ સ્કીમ (NMMSS) હેઠળ અરજીઓ સબમિટ કરવાની છેલ્લી તારીખ 15 નવેમ્બર, 2026 સુધી લંબાવી છે. આ વિસ્તરણ પાત્ર વિદ્યાર્થીઓને નેશનલ સ્કોલરશીપ પોર્ટલ (NSP) પર તેમની અરજીઓ પૂર્ણ કરવા માટે વધારાનો સમય પૂરો પાડશે અને સંબંધિત અધિકારીઓ દ્વારા સમયસર ચકાસણી કરવામાં સુવિધા આપશે.

સુધારેલું સમયપત્રક નીચે મુજબ છે:

નેશનલ સ્કોલરશીપ પોર્ટલ (NSP) વિદ્યાર્થીઓની અરજીઓ માટે 1 જૂન, 2026 થી ખુલ્લું છે. સ્કોલરશીપ માટે અરજી કરતા પહેલા વિદ્યાર્થીઓએ પોર્ટલ પર તેમનું વન-ટાઇમ રજીસ્ટ્રેશન (OTR) પૂર્ણ કરવું આવશ્યક છે. 30.10.2026 સુધીમાં, 90,483 નવી (fresh) અને 1,99,531 રીન્યુઅલ અરજીઓ સબમિટ કરવામાં આવી હતી.

જે વિદ્યાર્થીઓએ અગાઉથી તેમની અરજીઓ સબમિટ કરી દીધી છે તેમણે એ સુનિશ્ચિત કરવું જોઈએ કે અરજીઓ સંબંધિત ઇન્સ્ટિટ્યૂટ નોડલ ઓફિસર (L1) દ્વારા 30 નવેમ્બર સુધીમાં અને ડિસ્ટ્રિક્ટ નોડલ ઓફિસર (L2) દ્વારા 15 ડિસેમ્બર, 2026 સુધીમાં ચકાસવામાં આવે.

NMMSS નો ઉદ્દેશ્ય આર્થિક રીતે નબળા વર્ગના તેજસ્વી વિદ્યાર્થીઓને ટેકો આપવાનો અને તેમને ધોરણ VIII થી આગળ ધોરણ XII સુધી તેમનું શિક્ષણ ચાલુ રાખવા માટે પ્રોત્સાહિત કરવાનો છે.

આ યોજના સંબંધિત રાજ્ય/કેન્દ્રશાસિત પ્રદેશ સરકારો દ્વારા લેવાતી પસંદગી પરીક્ષામાં લાયકાત ધરાવતા પાત્ર ધોરણ IX ના વિદ્યાર્થીઓને દર વર્ષે એક લાખ નવી સ્કોલરશીપ પૂરી પાડે છે. ત્યારબાદ નિર્ધારિત શૈક્ષણિક જરૂરિયાતોને આધીન રીન્યુઅલ દ્વારા ધોરણ X થી XII સુધી સ્કોલરશીપ ચાલુ રાખવામાં આવે છે.

રાજ્ય સરકાર અને સરકારી અનુદાનિત શાળાઓમાં અને સ્થાનિક સ્વરાજ્યની સંસ્થાઓ દ્વારા સંચાલિત શાળાઓમાં અભ્યાસ કરતા પાત્ર વિદ્યાર્થીઓ પ્રતિ વર્ષ ₹12,000 મેળવે છે, જે ડીબીટી (DBT) દ્વારા સીધા તેમના બેંક ખાતામાં જમા કરવામાં આવે છે.

પસંદગી કસોટીમાં બેસવા માટે, વિદ્યાર્થીઓએ ધોરણ VII માં ઓછામાં ઓછા 55 ટકા માર્ક્સ અથવા સમકક્ષ ગ્રેડ મેળવેલ હોવા જોઈએ, જેમાં SC/ST વિદ્યાર્થીઓ માટે 5-ટકાવારી પોઇન્ટની છૂટછાટ છે. અરજદારના માતાપિતાની વાર્ષિક આવક ₹3.50 લાખથી વધુ ન હોવી જોઈએ.

SM/JY/JD