ഒക്ടോബർ 30-31 തീയതികളിൽ പ്രധാനമന്ത്രി ഗുജറാത്ത് സന്ദർശിക്കും

പ്രധാനമന്ത്രി ശ്രീ നരേന്ദ്ര മോദി 2026 ഒക്ടോബർ 30, 31 തീയതികളിൽ ഗുജറാത്ത് സന്ദർശിക്കും.

ഒക്ടോബർ 30-ന് രാവിലെ 9:30-ഓടെ, ബനസ്‌കന്തയിലെ 'എംബ്രിയോ ട്രാൻസ്ഫർ ടെക്നോളജി - ഇൻ വിട്രോ ഫെർട്ടിലൈസേഷൻ' (ET-IVF) ലബോറട്ടറിയും, 'ഭാരത് ബോവിൻ ബ്രീഡിംഗ് ആൻഡ് റിസർച്ച് സെന്റർ' (BBBRC) കന്നുകാലി ഫാമും പ്രധാനമന്ത്രി സന്ദർശിക്കും. രാവിലെ 10:30-ഓടെ, ബനസ്‌കന്തയിൽ 14,000 കോടിയിലധികം രൂപയുടെ വിവിധ വികസന പദ്ധതികൾക്ക് അദ്ദേഹം തറക്കല്ലിടുകയും, ഉദ്ഘാടനം ചെയ്യുകയും, രാജ്യത്തിന് സമർപ്പിക്കുകയും ചെയ്യും. കൂടാതെ, പിഎം-കിസാൻ (PM-KISAN) പദ്ധതിയുടെ 24-ാം ഗഡുവായി 19,000 കോടി രൂപ അദ്ദേഹം വിതരണം ചെയ്യും. രണ്ട് ട്രെയിൻ സർവീസുകൾ ഫ്ലാഗ് ഓഫ് ചെയ്യുന്ന അദ്ദേഹം, ചടങ്ങിൽ സദസ്സിനെ അഭിസംബോധന ചെയ്യുകയും ചെയ്യും. 

തുടർന്ന്, പ്രധാനമന്ത്രി കെവാഡിയയിലെ ഏക്താ നഗറിലേക്ക് യാത്ര തിരിക്കും. വൈകുന്നേരം 5 മണിയോടെ അദ്ദേഹം 'ഭാരത് പർവ് 2026' ഉദ്ഘാടനം ചെയ്യും. രാത്രി 7:45-ന് അദ്ദേഹം 'ഏക്താ പ്രകാശ് പർവ്' പരിപാടിയിൽ പങ്കെടുക്കും; തുടർന്ന് രാത്രി 8:15-ഓടെ നർമ്മദ ആരതിയിലും അദ്ദേഹം പങ്കുചേരും.

ഒക്ടോബർ 31-ന് രാവിലെ 9 മണിയോടെ, പ്രധാനമന്ത്രി  ഏകതാ പ്രതിമയിൽ പുഷ്പാഞ്ജലി അർപ്പിക്കും. തുടർന്ന്, രാവിലെ 9:15-ഓടെ ഏക്താ നഗറിൽ 400 കോടിയിലധികം രൂപയുടെ വിവിധ വികസന പദ്ധതികൾക്ക് അദ്ദേഹം തറക്കല്ലിടുകയും, ഉദ്ഘാടനം ചെയ്യുകയും രാജ്യത്തിന് സമർപ്പിക്കുകയും ചെയ്യും. ഇതിനുശേഷം, ഏകതാ നഗറിലെ മഴക്കാടുകളും വാമൻ വൃക്ഷ വാടികയും അദ്ദേഹം സന്ദർശിക്കും. വൈകുന്നേരം 5:30-ന്, സർദാർ വല്ലഭഭായ് പട്ടേലിന്റെ 151-ാം ജന്മവാർഷികത്തോടനുബന്ധിച്ചുള്ള 'രാഷ്ട്രീയ ഏകതാ ദിവസ്' ആഘോഷങ്ങളിൽ പ്രധാനമന്ത്രി പങ്കെടുക്കും.

ബനസ്‌കന്തയിൽ പ്രധാനമന്ത്രി

ഗുജറാത്തിലെ ബനസ്‌കന്തയിലുള്ള ഭിൽഡിയിൽ, 'ഭാരത് ബോവൈൻ ബ്രീഡിംഗ് ആൻഡ് റിസർച്ച് സെന്റർ' (BBBRC) പ്രധാനമന്ത്രി രാജ്യത്തിന് സമർപ്പിക്കും. 127 ഏക്കറിലായി വ്യാപിച്ചുകിടക്കുന്ന ഈ കേന്ദ്രം, അത്യാധുനിക സൗകര്യങ്ങളോട് കൂടിയ ഒരു 'സെന്റർ ഓഫ് എക്സലൻസ്' (Center of Excellence) ആയാണ് സജ്ജീകരിച്ചിരിക്കുന്നത്. കന്നുകാലി പ്രജനനം, ജനിതക മെച്ചപ്പെടുത്തൽ, നൂതന പ്രത്യുൽപാദന സാങ്കേതികവിദ്യകൾ എന്നിവ ശക്തിപ്പെടുത്തുന്നതിലൂടെ, കന്നുകാലി ഇനങ്ങളുടെ ഗുണനിലവാരം മെച്ചപ്പെടുത്തുന്ന പ്രക്രിയയെ 10 മുതൽ 20 മടങ്ങ് വരെ വേഗത്തിലാക്കാൻ BBBRC-ക്ക് സാധിക്കും. കാങ്ക്രെജ് (Kankrej) ഇനം കന്നുകാലികൾക്കായി സമർപ്പിക്കപ്പെട്ട, ഇത്തരത്തിലുള്ള രാജ്യത്തെ ആദ്യത്തെ കേന്ദ്രമായിരിക്കും ഇത്.

തരാദ്, രാധൻപുർ എന്നിവിടങ്ങളിൽ 'ബനാസ് ഡയറി'യുടെ രണ്ട് ബയോ-സി എൻ ജി പ്ലാന്റുകൾക്ക് പ്രധാനമന്ത്രി തറക്കല്ലിടും. ഇവയിൽ തരാദിലെ പ്ലാന്റിന് പ്രതിദിനം 75 മെട്രിക് ടണ്ണും, രാധൻപുരിലെ പ്ലാന്റിന് പ്രതിദിനം 100 മെട്രിക് ടണ്ണും ചാണകം സംസ്കരിക്കാനുള്ള ശേഷിയുണ്ടാകും.

കൂടാതെ, അഹമ്മദാബാദ് മെട്രോയുടെ 2A (എയർപോർട്ട് എക്സ്റ്റൻഷൻ), 2B (ഗിഫ്റ്റ് സിറ്റി എക്സ്റ്റൻഷൻ) ഘട്ടങ്ങൾക്ക് പ്രധാനമന്ത്രി തറക്കല്ലിടും. ഏകദേശം 6 കിലോമീറ്ററിലധികം ദൈർഘ്യമുള്ള ഫേസ്-2A-യിൽ കോട്ടേശ്വർ റോഡ് മുതൽ വിമാനത്താവളം വരെയുള്ള അഞ്ച് സ്റ്റേഷനുകൾ ഉൾപ്പെടുന്നു. ഫേസ്-2B-യിൽ 3.3 കിലോമീറ്ററിലധികം ദൈർഘ്യവും ഗിഫ്റ്റ് സിറ്റി (GIFT City) മുതൽ ഷാപൂർ വരെയുള്ള മൂന്ന് സ്റ്റേഷനുകളും ഉൾപ്പെടുന്നു.

ഏകദേശം 2,600 കോടി രൂപ ചെലവിൽ, അഹമ്മദാബാദ്-മെഹ്സാന റോഡ് (സ്റ്റേറ്റ് ഹൈവേ-41) നാല് വരി പാതയിൽ നിന്ന് എട്ട് വരി പാതയായി വികസിപ്പിക്കുന്നതിനും ശക്തിപ്പെടുത്തുന്നതിനുമുള്ള പദ്ധതിക്ക് പ്രധാനമന്ത്രി തറക്കല്ലിടും. ഈ പദ്ധതി അഹമ്മദാബാദും വടക്കൻ ഗുജറാത്തും തമ്മിലുള്ള യാത്ര കൂടുതൽ വേഗമേറിയതും സുരക്ഷിതവും സുഖകരവുമാക്കും.

ഗുജറാത്തിൽ കുട്ടികൾക്ക് അനുയോജ്യമായ 4,030 പുതിയ അങ്കണവാടി കേന്ദ്രങ്ങൾക്ക് പ്രധാനമന്ത്രി തറക്കല്ലിടുകയും, പൂർത്തിയായ 361 അങ്കണവാടി കേന്ദ്രങ്ങൾ ഉദ്ഘാടനം ചെയ്യുകയും ചെയ്യും. 800 കോടി രൂപ ചെലവിലുള്ള ഈ സംരംഭം 4 ലക്ഷത്തിലധികം ആളുകൾക്ക് പ്രയോജനപ്പെടും.

ഏകദേശം 4,950 കോടി രൂപ ചെലവിൽ 'അഗ്രികൾച്ചർ ഇൻഫ്രാസ്ട്രക്ചർ ഫണ്ടി'ന് (Agriculture Infrastructure Fund) കീഴിൽ പൂർത്തിയാക്കിയ 521 പദ്ധതികൾ പ്രധാനമന്ത്രി രാജ്യത്തിന് സമർപ്പിക്കും. കോൾഡ് സ്റ്റോറേജ് സൗകര്യങ്ങൾ, വെയർഹൗസുകൾ, ധാന്യ സംഭരണ ​​ശാലകൾ (silos), പോളിഹൗസുകൾ, ഗ്രീൻഹൗസുകൾ, പ്രാഥമിക-ദ്വിതീയ സംസ്കരണ കേന്ദ്രങ്ങൾ എന്നിവ ഈ പദ്ധതികളിൽ ഉൾപ്പെടുന്നു.

സനദാറിലെ ഉരുളക്കിഴങ്ങ് സംസ്കരണ പ്ലാന്റിന്റെ വിപുലീകരണം പ്രധാനമന്ത്രി ഉദ്ഘാടനം ചെയ്യും. കൂടാതെ, പാലൻപൂരിലെ അൾട്രാ-ഹൈ-ടെമ്പറേച്ചർ (UHT) ഉൽപ്പന്നങ്ങൾക്കായുള്ള 'ഓട്ടോമേറ്റഡ് സ്റ്റോറേജ് ആൻഡ് റിട്രീവൽ സിസ്റ്റം' (ASRS) അദ്ദേഹം പ്രവർത്തനസജ്ജമാക്കും.

റെയിൽ ഗതാഗത ബന്ധം ശക്തിപ്പെടുത്തുന്നതിന്റെ ഭാഗമായി, അഹമ്മദാബാദ് (സബർമതി) - വാരണാസി എക്സ്പ്രസ്, മെഹ്സാന - ബെച്ചാരാജി - സബർമതി മെമു (MEMU) ട്രെയിൻ സർവീസുകൾക്ക് പ്രധാനമന്ത്രി പച്ചക്കൊടി വീശും.

രാജ്യത്തുടനീളമുള്ള കർഷകർക്ക് സാമ്പത്തിക സഹായം തുടരുന്നതിന്റെ ഭാഗമായി, പ്രധാനമന്ത്രി കിസാൻ (PM-KISAN) പദ്ധതിയുടെ 24-ാം ഗഡുവായ 19,000 കോടി രൂപ പ്രധാനമന്ത്രി വിതരണം ചെയ്യും. അംഗീകാരം ലഭിച്ച 12 ഹോർട്ടികൾച്ചർ ക്ലസ്റ്ററുകളിലെ പ്രവർത്തനങ്ങളുടെ ഉദ്ഘാടനവും അദ്ദേഹം നിർവഹിക്കും. ഏകദേശം 1.46 ലക്ഷം ഹെക്ടർ പ്രദേശത്തായി വ്യാപിച്ചുകിടക്കുന്ന ഈ ക്ലസ്റ്ററുകൾ വഴി 1.3 ലക്ഷത്തിലധികം കർഷകർക്ക് പ്രയോജനം ലഭിക്കുമെന്ന് പ്രതീക്ഷിക്കുന്നു. വടക്കൻ ഗുജറാത്തിലെ രണ്ട് ക്ലസ്റ്ററുകൾ ഉരുളക്കിഴങ്ങ് കൃഷിക്ക് ഊന്നൽ നൽകും.

ഏക്ത നഗറിൽ പ്രധാനമന്ത്രി

ഒക്ടോബർ 30-ന്, 'രാഷ്ട്രീയ ഏകതാ ദിവസ്' ആഘോഷങ്ങളുടെ ഭാഗമായി, ഏക്ത നഗറിൽ 'ഭാരത് പർവ് 2026' പ്രധാനമന്ത്രി ഉദ്ഘാടനം ചെയ്യും. ഇന്ത്യയുടെ സാംസ്‌കാരിക പൈതൃകത്തെയും ദേശീയ ഐക്യത്തെയും ആഘോഷിക്കുന്നതിനായി വിഭാവനം ചെയ്ത ഈ മേള, 'ഏക് ഭാരത് ശ്രേഷ്ഠ ഭാരത്' എന്ന ആശയത്തെ പ്രതിനിധീകരിക്കുന്നു. വിവിധ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും തങ്ങളുടെ തനതായ പാരമ്പര്യങ്ങൾ, നാടൻ കലാരൂപങ്ങൾ, പ്രാദേശിക വിഭവങ്ങൾ, കരകൗശല വസ്തുക്കൾ, വിനോദസഞ്ചാര ആകർഷണങ്ങൾ എന്നിവ പ്രദർശിപ്പിക്കാനുള്ള വേദിയായി ഇത് മാറും. ഏക്ത നഗറിലും പരിസര പ്രദേശങ്ങളിലും വിനോദസഞ്ചാരം പ്രോത്സാഹിപ്പിക്കാൻ ഈ മേള സഹായിക്കുമെന്ന് പ്രതീക്ഷിക്കുന്നു. 2026 നവംബർ 15 വരെ ഈ മേള തുടരും.

ഇന്ത്യയുടെ ഐക്യം, വൈവിധ്യം, സാംസ്‌കാരിക പൈതൃകം, പുരോഗതി എന്നിവ ആഘോഷിക്കുന്ന 'ഏക്താ പ്രകാശ് പർവ്' എന്ന ദീപാലങ്കാര ഉത്സവത്തിനും പ്രധാനമന്ത്രി സാക്ഷ്യം വഹിക്കും. പ്രത്യേക പ്രമേയങ്ങളെ അടിസ്ഥാനമാക്കിയുള്ള ദീപാലങ്കാരങ്ങളിലൂടെ ഏക്ത നഗറിൽ രാത്രികാല വിനോദസഞ്ചാരത്തെ പ്രോത്സാഹിപ്പിക്കുകയാണ് ഈ ഉത്സവം ലക്ഷ്യമിടുന്നത്. ഇതിൽ പ്രധാനമായും രണ്ട് ആകർഷണങ്ങളാണുള്ളത്. 'പ്രാചീന ഇന്ത്യ മുതൽ ആധുനിക ഇന്ത്യ വരെ' എന്ന പ്രമേയത്തിൽ ഒരുക്കിയിരിക്കുന്ന, 530 മീറ്റർ നീളമുള്ള 'വാലി ഓഫ് ഫ്ലവേഴ്സ് റോഡ്' (Valley of Flowers Road) ദീപാലങ്കാരം, ഇന്ത്യയുടെ ദേശീയ സ്വത്വം, സംസ്കാരം, സ്ത്രീ ശാക്തീകരണം, സുരക്ഷാ സേനകൾ, സാങ്കേതികവിദ്യ, യോഗ, കുട്ടികൾക്കായി ഒരുക്കിയ ഭാവനാത്മക ലോകം എന്നിവയെ അവതരിപ്പിക്കുന്നു. ഇന്ത്യയുടെ നാനാത്വത്തിലെ ഏകത്വം എന്ന പ്രമേയത്തിൽ 180 മീറ്റർ നീളത്തിൽ ഒരുക്കിയിരിക്കുന്ന 'ഗ്ലോ ടണൽ' (Glow Tunnel), ഇന്ത്യയിലെ വിവിധ പ്രദേശങ്ങളിലെ സംസ്കാരം, വാസ്തുവിദ്യ, നാടൻ നൃത്തങ്ങൾ, കരകൗശല വസ്തുക്കൾ, ജീവിതശൈലികൾ എന്നിവയിലൂടെയുള്ള ഒരു നടത്താനുഭവം സന്ദർശകർക്ക് നൽകുന്നു. രാജ്യത്തിന്റെ വിവിധ ഭാഗങ്ങളിൽ നിന്നുള്ള കലാകാരന്മാർ സൃഷ്ടിച്ച കലാസൃഷ്ടികൾ ഉൾക്കൊള്ളുന്ന ഈ ദീപാലങ്കാരങ്ങളിൽ ഒന്നര കോടിയിലധികം എൽ.ഇ.ഡി (LED) ലൈറ്റുകളാണ് ഉപയോഗിച്ചിരിക്കുന്നത്.

ഒക്ടോബർ 31-ന്, ഏക്ത നഗറിൽ 400 കോടിയിലധികം രൂപയുടെ വിവിധ വികസന പദ്ധതികൾക്ക് പ്രധാനമന്ത്രി തറക്കല്ലിടുകയും, പൂർത്തിയായ പദ്ധതികൾ ഉദ്ഘാടനം ചെയ്ത് രാജ്യത്തിന് സമർപ്പിക്കുകയും ചെയ്യും. ഉദ്ഘാടനം ചെയ്യാനിരിക്കുന്ന പദ്ധതികളിൽ മലിനജല-ജല ശുദ്ധീകരണ പ്ലാന്റ്, കെട്ടിടങ്ങളുടെ പുറംഭാഗം പ്രകാശമാനമാക്കുന്ന 'ഫസാഡ് ലൈറ്റിംഗ്', നർമ്മദ ഘാട്ടിന്റെ നവീകരണം, ഐ.ആർ.സി.ടി.സി (IRCTC) ഹോട്ടൽ, ഏകതാ നഗറിലെ 'റെയിൻഫോറസ്റ്റ്', 'യൂണിറ്റി', 'ഇക്കോ ട്രയൽ' എന്നിവ ഉൾപ്പെടുന്നു. ഗോര-ഭന്ദ്ര റോഡ് വികസനം, സംയോജിത 'സീറോ വേസ്റ്റ്' സ്മാർട്ട് ഖരമാലിന്യ സംസ്കരണ പദ്ധതി, ഖൽവാനി ഇക്കോ ടൂറിസം വികസനം, കാക്റ്റസ് ആൻഡ് ബട്ടർഫ്ലൈ ഗാർഡനിലെ സമഗ്ര വികസന പദ്ധതികൾ എന്നിവയുൾപ്പെടെയുള്ള വിവിധ പദ്ധതികൾക്ക് പ്രധാനമന്ത്രി തറക്കല്ലിടും.

സർദാർ വല്ലഭഭായ് പട്ടേലിന്റെ 151-ാം ജന്മവാർഷികത്തോടനുബന്ധിച്ച്, 2026 ഒക്ടോബർ 31-ന് നടക്കുന്ന 'രാഷ്ട്രീയ ഏക്താ ദിവസ്' ആഘോഷങ്ങളിൽ പ്രധാനമന്ത്രി പങ്കെടുക്കും.

സെൻട്രൽ ആംഡ് പോലീസ് ഫോഴ്‌സസ് (CAPFs), സംസ്ഥാന പോലീസ് സേനകൾ, മറ്റ് കേന്ദ്ര പോലീസ് സംഘടനകൾ എന്നിവയുടെ അച്ചടക്കം, പ്രൊഫഷണലിസം, ധൈര്യം, സമർപ്പണബോധം എന്നിവ 'ഏക്താ പരേഡ്' പ്രദർശിപ്പിക്കും. ഇടതുപക്ഷ തീവ്രവാദത്തെ നേരിടുന്നതിൽ സുരക്ഷാ സേന കൈവരിച്ച നേട്ടങ്ങൾക്കും, തീവ്രവാദ ബാധിത പ്രദേശങ്ങൾ സമാധാനത്തിലേക്കും സുരക്ഷയിലേക്കും വികസനത്തിലേക്കും മാറിയതിനും ഈ വർഷത്തെ പരേഡിൽ പ്രത്യേക ഊന്നൽ നൽകും.

നാഷണൽ സ്കൂൾ ഓഫ് ​ഡ്രാമ (NSD) ഒരുക്കുന്ന 'നക്സൽ മുക്ത് ഭാരത്' (നക്സൽ വിമുക്ത ഭാരതം) എന്ന പ്രത്യേക നാടകാവതരണം ആഘോഷങ്ങളിലെ പ്രധാന ആകർഷണമായിരിക്കും. ഇടതുപക്ഷ തീവ്രവാദ ബാധിതരായ 126 ജില്ലകളിൽ നിന്നുള്ള ഏകദേശം 2,000 കലാകാരന്മാർ ഇതിൽ അണിനിരക്കും. ഈ പ്രദേശങ്ങളിലെ ജനസമൂഹങ്ങൾ നേരിട്ട വെല്ലുവിളികളെയും, സമാധാനത്തിലേക്കും സുരക്ഷയിലേക്കും വികസനത്തിലേക്കുമുള്ള അവരുടെ യാത്രയെയും നാടകങ്ങളിലൂടെ കലാകാരന്മാർ അവതരിപ്പിക്കും. 

ദേശസ്നേഹം, ദേശീയ അഭിമാനം, കൂട്ടായ്മ എന്നിവ പ്രതിഫലിപ്പിക്കുന്ന 'വന്ദേ മാതരം' എന്ന ആശയത്തെ അടിസ്ഥാനമാക്കിയുള്ളതായിരിക്കും നിശ്ചലദൃശ്യങ്ങളും സാംസ്കാരിക പരിപാടികളും. ജനങ്ങളുടെ അഭിലാഷങ്ങൾ, വിവിധ സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും സാംസ്കാരിക സമൃദ്ധി, ജനങ്ങളുടെ വികസന യാത്രകൾ എന്നിവ ഈ നിശ്ചലദൃശ്യങ്ങളിലൂടെ ദൃശ്യമാകും.

ഇന്ത്യയിലുടനീളമുള്ള ഏകദേശം 5,000 കലാകാരന്മാർ പങ്കെടുക്കുന്ന വിപുലമായ സാംസ്കാരിക പരിപാടി, രാജ്യത്തിന്റെ വൈവിധ്യമാർന്ന ശാസ്ത്രീയ-നാടോടി പാരമ്പര്യങ്ങൾ, സംഗീതം, നൃത്തം, കലാപരമായ പൈതൃകം എന്നിവയെ അനാവരണം ചെയ്യും.

***

SK