ભારત-જર્મની વેપાર અને રોકાણ સંબંધોને મજબૂત કરવા કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલે બર્લિનમાં ઉચ્ચ સ્તરીય આર્થિક બેઠકો યોજી

કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલે ભારત-જર્મની વેપાર, રોકાણ અને ઔદ્યોગિક સહયોગને મજબૂત કરવા માટે 22 ઓક્ટોબરના રોજ બર્લિનમાં ઉચ્ચ સ્તરીય બેઠકોની શ્રેણી યોજી હતી. આ જોડાણોમાં જર્મનીના આર્થિક બાબતો અને ઊર્જા મંત્રાલયના સંઘીય મંત્રી સુશ્રી કેથેરીના રેઇચ સાથેની દ્વિપક્ષીય બેઠક, જર્મન કાઉન્સિલ ઓન ફોરેન રિલેશન્સ (DGAP) ખાતે ઇન્ડિયા સેન્ટરનું ઉદ્ઘાટન, ભારત-જર્મની બિઝનેસ રાઉન્ડટેબલ અને બર્લિન ગ્લોબલ ડાયલોગમાં ભાગીદારીનો સમાવેશ થાય છે.

દ્વિપક્ષીય બેઠક દરમિયાન, શ્રી પીયૂષ ગોયલ અને સુશ્રી રેઇચે વધુ મજબૂત ઔદ્યોગિક સહયોગની તકો અને દ્વિપક્ષીય વેપાર અને રોકાણને વિસ્તારવા માટે ભારત-EU મુક્ત વેપાર કરાર (FTA) ની ક્ષમતા અંગે ચર્ચા કરી હતી. બંને મંત્રીઓએ બર્લિનમાં DGAP ના ઇન્ડિયા સેન્ટરનું સંયુક્ત રીતે ઉદ્ઘાટન કર્યું હતું, જેનો ઉદ્દેશ્ય ભારત-જર્મની સંબંધો પર નીતિગત સંશોધન અને સંવાદને પ્રોત્સાહન આપવાનો છે.

કેન્દ્રીય મંત્રીઓએ જર્મન CEO અને બિઝનેસ લીડર્સની ભાગીદારી સાથે DGAP અને એશિયા-પેસિફિક કમિટી ઓફ જર્મન બિઝનેસ (APA) સાથે આયોજિત ભારત-જર્મની બિઝનેસ રાઉન્ડટેબલની સહ-અધ્યક્ષતા પણ કરી હતી. તેમના મુખ્ય સંબોધનમાં, શ્રી ગોયલે ઝડપી વૃદ્ધિ અને એક નવા વેપાર યુગના નિર્માણ પર વાત કરી હતી, જ્યારે સુશ્રી રેઇચે FTAને ઔદ્યોગિક વાસ્તવિકતામાં રૂપાંતરિત કરવા વિશે વાત કરી હતી. ત્યારબાદની ચર્ચા સંભવિત ભારત-EU FTAને ચોક્કસ વેપાર અને રોકાણની તકોમાં રૂપાંતરિત કરવા પર કેન્દ્રિત હતી.

બર્લિન ગ્લોબલ ડાયલોગમાં, શ્રી પીયૂષ ગોયલે રોકાણ માટે જર્મન ચાન્સેલરના અંગત પ્રતિનિધિ શ્રી માર્ટિન બ્લેસિંગ; સિંગાપોરના માનવશક્તિ મંત્રી અને ઊર્જા તથા વિજ્ઞાન અને ટેકનોલોજીના પ્રભારી મંત્રી ડૉ. તાન સી લેંગ; અને માર્સેગાગ્લિયા સ્ટીલના ચેરવુમન અને સીએમડી સુશ્રી એમ્મા માર્સેગાગ્લિયા સાથે "નવો યુગ, નવો જોડાણ: ત્રીજો માર્ગ?" શીર્ષક હેઠળના પેનલ ચર્ચામાં ભાગ લીધો હતો અને આ સત્રનું સંચાલન પ્રોફેસર ડૉ. લાર્સ-હેન્ડ્રિક રોલર દ્વારા કરવામાં આવ્યું હતું. શ્રી ગોયલે આંતરરાષ્ટ્રીય ભાગીદારીમાં વિશ્વાસ, પૂરક આર્થિક શક્તિઓ અને સ્થિતિસ્થાપક સપ્લાય ચેઇન્સના મહત્વ પર ભાર મૂક્યો હતો.

શ્રી ગોયલે વ્યવસાય અને રોકાણ સહયોગની તકોની શોધ કરવા માટે બેયર એજી (Bayer AG) ના મેનેજમેન્ટ બોર્ડના સભ્ય અને તેના ફાર્માસ્યુટિકલ્સ ડિવિઝનના પ્રમુખ શ્રી સ્ટેફન ઓએલરિચ; નાઉફ ગ્રુપના મેનેજિંગ પાર્ટનર શ્રી મુરાત એકિલદિઝ; અને ફ્રેસેનિયસ SE & Co. KGaA ના સીઈઓ શ્રી માઇકલ સેન સાથે પણ અલગ-અલગ બેઠકો યોજી હતી.

જર્મની અને નેધરલેન્ડની તેમની મુલાકાતમાં શ્રી ગોયલ સાથે લગભગ 100 ભારતીય વ્યવસાયો અને સ્ટાર્ટઅપ્સનું પ્રતિનિધિમંડળ પણ સામેલ છે. બર્લિનની આ બેઠકો ભારત-જર્મની વ્યૂહાત્મક ભાગીદારીને ખાસ કરીને વેપાર, રોકાણ, ટેકનોલોજી અને ઔદ્યોગિક સહયોગમાં વધુ મજબૂત કરવાના ચાલુ પ્રયાસોનો એક ભાગ છે.

SM/BS/JD