મધ્યપ્રદેશ સરકારના મત્સ્યોદ્યોગ વિભાગ અને ભારત સરકારના મત્સ્યોદ્યોગ, પશુપાલન અને ડેરી મંત્રાલય (MoFAHD) ના મત્સ્યોદ્યોગ વિભાગ દ્વારા 23 ઓક્ટોબર 2026 ના રોજ ભોપાલ, મધ્યપ્રદેશ ખાતે 'ફિશરીઝ ઇન્વેસ્ટર્સ એન્ડ એક્સપોર્ટર્સ કોન્ક્લેવ 2026' નું આયોજન કરવામાં આવી રહ્યું છે. આ કોન્ક્લેવનો ઉદ્દેશ્ય આંતરદેશિય મત્સ્ય ઉત્પાદન અને રોકાણ, પ્રક્રિયા, કોલ્ડ-ચેઈન ઈન્ફ્રાસ્ટ્રક્ચર, મૂલ્યવર્ધન અને નિકાસ બજારો વચ્ચેના સંબંધોને મજબૂત કરવાનો છે. તેનો હેતુ માછીમારો અને મત્સ્ય પાલકો માટે બજાર પહોંચ અને વળતરમાં સુધારો કરવા પર ધ્યાન કેન્દ્રિત કરીને, મુખ્યત્વે ઉત્પાદન-કેન્દ્રિત અભિગમને બદલે એકીકૃત મૂલ્ય-શૃંખલા (વેલ્યુ-ચેઈન) મોડલ તરફના પરિવર્તનને પ્રોત્સાહિત કરવાનો છે.

આ કોન્ક્લેવમાં રોકાણકારો, નિકાસકારો, માછીમારો, મધ્યપ્રદેશના વિવિધ ભાગોમાંથી 1,000 થી વધુ મત્સ્ય પાલકો, મત્સ્યોદ્યોગ સહકારી મંડળીઓ, ફિશ ફાર્મર પ્રોડ્યુસર ઓર્ગેનાઈઝેશન્સ (FFPOs), સાહસિકો, સ્ટાર્ટ-અપ્સ, પ્રોસેસર્સ, નાણાકીય સંસ્થાઓ, સંશોધન સંસ્થાઓ અને અન્ય હિતધારકો એકત્ર થશે. આંતરદેશિય રાજ્યોને મત્સ્યોદ્યોગ રોકાણ અને નિકાસ નિવસનતંત્રમાં સાંકળવા પર વિશેષ ભાર મૂકવાની સાથે, આંતરદેશિય મત્સ્યોદ્યોગ મૂલ્ય શૃંખલામાં સાહસ વિકાસ, નાણાકીય સહાયતા સુધી પહોંચ, બજાર જોડાણો અને સહયોગની તકો પર વિચાર-વિમર્શ કરવામાં આવશે.

આ કોન્ક્લેવની એક મુખ્ય વિશેષતા 'મધ્યપ્રદેશ ફિશરીઝ ઇન્વેસ્ટમેન્ટ એન્ડ એક્સપોર્ટ ગાઇડલાઇન્સ, 2026' નું વિમોચન હશે. મધ્યપ્રદેશને કેન્દ્ર દ્વારા 'જળાશય મત્સ્યોદ્યોગ ક્લસ્ટર’ તરીકે અધીસૂચિત કરવામાં આવ્યું છે. આ નીતિનો હેતુ હેચરી, મત્સ્ય બીજ અને ખોરાક, જળાશય અને કેજ ફિશરીઝ, જળચર પ્રાણી સ્વાસ્થ્ય, પ્રોસેસિંગ, કોલ્ડ-ચેઈન ઈન્ફ્રાસ્ટ્રક્ચર, લોજિસ્ટિક્સ, મૂલ્યવર્ધન અને બજાર વિકાસ સહિત મત્સ્યોદ્યોગ મૂલ્ય શૃંખલાના મુખ્ય ક્ષેત્રોમાં રોકાણને સુગમ બનાવવાનો છે.

આ કાર્યક્રમમાં આંતરદેશિય રાજ્યોની નિકાસ ક્ષમતા પર સ્ટાન્ડર્ડ ઓપરેટિંગ પ્રોસિજર્સનું વિમોચન, ઇન્ટિગ્રેટેડ કેજ કલ્ચર યુનિટ્સનું વર્ચ્યુઅલ ઉદ્ઘાટન પણ સામેલ હશે. આ કાર્યક્રમ દરમિયાન, કેન્દ્રીય મત્સ્યોદ્યોગ, પશુપાલન અને ડેરી તથા પંચાયતી રાજ મંત્રી શ્રી રાજીવ રંજન સિંહ મધ્યપ્રદેશમાં જળાશયો અને અમૃત સરોવરોના સંકલિત વિકાસ માટેની વહીવટી મંજૂરી સુપ્રત કરશે. આ પહેલોથી આંતરદેશિય મત્સ્યોદ્યોગમાં રોકાણને ટેકો મળવાની, જળ સંસાધનોના ઉત્પાદક ઉપયોગને પ્રોત્સાહન મળવાની અને સાહસ વિકાસને વેગ મળવાની અપેક્ષા છે.

ભારતના વિસ્તરતા જતા મત્સ્યોદ્યોગ ક્ષેત્ર અને ખાદ્ય સુરક્ષા, આજીવિકા અને નિકાસ કમાણીમાં તેના વધતા યોગદાનના સંદર્ભમાં આ કોન્ક્લેવ નોંધપાત્ર મહત્વ ધરાવે છે. 2024-25 માં ભારતનું મત્સ્ય ઉત્પાદન 197.75 લાખ ટને પહોંચ્યું હતું, જેમાંથી 151.60 લાખ ટન આંતરદેશિય મત્સ્યોદ્યોગમાંથી આવ્યું હતું, જે દેશના કુલ મત્સ્ય ઉત્પાદનના લગભગ પોણા ભાગ જેટલું છે. 2025-26 માં ભારતની સીફૂડ નિકાસનું મૂલ્ય ₹73,890 કરોડ હતું. આ આંકડા આંતરદેશિય મત્સ્યોદ્યોગની ક્ષમતાને સાકાર કરવા માટે ઈન્ફ્રાસ્ટ્રક્ચર, પ્રોસેસિંગ ક્ષમતાઓ અને બજાર જોડાણોને મજબૂત કરવાના મહત્વ પર પ્રકાશ પાડે છે.

લગભગ 4.50 લાખ હેક્ટર જળ વિસ્તાર ધરાવતું મધ્યપ્રદેશ આંતરદેશિય મત્સ્યોદ્યોગના વિકાસ માટે નોંધપાત્ર ક્ષમતા ધરાવે છે. આ કોન્ક્લેવ રાજ્યના ઉત્પાદન આધારને, અન્ય આંતરદેશિય રાજ્યોની સાથે, રોકાણ, પ્રોસેસિંગ, મૂલ્યવર્ધન અને સ્થાનિક તથા નિકાસ બજારો સાથે જોડવાનો પ્રયાસ કરે છે.

આ કોન્ક્લેવમાં મધ્યપ્રદેશના માનનીય મુખ્યમંત્રી ડૉ. મોહન યાદવ; માનનીય કેન્દ્રીય મત્સ્યોદ્યોગ, પશુપાલન અને ડેરી તથા પંચાયતી રાજ મંત્રી શ્રી રાજીવ રંજન સિંહ ઉર્ફે લલન સિંહ; માનનીય કેન્દ્રીય મત્સ્યોદ્યોગ, પશુપાલન અને ડેરી તથા પંચાયતી રાજ રાજ્ય મંત્રી પ્રો. એસ. પી. સિંહ બઘેલ; અને મધ્યપ્રદેશ સરકારના મત્સ્યપાલક કલ્યાણ અને મત્સ્યોદ્યોગ વિકાસ વિભાગના માનનીય મંત્રી શ્રી નારાયણ સિંહ પવાર ઉપસ્થિત રહેશે.

હિતધારકોની સહભાગીતા અને રોકાણ તથા બજાર વિકાસ પરના વિચાર-વિમર્શ દ્વારા, આ કોન્ક્લેવ વધુ સ્પર્ધાત્મક અને બજાર-કેન્દ્રિત આંતરદેશિય મત્સ્યોદ્યોગ મૂલ્ય શૃંખલાને પ્રોત્સાહન આપવા, સાહસો અને નિકાસકારો માટે તકોનો વિસ્તાર કરવા અને માછીમારો તથા મત્સ્ય પાલકો માટે આજીવિકા અને આવકની તકોને મજબૂત કરવાનો પ્રયાસ કરે છે.

SM/IJ/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(રીલીઝ આઈડી: 2326374) મુલાકાતી સંખ્યા : 9