ભારતીય સેનાની સર્વોચ્ચ કક્ષાની દ્વિવાર્ષિક મંચ, આર્મી કમાન્ડર્સ કોન્ફરન્સનો આજથી પ્રારંભ થયો છે. ચીફ ઓફ ધ આર્મી સ્ટાફ (COAS) ની અધ્યક્ષતામાં આ કોન્ફરન્સ 21 થી 23 ઓક્ટોબર 2026 દરમિયાન નવી દિલ્હી ખાતે યોજાઈ રહી છે. તે વિકસતા સુરક્ષા વાતાવરણ, ઓપરેશનલ સજ્જતા, ક્ષમતા વિકાસ અને ભવિષ્ય માટે તૈયાર પરિવર્તનકારી પહેલો પર વિચાર-વિમર્શ કરવા માટે ભારતીય સેનાના વરિષ્ઠ નેતૃત્વને એકમંચ પર લાવે છે.

આ કોન્ફરન્સને માનનીય રક્ષા મંત્રી શ્રી રાજનાથ સિંહ સંબોધિત કરશે. આ ઉપરાંત, ચીફ ઓફ ડિફેન્સ સ્ટાફ, ચીફ ઓફ ધ નેવલ સ્ટાફ, સચિવ (ઇલેક્ટ્રોનિક્સ અને ઇન્ફર્મેશન ટેકનોલોજી), ઇલેક્ટ્રોનિક્સ અને ઇન્ફર્મેશન ટેકનોલોજી મંત્રાલય સમકાલીન સુરક્ષા સંબંધિત મુદ્દાઓ પર વક્તવ્ય આપશે.

આ કોન્ફરન્સનું મુખ્ય આકર્ષણ માનનીય રક્ષા મંત્રી દ્વારા 'લેન્ડ વોરફેર ડોક્ટ્રિન'નું વિમોચન હશે. આ સિદ્ધાંત યુદ્ધના બદલાતા સ્વરૂપ અને ભવિષ્યના સંઘર્ષો દ્વારા ઉદ્ભવતા પડકારોનો સામનો કરવા માટે ભારતીય સેનાને સજ્જ કરવા માટે એક વ્યાપક ફ્રેમવર્ક પૂરું પાડશે. માનનીય રક્ષા મંત્રી વાર્ષિક 'યુનાઇટેડ નેશન્સ જર્નલ' નું પણ અનાવરણ કરશે અને સંયુક્ત રાષ્ટ્રના શાંતિ રક્ષકો તરીકે સેવા આપતી વખતે નોંધપાત્ર યોગદાન આપનાર ભારતીય સેનાના જવાનોનું સન્માન કરશે, સંયુક્ત રાષ્ટ્રના બેનર હેઠળ આંતરરાષ્ટ્રીય શાંતિ અને સુરક્ષામાં તેમની ઉત્કૃષ્ટ સેવા, વ્યાવસાયિકતા અને યોગદાનની સરાહના કરશે.

પર્યાવરણીય ટકાઉપણું, સંસાધન સંચાલન અને મજબૂત ઉડ્ડયન સુરક્ષા સંસ્કૃતિના પ્રોત્સાહનમાં ઉત્કૃષ્ટતાને માન્યતા આપવા માટે, COAS ગ્રીન મિલિટરી સ્ટેશન્સ અને એવિએશન ફ્લાઇટ સેફ્ટી માટેના પુરસ્કારો પણ એનાયત કરશે.

પોતાના વ્યાપક એજન્ડા સાથે, આ કોન્ફરન્સ ભારતીય સેનાના વરિષ્ઠ નેતૃત્વ માટે ચાલુ પહેલોની સમીક્ષા કરવા, ભવિષ્યના મુખ્ય ક્ષેત્રોની ઓળખ કરવા અને પ્રગતિશીલ, અનુકૂલનશીલ, ટેકનોલોજીથી સજ્જ અને ભવિષ્ય માટે તૈયાર ભારતીય સેનાના નિર્માણ માટે યોગ્ય નીતિગત દિશાનિર્દેશો તૈયાર કરવા માટે એક મહત્વપૂર્ણ મંચ પૂરો પાડશે.

SM/IJ/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(રીલીઝ આઈડી: 2325935) મુલાકાતી સંખ્યા : 12