صارفین کے حقوق کے تحفظ سے متعلق مرکزی اتھارٹی(سی سی پی اے)نے صارفین کے تحفظ کے قانون، 2019 اور صارفین کے تحفظ (ای کامرس) قواعد، 2020 کی دفعات کے تحت، دھماکہ خیز مواد کے قانون، 1884، امونیم نائٹریٹ قواعد، 2012 اور دیگر قابلِ اطلاق ضوابط کے ساتھ مل کر، ڈیجیٹل پلیٹ فارمز پر ضابطے کے تحت آنے والے اور خطرناک دھماکہ خیز مادّوں، مثلاً امونیم نائٹریٹ، گن پاؤڈر، پکرک ایسڈ اور پینٹا اریتھریٹول ٹیٹرا نائٹریٹ (پی ای ٹی این) کی غیر مجاز آن لائن فہرست سازی، نمائش، تشہیر اور فروخت میں سہولت فراہم کرنے کے خلاف ضابطہ جاتی کارروائی شروع کی ہے۔ اس کارروائی کا مقصد صارفین کے تحفظ، عوامی سلامتی اور ای کامرس کے ذمہ دارانہ طریقۂ کار کو مزید مضبوط بنانا ہے۔

ان مادّوں کو دھماکہ خیز مواد قرار دیا گیا ہے اور یہ دھماکہ خیز مواد کے قانون، 1884 اور اس کے تحت بنائے گئے قواعد و ضوابط کے تحت آتے ہیں۔ ان کی قانونی خرید و فروخت کے لیے مقررہ لائسنس کا ہونا ضروری ہے۔ آن لائن پلیٹ فارمز سے یہ توقع کی جاتی ہے کہ وہ فروخت کنندگان کے درست پی ای ایس او (پٹرولیم اینڈ ایکسپلوسِوز سیفٹی آرگنائزیشن) لائسنس کی تفصیلات ظاہر کریں اور خریداری سے قبل خریداروں کی شناخت اور ان کے لائسنس یافتہ ہونے کی حیثیت کی تصدیق کو یقینی بنائیں۔

 

سی سی پی اے نے آن لائن پلیٹ فارمز پر ایسے مادّوں کی فہرست سازی اور فروخت کے حوالے سے کارروائی شروع کی، جن میں درج ذیل پلیٹ فارمز شامل ہیں:

1.انڈیا مارٹ

2.ٹریڈ انڈیا

3.ڈائل 4 ٹریڈ

4.جسٹ ڈائل

5.سگما-الڈرچ انڈیا

6.ایکسپورٹرز انڈیا

7.آئی بائے کیمیکلز

ان پلیٹ فارمز نے مجموعی طور پر 3,940 فروخت کنندگان اور آن لائن فہرستوں کی تفصیلات فراہم کیں، جن کی تفصیل ذیل میں دی گئی ہے۔ ان تمام فہرستوں کو تمام متعلقہ پلیٹ فارمز سے ہٹا دیا گیا ہے۔

 

 

 

سی سی پی اے اب تک درج ذیل معاملات میں حتمی احکامات جاری کر چکا ہے:

• ڈائل 4 ٹریڈ: امونیم نائٹریٹ کی فروخت کے معاملے میں 10 لاکھ روپے کا جرمانہ عائد کیا گیا۔
• ایکسپورٹرز انڈیا (ویبلنک ڈاٹ اِن پرائیویٹ لمیٹڈ): امونیم نائٹریٹ اور پینٹا اریتھریٹول ٹیٹرا نائٹریٹ (پی ای ٹی این) کی فروخت کے معاملے میں 10 لاکھ روپے کا جرمانہ عائد کیا گیا۔
• ایکسپورٹرز انڈیا (ویبلنک ڈاٹ اِن پرائیویٹ لمیٹڈ): پکرک ایسڈ کی فروخت کے معاملے میں 10 لاکھ روپے کا جرمانہ عائد کیا گیا۔

 

1.ڈائل 4 ٹریڈ ٹیکنالوجیز پرائیویٹ لمیٹڈ

• مرکزی ادارۂ تحفظِ صارفین (سی سی پی اے) نے کمپنی پر 10 لاکھ روپے کا جرمانہ عائد کیا اور اسے ہدایت دی کہ وہ اپنے پلیٹ فارم پر امونیم نائٹریٹ اور کسی بھی دوسرے دھماکہ خیز مادّے کی فہرست سازی اور ان کی فروخت میں سہولت فراہم کرنے کا عمل بند کرے۔
• کمپنی نے صارفین کے تحفظ کے قانون کی دفعہ 24 کے تحت اس حکم کو قومی صارفین کے تنازعات کے ازالے کے کمیشن (این سی ڈی آر سی) میں چیلنج کیا۔ فریقین کو 9 اکتوبر 2026 کو سننے کے بعد، (این سی ڈی آر سی) نے کمپنی کی اپیل مسترد کر دی۔
• حکم میں ان فہرستوں کو قانون کی دفعات 2(28) اور 2(47) کے تحت گمراہ کن اشتہارات اور غیر منصفانہ تجارتی طریقۂ کار قرار دیا گیا۔ کمپنی کو یہ بھی ہدایت دی گئی کہ وہ اپنے پلیٹ فارم پر مذکورہ مادّوں کی فہرست سازی اور ان کی فروخت میں سہولت فراہم کرنے کا عمل بند کرے۔

2.ایکسپورٹرز انڈیا (ویبلنک ڈاٹ اِن پرائیویٹ لمیٹڈ)

• مرکزی ادارۂ تحفظِ صارفین (سی سی پی اے) نے کمپنی پر 10 لاکھ روپے کا جرمانہ عائد کیا۔ یہ جرمانہ امونیم نائٹریٹ اور پینٹا اریتھریٹول ٹیٹرا نائٹریٹ (پی ای ٹی این) کی آن لائن فہرست سازی، میزبانی، تشہیر اور ان کی فروخت میں سہولت فراہم کرنے کے معاملے میں لگایا گیا۔ یہ دونوں دھماکہ خیز مادّے ہیں، جن کی فروخت دھماکہ خیز مواد کے قانون، 1884 اور اس کے تحت بنائے گئے قواعد و ضوابط کے تحت منضبط ہے۔
• ایک دوسرے معاملے میں، کمپنی پر 10 لاکھ روپے کا مزید جرمانہ عائد کیا گیا۔ یہ کارروائی پکرک ایسڈ نامی دھماکہ خیز مادّے کی آن لائن فہرست سازی، میزبانی، تشہیر اور اس کی فروخت میں سہولت فراہم کرنے کے حوالے سے کی گئی۔ اس مادّے کی فروخت بھی دھماکہ خیز مواد کے قانون، 1884 اور اس کے تحت بنائے گئے قواعد و ضوابط کے تحت منضبط ہے۔
• ایکسپورٹرز انڈیا نے قانون کی دفعہ 24 کے تحت ان احکامات کے خلاف قومی صارفین کے تنازعات کے ازالے کے کمیشن (NCDRC) میں اپیلیں دائر کی ہیں۔ توقع ہے کہ ان اپیلوں کو آئندہ مدت میں سماعت کے لیے فہرست میں شامل کیا جائے گا۔

3.انڈیا مارٹ انٹر میش لمیٹڈ

• مرکزی ادارۂ تحفظِ صارفین (سی سی پی اے) نے انڈیا مارٹ انٹر میش لمیٹڈ کو اپنے پلیٹ فارم پر امونیم نائٹریٹ، پینٹا اریتھریٹول ٹیٹرا نائٹریٹ (پی ای ٹی این)، گن پاؤڈر اور پکرک ایسڈ جیسے خطرناک مادّوں کی آن لائن فہرست سازی، میزبانی، تشہیر، فروخت اور فروخت میں سہولت فراہم کرنے کے معاملے میں نوٹس جاری کیے تھے۔
• ڈائریکٹر جنرل — تحقیقاتی شعبہ نے اس معاملے میں اپنی تحقیقات مکمل کر لی ہیں۔ تحقیقاتی رپورٹ کمپنی کے ساتھ شیئر کر دی گئی ہے اور انڈیا مارٹ نے اس رپورٹ کے جواب میں اپنا مؤقف بھی پیش کر دیا ہے۔
• صارفین کے تحفظ کے قانون، 2019 کی دفعات کی تعمیل کرتے ہوئے، کمپنی کو سماعت کے متعدد مواقع فراہم کیے گئے، جن کے دوران اس نے اپنا تفصیلی مؤقف پیش کیا۔
• کمپنی نے سی سی پی اے کی جانب سے جاری کردہ وجہ بتاؤ نوٹسز کو چیلنج کرتے ہوئے معزز دہلی ہائی کورٹ سے رجوع کیا ہے اور اس سلسلے میں ایک رِٹ پٹیشن دائر کی ہے۔

4.جسٹ ڈائل

• مرکزی ادارۂ تحفظِ صارفین (سی سی پی اے) نے جسٹ ڈائل لمیٹڈ کو امونیم نائٹریٹ کی آن لائن فہرست سازی، میزبانی، تشہیر، فروخت اور اس کی فروخت میں سہولت فراہم کرنے کے معاملے میں نوٹس جاری کیے تھے۔
• ڈائریکٹر جنرل — تحقیقاتی شعبہ نے اس معاملے میں اپنی تحقیقات مکمل کر لی ہیں۔ تحقیقاتی رپورٹ کمپنی کے ساتھ شیئر کر دی گئی ہے اور جسٹ ڈائل نے اس رپورٹ کے جواب میں اپنا مؤقف بھی پیش کر دیا ہے۔
• صارفین کے تحفظ کے قانون، 2019 کی دفعات کے تحت، حتمی حکم جاری کرنے سے پہلے کمپنی کو سماعت کا موقع دینا ضروری ہے۔ اب تک کمپنی کو سماعت کے چار مواقع فراہم کیے جا چکے ہیں، لیکن ہر مرتبہ کمپنی نے سماعت ملتوی کرنے کی درخواست کی ہے۔اس معاملے میں اگلی اور آخری سماعت 23 اکتوبر 2026 کو مقرر کی گئی ہے۔

ڈائریکٹر جنرل — تحقیقاتی شعبے کے زیرِ تفتیش معاملات

• سگما الڈرچ کیمیکلز پرائیویٹ لمیٹڈ: امونیم نائٹریٹ، پی ای ٹی این اور پکرک ایسڈ کی آن لائن فہرست سازی، پلیٹ فارم پر دستیابی، تشہیر اور فروخت میں سہولت فراہم کرنے کے معاملے کی تحقیقات۔

 

• ٹریڈ انڈیا (انفو کام نیٹ ورک پرائیویٹ لمیٹڈ): پکرک ایسڈ اور پی ای ٹی این کی آن لائن فہرست سازی، پلیٹ فارم پر دستیابی، تشہیر اور فروخت میں سہولت فراہم کرنے کے معاملے کی تحقیقات۔
• آئی بائے کیمیکلز: پکرک ایسڈ کی آن لائن فہرست سازی، پلیٹ فارم پر دستیابی، تشہیر اور فروخت میں سہولت فراہم کرنے کے معاملے کی تحقیقات۔

یہ کارروائی اس عزم کو مزید مضبوط کرتی ہے کہ حکومت اس بات کو یقینی بنانے کے لئے پُرعزم ہے کہ ڈیجیٹل مارکیٹ پلیسز قابلِ اطلاق قوانین اور صارفین کے تحفظ کے معیارات کی خلاف ورزی کرتے ہوئے ضابطے کے تحت آنے والے یا خطرناک مادّوں تک غیر مجاز رسائی فراہم نہ کریں۔

سی سی پی اے صارفین کے حقوق کے تحفظ، محفوظ ڈیجیٹل مارکیٹ پلیسز کو یقینی بنانے، غیر منصفانہ تجارتی طریقوں کی روک تھام اور تیزی سے ترقی کرتے ہوئے ای کامرس کے نظام میں صارفین کے اعتماد کو مزید مستحکم کرنے کے لیے پُرعزم ہے۔

***

ش ح۔ ک ا۔ ع د

U.NO.6320

(ریلیز آئی ڈی: 2325216) وزیٹر کاؤنٹر : 4