منشیات کی منظم اسمگلنگ کے خلاف بڑی کارروائی کرتے ہوئے، تمل ناڈو کے ساحلی علاقے میں حالیہ برسوں کی منشیات کی سب سے بڑی ضبطیوں میں سے ایک کے دوران، محکمۂ محصولات کی خفیہ معلوماتی شاخ (ڈی آر آئی) نے تمل ناڈو کے ضلع ناگاپٹنم کے ایک ساحلی گاؤں سے 137 کلوگرام (مجموعی وزن) کرسٹل میتھ ایمفیٹامین، جو ایک ممنوعہ مصنوعی منشیات ہے، ضبط کی ہے۔

مخصوص خفیہ اطلاع کی بنیاد پر، ڈی آر آئی کے افسران نے 16 سے 17 اکتوبر 2026 کے دوران سخت نگرانی اور نفاذِ قانون کی کارروائی انجام دی، جس کے نتیجے میں ساحلی راستے سے منشیات کی اسمگلنگ کرنے والے ایک مشتبہ نیٹ ورک کا پردہ فاش ہوا۔ یہ نیٹ ورک منشیات کو سری لنکا اسمگل کرنے کی کوشش کر رہا تھا۔ منشیات کی اس کھیپ کو سمندر کے درمیان دوسری کشتی میں منتقل کرکے سری لنکا اسمگل کیا جانا تھا۔ ضبط شدہ منشیات کی غیر قانونی منڈی میں مالیت 100 کروڑ روپے سے زیادہ ہونے کا تخمینہ ہے۔

یہ کارروائی اس مخصوص خفیہ اطلاع کے بعد کی گئی کہ منشیات کی ایک بڑی کھیپ کو ضلع ناگاپٹنم کے ایک ساحلی مقام پر ذخیرہ کرنے اور وہاں سے سری لنکا اسمگل کرنے کے لیے لایا گیا ہے۔ اس کے بعد کی گئی تلاشی کے دوران چاندی کے ورق میں لپٹے 27 پیکٹوں پر مشتمل 6 سفری تھیلے برآمد ہوئے، جن میں سے ہر پیکٹ کا وزن تقریباً 5 کلوگرام تھا۔ ان پیکٹوں میں سفید قلمی مادہ موجود تھا، جس کے اعلیٰ درجے کی خالصیت والی میتھ ایمفیٹامین ہونے کا شبہ ہے۔ ضبطی کی کارروائی منشیات اور نفسیاتی اثرات رکھنے والے مادوں سے متعلق قانون، 1985(این ڈی پی ایس ایکٹ) کی دفعات کے تحت انجام دی گئی۔

مشتبہ منتظم کے ٹھکانے پر بیک وقت کی گئی تلاشی کے دوران ڈی آر آئی کے افسران نے 10 لاکھ روپے نقد ضبط کیے، جن کے منشیات کی فروخت سے حاصل ہونے والی رقم ہونے کا شبہ ہے۔ منشیات کی نقل و حمل میں مبینہ طور پر استعمال ہونے والی دو چار پہیہ گاڑیاں اور ایک دو پہیہ گاڑی بھی ضبط کی گئیں۔ اس کارروائی سے منشیات کی اسمگلنگ کے اس نیٹ ورک کا کامیابی سے پردہ فاش ہوا، جس میں ساحلی راستے سے منشیات بیرونِ ملک بھیجنے، نقل و حمل، ذخیرہ کرنے اور کھیپ کے انتظامات میں ملوث افراد شامل تھے۔ این ڈی پی ایس ایکٹ، 1985 کی دفعات کے تحت 4 افراد کو گرفتار کرکے عدالتی تحویل میں بھیج دیا گیا ہے۔

اس کارروائی کے ذریعے ڈی آر آئی نے نہ صرف منشیات کی ایک بڑی مقدار کو غیر قانونی گردش سے باہر نکالا، بلکہ منشیات کی اسمگلنگ کے ایک نیٹ ورک کو بھی کامیابی سے ختم کیا۔ منشیات کی یہ بڑی ضبطی منظم اسمگلنگ کے نیٹ ورکس کو ناکام بنانے اور ہندوستان کے ساحلی علاقوں کو منشیات کی غیر قانونی اسمگلنگ کے راستے کے طور پر استعمال ہونے سے روکنے کے لیے ڈی آر آئی کی مسلسل کوششوں اور نفاذِ قانون کی صلاحیتوں کو اجاگر کرتی ہے۔

******

ش ح۔ ش ا ر۔ ول

Uno-6276