بھارت کے نائب صدر، جناب سی پی رادھا کرشنن نے آج کوزیکوڈ، کیرلا میں 'نوراتری سرگوتسوم 2026' کا افتتاح کیا اور ترقی کی راہ پر آگے بڑھتے ہوئے بھارت کے بھرپور ثقافتی ورثے کو برقرار رکھنے کی اہمیت پر زور دیا۔

حاضرین سے خطاب کرتے ہوئے، نائب صدر نے کہا کہ نوراتری 'آدی پراشکتی' کی روحانی نسوانی طاقت کا جشن ہے، جو کائنات کی تخلیق، طاقت، حکمت اور ہمدردی کا ابدی سرچشمہ ہیں۔ انہوں نے اس بات پر زور دیا کہ اس تہوار کا لازوال پیغام یہ ہے کہ حوصلے کو خوف پر غالب آنا چاہیے، راست بازی کو ناانصافی پر فتح پانی چاہیے، اور علم کو جہالت کو دور کرنا چاہیے۔ انہوں نے کہا کہ یہ لافانی اقدار معاشرے کو ایک بہتر مستقبل کی طرف لے جانے کے لیے مسلسل رہنمائی کرتی ہیں۔

بھارت کی متنوع نوراتری روایات پر روشنی ڈالتے ہوئے، نائب صدر نے کہا کہ زبانوں، رسوم و رواج اور عبادت کے طریقوں کے تنوع کے باوجود، یہ ملک اپنی مشترکہ تہذیبی وراثت کے ذریعے متحد ہے۔ انہوں نے واضح کیا کہ یہ چیز 'ایک بھارت، شریشٹھ بھارت' کے جذبے کی عکاسی کرتی ہے۔

وزیراعظم کے وژن 'وکاس بھی، وراثت بھی' پر زور دیتے ہوئے، جناب سی پی رادھا کرشنن نے کہا کہ بھارت کا ثقافتی ورثہ اور ترقیاتی امنگیں ایک دوسرے کی تکمیل کرتی ہیں۔ برگد کے درخت کی مثال دیتے ہوئے انہوں نے واضح کیا کہ جس طرح ایک درخت اپنی گہری جڑوں سے طاقت حاصل کرتا ہے اور ساتھ ہی اپنی شاخیں پھیلاتا ہے، بالکل اسی طرح بھارت کی روایات اور اقدار اس وقت استحکام، شناخت اور تسلسل فراہم کرتی ہیں جب قوم جدیدیت اور ترقی کو گلے لگا رہی ہوتی ہے۔

نائب صدر نے اس تہوار کے انعقاد پر 'کیسری ویکلی' کو مبارکباد دی اور ملیالم صحافت، جمہوری اقدار اور آزادیِ اظہارِ رائے کے لیے اس کی خدمات کی ستائش کی۔

اس موقع پر، نائب صدر نے کتاب 'سنگھ نوٹانڈیلے اکشرا مدراکل' کا اجرا کیا۔ انہوں نے شری پی آر راجندرن کو فنونِ لطیفہ میں ان کی گراں قدر خدمات کے اعتراف میں 'سرگا کیسری ایوارڈ' سے بھی نوازا۔

جناب رادھا کرشنن نے اس امید کا اظہار کیا کہ 'نوراتری سرگوتسوم' نوجوانوں کو ترغیب دے گا، فنکاروں کی حوصلہ افزائی کرے گا اور جدت پسندی کو اپناتے ہوئے بھارت کے ثقافتی ورثے کے تحفظ کی کوششوں کو مضبوط بنائے گا۔ دیویوں کے آشیرواد کے لیے پرارتھنا کرتے ہوئے انہوں نے امید ظاہر کی کہ معاشرے کو ناانصافی کے خلاف لڑنے، پسماندہ طبقات کے ساتھ خوشحالی بانٹنے اور ایک ایسے ہمدرد معاشرے کی تعمیر کے لیے علم کا استعمال کرنے کی طاقت ملے گی جو سب کا خیال رکھتا ہو۔

اس موقع پر جناب راجندر وشوناتھ ارلیکر، کیرلم اور تمل ناڈو کے عزت مآب گورنر؛ جناب سی سربانندن ماسٹر، عزت مآب رکن پارلیمنٹ، راجیہ سبھا؛ محترمہ وِدھو – بالا، صدر نوراتری سرگوتسوَم سمیتی؛ جناب اے کے پرشانت، قائم مقام صدر، نوراتری سرگوتسوَم سمیتی؛ اور دیگر معززین بھی موجود تھے۔

***

 (ش ح –ا ب ن)

U.No:6233