ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે કેરળના કોઝિકોડ ખાતે નવરાત્રી સરગોત્સવમ 2026 નું ઉદ્ઘાટન કર્યું હતું અને વિકાસના માર્ગે આગળ વધતી વખતે ભારતના સમૃદ્ધ સાંસ્કૃતિક વારસાને જાળવવાના મહત્વ પર ભાર મૂક્યો હતો.

સભાને સંબોધતા ઉપરાષ્ટ્રપતિ જણાવ્યું હતું કે નવરાત્રી એ સૃષ્ટિ, શક્તિ, જ્ઞાન અને કરુણાના શાશ્વત સ્ત્રોત એવા આદિ પરાશક્તિની દિવ્ય નારી શક્તિની ઉજવણી કરે છે. તેમણે અવલોકન કર્યું કે આ તહેવારનો શાશ્વત સંદેશ એ છે કે સાહસે ડર પર વિજય મેળવવો જોઈએ, ધર્મે અન્યાય પર વિજય મેળવવો જોઈએ અને જ્ઞાને અજ્ઞાનને દૂર કરવું જોઈએ. તેમણે ઉમેર્યું કે આ કાલજયી મૂલ્યો સમાજને વધુ સારા ભવિષ્ય તરફ દોરી જવાનું ચાલુ રાખે છે.

ભારતની વિવિધ નવરાત્રી પરંપરાઓ પર પ્રકાશ પાડતા, ઉપરાષ્ટ્રપતિ જણાવ્યું હતું કે ભાષાઓ, પરંપરાઓ અને પૂજા પદ્ધતિઓની વિવિધતા હોવા છતાં, દેશ તેના સહિયારા સાંસ્કૃતિક વારસાથી એકજૂથ રહે છે. તેમણે નોંધ્યું કે આ "એક ભારત, શ્રેષ્ઠ ભારત" ની ભાવનાને પ્રતિબિંબિત કરે છે.

પ્રધાનમંત્રીના "વિકાસ પણ, વિરાસત પણ" ના વિઝન પર ભાર મૂકતાં શ્રી સી. પી. રાધાકૃષ્ણને જણાવ્યું હતું કે ભારતનો સાંસ્કૃતિક વારસો અને વિકાસની આકાંક્ષાઓ એકબીજાના પૂરક છે. વડના વૃક્ષનું ઉદાહરણ આપતાં તેમણે અવલોકન કર્યું કે જે રીતે વૃક્ષ તેની શાખાઓ ફેલાવતી વખતે તેના ઊંડા મૂળમાંથી શક્તિ મેળવે છે, તે જ રીતે રાષ્ટ્ર આધુનિકતા અને પ્રગતિને અપનાવે છે ત્યારે ભારતની પરંપરાઓ અને મૂલ્યો સ્થિરતા, ઓળખ અને સાતત્ય પૂરા પાડે છે.

ઉપરાષ્ટ્રપતિ આ મહોત્સવનું આયોજન કરવા બદલ 'કેસરી વીકલી' ને અભિનંદન પાઠવ્યા હતા અને મલયાલમ પત્રકારત્વ, લોકશાહી મૂલ્યો અને અભિવ્યક્તિની સ્વતંત્રતામાં તેના યોગદાનની પ્રશંસા કરી હતી.

આ પ્રસંગે ઉપરાષ્ટ્રપતિ "સંઘ નૂટ્ટંડીલે અક્ષર મુદ્રકલ" પુસ્તકનું વિમોચન કર્યું હતું. તેમણે ફાઇન આર્ટ્સમાં તેમના યોગદાનની કદરરૂપે શ્રી પી. આર. રાજેન્દ્રનને સર્ગ કેસરી એવોર્ડ પણ પ્રદાન કર્યો હતો.

શ્રી રાધાકૃષ્ણને આશા વ્યક્ત કરી હતી કે નવરાત્રી સરગોત્સવમ યુવાનોને પ્રેરણા આપશે, કલાકારોને પ્રોત્સાહિત કરશે અને નવીનતાને અપનાવીને ભારતના સાંસ્કૃતિક વારસાને જાળવવાના પ્રયાસોને મજબૂત કરશે. દેવી માતાના આશીર્વાદ માટે પ્રાર્થના કરતા તેમણે આશા વ્યક્ત કરી કે સમાજને અન્યાય સામે લડવાની, વંચિતો સાથે સમૃદ્ધિ વહેંચવાની અને સૌની સંભાળ રાખતા કરુણા સભર સમાજના નિર્માણ માટે જ્ઞાનનો ઉપયોગ કરવાની શક્તિ મળશે.

આ પ્રસંગે કેરળ અને તમિલનાડુના માનનીય રાજ્યપાલ શ્રી રાજેન્દ્ર વિશ્વનાથ અર્લેકર; રાજ્યસભાના માનનીય સાંસદ શ્રી સી. સદાનંદન માસ્ટર; નવરાત્રી સરગોત્સવમ સમિતિના અધ્યક્ષ શ્રીમતી વિધુ-બાલા; નવરાત્રી સરગોત્સવમ સમિતિના કાર્યાધ્યક્ષ શ્રી એ. કે. પ્રશાંત અને અન્ય મહાનુભાવો ઉપસ્થિત રહ્યા હતા.

SM/NP/JD