പോസ്റ്റഡ് ഓണ്‍:
15 OCT 2026 5:32PM by PIB Thiruvananthpuram
കേന്ദ്ര കൃഷി-കർഷക ക്ഷേമ മന്ത്രാലയത്തിന് കീഴിലുള്ള കൃഷി-കർഷക ക്ഷേമ വകുപ്പ്, ദേശീയ മഹിളാ കിസാൻ ദിവസ് 2026 ഇന്ന് (2026 ഒക്ടോബർ 15) ന്യൂഡൽഹിയിലെ ഡോ. ബി.ആർ. അംബേദ്കർ ഇന്റർനാഷണൽ സെന്ററിൽ വിപുലമായി ആഘോഷിച്ചു. കൃഷി-കർഷക ക്ഷേമ വകുപ്പ് സെക്രട്ടറി ശ്രീ അതിഷ് ചന്ദ്രയുടെ അധ്യക്ഷതയിലായിരുന്നു ചടങ്ങുകൾ നടന്നത്. ഇന്ത്യൻ കാർഷിക മേഖലയ്ക്ക് വനിതാ കർഷകർ നൽകുന്ന വിലമതിക്കാനാവാത്ത സംഭാവനകളെ ആദരിക്കുന്നതിനും, കാർഷിക വികസനം ത്വരിതപ്പെടുത്തുന്നതിനും 'വികസിത ഭാരതം' എന്ന ലക്ഷ്യം കൈവരിക്കുന്നതിൽ അവരുടെ നിർണായക പങ്ക് എടുത്തുപറയുന്നതിനുമാണ് ഈ പരിപാടി സംഘടിപ്പിച്ചത്.
കാർഷിക മേഖലയിലും അനുബന്ധ രംഗങ്ങളിലും ഗ്രാമീണ വനിതകൾ നൽകുന്ന വിലയേറിയ സംഭാവനകളെ കൃഷി-കർഷക ക്ഷേമ വകുപ്പ് സെക്രട്ടറി ശ്രീ അതിഷ് ചന്ദ്ര തന്റെ പ്രസംഗത്തിൽ എടുത്തുപറഞ്ഞു. രാജ്യത്തിന്റെ ഭക്ഷ്യസുരക്ഷ ഉറപ്പാക്കുന്നതിലും, ഗ്രാമീണ ഉപജീവനമാർഗ്ഗങ്ങൾ നിലനിർത്തുന്നതിലും, പ്രകൃതിവിഭവങ്ങൾ കൈകാര്യം ചെയ്യുന്നതിലും, കാർഷിക പുരോഗതിക്ക് വേഗത കൂട്ടുന്നതിലും വനിതകൾ വഹിക്കുന്ന പങ്ക് അദ്ദേഹം ചൂണ്ടിക്കാട്ടി. നേരിട്ടുള്ള സാമ്പത്തിക സഹായം, കുറഞ്ഞ പലിശയ്ക്കുള്ള ബാങ്ക് വായ്പകൾ, സാങ്കേതികവിദ്യാ കൈമാറ്റം, നൈപുണ്യ വികസനം, കൃഷി യന്ത്രവൽക്കരണം, കാർഷിക വിപണന ശൃംഖലകളുടെ മികച്ച ലഭ്യത എന്നിവയുൾപ്പെടെയുള്ള വിവിധ പദ്ധതികളിലൂടെ വനിതാ കർഷകരെ ശാക്തീകരിക്കാൻ ഗവൺമെന്റ് പ്രതിജ്ഞാബദ്ധമാണെന്ന് അദ്ദേഹം വ്യക്തമാക്കി.
വിവിധ സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമുള്ള പുരോഗമന ചിന്താഗതിക്കാരായ വനിതാ കർഷകർ, വനിതാ കാർഷിക വിജ്ഞാന വ്യാപന പ്രവർത്തകർ, ഉദ്യോഗസ്ഥർ എന്നിവരും കൃഷി-കർഷക ക്ഷേമ വകുപ്പിലെ മുതിർന്ന ഉദ്യോഗസ്ഥരും ചടങ്ങിൽ പങ്കെടുത്തു. "വികസിത കൃഷിയും വികസിത ഭാരതവും കെട്ടിപ്പടുക്കുന്നതിൽ വനിതാ കർഷകരുടെ പങ്ക്" എന്നതാണ് 2026-ലെ മഹിളാ കിസാൻ ദിവസത്തിന്റെ പ്രമേയം. കാർഷിക ഉൽപ്പാദനക്ഷമത ശക്തിപ്പെടുത്തുന്നതിലും, സുസ്ഥിര കൃഷിരീതികൾ പ്രോത്സാഹിപ്പിക്കുന്നതിലും, പ്രകൃതിവിഭവങ്ങൾ സംരക്ഷിക്കുന്നതിലും, ഗ്രാമീണ സമൃദ്ധിക്ക് സംഭാവന നൽകുന്നതിലും സ്ത്രീകൾ വഹിക്കുന്ന നിർണായക പങ്കിനെ ഈ പ്രമേയം അടിവരയിടുന്നു.
പരിപാടിയുടെ ഭാഗമായി കാർഷിക അധിഷ്ഠിത മേഖലകളിൽ മികച്ച നേട്ടങ്ങൾ കൈവരിച്ച വനിതാ കർഷകരെ ചടങ്ങിൽ ആദരിച്ചു. കാർഷിക പ്രവർത്തനങ്ങളിലും ഗ്രാമീണ സംരംഭകത്വത്തിലും അവർ കാണിച്ച അർപ്പണബോധം, പ്രതിസന്ധികളെ അതിജീവിക്കാനുള്ള കരുത്ത്, നൂതന ആശയങ്ങൾ, നേതൃപാടവം എന്നിവയ്ക്കുള്ള അംഗീകാരമായാണ് ഈ ആദരം നൽകിയത്. ചടങ്ങിൽ “ഇന്ത്യയിലെ വനിതാ കർഷകർ: വെല്ലുവിളികളിൽ നിന്ന് വിജയത്തിലേക്കുള്ള യാത്ര” എന്ന പുസ്തകവും പ്രകാശനം ചെയ്തു. കാർഷിക-അനുബന്ധ മേഖലകളിൽ വനിതാ കർഷകർ നടത്തിയ ശ്രദ്ധേയമായ സംഭാവനകൾ, നേട്ടങ്ങൾ, നൂതന പരീക്ഷണങ്ങൾ, പോരാട്ടങ്ങളിൽ നിന്ന് വിജയത്തിലേക്കുള്ള അവരുടെ യാത്രകൾ എന്നിവ ഉൾക്കൊള്ളുന്ന പ്രചോദനാത്മകമായ വിജയകഥകളുടെ സമാഹാരമാണ് ഈ പുസ്തകം. കൃഷിയിൽ സ്ത്രീകൾക്കുള്ള നിർണായക പങ്ക്, അവരുടെ ശേഷി, നേതൃത്വം, സംരംഭകത്വ മനോഭാവം എന്നിവയെ ഈ പുസ്തകം അടിവരയിടുന്നു.
വനിതാ കർഷകർക്കും കാർഷിക വികസന പ്രവർത്തകർക്കും തങ്ങളുടെ അനുഭവങ്ങളും ജീവിതയാത്രകളും പങ്കുവെക്കാനുള്ള ഒരു മികച്ച വേദി കൂടിയായി ഈ പരിപാടി മാറി. ചടങ്ങിൽ സംസാരിച്ച ചില പ്രതിനിധികൾ തങ്ങൾ നേരിട്ട വെല്ലുവിളികളെക്കുറിച്ചും, കൈവരിച്ച നേട്ടങ്ങളെക്കുറിച്ചും, കാർഷിക മേഖലയ്ക്ക് നൽകിയ സംഭാവനകളെക്കുറിച്ചും വ്യക്തിഗത അനുഭവങ്ങൾ പങ്കുവെച്ചു. മെച്ചപ്പെട്ട കൃഷിരീതികൾ സ്വീകരിക്കുന്നതിലും, ഗ്രാമീണ ഉപജീവനമാർഗ്ഗങ്ങൾ ശക്തിപ്പെടുത്തുന്നതിലും, മറ്റു സ്ത്രീകളെ കാർഷിക വികസനത്തിന്റെ ഭാഗമാകാൻ പ്രചോദിപ്പിക്കുന്നതിലും വനിതകൾ വഹിക്കുന്ന പ്രധാന പങ്കിനെ എടുത്തു കാണിക്കുന്നതായിരുന്നു ഇവരുടെ അനുഭവവിവരണങ്ങൾ.
വിളകൃഷി, മൃഗപരിപാലനം, വിത്തുസംരക്ഷണം, പ്രകൃതിവിഭവ പരിപാലനം, വിളവെടുപ്പാനന്തര പ്രവർത്തനങ്ങൾ, മൂല്യവർദ്ധനവ് എന്നിവയുൾപ്പെടെ കാർഷിക മേഖലയിലെ സമ്പൂർണ്ണ മൂല്യശൃംഖലയിലുടനീളം വനിതാ കർഷകർ മികച്ച സംഭാവനകളാണ് നൽകുന്നത്. അവരുടെ പാരമ്പര്യ അറിവുകളും, സംരംഭകത്വ ശ്രമങ്ങളും, നൂതനവും കാലാവസ്ഥാ പ്രതിരോധശേഷിയുള്ളതുമായ കൃഷിരീതികളുടെ സ്വീകരണവും ഇന്ത്യൻ കാർഷിക രംഗത്തെ കൂടുതൽ ഉൽപ്പാദനക്ഷമവും സുസ്ഥിരവും എല്ലാവരെയും ഉൾക്കൊള്ളുന്നതുമാക്കുന്നതിന് അത്യന്താപേക്ഷിതമാണ്.
കാർഷിക ഗവേഷണങ്ങളും കർഷക സമൂഹങ്ങളും തമ്മിലുള്ള വ്യത്യാസങ്ങൾ ഇല്ലാതാക്കുന്നതിൽ വനിതാ കാർഷിക ഉദ്യോഗസ്ഥരും വിജ്ഞാന വ്യാപന പ്രവർത്തകരും നിർണായക പങ്കുവഹിക്കുന്നുണ്ട്. പരിശീലനങ്ങൾ, സാങ്കേതികവിദ്യാ വ്യാപനം, ബോധവൽക്കരണം, ഗവൺമെന്റ് പദ്ധതികളെക്കുറിച്ചുള്ള മാർഗ്ഗനിർദ്ദേശങ്ങൾ എന്നിവയിലൂടെ ശാസ്ത്രീയ കൃഷിരീതികൾ നടപ്പിലാക്കാൻ അവർ സഹായിക്കുകയും വിജ്ഞാനത്തിലൂടെയും സ്ഥാപനപരമായ പിന്തുണയിലൂടെയും വനിതാ കർഷകരെ ശാക്തീകരിക്കുകയും ചെയ്യുന്നു.
കാർഷിക പരിവർത്തനത്തിലെ പ്രധാന പങ്കാളികളായി സ്ത്രീകളെ അംഗീകരിക്കുന്നതിനുള്ള ഗവൺമെന്റിന്റെ പ്രതിജ്ഞാബദ്ധത മഹിളാ കിസാൻ ദിവസ് 2026 ആഘോഷങ്ങൾ അടിവരയിടുന്നു. സാങ്കേതികവിദ്യ, വിഭവങ്ങൾ, ശേഷി വികസന അവസരങ്ങൾ, സ്ഥാപനപരമായ പിന്തുണ എന്നിവയിലേക്കുള്ള സ്ത്രീകളുടെ പ്രവേശനം ശക്തമാക്കേണ്ടതിന്റെ പ്രാധാന്യം ഇത് എടുത്തുപറഞ്ഞു. അതോടൊപ്പം കൃഷി, അനുബന്ധ മേഖലകളിലുടനീളമുള്ള തീരുമാനങ്ങൾ എടുക്കുന്നതിലും നേതൃത്വനിരയിലും സ്ത്രീകളുടെ കൂടുതൽ പങ്കാളിത്തം ഇത് പ്രോത്സാഹിപ്പിക്കുകയും ചെയ്യുന്നു.
സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ഉള്ള വിജ്ഞാന വ്യാപന വിദ്യാഭ്യാസ സ്ഥാപനങ്ങൾ, സ്റ്റേറ്റ് അഗ്രികൾച്ചറൽ മാനേജ്‌മെന്റ് ആൻഡ് എക്സ്റ്റൻഷൻ ട്രെയിനിംഗ് ഇൻസ്റ്റിറ്റ്യൂട്ടുകൾ എന്നിവയുടെ നേതൃത്വത്തിൽ വനിതാ കർഷകരെയും മറ്റ് കാർഷിക പങ്കാളികളെയും ഉൾപ്പെടുത്തിക്കൊണ്ടാണ് ദേശീയ മഹിളാ കിസാൻ ദിവസ് 2026 ആചരിച്ചത്. ഗോത്രവർഗ മേഖലകളിൽ നിന്നുള്ള വനിതാ കർഷകരുടെ പങ്കാളിത്തത്തിന് ചടങ്ങുകളിൽ പ്രത്യേക ഊന്നൽ നൽകി.
വനിതാ കർഷകരെ ശാക്തീകരിക്കേണ്ടതും അവരുടെ സംഭാവനകളെ അംഗീകരിക്കേണ്ടതും വികസിത കൃഷി കെട്ടിപ്പടുക്കുന്നതിനും, ഗ്രാമീണ ഉപജീവനമാർഗ്ഗങ്ങൾ ശക്തിപ്പെടുത്തുന്നതിനും, വികസിത് ഭാരതം എന്ന ലക്ഷ്യം കൈവരിക്കുന്നതിന് അത്യന്താപേക്ഷിതമാണെന്ന സന്ദേശം അടയാളപ്പെടുത്തിക്കൊണ്ടാണ് ചടങ്ങ് സമാപിച്ചത്.