രാഷ്ട്രപതിയുടെ കാര്യാലയം
രാഷ്ട്രപതി ശ്രീമതി ദ്രൗപദി മുർമു വിജയവാഡയിൽ നടക്കുന്ന ദേശീയ സരസ് മേളയിൽ പങ്കെടുത്തു
പോസ്റ്റഡ് ഓണ്‍:
15 OCT 2026 3:15PM by PIB Thiruvananthpuram
കേന്ദ്ര ഗ്രാമവികസന മന്ത്രാലയവും ആന്ധ്രാപ്രദേശ് സർക്കാരും സംയുക്തമായി വിജയവാഡയിൽ സംഘടിപ്പിച്ച ദേശീയ സരസ് മേളയിൽ രാഷ്ട്രപതി ശ്രീമതി ദ്രൗപദി മുർമു പങ്കെടുത്തു. മേളയിലെ വിവിധ സരസ് സ്റ്റാളുകൾ സന്ദർശിച്ച രാഷ്ട്രപതി, സ്വയംസഹായ സംഘങ്ങളിലെ വനിതാ സംരംഭകരായ 'ലഖ്പതി ദിദിമാരുമായി' കൂടിക്കാഴ്ച നടത്തി.
ചടങ്ങിനെ അഭിസംബോധന ചെയ്യവേ, കാർഷിക മേഖലയിൽ ഗ്രാമീണ വനിതകൾ നിർണായക പങ്കുവഹിക്കുന്നുണ്ടെന്ന് രാഷ്ട്രപതി പറഞ്ഞു. സ്വയംസഹായ സംഘങ്ങളിലൂടെ സാമ്പത്തിക, സാങ്കേതിക, സാമൂഹിക ശാക്തീകരണത്തിനുള്ള പുതിയൊരു പാത അവർ കണ്ടെത്തിയിരിക്കുന്നു. വനിതാ സംരംഭകത്വത്തിലെ ആവേശം പകരുന്ന വളർച്ചയ്‌ക്കൊപ്പം, സാമ്പത്തിക തീരുമാനങ്ങൾ എടുക്കുന്നതിൽ ഗ്രാമീണ വനിതകളുടെ പങ്കാളിത്തവും വർദ്ധിച്ചുവരുന്നതിൽ സന്തോഷമുണ്ടെന്ന് അവർ കൂട്ടിച്ചേർത്തു. നമ്മുടെ രാജ്യത്തിന്റെ സമഗ്രവും എല്ലാവരെയും ഉൾക്കൊള്ളുന്നതുമായ വികസനത്തിന് ഇത് അത്യന്താപേക്ഷിതമാണെന്ന് അവർ ചൂണ്ടിക്കാട്ടി.
വനിതാ സ്വാശ്രയ സംഘങ്ങൾ ഗ്രാമീണ സമ്പദ്‌വ്യവസ്ഥയ്ക്ക് മികച്ച സംഭാവനകളാണ് നൽകിയിട്ടുള്ളതെന്ന് രാഷ്ട്രപതി പറഞ്ഞു. കഴിഞ്ഞ 12 വർഷത്തിനിടെ ഇത്തരം സംഘങ്ങളുമായി ബന്ധപ്പെട്ട് പ്രവർത്തിക്കുന്ന സ്ത്രീകളുടെ എണ്ണം 10 കോടിയിലധികമായി ഉയർന്നു. 90 ലക്ഷത്തിലധികം സ്വാശ്രയ സംഘങ്ങളിലായിട്ടാണ് ഈ സ്ത്രീകൾ പ്രവർത്തിക്കുന്നത്. തങ്ങളുടെ കുടുംബങ്ങളുടെ സാമ്പത്തിക ഭദ്രത ഉറപ്പുവരുത്തുന്നതിൽ ഇവർ മഹത്തായ പങ്കാണ് വഹിക്കുന്നത്. ഈ പങ്കാളിത്തം സ്ത്രീ കേന്ദ്രീകൃതവും എല്ലാവരെയും ഉൾക്കൊള്ളുന്നതുമായ ഗ്രാമീണ വികസനത്തിന് വഴിവെക്കുന്നുണ്ടെന്നും, കൂട്ടായ സംരംഭകത്വ അവസരങ്ങളുടെ വൻ വിപുലീകരണത്തിന് ഇത് കാരണമായെന്നും രാഷ്ട്രപതി വ്യക്തമാക്കി.
സമൂഹത്തിന്റെ ഉന്നമനത്തിന്‌ വനിതാ സ്വാശ്രയ സംഘങ്ങൾ പ്രധാന പങ്ക് വഹിക്കുന്നുണ്ടെന്നും, ഗ്രാമീണ ജീവിതത്തിന്റെ സമഗ്ര മാറ്റത്തിനും രാജ്യത്തിന്റെ സമഗ്ര വികസനത്തിനും അവ നിർണായക സംഭാവനകളാണ് നൽകുന്നതെന്നും രാഷ്ട്രപതി ഓർമിപ്പിച്ചു. 'ലഖ്പതി ദിദി' പദ്ധതിയിലൂടെ കേന്ദ്ര സർക്കാർ ഗ്രാമീണ വനിതകളുടെ ശാക്തീകരണത്തിന് വ്യക്തമായ വേഗതയും ദിശാബോധവും നൽകിയിട്ടുണ്ടെന്ന് രാഷ്ട്രപതി പറഞ്ഞു. ഡിജിറ്റൽ സേവനങ്ങൾ, പുനരുപയോഗ ഊർജം തുടങ്ങിയ വിവിധ ആധുനിക മേഖലകളിലെ വർദ്ധിച്ചുവരുന്ന പങ്കാളിത്തം ഗ്രാമീണ വനിതകളുടെ നൈപുണ്യ വികസനത്തിന് പുതിയ വഴികൾ തുറന്നു നൽകിയിട്ടുണ്ടെന്നും അവർ കൂട്ടിച്ചേർത്തു.
ഇന്ന് ഗ്രാമീണ വനിതകൾ വെറും പദ്ധതി ആനുകൂല്യങ്ങൾ കൈപ്പറ്റുന്നവർ മാത്രമല്ലെന്നും അവർ സമ്പത്ത് സൃഷ്ടിക്കുന്നവരും വികസനത്തിന്റെ ചാലകശക്തികളുമായി ഉയർന്നു കഴിഞ്ഞുവെന്നും രാഷ്ട്രപതി പറഞ്ഞു. എന്നിരുന്നാലും, ശാക്തീകരണത്തിന്റെ ഈ യാത്രയിൽ നമുക്ക് ഇനിയും ഒരുപാട് മുന്നേറാനുണ്ട്. ഗ്രാമീണ വനിതകൾക്ക് തങ്ങളുടെ വരുമാനത്തിലും ആസ്തികളിലും എത്രത്തോളം നിയന്ത്രണം ലഭിച്ചു എന്നതായിരിക്കണം ശാക്തീകരണത്തിന്റെ പ്രധാന അളവുകോൽ. അതേസമയം, ഗൃഹപരിപാലന ചുമതലകൾക്കായി സമൂഹാധിഷ്ഠിത പിന്തുണ സംവിധാനങ്ങൾ പ്രോത്സാഹിപ്പിക്കേണ്ടതുണ്ട്. കാലാവസ്ഥാ വ്യതിയാനങ്ങളെ പ്രതിരോധിക്കുന്ന സംരംഭങ്ങളിൽ ഗ്രാമീണ വനിതകളുടെ പങ്കാളിത്തം വർദ്ധിപ്പിക്കുകയും വേണം.
ഗ്രാമീണ സമ്പദ്‌വ്യവസ്ഥയെ ശക്തിപ്പെടുത്തുന്നതിനുള്ള വേദികളായി സരസ് മേളകൾ മാറിക്കൊണ്ടിരിക്കുകയാണെന്ന് രാഷ്ട്രപതി പറഞ്ഞു. ഈ മേളകൾ സജീവ ഗ്രാമീണ വിപണികളായി ഇതിനകം സ്ഥാപിതമായിക്കഴിഞ്ഞു. ഇവയിലൂടെ രാജ്യത്തുടനീളമുള്ള ഗ്രാമീണ വനിതാ സംരംഭകരും ഉപഭോക്താക്കളും തമ്മിലുള്ള നേരിട്ടുള്ള ബന്ധം കൂടുതൽ ശക്തമായിട്ടുണ്ട്. 2047-ഓടെ 'വികസിത ഭാരതം' എന്ന ലക്ഷ്യം കൈവരിക്കാൻ വികസനത്തിന്റെ നേട്ടങ്ങൾ എല്ലാ ഗ്രാമങ്ങളിലും എല്ലാ വീടുകളിലും എത്തിക്കേണ്ടത് അത്യന്താപേക്ഷിതമാണെന്ന് അവർ പറഞ്ഞു. ഈ പരിശ്രമത്തിൽ സ്വയംസഹായ സംഘങ്ങൾക്കും സരസ് മേളകൾക്കും നിർണ്ണായക പങ്ക് വഹിക്കാൻ കഴിയുമെന്നും ശ്രീമതി മുർമു പറഞ്ഞു.
ഈ വർഷത്തെ ദേശീയ സരസ് മേളയിൽ 34 സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമായി ഏകദേശം 1500 വനിതാ സ്വയംസഹായ സംഘം സംരംഭകരും ലഖ്പതി ദിദിമാരും 650-ലധികം സ്റ്റാളുകളിലൂടെ തങ്ങളുടെ ഉൽപ്പന്നങ്ങൾ പ്രദർശിപ്പിക്കുന്നുണ്ട്. മേള 2026 ഒക്ടോബർ 31 വരെ പൊതുജനങ്ങൾക്ക് സന്ദർശിക്കാവുന്നതാണ്.
*****
( റിലീസ് ഐ.ഡി: 2323947)
സന്ദര്‍ശക കൗണ്ടര്‍ : 3