وزارتِ آیوش نے یوگا کو شامل کرتے ہوئے آیوروید، سدھ، یونانی اور ہومیوپیتھی کے تحت ’’جلدکے امراض کے علاج کے لیے معیاری رہنما اصول‘‘ جاری کیے ہیں۔ یہ دستاویز وزارتِ صحت و خاندانی بہبود کے محکمۂ صحت خدمات کے ڈائریکٹوریٹ جنرل کے آیوش شعبے نے تیار کی ہے۔ اس کا مقصد آیوش کے مختلف طریقہ علاج کے تحت طبی خدمات میں یکسانیت، معیار کی ضمانت اور سائنسی شواہد پر مبنی طریقۂ علاج کو فروغ دینا ہے۔

آیوش کے مرکزی وزیر مملکت (آزادانہ چارج) اور صحت و خاندانی بہبود کے وزیر مملکت جناب پرتاپ راؤ جادھو نے اس بات پر زور دیا کہ یہ رہنما اصول آیوش کے طریقہ علاج کو قومی نظامِ صحت کے ساتھ مزید مربوط بنانے میں مددگار ثابت ہوں گے۔ وزیر موصوف نے کہا، ’’یہ رہنما اصول جلد کی عام بیماریوں کے محفوظ، مؤثر اور جامع علاج میں مدد دینے کے لیے ہر طریقۂ علاج کے مخصوص طبی طریقوں کو جدید سائنسی شواہد کے ساتھ یکجا کرتے ہیں۔ معیاری اور سائنسی شواہد پر مبنی طبی طریقۂ کار کو فروغ دے کر یہ مریضوں کی نگہداشت کو بہتر بنانے اور صحتِ عامہ میں آیوش کے طریقہ علاج کے کردار کو مضبوط کرنے میں معاون ثابت ہوں گے۔‘‘

وزارتِ آیوش کے سکریٹری ویدیا راجیش کوٹیچا نے کہا کہ یہ رہنما اصول آیوش کے تمام طریقہ علاج میں معیاری اور شواہد پر مبنی طبی طریقۂ کار کو فروغ دینے میں مدد کریں گے۔ انہوں نے کہا، ’’جلدکے امراض کے علاج کے لیے معیاری رہنما اصول، آیوش کے تمام طریقہ علاج میں یکسانیت، معیار اور شواہد پر مبنی طریقۂ علاج کو مضبوط بنانے کی جانب ایک اہم قدم ہیں۔ ماہرین سے مشاورت اور جدید سائنسی شواہد کے جائزے کے ذریعے تیار کیے گئے یہ رہنما اصول، آیوش کے ہر طریقۂ علاج کے بنیادی اصولوں کو برقرار رکھتے ہوئے بیماریوں سے بچاؤ، تشخیص، علاج، بعد از علاج نگرانی اور مریض کی مسلسل دیکھ بھال کے لیے عملی سفارشات پیش کرتے ہیں۔ ان سے طبی طریقۂ کار میں زیادہ یکسانیت پیدا ہوگی اور مریضوں کے علاج سے متعلق معقول فیصلے کرنے میں مدد ملے گی۔‘‘

صحتِ خدمات کے ڈائریکٹر جنرل ڈاکٹر لوَنینش جی کرشنا نے جلدکے امراض کی نگہداشت کو بہتر بنانے میں مختلف شعبوں کے درمیان اشتراک کی اہمیت پر زور دیا۔ انہوں نے کہا، ’’جلدکے امراض کے علاج سے متعلق معیاری رہنما اصول، آیوش کے تمام طریقہ علاج کے تحت معیاری، یکساں اور سائنسی شواہد پر مبنی صحت خدمات کی فراہمی کو فروغ دینے کی جانب ایک اہم قدم ہیں۔ مختلف شعبوں کے درمیان اشتراک کو فروغ دے کر یہ رہنما اصول آیوش کے معالجین کو محفوظ، مؤثر اور مریضوں کی ضروریات پر مرکوز علاج فراہم کرنے میں مدد دیں گے۔‘‘

یہ رہنما اصول آیوروید کے 11ویں دن کے موقع پر عام کیے گئے۔ یہ آیوش کے طریقہ علاج کے ذریعے جلدکے امراض کے علاج کے لیے ایک معیاری طریقۂ کار اپنانے کی جانب ایک اہم پیش رفت ہیں۔ ان میں ہر طریقۂ علاج کے لیے جلد کی عام بیماریوں، مثلاً چنبل، جلد کی سوزش، برص، چھپاکی اور جلد پر پھپھوندی کے انفیکشن سے بچاؤ، تشخیص، علاج، بعد از علاج نگرانی اور بحالی کے حوالے سے مخصوص سفارشات پیش کی گئی ہیں۔

بین شعبہ جاتی تیاری

ان رہنما اصولوں کی تیاری ایک جامع اور بین شعبہ جاتی کوشش کا نتیجہ ہے۔ اس میں آیوش کی تحقیقی کونسلوں کی تکنیکی مہارت، آیوروید، یونانی، سدھ اور ہومیوپیتھی کے سینئر ماہرینِ تعلیم، یوگا کے ماہرین اور جدید طب کے ماہرین کی خدمات سے استفادہ کیا گیا۔ اس عمل میں ماہرین سے مشاورت، قدیم مستند متون کا جائزہ، موجودہ سائنسی شواہد کا تجزیہ اور باہمی اتفاقِ رائے کی بنیاد پر غور و خوض شامل تھا، جبکہ آیوش کے ہر طریقۂ علاج کے بنیادی اصولوں کو برقرار رکھا گیا۔

عملی حالات میں توثیق

اس مشق کی ایک اہم خصوصیت علاج کے طریقۂ کار کی زمینی سطح پر توثیق تھی، جس کا مقصد حقیقی طبی حالات میں ان کی افادیت کو جانچنا تھا۔ آیوش شعبے نے قومی راجدھانی خطہ دلی کی حکومت کے ڈائریکٹوریٹ آف آیوش کے ساتھ مل کر بنیادی اور ثانوی صحت خدمات میں کام کرنے والے طبی افسران کے ذریعے ان طریقۂ کار کو آزمایا۔ رہنما اصولوں کے عملی استعمال سے متعلق ان افسران کی آرا کو حتمی دستاویزات میں شامل کیا گیا، جس سے ان کی طبی افادیت اور عملی اہمیت میں اضافہ ہوا۔

متوقع فوائد

توقع ہے کہ یہ رہنما اصول طبی علاج سے متعلق معقول فیصلے کرنے، صلاحیت سازی، تعلیم اور مزید تحقیق میں مددگار ثابت ہوں گے۔ یہ آیوش کے معالجین، طبی ماہرین، اساتذہ، محققین اور پالیسی سازوں کے لیے اہم حوالہ جاتی دستاویزات کے طور پر بھی کام کریں گے۔ یہ اقدام صحت خدمات کی فراہمی میں آیوش کے طریقہ علاج کو معیاری بنانے، معیار کی ضمانت دینے اور سائنسی شواہد کی بنیاد پر مربوط کرنے کے لیے حکومت کی مسلسل کوششوں کی بھی عکاسی کرتا ہے۔

مختلف طریقہ علاج کے لحاظ سے معیاری رہنما اصول

آیوروید — جلدکے امراض کے علاج سے متعلق معیاری رہنما اصول

رہنما اصول کا لنک: https://www.ayush.gov.in/assets/pdf/whatsnew/STG_Dermatological_Disorders_Ayurveda.pdf

سدھا — جلدکے امراض کے علاج سے متعلق معیاری رہنما اصول

رہنما اصول کا لنک:

 https://www.ayush.gov.in/assets/pdf/whatsnew/STG_Dermatological_Disorders_Siddha.pdf

یونانی — جلدکے امراض کے علاج سے متعلق معیاری رہنما اصول

رہنما اصول کا لنک:

https://www.ayush.gov.in/assets/pdf/whatsnew/STG_Dermatological_Disorders_Unani.pdf

ہومیوپیتھی — جلدکے امراض کے علاج سے متعلق معیاری رہنما اصول

رہنما اصول کا لنک:

https://www.ayush.gov.in/assets/pdf/whatsnew/STG_Dermatological_Disorders_Homoeopathy.pdf

******

 

ش ح ۔ ا ع خ  ۔ م ا

UR No-6002

(ریلیز آئی ڈی: 2322827) وزیٹر کاؤنٹر : 11