صحت و خاندانی بہبود کے مرکزی وزیر جناب جگت پرکاش نڈّا، 12 اکتوبر 2026 کو ہماچل پردیش کے ضلع لاہول اور اسپیتی کے علاقے کیلانگ میں آئی سی ایم آر کے 'سینٹر فار ہائی الٹی ٹیوڈ میڈیسن اینڈ پبلک ہیلتھ ریسرچ' (آئی سی ایم آر – سی ایچ اے ایم پی) کا سنگِ بنیاد رکھیں گے۔ یہ مرکز انڈین کونسل آف میڈیکل ریسرچ (آئی سی ایم آر) کی جانب سے محکمہ صحت کی تحقیق، وزارتِ صحت و خاندانی بہبود، حکومتِ بھارت کے تحت قائم کیا جا رہا ہے، جس کا مقصد بھارت کے بلند ترین اور موسمیاتی اعتبار سے حساس خطوں پر توجہ مرکوز کرتے ہوئے کثیر الشعبہ تحقیق، جدت طرازی اور استعداد کار میں اضافے کو مضبوط بنانا ہے۔

ہمالیائی ماحولیاتی نظام بلند مقامات، شدید موسمی حالات، دشوار گزار راستوں، جغرافیائی تنہائی اور بدلتے ہوئے موسموں کی وجہ سے عوامی صحت کے منفرد چیلنجز پیش کرتا ہے۔ یہ عوامل بیماریوں کے رجحانات، طبی سہولیات تک رسائی، پیشہ ورانہ صحت اور ہنگامی حالات میں ردعمل پر اثر انداز ہوتے ہیں۔ یہ مرکز سائنسی شواہد اکٹھے کرنے کے عمل کو مضبوط کرے گا، اور ان مشکل حالات میں رہنے اور کام کرنے والے لوگوں کے لیے ماحول کے مطابق قابلِ عمل اور وسیع طبی حل تیار کرے گا۔

اس مرکز کے تحقیقی دائرہ کار میں بلند مقامات کی فزیالوجی اور مطابقت پذیری، پہاڑی ادویات، موسمیاتی اثرات سے پیدا ہونے والی اور نئی ابھرتی ہوئی بیماریاں، متعدی اور غیر متعدی بیماریاں، زچہ و بچہ کی صحت، غذائیت، ذہنی صحت، ماحولیاتی اور پیشہ ورانہ صحت اور آفات کے وقت دی جانے والی طبی امداد شامل ہوں گی۔یہ مرکز دور دراز اور مشکل گزار علاقوں میں صحت کی خدمات کی فراہمی کو بہتر بنانے کے لیے ڈیجیٹل ہیلتھ پلیٹ فارمز، ٹیلی میڈیسن، ڈرون کے ذریعے طبی سامان کی ترسیل اور حقیقی وقت میں عوامی صحت کی نگرانی کے انضمام کا بھی جائزہ لے گا۔

لاہول اور اسپتی میں واقع یہ مرکز ایک تزویراتی لحاظ سے اہم سرحدی خطے میں بلند مقامات پر رہنے والی اور قبائلی آبادیوں پر مشتمل طویل مدتی فیلڈ ریسرچ کے لیے ایک اہم ادارہ جاتی پلیٹ فارم فراہم کرے گا۔ اس کا مقام ماحولیاتی حالات، موسمیاتی تبدیلیوں اور صحت پر ان کے اثرات کے باہمی تعلق کے حوالے سے طویل مدتی جائزوں اور تحقیقات کو آسان بنائے گا۔ توقع ہے کہ یہ مرکز قبائلی صحت، آفات سے نمٹنے کی تیاری، ڈیجیٹل ہیلتھ انوویشن اور موسمیاتی تبدیلیوں کا مقابلہ کرنے والے نظامِ صحت کی ترقی میں قومی ترجیحات کے حصول میں مددگار ثابت ہوگا، اور ساتھ ہی ہائی الٹی ٹیوڈ میڈیسن کی عالمی تحقیق میں بھارت کے کردار کو مزید مضبوط کرے گا۔

یہ پہل قدمی مسلح افواج طبی خدمات (اے ایف ایم ایس)، بھارت کے قومی اہمیت کے حامل تحقیقی اداروں اور حکومتِ ہماچل پردیش کے ساتھ ادارہ جاتی تعاون کو فروغ دے گا۔ یہ شراکت داریاں عملی تحقیق، سائنسی تبادلوں، استعداد کار میں اضافے اور شواہد پر مبنی پالیسی سازی میں مددگار ثابت ہوں گی، جس سے صحت کی تحقیق میں حکومتِ بھارت کے 'آتم نربھر بھارت' کے وژن اور سب کو شامل کرنے والے، موسمیاتی تبدیلیوں کا مقابلہ کرنے والے نظامِ صحت کو آگے بڑھایا جا سکے گا۔

سنگِ بنیاد کی اس تقریب میں روایتی بھومی پوجا، باضابطہ سنگِ بنیاد رکھنے کی رسم اور سنگِ بنیاد کی رونمائی کی جائے گی، جس کے بعد 'گرین آئی سی ایم آر کیمپس پہل قدمی' کے تحت ہمالیہ کے مقامی پودے لگائے جائیں گے۔ اس پروگرام میں ایک سائنسی نمائش کا افتتاح، مرکز کی تعارفی ویڈیو اور ویب سائٹ کا آغاز، عمارت کے نقشے کی پیشکش، اور مرکزی وزیر صحت کی جانب سے ایک یادگاری خصوصی ڈاک ٹکٹ کا لفافہ جاری کرنا بھی شامل ہوگا۔

اس تقریب میں جناب سنجے سیٹھ، دفاع کے وزیر مملکت، حکومت ہند؛ جناب جے رام ٹھاکر، حزب اختلاف کے رہنما، ہماچل پردیش کے سابق وزیر اعلیٰ اور ہماچل پردیش قانون ساز اسمبلی کے رکن؛ محترمہ کنگنا رانوت، منڈی سے رکن پارلیمان ؛ محترمہ انورادھا رانا، لاہول اور اسپتی کی نمائندگی کرنے والے ہماچل پردیش قانون ساز اسمبلی کے رکن؛ اور روی ٹھاکر ، قانون ساز اسمبلی کے رکن شرکت کریں گے۔

تقریب میں شرکت کرنے والی دیگر معزز شخصیات میں ایئر مارشل سندپ تھریجا ڈائریکٹر جنرل، آرمڈ فورسز میڈیکل سروسز، ڈاکٹر راجیو بہل سیکریٹری، محکمہ صحت کی تحقیق اور ڈائریکٹر جنرل، آئی سی ایم آر، محترمہ منیشا سکسینہ جوائنٹ سیکریٹری، محکمہ صحت کی تحقیق، جناب وویک کمار دکش سینئر ڈپٹی ڈائریکٹر جنرل - ایڈمنسٹریشن، آئی سی ایم آر، ایڈیشنل ڈی جی (ایکسٹرا میورل) ڈاکٹر الکا شرما اور سینئر فنانشل ایڈوائزر ڈاکٹر رچا پانڈے شامل ہوں گے۔ مرکزی اور حکومتِ ہماچل پردیش کے اعلیٰ حکام، مسلح افواج کے نمائندے، سائنسدان، عوامی صحت کے ماہرین، تحقیقی ادارے اور دیگر اہم شراکت دار بھی اس تقریب میں حصہ لیں گے۔

**********

 (ش ح –ا ب ن)

U.No:4973

(ریلیز آئی ڈی: 2321957) وزیٹر کاؤنٹر : 5