ڈائریکٹوریٹ آف ریونیو انٹیلی جنس (ڈی آر آئی) نے بنگلہ دیش سے سرحد پار سونے کی اسمگلنگ کے خلاف اپنی کارروائی تیز کر دی ہے، اور مشرقی خطے میں 08–09 اکتوبر 2026 کو انٹیلی جنس پر مبنی کارروائیوں کے دوران تقریباً 7.8 کلوگرام غیر ملکی سونا ضبط کیا ہے، جس کی مالیت 11.50 کروڑ روپے سے زیادہ ہے۔ ان کارروائیوں نے سرحدی علاقوں سے اسمگل شدہ سونا کولکتہ منتقل کرنے کے لیے سڑک اور ریل نیٹ ورک کے استعمال کا پردہ فاش کیا، جس کے نتیجے میں چھ افراد کو گرفتار کیا گیا ہے۔

 

ڈی آر آئی کے افسران نے ڈنکونی ٹول پلازہ پر ایک چار پہیہ گاڑی کو روکا۔ یہ گاڑی، جس میں چار افراد سوار تھے، بنگلہ دیش سرحد کے قریب بان پور سے کولکتہ کی طرف جا رہی تھی۔ گاڑی اور اس میں سوار افراد کی تلاشی کے نتیجے میں سونے کے 50 بسکٹ برآمد اور ضبط کیے گئے، جن کا وزن تقریباً 6.8 کلوگرام اور مالیت تقریباً 10 کروڑ روپے ہے۔ سونے کے کچھ بسکٹوں پر غیر ملکی نشانات موجود تھے۔ وہ افراد سونے کے قانونی قبضے کو ثابت کرنے کے لیے کوئی بھی جائز دستاویز پیش کرنے میں ناکام رہے اور انہوں نے اپنے بیانات میں بنگلہ دیش کے راستے بھارت میں غیر ملکی سونا اسمگل کرنے میں ملوث ہونے کا اعتراف کیا۔ اہم بات یہ ہے کہ بان پور سرحدی علاقے میں کام کرنے والے اس گروہ کا سرغنہ بھی گرفتار کیے گئے ان چار افراد میں شامل تھا۔

اسی دن، مغربی بنگال کی ریاست میں ڈی آر آئی کی ٹیموں نے دو ریلوے اسٹیشنوں یعنی مالدہ ٹاؤن ریلوے اسٹیشن اور نیو جلپائی گوڑی ریلوے اسٹیشن پر ٹرینوں سے سفر کرنے والے مسافروں کو روکا اور ان کے قبضے سے تقریباً ایک کلوگرام غیر ملکی سونا ضبط کیا، جس کی مالیت تقریباً 1.5 کروڑ روپے ہے۔ دونوں مسافروں کو قانونی خریداری ثابت کرنے والی دستاویزات پیش نہ کرنے پر گرفتار کر لیا گیا۔ تحقیقات سے معلوم ہوا ہے کہ ضبط شدہ سونا، جو چوڑیوں اور بسکٹوں کی شکل میں تھا، تریپورہ میں بھارت-بنگلہ دیش سرحد کے راستے اسمگل کیے گئے سونے سے تیار کیا گیا تھا۔

یہ کارروائیاں اسمگل شدہ سونے کی نقل و حمل کے لیے بنگلہ دیش کے ساتھ سرحدی علاقوں کے ساتھ ساتھ شمال مشرقی خطے کو کولکاتہ جیسی بڑی مارکیٹوں سے جوڑنے والے سڑک اور ریل راہداریوں کے مسلسل استعمال کو واضح کرتی ہیں۔ ڈی آر آئی انٹیلی جنس پر مبنی نفاذ اور مربوط کارروائی کے ذریعے منظم اسمگلنگ نیٹ ورکس کو تباہ کرنے کے لیے پرعزم ہے۔

**********

 (ش ح –ا ب ن)

U.No:4968

(ریلیز آئی ڈی: 2321897) وزیٹر کاؤنٹر : 8