ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે ઝારખંડના દેવઘરમાં 'સૈન્ય સંપર્ક મેળો – સદૈવ આપકે સાથ' ની મુલાકાત લીધી હતી. સમગ્ર સંથાલ પરગણા પ્રદેશના ભૂતપૂર્વ સૈનિકો, વીર નારીઓ અને તેમના આશ્રિતોને કલ્યાણકારી સેવાઓ અને ફરિયાદ નિવારણ સુવિધાઓ પૂરી પાડવા માટે ભારતીય સેના દ્વારા દેવઘર જિલ્લા પ્રશાસનના સહયોગથી આ મેળાનું આયોજન કરવામાં આવ્યું હતું.

સભાને સંબોધતા, ઉપરાષ્ટ્રપતિએ નિવૃત્ત સૈનિકો અને વીર નારીઓને રાષ્ટ્ર માટે તેમના અમૂલ્ય બલિદાન અને યોગદાન બદલ શ્રદ્ધાંજલિ અર્પણ કરી હતી. નિવૃત્ત સૈનિકોને એક મહત્વપૂર્ણ રાષ્ટ્રીય સંસાધન તરીકે વર્ણવતા તેમણે કહ્યું કે તેમનો અનુભવ યુવાનોને માર્ગદર્શન આપી શકે છે અને તેમનું નેતૃત્વ રાષ્ટ્રનિર્માણમાં નોંધપાત્ર યોગદાન આપી શકે છે. વીર નારીઓને નમન કરતાં તેમણે નોંધ્યું કે સરહદ પર સેવા આપતા દરેક સૈનિકની પાછળ એક પરિવાર ઊભો હોય છે જે સૈન્ય સેવાના બલિદાન અને જવાબદારીઓમાં ભાગીદાર હોય છે. તેમણે ભારપૂર્વક જણાવ્યું હતું કે રાષ્ટ્ર સૈનિકો અને તેમના પરિવારો દ્વારા આપવામાં આવેલા બલિદાનને ક્યારેય ભૂલી શકે નહીં.

ઝારખંડના રાજ્યપાલ તરીકેના તેમના કાર્યકાળને યાદ કરતા, ઉપરાષ્ટ્રપતિએ રાષ્ટ્ર સેવા કરવાની રાજ્યની ગૌરવશાળી પરંપરા પર પ્રકાશ પાડ્યો હતો. તેમણે પરમવીર ચક્ર વિજેતા લાન્સ નાયક આલ્બર્ટ એકાને શ્રદ્ધાંજલિ આપી હતી અને ભગવાન બિરસા મુંડા, તિલકા માંઝી, સિદ્ધુ અને કાનહૂ, તથા નીલાંબર અને પીતાંબર સહિતના આદિવાસી સ્વતંત્રતા સેનાનીઓના યોગદાનને યાદ કર્યું હતું. તેમણે કહ્યું કે દેશભક્તિ અને રાષ્ટ્ર સેવાની ભાવના ઝારખંડના લોકોને પ્રેરણા આપતી રહે છે.

ઉપરાષ્ટ્રપતિએ પ્રધાનમંત્રી શ્રી નરેન્દ્ર મોદીના નેતૃત્વમાં 'વન રેન્ક, વન પેન્શન' ની લાંબા સમયથી ચાલી આવતી માંગ પૂર્ણ કરવા વિશે વાત કરી હતી અને નિવૃત્ત સૈનિકો તેમજ વીર નારીઓ માટે શરૂ કરવામાં આવેલી વિવિધ કલ્યાણકારી પહેલોનો ઉલ્લેખ કર્યો હતો. મેળામાં સિંગલ-વિન્ડો મિકેનિઝમની પ્રશંસા કરતા તેમણે કહ્યું કે પેન્શન સંબંધિત સહાય, તબીબી સુવિધાઓ, દસ્તાવેજીકરણ સેવાઓ અને ફરિયાદ નિવારણને એક મંચ પર લાવવું એ છેવાડાના માનવી સુધી સુવિધાઓ પહોંચાડવાનું એક અર્થપૂર્ણ ઉદાહરણ છે.

સંકલિત જાહેર સેવાની જરૂરિયાત પર ભાર મૂકતા, શ્રી સી. પી. રાધાકૃષ્ણને જણાવ્યું હતું કે સશસ્ત્ર દળો, નાગરિક પ્રશાસન, નાણાકીય સંસ્થાઓ, આરોગ્યસંભાળ પ્રદાતાઓ અને કલ્યાણકારી એજન્સીઓની ભાગીદારી એ લોકોની સેવા કરવાની સહિયારી પ્રતિબદ્ધતા દર્શાવે છે જેઓએ રાષ્ટ્રની સેવા કરી છે. તેમણે "સદૈવ આપકે સાથ" થીમ એક સતત ચાલતી રાષ્ટ્રીય પ્રતિબદ્ધતા બને તેવું આહ્વાન કર્યું, જેથી નિવૃત્ત સૈનિકો અને તેમના પરિવારો હંમેશાં સન્માનિત, સમર્થિત અને સંભાળનો અનુભવ કરે.

મુલાકાત દરમિયાન, ઉપરાષ્ટ્રપતિએ સૈન્ય સંપર્ક મેળાના વિવિધ સ્ટોલ્સની મુલાકાત લીધી હતી, જેમાં શસ્ત્રો અને સૈન્ય સાધનોનું પ્રદર્શન, આપત્તિ રાહત સુવિધાઓ, એક્સ-સર્વિસમેન કન્ટ્રીબ્યુટરી હેલ્થ સ્કીમ (ECHS) સેવાઓ, મેડિકલ સ્ક્રિનિંગ અને રક્તદાન કેમ્પ, મહિલા આરોગ્ય જાગૃતિ પહેલ, NCC પ્રવૃત્તિઓ અને પેન્શન સંબંધિત સેવાઓનો સમાવેશ થાય છે. તેમણે નિવૃત્ત સૈનિકો, લાભાર્થીઓ અને મેળામાં ઉપસ્થિત અન્ય લોકો સાથે વાર્તાલાપ પણ કર્યો હતો.

ઉપરાષ્ટ્રપતિએ આ પહેલના આયોજન માટે ભારતીય સેના અને દેવઘર જિલ્લા પ્રશાસનને અભિનંદન આપ્યા હતા અને સાંસદ ડૉ. નિશિકાંત દુબેના પ્રયાસોની પ્રશંસા કરી હતી. તેમણે સશસ્ત્ર દળોના સમુદાયના કલ્યાણ માટે આપેલા યોગદાન બદલ ભાગ લેનાર સંસ્થાઓ અને એજન્સીઓનો પણ આભાર માન્યો હતો.

આ કાર્યક્રમમાં ઝારખંડના રાજ્યપાલ શ્રી સંતોષ કુમાર ગંગવાર; કેન્દ્રીય આરોગ્ય અને પરિવાર કલ્યાણ રાજ્ય મંત્રી શ્રી પ્રતાપરાવ જાધવ; સંસદસભ્યો ડૉ. નિશિકાંત દુબે અને શ્રી આદિત્ય સાહૂ; જનરલ ઓફિસર કમાન્ડિંગ, 111 એરિયા, લેફ્ટનન્ટ જનરલ પવન ચઢ્ઢા; બાબા વૈદ્યનાથ મેડિકલ ટ્રસ્ટના અધ્યક્ષ સુશ્રી અનામિકા ગૌતમ; ભારતીય સેનાના વરિષ્ઠ અધિકારીઓ, નાગરિક પ્રશાસનના અધિકારીઓ, નિવૃત્ત સૈનિકો, વીર નારીઓ અને તેમના પરિવારો ઉપસ્થિત રહ્યા હતા.

SM/JT/JD