اطلاعات و نشریات کی وزارت نے 2 اکتوبر 2026 سے خصوصی مہم 6.0 کا آغاز کیا ہے، جس میں ملک بھر کے اس کے 610 دفاتر حصہ لے رہے ہیں۔ اس مہم کا مقصد سرکاری دفاتر میں صفائی ستھرائی کو بہتر بنانا اور زیر التوا معاملات میں کمی لانا ہے۔ اس کے علاوہ، ای- کچرے کو مؤثر طریقے سے جمع کرنے، الگ الگ کرنے اور ٹھکانے لگانے پر بھی زور دیا جا رہا ہے۔

تیاری کے مرحلے کے دوران، تمام میڈیا یونٹس اور ان کے فیلڈ دفاتر، بشمول مرکزی سکریٹریٹ، کو اہداف کو حتمی شکل دینے، زیر التوا حوالہ جات کی نشاندہی کرنے اور جگہ کے بہتر انتظام کی منصوبہ بندی کرنے کی ہدایت دی گئی۔

اطلاعات و نشریات، ریلوے اور الیکٹرانکس و انفارمیشن ٹیکنالوجی کے مرکزی وزیر جناب اشونی ویشنو نے تیاری کے مرحلے کے دوران وزارت اور میڈیا یونٹس کے سینئر افسران سے بات چیت کی۔ انہوں نے تمام متعلقہ افراد پر زور دیا کہ وزارت کے ہر دفتر، حتیٰ کہ سب سے چھوٹی اکائی کو بھی اس مہم میں شامل کیا جائے۔ انہوں نے ہدایت دی کہ یہ مہم 31 اکتوبر 2026 کے بعد بھی جاری رہنی چاہیے اور اسے سال بھر چلنے والی مہم بنایا جانا چاہیے۔ عوام سے براہِ راست رابطے والے دفاتر کو اعلیٰ ترجیح دی جائے اور اچھے کاموں کی تشہیر مختلف سماجی ذرائع ابلاغ کے پلیٹ فارموں کے ذریعے کی جائے۔

اطلاعات و نشریات کی وزارت کے سکریٹری جناب چنچل کمار نے میڈیا یونٹس کے تمام سربراہان اور ان کے نوڈل افسران کے ساتھ مہم کی تیاریوں اور نفاذ کا جائزہ لیا۔ انہوں نے اس سال کی مہم کے لیے مقررہ اہداف حاصل کرنے کی غرض سے مناسب اور بروقت کارروائی کرنے کی ہدایات جاری کیں۔

وزارت نے گزشتہ خصوصی مہمات میں اچھی کارکردگی کا مظاہرہ کیا ہے، جو صفائی ستھرائی کو ادارہ جاتی نظام کا حصہ بنانے اور زیر التوا معاملات کو بروقت نمٹانے کے تئیں اس کے مسلسل عزم کی عکاسی کرتا ہے۔ سابقہ مہمات کے دوران کی جانے والی کوششوں سے نہ صرف دفاتر کی صفائی ستھرائی بہتر بنانے میں مدد ملی ہے، بلکہ آمدنی پیدا کرنے، جگہ کے بہتر انتظام اور کاغذی فائلوں کو ٹھکانے لگانے کے معاملے میں بھی نمایاں نتائج حاصل ہوئے ہیں۔

سال2021 میں خصوصی مہم کے آغاز سے اب تک وزارت نے مجموعی طور پر 36.20 کروڑ روپے کی آمدنی حاصل کی ہے۔ اس مدت کے دوران تقریباً 13.89 لاکھ کلوگرام ناکارہ سامان کو ٹھکانے لگایا گیا، 13.98 لاکھ مربع فٹ جگہ خالی کرائی گئی اور 2.71 لاکھ کاغذی فائلوں کو  نمٹایا کیا گیا۔ اس کے علاوہ، باہر کے مقامات پر صفائی کی 6,642 مہمات چلائی گئیں اور 15,496 مقامات کی صفائی کی گئی۔ مجموعی کامیابیوں کے ساتھ ساتھ سال وار تفصیلات ذیل میں پیش کی گئی ہیں۔

***

ش ح۔ض ر ۔ م الف

U. No- 4920