প্ৰধানমন্ত্ৰী শ্ৰী নৰেন্দ্ৰ মোদীয়ে ২০২৬ চনৰ ৮ অক্টোবৰত পুৱা প্ৰায় ১০ বজাত নতুন দিল্লীৰ যশোভূমিত ইণ্ডিয়া ম’বাইল কংগ্ৰেছৰ দশম সংস্কৰণ উদ্বোধন কৰিব।এই উপলক্ষ্যে তেওঁ সমবেত লোকসকলকো সম্বোধন কৰিব।

ভাৰতীয় চেলুলাৰ অপাৰেটৰ এছ’চিয়েশ্যনে (COAI) যুটীয়াভাৱে আয়োজন কৰা এই অনুষ্ঠান ৭ অক্টোবৰৰ পৰা ১০ অক্টোবৰলৈ অনুষ্ঠিত হ’ব।২০২৬ চনৰ ইণ্ডিয়া  ম’বাইল কংগ্ৰেছৰ মূল বিষয়বস্তু হৈছে ‘সীমাহীন সম্প্ৰসাৰণ’।এই বিষয়বস্তুৱে ডিজিটেল উদ্ভাৱন, পৰৱৰ্তী প্ৰজন্মৰ সংযোগ ব্যৱস্থা আৰু প্ৰযুক্তিনিৰ্ভৰ বিকাশৰ ক্ষেত্ৰত ভাৰতৰ ক্ৰমবৰ্ধমান সক্ষমতাক প্ৰতিফলিত কৰিছে।২০২৬ চনৰ ইণ্ডিয়া ম’বাইল কংগ্ৰেছৰ চাৰিটা মূল স্তম্ভ হৈছে — সৃষ্টি: ভৱিষ্যৎ নিৰ্মাণ; সংবৰ্ধন: বিকাশৰ গতি ত্বৰান্বিত কৰা; সবল: সুযোগৰ সম্প্ৰসাৰণ; আৰু সুৰক্ষা: বিশ্বাস শক্তিশালী কৰা। অনুষ্ঠানটোত উদ্ভাৱন আৰু পৰৱৰ্তী প্ৰজন্মৰ ডিজিটেল আন্তঃগাঁথনি, প্ৰযুক্তিনিৰ্ভৰ অৰ্থনৈতিক বিকাশ, সকলোৰে বাবে ডিজিটেল সুবিধা নিশ্চিত কৰা আৰু সুৰক্ষিত তথা সংকট মোকাবিলা কৰিব পৰা ডিজিটেল ব্যৱস্থা গঢ়ি তোলাৰ বিষয়ত গুৰুত্ব আৰোপ কৰা হ’ব।২০২৬ চনৰ  ইণ্ডিয়া  ম’বাইল কংগ্ৰেছে বিশ্বৰ প্ৰযুক্তি খণ্ডৰ শীৰ্ষস্থানীয় ব্যক্তি, নীতিনিৰ্ধাৰক, উদ্যোগ বিশেষজ্ঞ, নতুন উদ্যোগ, বিনিয়োগকাৰী আৰু উদ্ভাৱকসকলক একত্ৰিত কৰিব। ইয়াৰ জৰিয়তে ডিজিটেল ব্যৱস্থাৰ বিভিন্ন ক্ষেত্ৰত উদীয়মান সুযোগসমূহৰ বিষয়ে আলোচনা কৰা হ’ব। ২০২৬ চনৰ সংস্কৰণত ৫জি আৰু ৬জি, পৰৱৰ্তী প্ৰজন্মৰ এআই নেটৱৰ্ক, অৰ্ধপৰিবাহী, অ-স্থলজ নেটৱৰ্ক, চাইবাৰ সুৰক্ষা, কোৱাণ্টাম যোগাযোগ, উদ্যোগ ৰূপান্তৰ, বৃত্তাকাৰ অৰ্থনীতি আৰু ইএছজি, আৰু ইলেক্ট্ৰনিক্স উৎপাদনকে ধৰি ৯টা প্ৰতিষ্ঠিত  খণ্ড সামৰি লোৱা হ’ব। এই অনুষ্ঠানটোৱে চাৰিটা নতুন ডমেইন - স্মাৰ্ট মবিলিটি, ক্ৰীড়াংগনৰ অভিজ্ঞতা, ঔদ্যোগিক ৰবটিক্স আৰু পৰিবহণ প্ৰযুক্তিলৈও ইয়াৰ খণ্ডগত মনোযোগ সম্প্ৰসাৰিত কৰিব।

আইএমচি ২০২৬ত ১০০ খনতকৈও অধিক দেশৰ পৰা ১.৫ লাখতকৈ অধিক অংশগ্ৰহণকাৰীয়ে অংশগ্ৰহণ কৰিব বুলি আশা কৰা হৈছে, য’ত ৫০০+ অংশীদাৰ আৰু প্ৰদৰ্শক, ৬০০+ ষ্টাৰ্টআপ আৰু ৯০০+  শীৰ্ষস্থানীয় ব্যক্তিয়ে অংশগ্ৰহণ কৰিব। এই অনুষ্ঠানত ২০০০ৰো অধিক প্ৰযুক্তি ব্যৱহাৰৰ ক্ষেত্ৰ আৰু ১২০টাতকৈও অধিক অধিৱেশন অনুষ্ঠিত হ’ব।

****

MJPS/SS/ST/DM