প্রধান মন্ত্রী শ্রী নরেন্দ্র মোদীনা ইন্দিয়া মোবাইল কংগ্রেসকী মাংওইননা ঙসি অয়ুক সেভা তির্থতা গ্লোবেল সিস্তেম ফোর মোবাইল কম্ম্যুনিকেসন এসোসি‌এসন (জি.এস.এম.এ.) গী বোর্দ মেম্বরশিংগা ৱারী শানখ্রে। জি.এস.এম.এ. অসি মোবাইল ইকোসিস্তেম পুনশিন্নবা মালেমগী ওর্গনাইজেসন অমনি, মসিনা মোবাইল ইকোসিস্তেম অমসুং মসিগা নক্নবা ইন্দস্ত্রীশিংদা লৈরিবা মোবাইল ওপরেতরশিং অমসুং ওর্গনাইজেসনশিংবু রিপ্রজেন্ত তৌই।

তেক্নোলোজী অসি ইনক্লুসিব অমসুং সস্তেনেবল দিবেলপমেন্তকী খুৎলাই অমা ওইহনগদবনি হায়না প্রধান মন্ত্রীনা অকনবা ৱাফম থমখি। তেক্নোলোজীগী দেমোক্রেতাইজেসন অসি খুন্নাইগী কাঙলুপ অমত্তবু শোত্থনা লৈহন্দনবা তঙাইফদবা অমনি হায়না মহাক্না অকনবা ৱাফম থমখি। তেক্নোলোজী অমসুং দিজিতেল সর্ভিসশিং অসি শেল চঙদবা অমসুং এক্সেবল ওইহনবা তঙাইফদবা লৈ হায়না মহাক্না ফোংদোকখি, মরুওইনা গ্লোবেল সাউথকীদমক্তা, অমসুং দিজিতেল দিভাইদ হেনগৎলকপা থিংনবা তেক্নোলোজী অসি লাস্ত মাইল ফাওবা পুখৎপগী মরুওইবা অদু মহাক্না ফোংদোকখি।

প্রধান মন্ত্রীনা দিজিতেল পব্লিক ইনফ্রাস্ত্রকচর (দি.পি.আই.) না মরুওইনা চাউখৎলক্লিবা লৈবাকশিংগীদমক অহোংবা পুরকপা ঙম্বা ফোর্স অমা ওইবগী ওইথোকপা অদু পনখি। মালেমগী লুচিংবা কয়াগা লোয়ননা দি.পি.আই.গী মতাংদা খন্ন-নৈনখিবা অদুদা মালেমগী ওইনা মসি য়াম্না মরু ওইরে হায়বা উৎলে হায়না মহাক্না ফোংদোকখি অমসুং অসিগুম্বা প্লেৎফোর্মশিং অসি গ্লোবেল সাউথকী লৈবাকশিংগীদমক্তা স্ত্রিংবোর্দ অমা ওইনা থবক তৌবা য়াই হায়না মহাক্না ফোংদোকখি।

দিজিতেল অমসুং সাইবর ফ্রোদকী হেনগৎলক্লিবা শিংনবদুগী মতাংদা পল্লদুনা প্রধান মন্ত্রীনা হায়খি মদুদি মসিগী খুদোংচাদবা অসি তেক্নোলোজী-দ্রিভন সোলুসনশিং মথৌ তাই। মহাক্না য়ুজরশিংদা লাকপা য়াবা ফ্রোদ কোলশিংগী মতাংদা চেকশিনহন্নবগীদমক তুংকোইনা চৎকদবা এৱেরনেস মেসেসশিং পীরক্নবা ৱাফম থমখি।

প্রধান মন্ত্রীনা অনৌবা তেক্নোলোজীশিংগীদমক মালেমগী স্তেন্দর্দশিং অমসুং অপুনবা কাংলোনশিংগী তঙাই ফদবা অদুসু পনখি। দিপ ফেকশিং অমসুং এ.আই.না পুথোকপা কন্তেন্তকী হেনগৎলক্লিবা খুদোংথীবগী মতাংদা, মহাক্না য়ুজরশিংদা মদুগী হৌরকফম অদু খুদক্তা মশক খঙদোকপা য়াহন্নবা মেকানিজমশিং থিজিনবা ৱাফম থমখি।

জি.এস.এম.এ.গী বোর্দ মেম্বরশিংনা ভারতনা দিজিতেল অমসুং মোবাইল কনেক্তিবিতীদা মালেমগী লুচিংবা অমা ওইনা থোরক্লিবা অদু ফোংদোকখি। মখোয়না ৪জি অমসুং ৫জিগী খোংজেল য়াংনা পাকথোক চাউথোকপা, দিজিতেল পব্লিক ইনফ্রাস্ত্রকচরগী পাক চাউথোকপা অমসুং তেলিকোম অমসুং মোবাইল মেন্যুফেকচরিং ইকোসিস্তেম চাউখৎলকপা উবা ফংখি। মখোয়না ভারতকী ইনভেস্তমেন্ত-ফ্রেন্দলী পোলিসী ফ্রেমৱার্ক অদুবু থাগৎপা ফোংদোকখি অমসুং দিজিতেল গ্রোথ মখা তানা শৌগৎপদা সেক্যুর, রেসিলিয়েন্ত অমসুং থাজবা য়াবা দিজিতেল ইনফ্রাস্ত্রকচরগী থৌদাং অদুদা অকনবা ৱাফম থমখি।

বোর্দ মেম্বরশিংনা ৫জি, ৬জি, এ.আই., সাইবর সেক্যুরিতী, দিজিতেল ইনক্লুজন অমসুং সেতেলাইত কনেক্তিবিতী য়াওনা হিরমশিংদা ভারতকা লোয়ননা মালেমগী থাক্তা তেংবাং পীনবগী ওইথোকপা হেনগৎলক্লিবা খুদোংচাবশিং অদুসু পনখি।

মীফম অদুদা কম্ম্যুনিকেসন মন্ত্রী, শ্রী জ্যোতিরাদিত্য সিন্ধিয়া, কম্ম্যুনিকেসনগী রাজ্য মন্ত্রী, দা. পেম্মসানি চন্দ্র সেখর, জি.এস.এম.এ.গী বোর্দ মেম্বরশিং অমসুং ভারত সরকারগী মকোক থোংবা ওফিসিএলশিংনা শরুক য়াখি।

****