যুৱ পৰিক্ৰমা আৰু ক্ৰীড়া মন্ত্ৰালয়ৰ দ্বাৰা মেৰা যুৱ ভাৰতৰ (মাই ভাৰত) জৰিয়তে পৰিচালিত ফ্লেগশ্বিপ যুৱ অংশগ্ৰহণমূলক পদক্ষেপ ‘বিকশিত ভাৰত যুৱ নেতৃত্ব সংলাপ’ (ভিবিৱাইএলডি) ২০২৭-এ সফলতাৰে বিকশিত ভাৰত কুইজ সম্পন্ন কৰিছে। বাছনি প্ৰক্ৰিয়াৰ সময়ছোৱাত সমগ্ৰ দেশৰ ১,৪৫,২৬,০১৩ বাৰ অংশগ্ৰহণৰ সৈতে এই কুইজে দেশৰ যুৱ প্ৰজন্মৰ পৰা বিপুল সঁহাৰি লাভ কৰে।

ভিবিৱাইএলডি ২০২৭ৰ মূল লক্ষ্য হৈছে বিকশিত ভাৰত @২০৪৭ৰ দৃষ্টিভংগীৰ দিশত নিজৰ ধ্যান-ধাৰণা, দৃষ্টিভংগী আৰু উদ্ভাৱনীমূলক সমাধানসমূহ আগবঢ়াবলৈ যুৱ নাগৰিকসকলক এক সুসংগঠিত, মেধাভিত্তিক মঞ্চ প্ৰদান কৰা। প্ৰতিভাশালী যুৱ প্ৰজন্মই যাতে ৰাজহুৱা জীৱনত অংশগ্ৰহণ কৰি দেশ নিৰ্মাণত অৰিহণা যোগাব পাৰে, তাৰ বাবে সুযোগ সৃষ্টি কৰাৰ মাননীয় প্ৰধানমন্ত্ৰী শ্ৰী নৰেন্দ্ৰ মোদীৰ দৃষ্টিভংগীৰ সৈতে এই পদক্ষেপ সংগতিপূৰ্ণ।

এক মেধাভিত্তিক ৰাষ্ট্ৰীয় যুৱ নেতৃত্বৰ যাত্ৰা

ভিবিৱাইএলডি ২০২৭য়ে তৃণমূল পৰ্যায়ৰ পৰা ৰাষ্ট্ৰীয় পৰ্যায়লৈ যুৱ নেতৃত্বক চিনাক্ত আৰু প্ৰতিপালন কৰাৰ বাবে এক সুসংগঠিত, বহুস্তৰীয় বাছনি প্ৰক্ৰিয়া অনুসৰণ কৰে। বিকশিত ভাৰত প্ৰত্যাহ্বানৰ পৰিক্ৰমা এনেধৰণৰ:

বিকশিত ভাৰত কুইজ → বিকশিত ভাৰত ৰচনা প্ৰত্যাহ্বান → জিলা পৰ্যায়ৰ পিপিটি প্ৰতিযোগিতা → ৰাজ্য/কেন্দ্ৰীয়শাসিত অঞ্চল ভিবিৱাইএলডি → ৰাষ্ট্ৰীয় ভিবিৱাইএলডি

ভিবিৱাইএলডি ২০২৭ বাছনি প্ৰক্ৰিয়াৰ প্ৰথম পৰ্যায় হিচাপে ১৭ আগষ্টৰ পৰা ৩০ ছেপ্টেম্বৰ ২০২৬লৈ মাই ভাৰত প’ৰ্টেলত বিকশিত ভাৰত কুইজ অনুষ্ঠিত কৰা হৈছিল। ইয়াৰ সমান্তৰালভাৱে মাইগভ মঞ্চতো কুইজখন আয়োজন কৰা হৈছিল। এই কুইজত ২০ টা প্ৰশ্ন আছিল, যাৰ সৰ্বোচ্চ নম্বৰ আছিল ২০ আৰু সময়সীমা আছিল ১০ মিনিট।

কুইজ পৰ্যায়ত উত্তীৰ্ণ হোৱা প্ৰায় ৫.৭ লাখ যুৱকে পৰৱৰ্তী পৰ্যায়লৈ, অৰ্থাৎ ‘বিকশিত ভাৰত ৰচনা প্ৰত্যাহ্বান’লৈ অগ্ৰসৰ হ’ব আৰু নিজৰ অঞ্চলৰ বাবে নিৰ্ধাৰিত বিষয়বস্তুৰ ওপৰত মাই ভাৰত প’ৰ্টেলত ৫০০ শব্দৰ একোখন ৰচনা জমা দিব। ৰচনা আৰু উপস্থাপন পৰ্যায়ৰ বিষয়বস্তুসমূহ তলত উল্লেখ কৰা হ’ল। বিষয়বস্তুৰ সৈতে ৰাজ্যসমূহৰ বিতং মেপিং মাই ভাৰত প’ৰ্টেলত উপলব্ধ:

১. ভৱিষ্যতৰ শাসন ব্যৱস্থা, নগৰীয়া ৰূপান্তৰ আৰু নাগৰিক সেৱা

২. জলবায়ু সুৰক্ষা, সীমান্ত আৰু বহনক্ষম পাৰ্বত্য উন্নয়ন

৩. জনসংখ্যাগত লভ্যাংশ আৰু মানৱ সম্পদ উন্নয়ন

৪. বহনক্ষম ঔদ্যোগীকৰণ আৰু সম্পদভিত্তিক বিকাশ

৫. এক্ট ইষ্ট, যোগাযোগ আৰু সাংস্কৃতিক নেতৃত্ব

৬. উৎপাদন, উদ্যোগশীলতা আৰু সেউজ বিকাশ

৭. জনজাতীয় নেতৃত্ব, প্ৰাকৃতিক সম্পদ আৰু সৰ্বাংগীন উন্নয়ন

৮. উদ্ভাৱনমুখী অৰ্থনীতি, পৰ্যটন আৰু সৃজনশীল উদ্যোগ

৯. প্ৰযুক্তি, উদ্ভাৱন আৰু ভৱিষ্যতৰ প্ৰস্তুতি

১০. নীলা অৰ্থনীতি, মানৱ সম্পদ আৰু বিশ্বব্যাপী প্ৰতিযোগিতা

অংশগ্ৰহণকাৰীসকলে ১৫ অক্টোবৰ, ২০২৬লৈকে মাই ভাৰত প’ৰ্টেলত ২৩টা ভাষাৰ যিকোনো এটা ভাষাত ৰচনা লিখিব পাৰিব। আটাইতকৈ সম্ভাৱনাপূৰ্ণ যুৱ অংশগ্ৰহণকাৰীসকলক জিলা পৰ্যায়ত ব্যক্তিগতভাৱে উপস্থিত থাকি অংশ লোৱা উপস্থাপন পৰ্যায়ৰ বাবে বাছনি কৰা হ’ব, যিটো প্ৰথমবাৰৰ বাবে সকলো জিলাতে অনুষ্ঠিত কৰা হ’ব। ইয়াৰ পিছত নিৰ্বাচিত অংশগ্ৰহণকাৰীসকলে ৰাজ্য বা কেন্দ্ৰীয়শাসিত অঞ্চল পৰ্যায়ৰ ভিবিৱাইএলডিলৈ অগ্ৰসৰ হৈ উপস্থাপন আগবঢ়াব। ১০টা আঞ্চলিক বিষয়বস্তুৰ অধীনত সকলো ৰাজ্য আৰু কেন্দ্ৰীয়শাসিত অঞ্চলৰ পৰা নিৰ্বাচিত হোৱা প্ৰতিযোগীসকল ‘বিকশিত ভাৰত যুৱ নেতৃত্ব সংলাপ’ৰ (ভিবিৱাইএলডি) ৰাষ্ট্ৰীয় দলৰ অংশ হ’ব।

Pawan Singh Faujdar/MM