కేంద్ర వ్యవసాయ, రైతుల సంక్షేమం మరియు గ్రామీణాభివృద్ధి శాఖ మంత్రి శ్రీ శివరాజ్ సింగ్ చౌహాన్ ఈ రోజు (ఆదివారం) గుంటూరు జిల్లా బుర్రిపాలెం గ్రామంలో జరిగిన కార్యక్రమంలో ప్రధాన్ మంత్రి ఆవాస్ యోజన-గ్రామీణ్ 2.0 కింద ఆంధ్రప్రదేశ్‌కు రూ.3,600 కోట్ల విలువైన 3 లక్షల ఇళ్ల తొలి విడతను అందజేశారు. ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడు సమక్షంలో, చౌహాన్ రూ.14 కోట్ల వ్యయంతో 177 ఇళ్లతో కూడిన త్రీడీ కాంక్రీట్ ప్రింటింగ్ సాంకేతికతను ఉపయోగించే దేశంలోనే తొలి పైలట్ హౌసింగ్ ప్రాజెక్ట్‌కు శంకుస్థాపన చేశారు. సభకు హాజరైన వేలాది మందిని ఉద్దేశించి చౌహాన్ ప్రసంగిస్తూ, ప్రధానమంత్రి శ్రీ నరేంద్ర మోదీ, ముఖ్యమంత్రి చంద్రబాబు నాయుడుల నాయకత్వంలో కేంద్రం మరియు ఆంధ్రప్రదేశ్ ప్రభుత్వాలు అన్ని రంగాలలో రాష్ట్ర అభివృద్ధిని వేగవంతం చేసేందుకు.. దేశంలోనే ప్రథమ స్థానంలో నిలబెట్టడానికి కలిసి పనిచేస్తున్నాయని అన్నారు. ఈ కార్యక్రమంలో కేంద్ర గ్రామీణాభివృద్ధి, సమాచార శాఖల సహాయ మంత్రి డాక్టర్ చంద్రశేఖర్ పెమ్మసాని, ఆంధ్రప్రదేశ్ పౌర సరఫరాల శాఖ మంత్రి నాదెండ్ల మనోహర్, గృహ నిర్మాణ మరియు సమాచార శాఖ మంత్రి కొలుసు పార్థసారథి, పర్యాటక శాఖ మంత్రి కందుల దుర్గేష్, బీజేపీ రాష్ట్ర అధ్యక్షుడు పి.వి.ఎన్. మాధవ్, రాజ్యసభ ఎంపీ భాష్యం రామకృష్ణ, ఎంపీ లింగమనేని రమేష్, ఎమ్మెల్సీ ఆలపాటి రాజేంద్రప్రసాద్, హౌసింగ్ కార్పొరేషన్ ఛైర్మన్ బతులే తాతయ్య బాబు, కేంద్ర, రాష్ట్ర ప్రభుత్వాల సీనియర్ అధికారులు, వేలాది మంది రైతులు, గ్రామీణ ప్రజలు, మహిళలు పాల్గొన్నారు.

కేంద్రం గృహ కేటాయింపును 76,000 నుంచి 3 లక్షల ఇళ్లకు పెంచింది

ఆంధ్రప్రదేశ్ గృహ అవసరాలను తీర్చడంలో కేంద్రం నిబద్ధతను తెలియజేస్తూ, అధికారులు ప్రతిపాదించిన ప్రారంభ కేటాయింపు కేవలం 76,000 ఇళ్లు మాత్రమేనని శ్రీ చౌహాన్ చెప్పారు. అయితే, రాష్ట్రంలోని ప్రతి పేద కుటుంబానికి శాశ్వత ఇల్లు ఉండాలని ముఖ్యమంత్రి చంద్రబాబు నాయుడు చేసిన విజ్ఞప్తి మేరకు కేటాయింపులను 3 లక్షల ఇళ్లకు పెంచారు. "ఆంధ్రప్రదేశ్‌కు 76,000 ఇళ్లు మాత్రమే అర్హత ఉందని మా మంత్రిత్వ శాఖ అధికారులు నాకు తెలియజేశారు. కానీ రాష్ట్రంలోని ప్రతి పేద కుటుంబానికి శాశ్వత నివాసం ఉండాలని ముఖ్యమంత్రి చంద్రబాబు నాయుడు పట్టుబట్టి మరిన్ని ఇళ్లను కోరారు. ప్రధాని నరేంద్ర మోదీ ఆశీస్సులతో, మేము 76,000 ఇళ్లకు బదులుగా 3 లక్షల ఇళ్లను మంజూరు చేశాం" అని తెలిపారు. నాయుడు మరో 6 లక్షల ఇళ్లను కూడా కోరారని చౌహాన్ చెప్పారు. కేంద్రం నుంచి నిరంతర మద్దతు ఉంటుందని ముఖ్యమంత్రికి హామీ ఇస్తూ, "మొత్తం భారత ప్రభుత్వం మీకు తోడుగా ఉందని, నేను కూడా మీకు తోడుగా ఉన్నానని బాబుతో అన్నారు. ఈ 3 లక్షల ఇళ్ల నిర్మాణాన్ని పూర్తి చేయండి, మేము మరో 3 లక్షలు, ఆ తర్వాత మరో 3 లక్షల ఇళ్లను మంజూరు చేస్తాం. ఆంధ్రప్రదేశ్‌లోని ప్రతి పేద కుటుంబానికి శాశ్వత ఇల్లు ఉంటుంది" అని ఆయన అన్నారు.

ఆరు నెలల్లో మన్నికైన ఇళ్లను అందించనున్న త్రీడీ కాంక్రీట్ ప్రింటింగ్

బుర్రిపాలెం మరియు ఓబుల్ నాయుడుపాలెంలో చేపట్టిన త్రీడీ కాంక్రీట్ ప్రింటింగ్ హౌసింగ్ ప్రాజెక్ట్‌ను గ్రామీణ గృహ నిర్మాణాన్ని ఆధునీకరించే దిశగా పడిన ఒక పెద్ద అడుగుగా వర్ణిస్తూ, ఈ రూ.14 కోట్ల పైలట్ ప్రాజెక్ట్ నిర్మాణ సమయం, వ్యయం, కార్మికుల అవసరాలను గణనీయంగా తగ్గిస్తుందని చౌహాన్ చెప్పారు. ఈ ప్రాజెక్ట్ అధునాతన యంత్రాలు మరియు త్రీడీ కాంక్రీట్ ప్రింటింగ్ సాంకేతికతను ఉపయోగించి 177 ఇళ్లను నిర్మిస్తుందని, అలాగే నిర్మాణం ఆరు నెలల్లోగా పూర్తవుతుందని భావిస్తున్నారు. సంప్రదాయ నిర్మాణ పద్ధతులతో పోలిస్తే ఈ ఇళ్లు ఎక్కువ మన్నిక కలిగి ఉండేలా రూపకల్పన చేశారు.

అమరావతి, పోలవరం మరియు మౌలిక సదుపాయాల అభివృద్ధికి కేంద్రం మద్దతు

రాష్ట్ర రాజకీయ మరియు అభివృద్ధి చరిత్రను ప్రస్తావిస్తూ, 2014లో రాష్ట్ర విభజన తర్వాత ఆంధ్రప్రదేశ్ రాజధాని లేకుండా మిగిలిపోయిందని చౌహాన్ అన్నారు. అమరావతిని ఆంధ్రప్రదేశ్ ఏకైక శాశ్వత రాజధానిగా గుర్తించే చట్టాన్ని పార్లమెంటులో మోదీ ప్రభుత్వం ఆమోదించిందని, దాని అభివృద్ధికి రూ.15,000 కోట్ల ప్రత్యేక ఆర్థిక సాయాన్ని అందించిందని ఆయన చెప్పారు. పోలవరం నీటిపారుదల ప్రాజెక్టును రాష్ట్రానికి జీవనాడి అని చౌహాన్ కొనియాడారు. గత ప్రభుత్వంలో జాప్యం జరిగిన ఈ ప్రాజెక్ట్, ఇప్పుడు కేంద్రం నుంచి 100% గ్రాంట్ సాయంతో ముందుకు సాగుతోందని చెప్పారు. ప్రతిపాదిత అల్లూరి సీతారామరాజు అంతర్జాతీయ విమానాశ్రయం రవాణా సౌకర్యాలను మరింత బలోపేతం చేస్తుందని మరియు రాష్ట్ర ఆర్థిక వృద్ధికి తోడ్పడుతుందని ఆయన తెలిపారు.

'అన్నదాత సుఖీభవ' రైతుల ఆదాయాన్ని బలపరుస్తుంది. 60 లక్షల మంది 'లఖ్‌పతి దీదీలు' లక్ష్యం

రైతుల ఆదాయాన్ని పెంచేందుకు రాష్ట్రం చేస్తున్న కృషిని వివరిస్తూ, పిఎం-కిసాన్ పథకం కింద కేంద్రం అందించే రూ.6,000 వార్షిక సాయం, 'అన్నదాత సుఖీభవ' పథకం కింద ఆంధ్రప్రదేశ్ ప్రభుత్వం అందించే రూ.14,000 సాయంతో కలిపి రైతులకు ఏటా రూ.20,000 లభిస్తుందని చౌహాన్ చెప్పారు. పండ్లు, పూలు, కూరగాయలు మరియు ఔషధ పంటలపై దృష్టి సారించి, దేశంలోనే అగ్రగామి హార్టికల్చర్ హబ్‌గా అవతరించే సామర్థ్యం ఆంధ్రప్రదేశ్‌‌కు ఉందన్నారు. మహిళల ఆర్థిక సాధికారతపై మాట్లాడుతూ, ఆంధ్రప్రదేశ్‌లో స్వయం సహాయక సంఘాల ద్వారా ఇప్పటికే 23 లక్షల మంది మహిళలు 'లఖ్‌పతి దీదీలు'గా మారారని చౌహాన్ తెలిపారు. ఎన్డీయే ప్రభుత్వం ఈ సంఖ్యను 60 లక్షలకు పెంచాలని, జీవనోపాధి అవకాశాలను విస్తరించాలని మరియు మహిళల ఆర్థిక స్వతంత్రాన్ని బలపరచాలని లక్ష్యంగా పెట్టుకుందని చెప్పారు. ఢిల్లీ వెలుపల ఈ ఈవెంట్‌ను నిర్వహించడం ఇదే తొలిసారి అని, అక్టోబర్ 15న ఆంధ్రప్రదేశ్‌లో జాతీయ సరస్ మేళా నిర్వహించనున్నట్లు ప్రకటించారు. మహిళల నాయకత్వంలోని స్వయం సహాయక సంఘాలు తమ ఉత్పత్తులను ప్రదర్శించేందుకు, మార్కెట్ అందుబాటును విస్తరించడానికి ఒక వేదికైన ఈ కార్యక్రమాన్ని రాష్ట్రపతి ద్రౌపది ముర్ము ప్రారంభిస్తారు.

'నేను మధ్యప్రదేశ్‌కి మామను అయితే, ఏపీకి కూడా మామనే': తెలుగులో ప్రజలకు శుభాకాంక్షలు తెలిపిన చౌహాన్

తన ప్రసంగాన్ని 'భారత్ మాతా కీ జై' మరియు 'శ్రీ వేంకటేశ్వర భగవాన్ కీ జై' నినాదాలతో ప్రారంభించిన చౌహాన్, తెలుగులో సభకు శుభాకాంక్షలు తెలిపారు. ఆంధ్రప్రదేశ్ సంస్కృతి, జ్ఞానం, శాస్త్రీయ సాధనలు, ప్రతిభను ప్రశంసించారు. తెనాలి రామకృష్ణుడి నేలకు నివాళులర్పిస్తూ, తెలుగు భాష తేనెకంటే తీపిగా ఉందని, దేశవ్యాప్తంగా గుర్తింపు పొందుతోందని చెప్పారు. "నేను మధ్యప్రదేశ్ ప్రజల మామను అయితే, ఆంధ్రప్రదేశ్ ప్రజలకు కూడా మామనే. ప్రజలకు సేవ చేయడమే నాకు పూజతో సమానం. ఇక్కడ ప్రజల ఉత్సాహం, నిజాయితీ, తపన చూస్తుంటే, మిమ్మల్ని మళ్లీ కలవాలని నేను మనస్ఫూర్తిగా కోరుకుంటున్నాను" అని ఆయన అన్నారు, ఇది సభ నుండి విశేష స్పందనను పొందింది.

పెమ్మసాని క్షేత్రస్థాయి సంబంధాన్ని, నాయుడు నాయకత్వాన్ని ప్రశంసించిన చౌహాన్

కేంద్ర సహాయ మంత్రి డాక్టర్ చంద్రశేఖర్ పెమ్మసాని స్వగ్రామమైన బుర్రిపాలెం సందర్శించడం పట్ల చౌహాన్ ప్రత్యేక సంతోషం వ్యక్తం చేశారు. పెమ్మసాని ప్రజాసేవ పట్ల ఉన్న నిబద్ధతను, క్షేత్రస్థాయి ప్రజలతో ఆయనకున్న అనుబంధాన్ని ప్రశంసిస్తూ, అమెరికా నుంచి తిరిగి వచ్చిన వ్యక్తికి గ్రామీణ జీవితం, అభివృద్ధి అర్థమవుతుందా అని తాను మొదట్లో ఆశ్చర్యపోయానని అన్నారు. "అయితే, ప్రజలతో ఆయనకున్న అనుబంధం, ఆయన సేవా భావం, ఆయన స్పష్టత చూసి నేను నిజంగా ప్రభావితమయ్యాను. ప్రతిభను గుర్తించి సామర్థ్యం ఉన్నవారిని ప్రజాసేవలోకి తీసుకురావడంలో బాబుకు అద్భుతమైన నైపుణ్యం ఉంది" అని అన్నారు. ముఖ్యమంత్రి చంద్రబాబు నాయుడిని డైనమిక్, అంకితభావం, నిర్దిష్ట నిర్ణయాలు తీసుకునే నాయకుడిగా వర్ణిస్తూ, ఆంధ్రప్రదేశ్‌ను ఒక ప్రధాన ఐటీ హబ్‌గా నిలబెట్టిన ఘనత ఆయనకే దక్కుతుందని చౌహాన్ అన్నారు. నాయుడు విజన్ ఇప్పుడు అమరావతిని ఆర్టిఫిషియల్ ఇంటెలిజెన్స్, క్వాంటమ్ టెక్నాలజీ, డేటా సెంటర్లు మరియు అడ్వాన్స్‌డ్ మాన్యుఫ్యాక్చరింగ్ కేంద్రంగా అభివృద్ధి చేస్తోందని చెప్పారు.

గృహ నిర్మాణ సాయానికి కేంద్రానికి ధన్యవాదాలు తెలిపిన చంద్రబాబు నాయుడు

తనకు మద్దతు తెలిపినందుకు చౌహాన్‌కు ముఖ్యమంత్రి చంద్రబాబు నాయుడు ధన్యవాదాలు తెలిపారు మరియు ఆయనను మధ్యప్రదేశ్ ప్రజలకే కాకుండా ఆంధ్రప్రదేశ్ ప్రజలకు కూడా ప్రియమైన 'మామ'గా వర్ణించారు. "శివరాజ్ సింగ్ చౌహాన్ మధ్యప్రదేశ్‌లో మంచి పరిపాలన, ప్రజాసేవ ద్వారా అసాధారణమైన రికార్డును నెలకొల్పిన ప్రజానాయకుడు. ఆంధ్రప్రదేశ్‌లోని పేదలకు శాశ్వత గృహాలను అందించే అంశాన్ని మేము ప్రస్తావించినప్పుడు, ఆయన వెంటనే కేటాయింపులను సుమారు 75,000 ఇళ్ల నుంచి 3 లక్షలకు పెంచి, రాష్ట్ర ప్రజల హృదయాలను గెలుచుకున్నారు" అని నాయుడు అన్నారు. ప్రతి పేద కుటుంబానికి శాశ్వత ఇల్లు ఉండేలా చూసేందుకు ఎన్డీయే ప్రభుత్వం కట్టుబడి ఉందని, రాష్ట్రానికి మొత్తం 9 లక్షల ఇళ్లు అవసరమని ఆయన పేర్కొన్నారు. చౌహాన్ ఇచ్చిన హామీని ప్రస్తావిస్తూ, మొదటి విడత పూర్తికాగానే మిగిలిన 6 లక్షల ఇళ్లను కూడా కేంద్రం మంజూరు చేస్తుందని నాయుడు చెప్పారు. రాష్ట్ర అభివృద్ధి బాటపై నమ్మకం వ్యక్తం చేస్తూ, ప్రధాని నరేంద్ర మోదీ మార్గదర్శకత్వంలో, చౌహాన్ నిరంతర మద్దతుతో ఆంధ్రప్రదేశ్ మౌలిక సదుపాయాలు, వ్యవసాయం, అడ్వాన్స్‌డ్ టెక్నాలజీ మరియు గ్రామీణాభివృద్ధిలో దేశంలోనే నంబర్ వన్ రాష్ట్రంగా అవతరిస్తుందని అన్నారు

***.