منشیات اور سائیکوٹروپک اشیا کی غیر قانونی اسمگلنگ اور ترسیل پر قابو پانے کی مسلسل کوششوں کے سلسلے میں سنٹرل بیورو آف نارکوٹکس (سی بی این)، جے پور نے تھائی لینڈ سے جے پور کے فارین پوسٹ آفس (ایف پی او) پہنچنے والے ایک بین الاقوامی پارسل میں چھپائی گئی 1.080 کلو ہائیڈروپونک ویڈ (گانجہ) ضبط کی۔

کارروائی کے دوران ضبط کی گئی ہائیڈروپونک ویڈ (گانجہ)

تھائی لینڈ سے موصول ہونے والے ایک بین الاقوامی پارسل میں منشیات چھپائے جانے کے شبہ سے متعلق مخصوص خفیہ اطلاع کی بنیاد پر جے پور کے سی بی این کے افسران نے ایک ٹیم تشکیل دی اور مشتبہ پارسل کی جانچ اور تلاشی کے لیے جے پور کے فارین پوسٹ آفس روانہ ہوئے۔

سازش کو انجام دینے کے لئے  استعمال کیے گئے کیک

پارسل کی تفصیلی جانچ کے دوران افسران نے دیکھا کہ کارٹن کے اندر کیک کے کئی پیکٹ اور دیگر اشیاء  رکھی گئی تھیں۔ مزید جانچ پر معلوم ہوا کہ ہائیڈروپونک ویڈ (گانجے) کو کیک کے 29 پاؤچز میں بڑی چالاکی سے چھپایا گیا تھاجنہیں چھپانے کی کوشش میں ان پاؤچز کو کیک کے دیگر پیکٹوں اور اشیا ءکے ساتھ ملا کر رکھا گیا تھا۔

کیک کے اندر چھپائی گئی ہائیڈروپونک ویڈ (گانجہ)

چھپائے گئے  ممنوعہ مادے کو احتیاط سے نکال کر اس کا وزن کیا گیا۔ ہائیڈروپونک ویڈ (گانجے) کی مجموعی مقدار 1.080 کلوگرام پائی گئی۔

برآمد شدہ ممنوعہ مادے  کو تمام قانونی کارروائی مکمل کرنے کے بعد نارکوٹک ڈرگس اینڈ سائیکوٹروپک سبسٹینسز (این ڈی پی ایس) ایکٹ، 1985 کی متعلقہ دفعات کے تحت ضبط کرلیا گیا۔ یہ ضبطی بین الاقوامی ڈاک کے ذریعے منشیات کی ترسیل کی کوششوں کا سراغ لگانے اور ایسی ممنوعہ اشیا کو ان کی مقررہ منزل تک پہنچنے سے روکنے کے لیے سنٹرل بیورو آف نارکوٹکس کی مسلسل نگرانی اور مربوط کوششوں کی عکاس ہے۔

سی بی این بین الاقوامی پارسلوں پر گہری نظر رکھے ہوئے ہے اور منشیات کی غیر قانونی ترسیل کی روک تھام کے لیے مخصوص خفیہ اطلاعات کی بنیاد پر مناسب کارروائی کررہا ہے۔ معاملے کی مزید تحقیقات جاری ہیں۔

***

ش ح۔م ش ۔ م ر

U-NO.4526

(ریلیز آئی ڈی: 2318257) وزیٹر کاؤنٹر : 7